All i need to do is clear the mission and go home.

Arc - 3.5

Unicode

သူတို့နားနေခဲ့တဲ့နေရာဆီသို့ပြန်လာတဲ့အခါ ဝန်ထမ်းလေးကအိပ်နေဆဲဖြစ်သည်။ ကိစ္စတွေအများကြီးဖြစ်သွားခဲ့ပေမဲ့ ဝန်ထမ်းလေးကတော့ ဘာမှမသိရှာပဲ အပူအပင်ကင်းမဲ့စွာအိပ်နေပုံက သူ့အိမ်ကခုတင်ပေါ်မှာများအိပ်နေတယ်ထင်နေလားမသိချေ။

အဲဒီနောက် အိုဂျယ်ဟွန်းက ထိုဝန်ထမ်းလေးကိုနှိုးလိုက်သည်။ ဝန်ထမ်းလေးကနိုးလာပြီးနောက် ပတ်ဟယ်ဗြောနဲ့ဂျွန်ဆော့ကိုမတွေ့တာကြောင့် ထူးဆန်းသွားကာ အိုဂျယ်ဟွန်းကိုမေးလေသည်။ အိုဂျယ်ဟွန်းက မျက်မှန်ပြန်တပ်ထားပြီဖြစ်လေသည်။ ဒါပေမဲ့ သူ့ရဲ့ဆံပင်တွေကိုတော့လှန်တင်ထားဆဲဖြစ်ကာ အဖုအဖိမ့်ကင်းစင်ကာ ပြောင်ရှင်းတဲ့နဖူးကိုမြင်နေရလျက် ခန့်ညားမှုကကျန်နေဆဲပေ။ ဝန်ထမ်းလေးက အိုဂျယ်ဟွန်းအရာအားလုံးကိုရှင်းပြတာကိုနားထောင်နေရင်း အိုဂျယ်ဟွန်းကိုငေးမောနေလေသည်။

အရာအားလုံးကိုသိရှိသွားပြီးနောက် ဝန်ထမ်းလေးကအံ့သြသွားရပြီး ပတ်ဟယ်ဗြောနဲ့ဂျွန်ဆော့ကိုရွံရှာသွားရသည်။အထူးသဖြင့် ပတ်ဟယ်ဗြောကိုပဲဖြစ်သည်။ လီဂျောင်ထယ်က ဒီလောက်ချစ်မြတ်နိုးတာကို သူတို့တရုံးလုံးသိရှိလေသည်။ ဒီလောက်ကောင်းမွန်တဲ့လီဂျောင်ထယ်ရှိနေတာတောင် ဘာမဟုတ်တဲ့ငကြောက်ကောင် ဂျွန်ဆော့နဲ့ဖောက်ပြန်ရဲသေးသည်။

ထိုနှစ်ယောက်အဖွဲ့ထဲကမောင်းထုတ်ခံရတာအတွက် သူကနည်းနည်းလေးမှသနားစိတ်မဝင်မိဘူး။ ခံရတာတောင်နည်းသေးသည်ဟုတွေးလိုက်သည်။ ဂျွန်ဆော့ကြောင့်သာမဟုတ်ရင် လူတစ်ယောက်သေရမှာမဟုတ်သလို ပတ်ဟယ်ဗြောရဲ့အကြံကြောင့်သာမဟုတ်ခဲ့ရင် သူတို့တွေဓာတ်လှေကားမှာကြုံခဲ့ရတဲ့အခြေအနေကိုကြုံခဲ့ရမှာမဟုတ်ဘူး။

သိပ်မကြာခင်မှာပဲ လီဂျောင်ထယ်က အချက်ပြမီးရှူးသေနတ်ဖြင့်ပြန်ရောက်လာသည်။ ဝန်ထမ်းလေးက လီဂျောင်ထယ်ကိုနှစ်သိမ့်အားပေးဟန်ဖြင့်သာ ပုခုံးကိုအသာပုတ်လိုက်သည်။

အဲဒီနောက်မှာတော့ သူတို့သုံးယောက်ဟာအရေးပေါ်လှေကားအတိုင်း အပေါ်ဆုံးထပ်သို့တက်လာခဲ့ကြလေသည်။ အရေးပေါ်တံခါးက သော့ခတ်ထားတာကြောင့် သူတို့မှာစိတ်ညစ်သွားသည်။