"وأخذتُ أنظرُ للطَريقِ مُعاتبًا
كيفَ انتَهت بين الأَسىٰ أيامِي."
🦋🦋🦋🦋🦋🦋🦋🦋🦋🦋🦋
حنين.. لمينا المبلغ الي نريده ومن طلعو إني هم طلعت بس هالمرة بموافقتهم بذاك الوقت جان عمري 15 جنت مراهقة هستوني مفتحة عيوني على الدنيا وللأسف ما فتحت عيني على عائلة متماسكة وأم تحبني وأب ينصحني وأخ يحتويني جان الشي الي يأدبوني بي الضرب والضرب يخليني ازيد بالغلط اكثر وأكثر ومااعرف
ألوم ابوي لأن تركني وراح لو ألوم امي لأن تزوجت عمي ألومها ماعرفت تربينا على الصبر ولا تواسينا إني وأخواني وضيعتنا بسبب طيشها دمرت عائلة كاملة ماادري المن ألوم ومنو اعاتب
طلعنا وجان العصر الجو كلش حلو مااعرف شنو جان بس أحساس بداخلي حلو أمشي وكأن طايره مو بالكاع حيل فرحانة كامشه اخواني منا ومنا ونتمشى ونسولف ونضحك تركت فضل ولزمت جنة اخاف عليها نمشي واني اسولفلهم شتشتريلكم وجانو يتسابقون بالكلام واني اضحك على سوالفهم التفت على فضل واني اضحك أريد أسأله وجان تصير عيوني بعيونه
مجموعة جنود بملابس الجيش جانو ورانا يمشون ومبين التعب عليهم وكان هو من بينهم كأن نجمة صاطعة احس گلبي ومع بين رجلية وكأن روحي رفرفت على هذا الشخص
درت وجهي بساع لأن مصختها بالنظر وسحبت الجهال وياي نمشي ونسولف على كيفنا وصلنا للأمام زرنا وخلصنا واخذتهم اشتريلهم كلمن يريد على ذوقه اللعاب واني افتر وياهم اخذت تنورة نفس الي كصكصها مازن ومكيفه بيها كلش
وصلنا للكراج وكعدو بالكاع يتصارخون بعد الأكل الي وكلتهم يريدون من المحل عضيت على شفتي بقهر ودرت وجهي للمحل اروح اشتريلكم واجي انتظروني
.. تعالي جنة
.. اخذت جنة ودخلت للمحل الي جان بصف الكراج الصدفة الي صارت جان هوه وجماعته بنفس المكان عجيب هذا الشخص مرتين شفته شنو سبب رجفة گلبي هاي
.. حنونه اشتريلي بسكت
.. اي حبيبتي
.. اخذت العلاكة ورحت لأبو المحل دفعت وطلعت بسرعة من التوتر عثرت بدرجات المحل مشيت واني صفنة تاخذني وصفنة تجيبني ركبنا بسيارات الي توصلنا الحينا وصلنا للبيت حاولت اتناساه وكلما اصفن الكه روحي سرحانة بي هوه ما جان ذاك الجمال يعني جان متوسط طويل وضعييف كلش واسمر يعني ملامحة عاديه بس ماادري ليش ركزت ويا
مرت الأيام واحنه ملتزمين كل خميس نلم فلوس ونروح نتونس مرات امي تروح ويانا مرات إني وحدي ويا أخواني جان المتنفس الوحيد النا هوه الولاية لأن محد يطلعنا بس الها وكلش نحبها ونرتاح من نروح
.. كل خميسين جان يوكف بباب الكراج واشوفه صرت أشك متعمد يوكف
بالبداية خفت من عنده وخصوصا خضر وجماعة اخوي كلهم محلاتهم موجوده هنا لذالك حاولت اتجنب النظر اله لكن غصب عني عيني تميل اله
