.....
بعد الكف الجاني و جملة فؤاد رايح... بقيت بغلى بي جوا...انا الدخلني شنو لو شالتو كرعينو عشان يروح... بس ذنبي اني كنت قاعدة مع الزول البحبو و بستمتع بي وقتي زي ما عايزة...
طوالي طلعت عشان افتش معاهم لأنو ديك كان الاولوية في الوقت دا...طنشت مناداة عمتي عشان ما اطلع... حمت الحلة كلها ما لقيتو... ضربت لي امجد عشان يفتشو مع انو لو اتلاقو اكيد حيتشكلو بس ما لقيت غيرو في اللحظة ديك...
طوالي لبس جكتو وهو شايل مظلة و قغدنا نفتشو... ضرب في رقمو كتير ما بيرد...
امجد دخل يشوفو في النادي و انا واصلت تفتيش....
فجأة اتضربت بي زول... رفعت راسي لقيت فؤاد بيعاين لي بي نظرات مخيفة و انا ما ناقني خوف تاني في الليل دا... بس حمدت الله اننا لقيناهو...
_ فؤاد كنت وين؟
اتبسم بي استفزاز و قال لي
_ ما تعملي فيها خايفة علي ولا شي... انا متأكد انو في حاجة خلتك تطلعي تفتشيني زي الوقت دا...
_ فؤاد كدي خلينا نرجع...
رش فيني موية المطرة بي كراعو وهو بيكورك..
_ ما تطنشيني ما شافع انا...
انفعلت فيهو و قلت ليهو...
_ انت واحد مجنون و مريض... ما عندي شي اتناقش معاك فيهو...
كورك هو زاتو لمن خفت...
_ مافي زول جابرك تجي تفتشيني... امشي لي امجد حقك دا و بوسيهو و لا سوي المصايب البتسويها معاهو ديك.... انا راجع البيت..
سكت و حاولت اضبط اعصابي... جا امجد طالع و بقا مستغرب وهو بيعاين لينا....
فؤاد حمر ليهو و دفرو... طوالي امجد انفعل قمت مسكتو و حاولت اهديهو...
_ دا مالو دا؟
_ خليهو..
_ استغفر الله... لو ما كان طلبتي مني ما كان طلعت افتشو...
_ معليش ي امجد... الولد دا اتغير شديد و بقا عصبي و انت عارف الحاجة دي عشان كدا حاول ما تتشاحن معاهو كتير... طيب؟
_ اااه... طيب...
.......
....
اليوم البعدو كان اليوم الثقافي... من مشيت المدرسة الناس كلها بي تيابها و جلاليبها كدا.. ما كان في محاضرات... لبست عبايتي المعتادة... و كنت عايزة احضر الفعاليات و الفقرات بس... جات رحيق من الصباح زيي لابسة هدومها العادية...
_ الحمدلله لقيت زول يجاملني...
_انا ما نوع اليلبسو تياب و يحومو بيها...
فجأة جات ليان و كان برضو زينا... اتوقعتها تلبس توب او على الاقل تقشر لانو ما من عاداتها تفوت يوم زي دا... كان لابسة عفريتة جنز و لابسة الطرحة بي كل عشوائية و كان هابطة و زعلانة...
مافي وحدة مننا سألتها...
بقينا حايمين و بنتفرج... كان جايبين فنانين و عاملين مسابقات...بقينا ماشين جمب كلية ناس طب...
رحيق مشت تسلم علي صحبتها سارة... كان بتتدرب علي فقرتها.. كان عندها شعر... بس استغربنا انها كان براها المرة دي...سألتها طوالي رحيق...
_ وينو كريم؟
_ ما اظن يشارك...
_ ااا طيب...
كان في تياب كتير و البنات قاعدين يلبسو... كان نفسي البس واحد و امشي لي امجد... اشوف ردة فعلو...
فجأة جريت توب و قعدت اهبشو... لقيت زول جاريهو من الجهة التانية... اتلفت لقيتها آن... طوالي قلبت ملامحي...
_ انتي لي بتعايني لي كدا كل ما نتلاقى؟
_ ما عارفة وشي براهو بقلب تلقائيا...
رحيق جاتني مخلوعة و هي بتعاين لي بي استغراب...همست لي في اضاني...
_ ي تهليل ما تتشكلي معاها هنا الله يرضى عليك...
عاينت لينا و قالت لي رحيق...
_ بسم الله مالكم؟
_ معليش يا رحيق دقيقة...
