#ولاد_تسعة "الفصل الاول/سميه تسعة" #جمان_فريد الجزء_الثاني "تسعة سلامه بيت المال" ⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔ ⚠️ملاحظه.. لما يبدا الكلام بالرمز هدا (♤) هذا يعني ان البطل يسرد في الاحداث اما لما يبدا بهذا (🌿) يعني الكاتبه هي اللي تسرد.. #ذكر_الله قال رسول الله صلى الله عليه وسلم: "بخ بخ لخمسة ماأثقلهن في الميزان،لاإله إلاالله،وسبحان الله،والحمد لله،والله اكبر،والولد الصالح يتوفى للمرء المسلم فيحتسبه" حديث صحيح_صحيح ترغيب الألباني 1557 ■■■■■■■■■■■■■■■■■■■■ 🌿 "الإنسان هو مخلوق متعدد الأبعاد ؛ يتألف من جوانب متضادة ومتناقضة، فهو قادر على النبل والخسة في الوقت نفسه." دوستويفسكي🌿 ••••••••••••••••••••••••••••••••••••••••••••••••••••••••• طرابلس.. 🌿في مزرعة جد زكية زوجة "سلامة" .. في مكان مستخطي في المزرعة ع كرسي رخام طويل كانوا مقعمزين.. زكية كانت حاضنه سلامه وهي تذرف في الدموع بألم.. تسمع في صوت بكاه اللي كان بالعبرة وآهات الوجع تطلع منه.. تمسح ع شعره وظهره وطبطب عليه وهو يبكي بدون مايتكلم.. شويه تباعد عنها شويه وقال ببكاء.. /هما اللي جبروني يازكيه..هما اللي خلوني ندير فيهم هكي..حاول يهدا وقال..تعرفي يازكيه لو جوني وقالولي نبوك تعطينا ماعندك والله عطيته،عطيته بطيب خاطر هما لو طلبوا روحي راني عطيتها واني فرحان..لكن..لكن هما شن داروا يازكيه! خانوني وغدروا بيا هان عليهم يكسروني ويقهروني ع صغاري يازكيه!..قتلوا ولدي عيل صغير مازال مايعرف من الدنيا شي وحرقوا قلبي عليه هان عليهم دم خوهم ولحمه واني مداير صغارهم صغاري ويخي نحبهم اكثر منهم لانهم صغارهم صغار خوتي..هكي الخضر ربانا يازكيه علاش هالربايه هادي ماثمرتش فيهم زي ماثمرت فيا!! علاش قوليلي..رجع يبكي وهو يقول بقهر.. "شن درتلهم بش داروا فيا هكي قولي يازكيه!" ضماته زكيه بقوة وهي تبكي معاه بعدين قالت.. /مادرت كان كل خير ياغالي مادرت كان كل خير .. ♤قالت حناي هداكا اليوم طلعوا من سانيه جدها لوحده من الفنادق في طرابلس قعدوا فيها ليله كامله وهديكا الليله لاهو ولاهي رقدوا غمضه ولانطق جدي بكلمه لتاني يوم اللي روحوا فيه للألف وخمسين.. قالت لما وصلنا في الارض اللي يملكوها عيلة بيت المال لقوا الدنيا مقلوبه..زحمة سيارات وناس خاشه وطالعه قالت اني كنت خايفه ع سلامه من اللي بيواجهه لكن هو فاجئها لما شافاته ثابت وقوي بالذات وين قالوله الناس ع خبر حادث خوته وموتهم كان يرد عليهم.. "سمعت سمعت خبروني..انا لله وانا اليه راجعون" ودموعه تنزل من غير أي انفعال لكن لما لاقى امه وشاف حالتها وجعاته هلبه وماوجعه حد غيرها ضمها طول لحضنه وقعد يبكي هو وياها... واكيد فاجعة زي هادي صابت عيلة كبيرة زي عيلة بيت المال حتخلي الناس تجيهم من كل مكان فيك ياليبيا يخي في ناس من مصر ومن تونس جو عزوا..