'99'
အပိုင်း ( ၁၆ )
Kris အခန်း၏ပြတင်းမှ အိမ်ရှေ့မြက်ခင်းပြင်ရှိပွဲသို့ ရှိုင်းထက် ငုံ့ကြည့်နေမိသည်မှာ ဘယ်လောက်ကြာပြီမှန်းမသိပါ။ Kris ပြင်ဆင်ပေးထားသည့်ဝတ်စုံကိုဝတ်ထားပြီး ပွဲအတွက်ဝတ်စားပြင်ဆင်နေသူ Kris ကိုစောင့်ဆိုင်းရင်း သူ့မှာတခြားလုပ်စရာလည်းမရှိပေ။
Kris တို့မိသားစုကုမ္ပဏီမှကျင်းပသည့်ပွဲဖြစ်သော်လည်း တစ်မိသားစုလုံးက သူ့ကိုပါဝင်စေချင်သဖြင့် သူ့မှာမဖြစ်မနေလာရခြင်း။ သီဟတို့ကိုလည်းဖိတ်ထားပေမဲ့ မိသားစုကိစ္စများ၊ တခြားသောကိစ္စများရှိနေကြ၍ မလာနိုင်ကြပေ။ သူတစ်ယောက်တည်းကသာ ပါပါးက အလုပ်ကိစ္စနှင့်အိမ်သိပ်မကပ်သူဖြစ်၍ ငြင်းမရခဲ့ခြင်း။
Kris တို့မိသားစုလက်အောက်တွင် လုပ်ငန်းစုများစွာရှိသည့်အနက် ယခုအခါ အစ်ကို William အဓိကဦးစီးနေသည့် Language Centre မှကျင်းပသည့်ပွဲဖြစ်သည်။ ကျင်းပရန် ဟိုဟိုသည်သည်နေရာရွေးခဲ့ကြရင်းမှ အမှတ်တရလည်းဖြစ်သွားလေအောင် ခြံဝင်းထဲမှာပဲကျင်းပရန်စီစဉ်ခဲ့ကြခြင်း။ နှစ်ပတ်လည်ပွဲလည်းဖြစ်သလို မိတ်ဆုံစားပွဲလည်းဖြစ်ပြီး ကျောင်းသားဟောင်းများပါ,ပါဝင်လာသည့်ပွဲဖြစ်၍ ပညာရေးဆိုင်ရာပွဲဆိုလည်းမမှားပေ။ ထို့ကြောင့်ပင် အန်ကယ်နှင့်အန်တီက သူ့တို့သူငယ်ချင်းတစ်သိုက်ကိုပါဝင်စေချင်ခြင်းဖြစ်သည်။
တဖွဲဖွဲလာနေကြပြီး နေရာယူပြီးကြသည့်လူတွေဟာ ကျင်းပရာခြံဝင်းဧရိယာထဲ တဖြည်းဖြည်းပြည့်သွားသည့်နောက် Kris က အခန်းထဲသို့ဝင်လာခဲ့သည်။ ရှပ်အင်္ကျီအဖြူခံနှင့်အနက်ရောင် suit အပြည့်ဝတ်ထားသည့် Kris က ထူးထူးခြားခြားပြင်ဆင်ထားခြင်းမရှိသော်လည်း အတော်ချောပါသည်။ နှာတံစင်းဖြောင့်ဖြောင့်နှင့် မျက်နှာအစိတ်အပိုင်းတစ်ခုလုံးထင်ရှားလှသည့် Kris က စိတ်ရှုပ်သည်ဟုဆိုကာ ဆံပင်နဂိုကောက်လေးတွေကို သူ့ခေါင်းထက်နေရာမယူခိုင်းခဲ့တာလည်း အတော်လေးကြာခဲ့ပါပြီ။
" ငါ့ကို ဒီလိုပဲကြည့်နေမယ်ဆိုရင် ပွဲမတက်တော့ဘူးလို့ ပြောလိုက်မယ်နော် "
အရယ်အပြုံးနည်းသူက သူ့ကိုပြုံးစစနှင့် စနောက်လာတော့လည်း ရှိုင်းထက် ခပ်လွင်လွင်လေးရယ်မိပါသည်။