رحيق مشت و بقيت بتكلم معاها...
_ ما عشان ساعدتك اليوم داك تجي تتظارفي معاي... انا لا بعرفك ي بت لا صحبتك... ما تجيني كأنو بنعرف بعض من زمان... ما ناسية الكنتي بتسويهو لي في الثانوي انتي و صحباتك ديك...
_ انا اسفه...
بقيت مصدومة و طلعت اضاني برا الطرحة عشان اسمع كويس...
_ شنو؟
_ ياخ معليش... ممكن تتخطي الحصل داك كلو...
_.... ما بتخطاهو بس بمشيك...
_ انا و رانيا اتشكلنا و هي حرشت الشلة كلها علي...
_ عشان كدا مجدوعة براك و جاية تفتشيني... لي الدرجة دي ما عندك صحبات غيرهم...
_ انا ما جيتك... فجأة لقيتك في وشي...
_ ليه اتشكلتو ان شاء الله؟
_ المهم كلام كتير...ونتي سمعت خطبك؟
_ انتي عارفة وقت ناديتيهو لي اليوم داك... قدرت اتكلم معاهو و عرفت انو عايز يخطبني...
_ يعني الفضل لي...
_ ما بالظبط بس شكرا برضو...
قعدنا نتونس و نضحك و رحيق بتعاين لينا من بعيد و هي مستغربة...و ليان بس كان ماسكة تلفونها و ماشغالة بي الحولينها...
_ ليه ما لبستي شي الليلة... لو شافك لابسة التوب امكن يتقدم ليك ي بت...
ضحكت و قلت ليها...
_ امكن والله... بس ما بحب التياب كتير و ما حصل لبست توب...
شالت التوب الكنت ماسكاهو...
_ دا بيجي معاكي...
_ ما بلبسو...
_ بس البسيهو الليلة...
_....
_ تهليل...
_ ما عارفة والله خايفة ابقا زي العبيطة و انا لابساهو...
_ شفتو الصباح لابس عللة دررررعة...
طوالي مسكتو منها...
_ تقميهو لي سريع...
_هههه والله ي تهليل...
لبستو و جيت طالعة... طوالي صفرت و قالت لي...
_ ي امجد الليلة تعقد بسسس...
_ بالجد؟
_ ي بت خلي العباطة امشي شوفي روحك...
بقيت بعاين روحي يمين و شمال و انا مبسوطة... رحيق جات و قالت لي...
_ مزززة... مزززة عديل...
_ خجلتوني ي جماعة...
مشيت مع رحيق برا علي قسم ادارة اعمال عشان الاقيهو... بقيت بتتبسم ساي قامت قالت لي رحيق...
_ آن شغالة هناك تلبس الناس و انا م عارفة؟
_ لا بس قالت لي البسي التوب دا...
_ من متين علاقتكم اتطورت كدا...
_ ي بت قصة طويلة بحكي ليك بعدين...
فجأة سمعت صفير اتلفتت من رحيق لقيت امجد واقف و منظرو و شكلو و ريحتو و هيبتو... كلو كلو دمرني... بقيت بتخجل ساي... قام اصحابو بقو يبشروا ليهوو وهو جايي علي... فجأة وقف قدامي و قال لي....
_ لكين ما براحة علي...
ضحكت و دنقرت وشي...
_ ملاك و اكتر من ملاك...
_ ما قدام الناس ي امجد...
_ بتخجلي؟
_ امجددد...
_ طيب طيب ي حبي....
مشينا بعيد شويا و قعدنا سوا...
_ بس فاضل اجيب المأذون و اعقد...
اتبسمت و قلت ليهو...
_ اول مرة اعرف العللة دا رهيب معاك كدا...
_ قلت ليك براحة علي... القلب دا ما بيتحمل... بيقيف قبل ولدنا يجي و يشوف ابوهو وهو نصيح...
ضحكت و لكزتو...
_ ما تشبكها لي انت كمان...
_ طيب طيب معليش...
........
....
لبست توبها سريع ووقفت في المراية و هي بتشوف روحها... بقت بتتلفت يمين و شمال و هي بتفتش قصايدها...
_ ي سماهر... شفتي قصايدي وين؟
_ ختيتها في المخزن جوا كدي شوفيها...
_ ليه ختيتيها هناك؟ المخزن كلو موية مطرة...
_ ما اظن اتبلا...
دخلت شافتو لقتو واقع في الارض و غرقان موية...
