السلام عليكم
عاملين اي يا رب تكونوا بخير انا اخوكم سيد ابو غالب عندي ٣٠ سنة من اسرة متواضعة في أرياف بني سويف متخرج من كلية الأداب جامعة بني سويف قسم تاريخ وشغال مدرس في ثانوية البنين في المركز عندنا وعندي حتة ارض براعيها و مشروعي الخاص في تجارة العقارات .... انا عارف انك ملكش دعوة بكل الرغي ده بس عادي يعني اعتبرني الريس.. متقال.. احم وبقول موال.. وانك جاي هنا علشان تسمع حكاويا الغريبة على حد علم البعض .... بس انا بفتح معاك كلام يا عم فخلي صدرك رحب كده علشان نعرف ندردش شوي. هيه ما علينا ....
تعال اما اقولك الموضوع معايا بدأ من امتى
في الأول احب اقولك اني اصغر اخواتي اللي كل واحد فيهم متجوز ومستقر بحياته منهم اللي قاعد معايا في البلد ومنهم اللي قاعد في اماكن مختلفة احنا سبع اخوات اربع ولاد وثلاث بنات وعايش مع امي بعد وفاة ابويا الحاج غالب الله يرحمه وانا عندي عشر سنين ومن هنا اقدر احكيلك بداية سيد ابوغالب جلاب المشاكل........
(((يوم العزاء)))....
كنت في المدرسة عادي زي بقية العيال قاعد في الفصل بعيط بعد ما اتعبطت علشان معرفتش اجاوب لما الأستاذ طلعني على السبورة وسألني وقال:
قول لي يا واد تعرف تقولي اسماء كان وأخواتها؟
فوقفت كده بكل كبرياء وغطرسة وأنا بعدل لياقة المريلة ورحت هازز رأسي وقايل له
_اكيد يا استاذ اعرفهم كلهم عز المعرفة ومش اسماء وبس
الأستاذ اتبسط مني قوي وقالي وهو بيهزر الخرزانة بتاعته في الهواء بإنبساط:
_ طيب عال عال سمعني
ابتسمت وبكل ثقة بصيت لزمايلي وبضحكة خبيثة قايل
_اسماء كان وأخواتها
اسماء كان
احمد كان
وشارو كان
راح الفصل كله بدأ يضحك بصوت عالي اصل اخوك كان اي دمه خفيف اوي.. كنت دونجوان الفصل أو خليل كوميدي الفصل مش فاكر.. ما علينا وهنا امر الأستاذ التلاتة اللي قاعدين في اول تخته يشدوني وهما ما شاء الله متوصوش وشدوني والأستاذ هاتك يا طحن وشتيمة في الحج ابو غالب ...يا ابن كذا ويا ابن كذا .... وفين يوجعك وانا بحاول افلت من ايد العيال اللي شديني والعيال مكلبشة فيا ....ولاد ال#### عندهم ضمير اوي في الشد تقولش ماسكين جاسوس .... محدش بقى يراعي العيش والملح وماتشات البلي اليومين دول
المهم بعد ما الأستاذ خلص حصة الض*رب والسب وانا قاعد ومش قاعد من كتر الالم اللي حاسس به لاقيت الأستاذ جاي ناحيتي
قولت في نفسي هو مفيش غيري في ام المدرسة دي ولا اي الله يخربيت معرفتك يا كان..وقف جمبي ولاقيته ميل عليا بس أنا هنا قولت اكيد نسي الروسية وجاي يديها لي بس معملش كده وطلع طيب القلب وقال لي تعالى يا سيد يا ابني معايا
انا في نفسي قولت
_ ابنك .... اومال الض**رب ده كله اي ...الكاميرا الخفية اكيد؟!
قومت معاه وانا مش فاهم حاجة واحنا ماشيين ناحية مكتب المدير لاقيته طبطب على ظهري وبيقول لي:
خليك راجل يا سيد واجمد كده ابوك الحاج غالب راجل طيب وسيرته زي العسل.
انا هنا بصتله بتعجب وقولت
_ مش ده الراجل اللي انت لسه ماسح بكرامته الأرض دلوقتي خلاص بقى طيب .... دا انت مطلعه حرامي الجامع من شوي، يالا ما علينا يمكن تاب وانا معرفش
أنت تقرأ
كبسولة رعب.
Horrorالعالم أكبر من انت تراه بعينيك وأبشع من أن تنجوا منه قصص قصيرة مرعبة ومخيفة تفتح عينيك على أفاق جديدة مرعبة... أطفأ مصباح غرفتك وأقرأ.
