Complicated 4
" မြတ်မင်း ပေးခိုင်းလိုက်တာ "
သူ့ရှေ့သို့ ပြည့်လျှံချပေးလာသည့်အိတ်လေးကိုဖွင့်ကြည့်လိုက်တော့ ခံ့ကို သူငှားလိုက်သည့်စာအုပ်များဖြစ်သည် ။ ဘာလို့ကိုယ်တိုင်ပြန်မပေးလဲဟူသည့်စိတ်နှင့် မင်းသီဟ ထောင်းခနဲဖြစ်သွားပြီး ပြည့်လျှံဘက်သို့ ထိုအိတ်ကိုတိုးပေးလိုက်သည့်အခါ ပြည့်လျှံက နားမလည်သလိုကြည့်သည် ။
" သွားပြန်ပေးလိုက် ကိုယ်တိုင်လာပေးလို့..."
" ဘာ... "
နားမလည်သည့်မျက်နှာထားနှင့်ပြည့်လျှံက မျက်မှောင်ကြုတ်နေလျက်။
" ဒီစာအုပ်တွေ ခံ့ကိုသွားပြန်ပေးလိုက်လို့ ... ငါ့ကို ကိုယ်တိုင်လာပေးလို့ပြော...အ "
သင်္ချာဖတ်စာအုပ်နှင့် သူ့ခေါင်းကိုရိုက်သည့်ပြည့်လျှံက အံတောင်ကြိတ်ထားသည် ။
" မင်းတို့အခိုင်းအစေများမှတ်နေလား ငါ့ကို... တစ်ယောက်ကလည်း မင်းသီဟကို ပေးပေးတဲ့ ... စကားပြောတာ ပြတ်ပြတ်ကြီးနဲ့ ။ ဒီကောင်ကျတော့လည်း အမိန့်သံနဲ့ ငါ လုပ်ထည့်လိုက်ရ .... "
ပြည့်လျှံ ပွစိပွစိပြောပြီးထသွားသည့်အခါ တစ်ဖက်ခုံတန်း၏ဟိုဘက်အစွန်းတွင်ထိုင်သောခံ့ကို မင်းသီဟ ကြားခံနယ်မရှိဘဲ မြင်လိုက်ရသည် ။
" ဟေ့ကောင်... "
သူ့စားပွဲခုံခြေထောက်ကို ခြေထောက်နှင့်ပါကန်လိုက်သဖြင့် ခံ့က စူးခနဲကြည့်လာ၏ ။
" ကိုယ့်ဘာသာလာပေး..."
မင်းသီဟ သူ့အရှေ့ရှိစာအုပ်ထုပ်ကို ခံ့၏စားပွဲပေါ်သို့တင်ပေးလိုက်သည် ။ ဘော့ပင်ကိုလက်တွင်ကိုင်ထားပြီး စာရေးနေပုံရသည့်ခံ့က သူ့ကိုစိတ်ကုန်သလိုကြည့်လာသည်မှာ ထထိုးချင်နေသည့်နှယ် ။
" ဘာတွေလာရှုပ်နေတာလဲ "
" မင်းငှားတုန်းကငှားသွားပြီး ကိုယ့်ဘာသာပြန်ပေးလေ "
စာအုပ်အိတ်ကို သူ့ရှေ့ရောက်အောင်တိုးပေးလိုက်သည့်အခါ ကျစ်ခနဲစုတ်သပ်လိုက်သည့်ခံ့က သူ့ကိုအရေးမစိုက်သလို တစ်ချက်ကလေးမှကြည့်မလာပါ ။
