Complicated 18
ယနေ့တော့ ရှိုင်းထက်တို့သူငယ်ချင်းတစ်သိုက်အပြင် ပါပါး ၊ အန်တီစုနှင့် မြတ်မင်းခံ့တို့ပါ မှော်ဘီ၏အထင်ကရစေတီတစ်ဆူဖြစ်သည့် ရွှေမော်တင်စေတီကို ဖူးမြော်ရန်လာခဲ့ကြသည်။ တီတီ့ပြောပြချက်အရ မှော်ဘီမြို့အတွင်းရှိ ကျောင်းသားများမှာ ဆယ်တန်းဖြေခါနီးတိုင်း ရွှေမော်တင်ခေါ် ဘုရားကြီးဆီသို့လာရောက်ပူဇော်ကြကြောင်းသိရသဖြင့် ရှိုင်းထက်တို့လည်း ရောက်တုန်းရောက်ခိုက် ဘုရားဖူးရန်လာဖြစ်ခဲ့ခြင်း။
ဉာဏ်တော်မြင့်သည့် ရွှေမော်တင်ဘုရားက ကားလမ်းမှကြည့်လျှင်တောင် စိန်ဖူးတော်ကိုလှမ်းမြင်နေရပြီး ဗုဒ္ဓဘာသာဝင်တို့၏အခါကြီးရက်ကြီးများ၌ကျင်းပသည့်ပွဲများတွင်လည်း စည်းကားလှပြီး စတုဒီသာအကျွေးအမွေးများက ပေါများလှသည်ဟု ရှိုင်းထက်သိရသည်။ မှော်ဘီအိမ်ကို အရင်ကမကြာခဏရောက်ဖြစ်သော်လည်း ရှိုင်းထက်ကတော့ မာမားသက်ရှိထင်ရှားရှိစဉ် သူ ကလေးဘဝတုန်းကတော့ ဘုရားကြီးကို ရောက်ဖြစ်မည်ဟုထင်ပါသည် ။ သို့သော် သူ့မှတ်ဉာဏ်ထဲမှာတော့မရှိပါ။
တီတီတို့အိမ်နှင့်သူ့အိမ်က ဘုရားကြီးလမ်းအတွင်းမှာရှိသဖြင့် လမ်းသိပ်မလျှောက်လိုက်ရပေ။ သူတို့အားလုံး ပုဆိုးနှင့်ရှပ်အင်္ကျီလက်တိုကိုဝတ်ဆင်လာခဲ့ကြပြီး သန့်သန့်ရှင်းရှင်းနှင့် အေးအေးချမ်းချမ်းဖြစ်လေအောင် ညနေရေချိုးပြီးချိန်မှ တမင်ရွေးပြီးလာခဲ့ကြခြင်း။
" ငါ ဖိနပ်ကိုင်ပေးမယ်...မင်းက ဖယောင်းတိုင်ထုပ်တွေသယ်လိုက် "
သူ ဖိနပ်ချွတ်ပြီးသည်နှင့် လက်ထဲသို့ ဖယောင်းတိုင်ထုပ်များထိုးထည့်ပေးလာသည့်ခရစ်စ်က သူ့ဖိနပ်ကိုဆွဲယူသွားခြင်းအား ရှိုင်းထက် တားချိန်မရလိုက်ပါ။
လှေကားထစ်တွေပေါ် ခြေလှမ်းကြသည့်အချိန် ပြည့်လျှံနှင့်အတူလျှောက်နေသည့်မြတ်မင်းကိုသာ တကြည့်ကြည့်ဖြစ်နေသူသီဟကိုကြည့်ပြီး သူနှင့်ခရစ်စ် ကြိတ်ရယ်မိကြ၏။
" မင်းသီဟတစ်ကောင်က တုံးချက်..."
" ထားလိုက်ပါ ။ အဲဒီကောင်က မထင်မှတ်တဲ့နေရာမှာတအားတုံးတာလေ ။ စာမေးပွဲလည်းနီးနေတာဆိုတော့ သူ့ဘာသာငြိမ်နေပါစေ ။"