حتى الكبار في الدوله وسفراء لدول عربيه واجنبيه..ايه مال شنو عيلة بيت المال عيلة صاحبة ثروة ونفوذ واللي عنده الحاجتين هادم تلقوا الناس من جميع الطبقات ومن كل المستويات والمراكز يتوددوله ويدوروا في قربه..هادي الدنيا.. المهم..العزي قعد شهرين بالزبط وبعد هالشهرين الزحمة فضت وقعدت العيلة بس.. قالتلي جداي ان بعد مافضى العزي طلب جدي الاجتماع بأرامل خوته... 🌿وسط صاله كبيره كانوا مقعمزات ارامل ولاد خضر بيت المال ومعاهم عزوزتهم ذهيبه وسلفتهم زكيه والصغار.. زكيه وهي مقعمزة كانت تسرق في النظر لمرت منصور اللي كانت تشوف لبطن زكيه البارزة وين رفعت عيونها في زكيه لقتها تشوفلها بنظرة تخوف هربت بعيونها عنها.. غيرت زكيه نظرها لأرملة عبد الهادي لقتها تشوفلها بنظرة غريبه بعدين غيرت ارملة عبد الهادي النظر عنها وزكيه قعدت تشوفلها بشك.. ووسط هالجلسه كانوا باقي الكناين شادات بناتهم وهما يذرفوا في الدموع وذهيبه توزع في نظرها عليهم ودموعها ينزلوا.. "امي" كلهم وجهوا انظارهم للباب اللي كان واقف وراه سلامه.. زكيه قالت.. /كلهم هني ياسي سلامه "كويس..اول شي عظم الله اجركم عزانا واحد ومصيبتنا وحده وقدر الله وماشاء فعل..الله يرحمهم ويغفرلهم ويسامحهم..اني طلبت نكلمكم بش نوضحلكم الوضع كيف بيكون من اليوم وبرا غادي..من قبل ولتوا ولأخر يوم في عمري صغار خوتي صغاري مش حنقصر في حقهم حنرعاهم ونحميهم ونحمي رزقهم لعند مايشتد عودهم إن شاء الله ونسلمهم كل شي..اما انتم بعد ترموا العده كل وحده حرة في حياتها مش حنربطوكم بينا لكن لازم تعرفوا كان جاكم نصيب صغارنا بيقعدوا عندنا حني مانخلوا حد يربيهم غيرنا حتى ماليكم لا وحقكم انكم تشوفوهم ويزوركم وتزورهم تاخدوه.. في حد عنده اعتراض ع كلامي!؟" زكيه مررت نظرها عليهم شويه ناضت مرت عبد الهادي مشت لزكيه طبست عند وذنها وقالتلها شي ووخرت.. شافتلها زكيه شويه بعدين شافت لعزوزتها وقالتلها ماقالت مرت عبد الهادي.. "هاه ياامي شني يازكية" ذهيبة قالت بنبرة باكيه.. /مرت عبد الهادي الله يرحمه حامل ياولدي.. سكت شويه بعدين قال.. /معناها تقعد حداكم هني لين تجيب والباقي كل وحده تكمل عقاب عدتها في حوشها هكي يقول الشرع.. زكيه مررت نظرها عليهم وقالت.. /قولوا لماليكم يقعدوا معاكم لين تم العدة.. "هو هدا يازكيه..وتوا بالله طلعولي الصغار كلهم نبي نطلعهم" ناضت زكيه مررت نظرها ع الصغار بنات وولاد وهي تقول بإبتسامه.. /هي اطلعوا لعمو يبي يدهور بيكم وياخدلكم حاجات قنينه.. ناضوا كلهم وطلعوا يجروا وهما في قمة الفرح.. ولقاهم عمهم برا وهو يحضن فيهم ويوزع عليهم في القبل والدموع محبوسات في محجر عيونه.. ♤اكيد خطر في بالكم سؤال وين الشرطه من حكاية الحادث؟نقوللكم ان الشرطه دارت كل شي تقدر عليه لكن ماوصلت لشي يعني حتى الحادث كان عندهم حادث عادي مش بفعل فاعل... باهي شن صار في صاحبه مسعود!؟ اكيد حتى السؤال هدا خطر عليكم.. 🌿"اني بروحي مستغرب فيه لاجي عزا ولاكلمني في الهاتف،من قوة المصيبة اللي نزلت عليا نسيته بكل" اخ مسعود قال بقلق.. /يعني مش مخبرك قبلها انه بيسافر ولا بيدير حاجه ماقالك شي!؟ سلامه وهو مقعمز ع كرسي في جنان حوش بوه قال.. /اني قبل ماينزل بينا مانزل ممكن قعدت فوق اسبوعين في الحوش لاجاني ولااتصل بيا الفترة الاخيره حسيته متغير ومش كيف قبل.. خوه خبط كفوفه ببعض وقال.. /معناها دارها ومشي لإيطاليا.. عقد حواجبه وقال.. /قصدك ولى لموال هديكا الطليانيه؟ قاله:قداش ليه موليله يابيي سلامة .. مط سلامه شفايفه للأسفل بأسف بعدين قال.. /ربي يسامحه ويهديه.. تنهد اخ مسعود بضيق وقال.. /باهي مالا خل نروح مانزيدش نعطل عليك وبالله كان سمعت حاجه بلغنا.. هز سلامه راسه بإيجاب وقال.. /حتى انتم كان سمعتوا شي طمنوني.. ♤لقوا مسعود شانق روحه في شقة ليه كانت في تاجورا وقتها مع انهم دوروا عليه قبل غادي ومالقوشي..تقرير الطبيب الشرعي اكدلهم انه مات منتحر شنقا وهما توقعوا سبب انتحاره المراة الطليانيه اللي كان يبيها لأنه حاول قبل ينتحر ع خاطرها لما سيباته.. وهدا كله كان تخطيط جدي سلامه اللي قعد حابسه شهرين في وحده من المزارع وبعدين رفعه لحوشه في تاجورا وخلاه بطريقه او بأخرى يشنق روحه وقعد ميت في شقته لين طلعت ريحة الجثه للجيران اللي اكتشفوا موته... شوفوا الانتقام كيف يخلي البنادم..شوفوا شن يديروا الغدر والخيانه في قلب انسان كان مليان حب وكله طيبه من رقته يخاف يجرح غيره بنظره.. اني هني مانبيش نبرر لجدي اللي داره لكن نشوف فيه انتقم انتقام عادل لأنه اللي داروه فيه مش شويه ولأنه لو ماقتلهمش كانوا حيقتلوه..هما تجازوا ع افعالهم والجزاء من جنس العمل ..مع ان الافضل والاصلح انه ياخد حقه منهم بالقانون لكن ممكن خوفه تتشوه سمعتهم وسمعة بوه اللي ياما الناس ضربت بيه المثل في كل شي باهي واولهم تربيته لولاده خلاه يعاقب خوته بروحه ويختار لصاحبه هالنهايه لأن سرهم معاه... 🌿🌿🌿🌿🌿 وتمر الشهور وذهيبه بدت تطلع من حزنها بالشوية وهي تستنى في جية احفادها الجدد بالذات عيل سلامه.. فرحت من قلبها بعد ماعرفت جنس المولودين،الزوز كانوا ذكور لكن عيل سلامه مازال اكبر من عيل خوه عبد الهادي بشهرين.. ♤جداي قالت ان جدي سلامة تجاوز اللي صار بسرعه والحاجه هادي خلتها تفهم ان مافيش في قلبه ذرة ندم ع اللي داره..واكيد مش حيندم لأنه ماظلمهمش هما ظلموا ارواحهم.. 🌿"بديت نبني" وهي شاده يده قالت.. /شن تبني!؟ شافلها بإبتسامه وقال.. /نبني في قصر ضحكت بإستغراب.. وخر خصلة شعرها اللي كانت طير فيها الريح ورا وذنها وقال.. /نبي نبني قصر كبير ماداروش زيه في البلاد كلها وبنسميه ع اسم امي "قصر ذهيبه" وهي مبتسمه قالت.. /الله..