🖤🦋آسير عينيها🦋🖤

🥀الجزء الرابع عشر🥀

🥀🖤الجنون في رماد عيونها يهون🥀🖤

الفصل1:   
            🍷أصابتني لعنة عيناها الرمادية كنت     المنتصر وهزمت في فتنتهما…!🍷

___الجزء 14 ______:

النبرة لي هضر بيها و القلق لي شافت فعينيه فيقات عليها مواجعها لي كان كاتحاول تدفن و هدمو ليها حصن قوتها لي كانت مصطانعة ،حركات راسها بالسلب ببطئ و شهقة متمردة خرجات ما بين شفايفها كانت الضو الاخضر لدموعها لي نزلو على خدها بتتابع
حجبانو تهزو بصدمة و كل دمعة طاحت من عينيها كانت كاتحرقو و تولد فيه احساس غريب داخل صدرو اول مرة يحسو ،زفر النفس بالجهد مكره  و بلا مايفكر جوج مرات جرها من يديها خاشيها فحضنو و يديه على ضهرها كيطبطب عليها ببطئ مخليها تبكي على خاطرها وسط صدرو بلا ماينطق بحتا كلمة
صوت شهقاتها بدا كينقص، حضنو و يديه لي كاطبطب على ضهرها كانت بحال مرهم كيداوي داك الجرح لي فقلبها ،بقاو على داك لحال حتا تهدنات ، حضن استحلاتو و صدر دافئ لقات عليه راحتها ،ما ان استوعبات وضعيتهم بعدات بالزربة كاتمسح فدموعها و عينيها فالارض باحراج
ميل راسو ببطئ كيطل عليها و علامات القلق باقيين مسيطرين على ملامحو ،حنحن مسرح حنجرتو و نطق بصوتو المبحوح و النبرة الخافتة لي نطق بيها غير ما خلاوه يبان مميز اكتر
تاج: مزيان دابا

حركات راسها بالايجاب ،كاترمش فالعدم ،ضبابة كحلها جات قدام عينيها و الطنين رجع زار ودنيها مخلين توازنها يختل ،و لو لا يد تاج لي تمدات جيهتها شاداها بسرعة لكانت طاحت فالأرض بسبب الدوخة لي سيطرات عليها
ملامح القلق لي كانو على وجهو تحولو لخوف ،يديه مزيرة على دراعها و يديه التانية تحطات على خدها و عينيه كيتفحصو ملامحها بخوف
تاج (بخوف): دكتورة ،مالك؟

حلات عينيها كاترمش فيه ببطئ،دقات قلبها تسارعو و هي كاتشوف داك القرب كامل لي بيناتهم و كانحس بيديه لي على خدها ،سرطات ريقها بتوتر و تقادات فالوقفة كاترد شعرها مور ودنيها
سجى (بارتباك): غير حسيت بدوخة و صافي دابا مزيان

قطب حجبانو و نظرتو الحادة سيطرات على نظرات الخوف و دفناتهم
تاج: واكلة شي حاجة

حركات راسها بالسلب بهدوء و عينيها كيضورو بتوتر مرة مرة كاتسرق شوفة فيه
تنهد بخفوت و رجع خطوة لور جامع يديه عندو
تاج: حتا انا مزال مافاطرت (شير جيهة المطعم لي واقفين حداه) ندخلو كولي شي حاجة باش تمشي هاد دوخة و تحيد حتا هاد صفورية لي فوجهك

ابتاسمات بلباقة و حركات راسها بامتناع
سجى: لا لا بلاش شكرا

دوز يديه على وجهو كيكالمي فراسو من طبعو ماكيحملش يعاود هضرتو جوج مرات و لكن ليها هي بالضبط كان شاد ليها الخاطر و غادي معاها على قد عقلها
تاج(باصرار): بلا ماتقصحي راسك دوزي غير  فطري و ديك ساعة سيري فين بغيتي

حركات راسها بهدوء واخا ماكانش عندها لخاطر باش تفطر و لكن مابغاتش ترفض عرضو
دخلو بزوج للمطعم وختارو طبلة فطيراس،مفضلين انهم يستمتعو بالريح لبارد لي كيضرب فيهم و ريحة لبحر لي كان قريب ليهم
فطبلتهم كان السكوت هو سيد الموقف ، سجى ساهية فالمنظر لي قدامها اما هو فكان ساهي فيها كيتامل جمالها كيف كيتامل ناقد فني لوحة فشي معرض ،عينيه على عينيها المميزة الدابلة ووجها لي مزال مارجع لونو الاصلي خلاوه يخرج تنهيدة خفيفة كاره يشوفها فداك الحال
قاطع تامل السيرفور لي جاب ليهم لفطور و حطو قدامهم بهدوء و نساحب
حنحن بهدوء مقاطع سهوتها و اشار ليها لفطور بعينيه
تاج (بهدوء): كولي
حركات راسها بهدوء مبتاسمة ابتسامة دابلة و هزات كاسها دلعاصير كاترشف منو
تكا بضهرو على لكرسي و فيديه طاس ديال قهوتو كيرشف منها مراقبها بهدوء
تاج: كاتنصحي المرضى ديالك باش ماينساوش وجبة الفطور و ياكلوا مزيان و نتي ماكاطبقيش نصائحك

شافت فيه مبتاسمة بلباقة و حركات راسها بالسلب
سجى: غير حيت مافيا ماناكل دابا و صافي

حط طاس ديالو فوق الطبلة عاض على باطن حنكو ، و رغبة كبيرة داخلو باغا تعرف شنو سبب حالتها ، مصمم انه اذا كان شخص هو لي بكاها ماغايترددش تانية انه يمحيه من لوجود
تاج : دكتورة واش عندك شي مشكل

سجى حركات ليه راسها بالسلب بهدوء

تاج :و نقدر نعرف شنو سبب دوك الدموع و هاد الحالة لي راك فيها

سرطات ريقها و تنهيدة حارة خرجات من مابين شفايفها ،عينيها لمعو بدموع لي عاودو تجمعوا فيهم و نطقات بصوت مخنوق بسبب الغصة لي خانقاها
سجى : بحال ليوما ماتو واليديا

يديه لي كان مزير عليها ترخفات و عينيه لي كانت فيهم نظرة عميقة تحلو بصدمها ،حواجبو تفكرو و الم كبير عصر حلقو
  عارف قيمة الواليدين و دورهم لكبير فحياة الشخص و لفراغ لي كيسبب رحيلهم فقلب الابن ،رجال بقوتهم و تحطمو فما بالك بانتى رقيقة بحالها