كبسولة رعب.

((مسافة_السكة))

«مسافة الطريق»
شغلتي كسواق نقل ثقيل علمني إني دائمًا أكون حريص في السواقة ودائمًا أعمل صيانة وفحص قبل خروجي بأي شحنة لإني بسافر مسافات طويلة،

المرة دي طريقنا صحراء شحنة لواحدة من محافظات الحدود وطالع مكان صاحبي اللي واخد أجازة علشان عامل عملية،  الطريق صحراوي والسفر هيكون بالليل،  توكلت على الله وعملت فحص وتعيين للعربية والبضاعة وكنت نايم وواكل قبلها كويس الحمدلله وكل حاجة تمام

ركبت العربية بعد ما تممت على الشحنة في المصنع وتوكلت على الله،  وقبل ما أطلع لاقيت صاحبي بيتصل عليا،  بعد إزيك سلامات اي الأخبار؟!  سألني إذا كنت أنا اللي طالع بالشحنة مكانه المرة دي ولا أي
جاوبت وقلتله أيوه

سكت شوي وبعدين قالي طب اسمع وفتح مخك معايا في شوية تعاليم هقولها لك نفذها بالحرف الواحد...  انا طبعًا هزرت عليه وقولت له إنتَ هتعلمني أنا!! دا أنا أعلمك وأعلم بلدك كلها

ضحك معايا وقال لي، إنه شغال على الطريق ده أديله عشر سنين وهو أدرى بيه وأني لو سمعت هو هيقول اي مش هخسر حاجة،  قولتله طيب يا سيدي قول

أول حاجة قالها إني ممنوع أطفي أنوار العربية نهائي ويبقى كويس لو أخدت معايا كشافات إحتياطي وشمع لو أمكن،  طبعًا أنا إستغربت جدًا وقلت له شمع!  طب ليه؟ وفضلت أتريق عليه وأغني وألحن

رد وقالي مقاطعش كلامه وأسمع للٱخر فقلت له إتفضل....  كمل كلامه بنفس الجدية الغير معتادة من شخصية زيه بتحب دائمًا تضحك وتهزر وقال..

متفتحش زجاج الكبينة مهما حصل مهما سمعت ومهما شوفت لحد ما توصل لمكانك
طبعًا أنا هنا بدأت أسأل... هو انا ممكن أسمع اي في مكان مقطوع زي ده يعني
وكمل تعليمات وقال.. ولو حد حاول يوقفك متقفش

أنا عمري ما حد طلب مني مساعدة ورفضت وصادفت كثير ناس وقفتني على الطريق تطلب مني مساعدة،  اللي عايزني اوصله واللي عربيته بتعطل واللي عايز يعمل مكالمة علشان كده أبديت إعتراضي وقلت له

" بس أنا عمري ما رفضت إني أساعد أي حد،  علشان كده سكت شوي،  لحد هو ما قال..

أنت ماشي على طريق صحراوي لواحدة من محافظات الحدود اللي لما حد بيعوز يسافر ليها بيبقى قدامه حلين إما طيران وإما باصات كبيرة،  إنت متخيل اي ممكن يخلي واحد لواحده يقف على طريق مقطوع زي ده مفيهوش اي استراحات دا حتى قطاعين الطرق مش بيتواجدوا هناك نظرًا لقلة الناس اللي بتاخد الطريق ده

طبعًا كلام منطقي لذالك رديت وقولت عندك حق،  فيه حاجة تاني عايز تقولها يا أبو ٱدم

رد عليا وقال جملة غريبة مفهمتهاش
قال.. لو حصل وإضطريت توصل حد معاك حاول بقدر المستطاع متتكلمش معاه ولا تقول أسمك قدامه ولا تخليه يعرف اسمك