تصدق تخيلته ياسي سلامة! ضحك بعدين قال.. /ومايولي غالي وعليه القيمه الا لأنك انتي مولاته.. نزلت عيونها وهي مبتسمه بخجل.. حط يده ع ذقنه ورفعه شويه وقال.. /معاش تهربي بعيون الريلا عن عيوني.. بإبتسامة استغراب قالت.. /الريلا!؟ قاللها:الغزال الاريل ماتعرفيشي!؟ قالت:اول مرة نسمع بيه الاسم هدا للغزال!.. مسح بيده ع شعرها قال.. /وهاك سمعتي بيه يا ريلة سلامه.. ضحكت وجهها محمر من الخجل وهو ابتسم بحب لخجلها بعدين قال.. /بنقولك ع الاسم اللي اخترته للولد.. قالتله:ايه حق..قتلي اخترت اسم بتقول عليه في الشهر الاخير.. هز راسه بعدين مرر نظره ع الطبيعه حواليه وقال.. /تتفكري في الحلم اللي فسرهولي الشيخ العربي؟ قالت:ايه.. شافلها وقال.. /ماخبرتكش عن عقاب تفسيره.. بشي من القلق وقالت.. /ان شاء الله خير.. ابتسم وقال:ماتخافيش خير بإذن الله خير.. وحكالها باقي تفسير الحلم وهي فرحت من قلبها لما سمعاته وتأثرت لين دمعوا عيونها لكن ملامح وجهها تبدلت للصدمة لما سمعت الاسم اللي قال عليه الشيخ.. زكيه بصدمه:منك جد ياسي سلامه!؟ قاللها:وجد الجد ياريلة سلامة.. قالت بإستياء.. /لكن حرام هكي بعدين يقعدوا يعزروا بيه ولدي قاللها:مايعزره حد يازكيه صدقيني..وبعدين هكي خير يازكيه حماية ليه من اي شي يصيبه.. سكتت وهي مضايقه والدمعه في عينها.. هو مسح ع شعرها بحنان وقال.. /ربك بعتلي هالحلم جواب واني لازم ندير ماجاني في هالجواب بش نحافظ ع النعمه اللي بيعطيهالي بعد شوق قهر ومراجاه وحرمان يازكيه.. ردت نظره ليه بعدين ابتسمت وقالت.. /اللي تشوفه صح ديره ياسي سلامه.. ابتسم بحب وقرب منها طبع قبله ع جبينها... ♤طبعا "ذهيبة" ام جدي خلال شهور حمل كناينها رعتهم احسن رعايه وع كلام جداي زكيه ارملة عبد الهادي كانت طول فترة قعادها معاهم حابسه روحها في دارها ومخليه معاناة بناتها عليهم وهما كانوا مقدرين حالتها ومخليينها ع راحتها.. وتمت شهور حمل حناي زكيه واخيرا..جي بوي ع الدنيا.. تسعة سلامه خضر بيت المال.. المولود المنتظر اللي كان جدي يعد في دقايق وهو يراجي فيه امتى يطلع للدنيا ويشوفه ويربيه ويكبره.. لكن هالمولود برغم اهميته عند بوه وامه وجدته جي ع الساكت بدون أي مظاهر للفرح مش الشيخ قال لجدي كان جاك ماتبالغش بفرحتك بيه هو مادارش ولا حاجه من مظاهر الفرح نهائي اللهم الا العقيقة اللي كان مفروض عليه يديرها ولما دارها صدق تلاته ارباعها والربع دار بيه وليمه لعيلة زوجته جداي زكيه بس.. طبعا الناس فسرت الحاجه هادي ع انه من باب الحزن ع خوته وسبحان الله كأن هالشي صار بش الناس ماتشوفش في ولادة بوي شي يفرح ويزهى في العين.. 🌿"ماشاء الله اللهم صل ع النبي بيجي اشقر لبوك" سلامه وهو يشوف لولده اللي ولى عمره شهر قال بإبتسامه.. /مافي حد جي لبوي كان هو.. زكيه بإبتسامه:عمي الله يرحمه كان اشقر؟ شافلها وقال.. /كان اشقر،عيونه تقول فازوات عسل،طويل عريض ومهيوب الله يرحمه ويغفرله.. ذهيبه والدمعه في عينها قالت.. /الله يرحمه.. كنتها وهي تشوفلها ابتسمت وحتى هي ترحمت عليه.. ♤ويفوت شهر تاني ويلحق ولد عبد الهادي ولد عمه،وجداه ذهيبه سماته ع اسم بوها "محفوظ".. حتى هو داروله ماداروا لولد عمه وفي يوم الوليمه قالت جداي زكيه حضروا باقي سلفاتها..قالت وسط العزومه لاحظت السلفات الصغيرات عاديات لكن ارملة منصور وارملة عبد الهادي كانوا يتبادلوا بين بعض في نظرات غريبه.. 🌿"عمتي سلفتي ولت لدارها" ذهيبه وهي دور بعيونها قالت.. /شكلها هكي.. زكيه:ماشيه نشوفها بالك تبي حاجه.. ومشت زكيه بإتجاه دار ارملة عبد الهادي وهي حاسه انه حتشوف او تسمع شي خطير خصوصا انها لاحظت غياب مرت منصور.. وفعلا اول ماوصلت للدار اللي كانت مردوده سمعت نقاش حامي قاعد يدور بيناتهم.. "انتي شن تبي مني بالزبط!؟" انتي عارفه كويس شن نبي فكيني من اللف والدوران وقولي شن درتي من وراي تكلمي" وينفتح عليهم الباب بقوة وتخش زكيه وهي تقول.. /خيرك انتي وياها شن في!؟ قعدوا يشوفولها الزوز بريبه وهما ساكتات.. سكرت الباب وقدمتلهم وهي تقول.. /تكلموا..ع شن قاعدين تتعاركوا..ولاتتحاسبوا!..قالت الكلمه الاخيره وهي رافعة حاجبها.. ارملة منصور قالت.. /حاجه بيني وبينها.. زكيه ضمت شفايفها لداخل وهي تهز في راسها.. ويدق باب الدار.. زكيه قالت:شكون؟ "اني يازكيه" اشرت ع الباب وقالت.. /سمعتوا؟!..البسوا ع رووسكم.. رفعوا حجابهم ع رووسهم وهما في قمة الخوف لما تاكدت زكيه انهم لبسوا حجابهم مشت فتحت الباب وقالت.. /تفضل ياسي سلامه.. خش سلامه للدار وشاف لنساوين خوته بنظرة متجهمه بعدين غير نظره عنهم وقال.. /مرت خوي منصور تعرفي وحده اسمها "زمزم جمعة"!؟. انخطف لون وجهها وبنبرة خوف قالت.. /عمري ماسمعت بيها.. بصوت غاضب قال.. /كذابه.. الزوز انتفضوا من الفجعه وهو متابع يقول.. /مراة حاجه بيت الله مرتين تطلع وحده سحارة!؟ كيف وحده زيك انتي بنأمن ع صغار خوي معاها كيف وحده تربي صغارها رباية حسنة قولي!.. بدت تبكي وهي تقول.. /كله من خوك ياسي سلامه خوك هو اللي جبرني ندير هكي.. قاللها بغضب.. /حاشا خوي من افعال الشياطين هادي مايطلع البلي هدا الا منك انتي.. وهي تبكي قالت.. /ونترزا في صحتي ونترزا في شبح عيوني ياسي سلامه كان نكذب عليك انت شن تحساب؟ تحساب خوتك يحبوك حق! والله ماريت خوت يكرهوا هالكريهة هادي كلها كان خوتك والله خلوني نشك انك خوهم شقيقهم قاطعها بغضب وهو يقول.. /تزيدي كلمة تانيه نفضح بيك قدام ماليك ونخليهم يعلقوا مشنقتك.. سكتت وهي تبكي بخوف.. وسلفتها ترعش مع بعضها.. زكيه اللي كانت موجوعه ع راجلها قالت.. /وحد الله ياسي سلامه.. مسح بيده ع وجهه وقال وهو شاد دموعه بقوة بعدين قال.. /اسمعي جاي بنخلي الصغار يقعدوا معاك وبنعطيك فرصه تانيه وربي المعظم تعاودي عمايلك مرة تانيه ندير فيك وفي ماليك شي عقلك مايتخيلاش.. وهي تبكي قالت.. /لالا والله خلاص والله العظيم خلاص معاش تشوف ولاتسمع عني الا اللي يرضيك.. هز راسه وقال.. /تو نشوفوا..