_ واااي هسي اسوي شنو؟
_ ما حافظاهم؟
_ كتبتهم امبارح سريع ماكان عندي زمن احفظهم...
_ والله معليش ي سارة ما قصدي اوقعهم...
_ كدي خليني القى حل...
بقت بتلف و تدور... و تحاول تنقل الكلام الظاهر من الورقة المبلية في ورقة تانية...
فجأة جا كريم داخل وهو لابس عللة عادية بس كان سمحة معاهو... بقت بتعاين ليهو مسافة وهو بيتكلم مع سماهر و هي بتحكي ليهو الحصل...
_ انا ببقا بديل لو ما عندكم زول؟
اتلفتت عليها سماهر وهي بتأشر ليها موافقة و لا لا؟
_ ما مشكلة...
بقت بتعاين ليهو مسافة و هو بيهبش تلفونو...
_ المرة الجاية اكتبي في تلفونك...
ما ردتو و طلعت برا سريع...
اول ما طلع المسرح بقت بتدافر عشان تقيف في حتة كويسة و تشوفو واضح..
_ يا سَعْدِي بي شُوفتِك
و يا فرحةً ما تمتْ
بس نظرة ليكْ خلتْ
الفيني كلو إتهدْ
الناس كلها بقت تصفق وهي بس واقفة تعاين ليهو في عيونو...
خلينا من زماناً فات
و اسمعي الحِكوة في الاوقات
الطابت فيها العين و سرت الخاطرْ
حكوة خلت القلب يبكي و سِيدا باتْ ساهرْ
يوم جِيتِينِي بي كرعِينكْ
تلفى في الاعذارْ
خشمْ بابي دا وقِفتِي
و بس فضل بينا امتارْ
يوم شفتي بي عِينِيكْ
الكان هو عندي اسرارْ
فضحتي حالاً كان
مدْسُوسْ مع الاقبارْ
بس في هواكْ خفتَ
و الكلو فِينِي انهارْ
خفت الوقوع منكْ
اصلو.. مقامِك عالْ
... قرب علي طرف المسرح و هو بيعاين ليها وهو بيتكلم و بيأشر على عيونها...
بس بي نظرة من عِينِيك
جاطت في قلبي افكارْ
يمكن دي رِيّدَة و بسْ
كفاني شِعِر
... ورفع يدينو و هو بيقول اخر جملة
_ بس غيرها ما بِخْتارْ...
و نزل طوالي و مسك يد سارة و طلعها المسرح
_ دي هيْ البَرِيّدها و بس
وليها ارتجلتَ اشعارْ....
الناس كلها بقت تصفق شديد و تكورك... سارة بقت خجلانة شديد و بترجف لي درجة سنونها بتتطاقش... اتبسم و مسكها من يدها و نزلو...
اول ما بقو براهم لزتو دفرتو بعيد منها...
بقا خايف و واقف مستنيها تهيج فيهو...
بقت بتعاين ليهو في عيونو وقالت ليهو...
_ ي رهيب انت... لو عندك شعر سمح كدا ما كان تخلينا نتفق و نقولو سوا زي كل مرة...
ما اتوقع ردة فعلها دي و بقا ساكت بس...
_ بس ما كان في داعي للحركة حقت النهاية دي...
_ الناس بتحب الزي دا...
_ ما ضروري تقدم ليهم كل البيحبو...
_ لو قلت ليك اني ارتجلت دا كلو بتصدقي...
_ بصدق و لي ما اصدق...
_ عندو باقي كمان بس ما قلتو عشان خفت تكوركي فيني...
_ علي حسب كدي قول...
مسك يدينها و قال ليها...
_ ي سارة ليكي مكان
في قلبي ليكي مصان
دي بس جمل بي لسان
عند ناسا واقفة عيان
ما قايلينو حبا بينا
فات عقل اي انسان
قعد يضحك و قال ليها...
_ خلاص غلبني اتم...
بقت واقفة مسافة بتستوعب و تبلع ريقها...
_ اصلا فهمت خلاص...
_ كدا انا مبسوط...
بقيت ساكتة قام قال ليها...
_ ما عايز افتح الموضوع حق اليوم داك بس انسي اي شي شفتيهو...
دنقر راسو بي زعل قامت دنقرت عليهو و هي بتقول...
_انت قايل حبي ليك مقياس؟
بالعندك ليهو بتقاس؟
اديكا قلبي تشوف
قدر كيف هو عندو احساس
بي حبي لي قربك و تضارب الانفاس
و حبي ليك الكان
ما شاف عيون الناس...
