أنتِ العشق ( للكاتبة سارة إياد )

الفصل الثامن

متنسوش يا حلوين تصويت للبارت⭐ ومتابعة لحسابى ❤️

فى صباح اليوم التالى وفى الساعة الثامنة صباحاً، استيقظ الجميع وتجمعوا حول السفرة على الفطار ما عدا عشق.

هانم بسخرية وهى تأكل : اومال فين جناب الأميرة لسة مصحيتش ليه ، ولا عندهم مكنش فيه فطار ، كانوا بياكلوا وجبة واحدة فى اليوم.

أدهم بصوت جهورى: مرات عمى ياريت متنسيش أن عشق هتكون مراتى، وهقولها دلوقتى قدام الكل ، انا  مش هسمح لأى حد أبداً فيكم مهما كان يهينها أو يجرحها بكلمة واحدة ، عشق هتبقى أهانتها اهانة ليا  انا ، واحترامها من احترامى فاهمين.

نظرت له عليا بحسرة ألهذه الدرجة يحبها ويدافع عنها أمام الجميع ؟ ألهذه الدرجة لا يتحمل كلمة واحدة عليها ؟ كم أنتِ محظوظة يا عشق !

وفى اللحظة التى كان يتحدث أدهم عنها كانت تنزل عشق على الدرج واستمعت لحديثه عنها وابتسمت لهذا الحديث الجميل، فكانت لا تتوقع أن يدافع عنها بهذا الشكل وهو فقط يعرفها منذ الأمس.

عشق بابتسامة : صباح الخير.

ابتسم أدهم بشكل غير إرادى عندما رأى عشق فهذه المرأة ينجذب إليها بشكل غير معقول،  ورد عليها قائلا : صباح النور.

يحيى : صباح النور يا عشق ، اتفضلى يا بنتى اقعدى جنب أية ، انتى على لحم بطنك من امبارح.

عشق بابتسامة : شكرا يا جدى.

عبدالله : يلا يا أدهم انت وسليم وعليا خلصوا فطاركم بسرعة علشان منتأخرش على الاجتماع.

عشق بتلقائية وبلاهة : اجتماع ايه ، هو حضراتكم صحيح بتشتغلوا ايه.

عليا: يعنى ايه بنشتغل ايه معقولة تعرفى أدهم من مدة ومتعرفيش هو بيشتغل ايه.

أدهم وقد بدت عليه علامات التوتر وهو يحاول أن ينقذ الموقف : عشق  بتحب تهزر كدة يا عليا ، هى طبعا عارفة انى شغال مهندس وانى شركتنا شركة بناء ،صح يا عشق يا حبيبتى.

حزنت عليا على هذه الكلمة فكم تمنت أنت تسمع هذه الكلمة منه ولو مرة واحدة ،وقد لاحظت عشق هذا الحزن وتعبيرات الوجه هذه ، وشكت بالفعل بأنها قد تحمل مشاعر لأدهم.

عشق وقد أدركت سذاجة ما قالته وهى تبتسم : اه طبعا عارفة اكيد يا أدهم انت بتشتغل ايه ، هو زى ما قال كدة انا بحب اهزر بس.

عليا : مممم تمام، على العموم انا خلصت فطارى عن اذنكم  انا راحة الشركة.

سليم : ما تستنى يا عليا شوية وهنمشى سوا.

عليا : لا معلش اصل مستعجلة عندى شوية اوراق عايزة اخلصها.

سليم : تمام براحتك.

وبعد قليل نهض الجميع من على السفرة وذهبوا إلى عملهم ما عدا عشق وصفية وهانم ويحيى.

عشق : طب انا هطلع شوية الاوضة هرتاح شوية.