ابني الصغير بيحب الرسم اوي.. وأنا كمان من قبله كنت بحب الرسم... لذلك حبيت اني اطور موهبته دي وجبت له الوان كتير واستاند للرسم وفرش بس كنت حريصة اني مجبش ألوان يكون فيها مواد خطر عليه.
ما شاء الله يا جماعة خياله واسع اوي
رغم انه عنده يا دوب سبع سنين بس لوحاته كلها تجنن... مناظر طبيعية وشخصيات جميلة..
اصحابي بيحسدوني عليه فعلًا.. وكل ما واحدة كانت تشوفه كانت تقعد تقولي يا بختك بيه.. لدرجة اني بدأت اخاف على الولد من الحسد وقد كان فعلًا.
الولد مرة واحدة جاله زي صدمة اعراض سخونة شديدة ويقوم بالليل يصرخ وبيهلوس وهو نايم ومش بينطق..
فضل اكثر من شهر على الحال ده لفيت كتير على الدكاترة علشان يشوفوه في ايه وكلهم قالوا إن الولد مفيهوش عرض جسدي.
لحد ما ناس كتير نصحتني اروح لشيخ وفعلًا من قلة الحيلة قررت آخده لشيخ بيعالج بالقرآن بس في اليوم اللي بعده
الحمدلله ملحقتش اروح لإني قمت من النوم تاني يوم لقيته قاعد في الصالة بيرسم ومبسوط.. جريت عليه حضنته وبوسته.. اخيرًا نطق.
مكنتش مصدقة.. فضلت احمد ربنا كتير اوي.. الولد رجع يرسم تاني وحياته طبيعية بس الروسومات اللي كان بيرسمها هي اللي مكانتش طبيعية!
الولد بقى بيرسم مشاهد كتير غريبة وكلها بتتحقق!
أول لوحة رسمها كانت لشاشة التليفزيون عندنا وهي واقعة مكسورة... وجه وراها ليا في الأول مفهمتش بس بعدها فهمت لما الشاشة وقعت اتكسرت بخمس دقائق.
تاني رسمة كانت لأخويا طارق وراسه ملفوفة بشاش ورجله مكسورة... وفعلا تاني يوم بالضبط كان اخويا عمل حادثة وهو راجع من عندنا والحمدلله ربنا نجاه منها هو بس دماغة ورجله حصل لهم نفس اللي في اللوحة.
حاجات زي كده كتير... لحد ما الموضوع بدأ يزيد عن حده ورسوماته بدأ يظهر في خلفيتها راجل شكله بشع.. طويل وملامحه مش واضحه.
من لما الراجل ده بدأ يظهر في رسوماته والمصايب كثرت... بقى يرسم جث"ث مي"ته وقرايب لينا وهما واقعين في مصايب.
كنت في الأول بسأله بيعرف الحاجات دي ازاي او بيجيب الرسومات دي من فين بس مكنش بيرد عليا لحد ما وصل بيا إني أمنعه من الرسم علشان اوقف المصايب دي.. بس مكنتش بلاقي منه غير عياط وزعيق ونرفزة وصل بيه الحال لنوابات صرع.
قررت اني أراقبه بالليل.. بقيت بتصنت على غرفته.. سمعته اكثر من مرة بيكلم حد.. بس مفيش حد بيرد عليه.
جبته وقعدت معاه وحايلته يحكيلي بيتكلم مع مين... بس قال انه صاحبه وهو بيحبه وبس.
كلمت زوجي هو مسافر وأخذت اذنه واستاشرت دكتور نفسي صديق العائلة وطلب مني اسجل له فيديوا بتصرفات ابني وهو قاعد وحده علشان يفهم في ايه بالضبط؟
وبالفعل مرة كنت واقفه بحضر غداء في المطبخ وهو قاعد بيرسم في الصالة وسمعته بيتكلم مع حد زي كل مرة ومن غير ما ياخد باله من ورا حيطة المطبخ فتحت فيديوا وبدأت أصوره من ضهره.
بس كانت المفاجأة اني سمعته بينادي عليا وبيقول لي
_ ماما أنا شايفك بلاش تصوري علشان صاحبي بيضايق وبيقول لي أنه ممكن يزعل منك.
هنا أنا وقفت مصدومة... إزاي عرف؟! الرعب دب في قلبي.. خصوصًا لما ابني قام من مكانه وإداني لوحة رسمها ليا وأنا واقفة في المطبخ بصوره ونفس الراجل الطويل واقف ورايا بس المرة دي كان بيبتسم بشكل بشع وملامحه المرعبة واضحة جدًا.
#اسكربتات_ما_وراء_الرعب
#آمنة_محمد
معلش اسكربت سريع🖤🌱اتمنى يعجبكم
أنت تقرأ
كبسولة رعب.
Horrorالعالم أكبر من انت تراه بعينيك وأبشع من أن تنجوا منه قصص قصيرة مرعبة ومخيفة تفتح عينيك على أفاق جديدة مرعبة... أطفأ مصباح غرفتك وأقرأ.
