Unicode
"ဘေဘီသျှန်က ဒီနားကိုလာပေးပါ၊ မပြေးရဘူးနော် တီချယ်ဘာပြောထားလဲ"
ပြေးမလို့ခြေလှမ်းပြင်နေတဲ့ သက်သျှန်လေးက သူ့ရဲ့ခြေထောက်ပုတိုလေးတွေကို ရပ်လိုက်ပြီး တစ်လှမ်းချင်းလိမ်ကျစ်လိမ်ကျစ်နဲ့ လျှောက်လာတယ်။ မူကြိုကလေးငယ်လေးတွေရဲ့ ကျောင်းတွင်းပြိုင်ပွဲလေးဖြစ်ပြီး အုပ်စုလေးတွေခွဲကာ ပြဇာတ်ကကြမှာပင်။
စင်ပေါ်မှာ ကလေးလေးတွေနေရာယူထားကြပြီး သက်သျှန်လေးက သားရဲကောင်ကြီး role ကိုတာဝန်ယူထားလေသည်။ Beauty and the Beast ဇာတ်လမ်းလေးကိုကျောရိုးယူပြီး အဲ့ထဲက ဇာတ်ဝင်ခန်းတစ်ခုကို ကပြမှာပင်။
စင်အောက်က ထိုင်ခုံတွေမှာ ဓာတုလွန်ကထိုင်နေပြီး သွေးသက်ကို online ကနေ video call ခေါ်ကာ သက်သျှန်လေးကိုပြပေးနေသည်။ ဓာတုလွန်ရဲ့ဘေးမှာ ရဲရဲပိုင်လည်းရှိနေပြီး အဖော်အဖြစ် ဦးငယ်ပါလာ၏။
သက်သျှန်လေးက လည်စံမွှေးအတုတွေကို ပါးနဲ့မေးစေ့တစ်ဝိုက်မှာသိုင်းထားပြီး ယားလို့ထင် လက်ကငြိမ်ငြိမ်မနေဘဲ ကုတ်နေ၏။ ကုတ်နေရင်းနဲ့ ဓာတုလွန်ကို စင်ပေါ်ကနေ မကြာခဏဆိုသလိုရယ်ပြနေသည်။ ပွဲမှာ ထူးထူးလေးလည်းပါဝင်လာပြီး နှင်းဆီပန်းနေရာမှာ တာဝန်ယူရ၏။ ထူးထူးလေးက သက်သျှန်ရဲ့အနားမှာ တောင့်တောင့်ကြီးရပ်နေပြီး လက်ကလေးတွေအချင်းချင်း လိမ်ကျစ်ထားကာ တစ်ခုခုကိုရှာနေ၏။ ခေါင်းပေါ်တွင် နှင်းဆီပန်းအကြီးကြီးကိုတင်ထားပြီး အစိမ်းရောင်ရိုးတံနှင့်တူသော အင်္ကျီကိုလည်းဝတ်ထားသေးသည်။
"အဖွဲ့နာပါတ် သုံး နောက်ဆုံးကျန်တဲ့အဖွဲ့ က သားသားမီးမီးလေးတွေ ဖျော်ဖြေမှုစတင်လို့ရပါပြီ လက်ခုပ်သံလေးချီးမြှင့်ပေးကြပါဦးရှင့်"
Beauty နေရာမှာ သရုပ်ဆောင်တဲ့ ကလေးမလေးက တော်တော်လေးချစ်ဖို့ကောင်းပေမဲ့ သူမလေးက မရယ်မပြုံးဘဲ စူပုပ်နေရင်းပဲ သူမမှတ်သားထားတဲ့ ဒိုင်ယာလော့တွေကို မှတ်မိသလောက်ပဲပြန်ပြောနေသည်။
"သူခိုးမဟုတ်ဝူး..ပြန်ပေးမယ် ပန်း"
"ဂါး..!"