بحبك من قلبي
وقفت و هي بتقش دموعها...
_ الكلام العندي زاتو انتهى
_ وصل وصل...
.......
....
كان ماشة براحة و تتفادى تلاقيهو قام مسكها من يدها لمن صرخت...
_ شاردة مني وين ي ليانتي؟
_ ما شاردة
و بقت تتبسم بالقوة
_ غبتي امبارح لي طيب؟
_ كنت تعبانة شوية...
_ اااا تعبانة...
_ عايز شنو انت كمان؟
_ حسني اساليبك ي بت انتي عارفة البينا كتير و لو طلع ماحيضر زول غيرك...
_ اوعى تفكر...
_ والله قاعد افكر... و قلت كمان نعمل صفحة في الفيس ننشر فيها صورنا سوا... خصوصا الصور الخاصة ديك لو طلعت ما بنلقى ملايين اللايكات...
_ انت لي بتعمل فيني كدا... كيف قدرت اصدق واحد زيك...
_ تصدقي؟انا ما كنت مكلف روحي اكضب ليك زاتو انتي كنتي جارية وراي و كنتي متعلقة فيني...
قعدت تبكي قام قرب عليها و قال ليها...
_ اوعك تنزلي لي دموعك ديل...
_اسامة عليك الله امسحهم... انت عارف انا حأموت لو زول شاف الصور دي...
_ انتي بتغلطي ليه؟
_ ي اسامة عليك الله...
_ والله لو ما سكتي حسي ارسلهم في قروب الدفعة...
_ لا لا خلاص سكتت...
_ واطية...
......
...
وقفت قدام المراية و هي بتعاين روحها لبست عبايتها سريع و شنطتها و طلعت و هي بتبكي مع كل خطوة... ركبت عربية و مشت علي بيتو الوصفوهو ليها... دقت الباب قامت فتحت ليها رغد و الصدمة الفيها كان عجيبة...
_ انتي ي... ي بت... الجابك هنا شنو؟
_ عايزة راجلي...
كان نظراتها جادة شديد و التانية ما قدرت تستحملها و دفرتها برا... كوركت فيها و بقو بيتدافرو... فجأة جا طالع من جوا و اتخلع لمن شافها... طوالي فكتها و قعدت تبكي و هي بتعاين ليهو
_ مالكم؟... هيلين؟
_.....
طوالي رغد مسكت يدو وهي بتبعد منها...
_ المجنونة دي جات هنا و قعدت تدقني بلا سبب..
فكا رغد منو و مشا عليها براحة و هو بس سرحان فيها....
_ محمد... خلاص انا ما قادرة بلاك...
طوالي رغد انفعلت و دفرتها...
_ انتي ي واطية....
قاطعها محمد و سكتها...
هيلين مسكت ورقة الطلاق و شرطتها...
_ قاعدة اموت انا خلاص....
_ نرجع؟
اتبسمت ليهو طوالي دخلها جوا و رغد مصدومة في البيسويهو....
مسكها من وشها و باسها.... و رغد بتعاين ليهم و الغيرة كاتلاها.... دفرتهم من بعض و هي بتكورك....
رجع مسكها تاني و هو ما حاسي بي شي و ماشايف حاجة غيرها...
_ اخيرا ي حبي...
ضحكت و حضنتو...
رغد زحتهم تاني و هي بتكورك....
_ خلاص ي محمد...
ما رداها
_ محمد؟ دي مش الكنت بتشرد منها و تسافر لي؟
_ اي ياها زاتها....
_ محمد؟ معقولة ترجع ليها تاني؟ انت جنيت؟
وقف قدام رغد و هو بيتكلم معاها...
_ انا بحبها ي رغد بحبها شديد....
طوالي كوركت و لصقتو كف...
_ بتحبها؟
هيلين ما كان مصدومة نهائي و بس ماسكة يد محمد و بتعاين ليهو
_ اي... لقيت اني بحبها و بس...
_ محمد انت جادي؟
ما اشتغل بيها و دخل جاب مفتاح العربية و لبس جكتو و طلع....مسك هيلين من يدها و قفل الباب في وش رغد و هو طالع... كل واحد فيهم بيعاين للتاني...
.......
.....
..
...... سيو 🙋🏻♀️✨
..
..
.
..
.
كل ابيات الشعر و النصوص في الرواية و في نهاية الفصول من تأليفي
#منافي سيد
