مملكة الاحفاد لكاتبة(بسملة'ة محمــد)

الحلقة الثاني عشر

مش بتصلي!
يبقي أستحمل تعبك النفسي؛ تعبك الجسدي؛ تعبك في كل حاجه أستحمل بقا ؛ وآخر حاجه أستحمل نار جهنم خليك راجل ياعم أمال اي! نصلي يا شباب نصلي.

ـــــــــــــــــــــــــــــــــــــــــــــــــــــــــــــــــــــــــــــــــــــــــــ
في بيت الحح رشوان وخاصة في أوضة رشوان...

رشوان قاعد علي الكرسي الخاص بيه جمب السرير ولابس نضارة القراءة وماسك المصحف وبيقرا فيه بعد ما صلي قيام الليل وقرأ أذكاره... شوية و رقية دخلت عليه وهي مبتسمة ثواني و إبتسامتها إتلاشت...

"إيه ده يا رشوان أنت بتعمل إيه"

"صدق الله العظيم"

رشوان صدق وبعدين شال النضارة من عينه وسابها هي والمصحف علي الكومودينو اللي جمب السرير وبعدين وجه نظراته لـ رقية بهدوء

"هكون بعمل إيه يا رقية... بقرا في كتاب ربنا شوية"

"من امته وأنت بتقرا في كتاب ربنا من قبل ما تصلي قيام الليل"

رشوان أبتسم بهدوء
"اللي فيه عاده مش بيغيرها يا رقية"

رقية ضيقت عيونها بشك
"يعني إيه يا رشوان"

"يعني صليت قيام الليل يا رقية"

رقية بصدمه
"من غيري يا رشوان"

"عشان غلطاتك كترت يا رقية."

رقية قعدت علي السرير بخنقة
"وأنا عملت إيه يا رشوان"

رشوان وجه نظراته ليها وأتكلم بجدية
"فكراني نسيت وقفتك في الشارع قصاد الواد المكواجي"

"يعني أسيب الواد يضرب مراته يا رشوان... ده اللي بيسكت عن الحق شيطان أخرس"

"لا يا رقية بس متدخليش تيجي تقوليلي وأنا هتصرف بس بسبب اللي أنتي عملتيه أنتي تعبتي و أدهم كان ها يقتل الواد في إيده"

رقية بتبرير و زعل
"بس أنا كان نيتي خير يا رشوان"

رشوان بغير نوعا ما
"وضحكتك اللي كانت في الشارع النهارده خير بردو"

رقية نسيت زعلها منه وأتكلمت بفرحه
"أنت لسه بتغير عليا يا رشوان"

"رقية"

"الاه يا رشوان ما تسبني أفرح إنك غيران أصلي عرفاك مشاعرك بتتحرك بالعافية"

رشوان موجه نظراته ليها ببرود...و رقية فهمت نظراته
"طيب خلاص بس ذنبي إيه نور هي السبب... والله يا حج البت نور ديه شربات كل ما أتكلم معاها أضحك من قلبي... بس يا حبة عيني الدنيا جاية عليها وبزياده"

"جاية عليها ازاي"

رقية قربت عليه وأتكلمت بحزن علي حالة "نور"

"أبوها رماهم هي و أمها وأخوها و أمها يعيني مريضة قلب ومحتاجه عملية وهي بتشتغل بشهادتها وكانت شغاله فعلاً بس أطردت فا بصراحه..."