وخر ع الباب وقال..بري اطلعي.. مشت بسرعة للباب فتحاته وطلعت وهو طلع وراها وقف في الباب وقعد يشوف فيها وهي ماشيه لين درقت من قدام عيونه قعد لحظات واقف بعدين خش وسكر الباب وهو يقول لمرت عبد الهادي.. /وانتي كنتي شيطان اخرس.. قالتله:غصب عني ابتسم بتهكم وقال.. /غصب عنك..تبدلت ملامح وجهه للغضب وقال..مش طالع من هني قبل لنسمع منك كل شي تعرفيه.. بلعت ريقها ونزلت عيونها وبدت تحكيله.. اللي سمعه منها نفس اللي قراه في الرساله وهكي زاد تأكد ان هي اللي بعتتها.. =هدا اللي صار كله ياسي سلامه.. زكية عقدت حواجبها وقالت.. /قبل لنخش عليكم سمعت هديكا تقول شن درتي من وراي شن معنى كلامها؟ قعدت ساكته وهي قي قمة الخوف.. سلامه قال بحده.. /تكلمي.. خدت نفس وقالت.. /اني اللي حطيتلك الجواب في سيارتك.. رفع حاجبه وقال بتهكم.. /وشن اللي خلاك ديري هكي ناض عليك وجع الضمير!؟ رفعت عيونها في زكيه بعدين قالت.. /زي ماقالت مرت منصور ياسي سلامه خوتك عمرهم ماكانوا خوت هادم عدوين..لان العدو الخسيس بس هو اللي يحط عينه ع عرض عدوه.. بدت ع وجه سلامة ملامح الصدمه.. وزكيه شافتله بخوف.. وارملة عبدالهادي متابعة تقول.. /سمعته بوذني قالها بعد يموت سلامه اني بنرد زكيه.. زكيه غمضت عيونها بشده وقالت.. /خلاص ضمي فمك.. هو بلع ريقه اللي كان ينزل في جوفه زي السم بعدين قال لأرملة عبد الهادي.. /من غدوة تروحي لحوشك.. ومشي طول فتح الباب وطلع وزكية طلعت وراه وهي تبكي.. قعدت واقفه في الباب تشوفله وهو ماشي كانت نظراتها ليه نظرات خوف وألم.. ♤خافت يتغير عليها بعد اللي عرفه..حاجه زي هادي صعبه هلبه ع الراجل صح المراة اللي في حالة جداي زكيه مالهاش ذنب..لكن تقعد صعبه..وصعبه هلبه اني نفسي ماتحملتهاش.. 🌿وعدا اسبوع وسلامه ماجاش للحوش بحجة السفر وخلا وراه زكيه تبكي بالخفاء وكل ليله ع جفاه وبعده لكن قدام عزوزتها كانت دير في روحها عاديه وفي رعاية ولدها ماقصرتش نهائي.. وبعد عدا هالاسبوع روح سلامة للحوش وين قابلاته وحده من الشغالات سألها عن امه قالت مشت لحوش مرت عبد الهادي تشوف حفيدها بعدين سألها عن زكيه قالت.. "مقعمزة برا تشمس في البي تسعة" ابتسم ومشي بطريقه للجنان.. بعد طلعله قعد يمشي وهو يسمع في صوتها تغني لولدها.. "بيك جبر وبيك جبر" وصل في المكان اللي كانت مقعمزة فيه بولدها وقعد يسمع في صوتها الحلو وهي تغني..هو صوتها حلو وين تتكلم يابال وين تجي تغني!.. بعد كملت غني قعدت تلعب في ولدها وتضحك معاه وفي عز انسجامها مع ولدها سرت في جسدها قشعريره بعد ماحست بقبله انطبعت ع راسها وشمت ريحة عطره الحلوة القويه.. رفعت عيونها وشافتله بنظرات كلها شوق ولهفه غرقوا بالدموع وسالوا.. هو مسح دموعها وقمعز جنبها حط ذراعه ع كتافها وشاف لولده لقاه يشوفله ضحك وقال.. /بي تسعة.. بدت ع وجه تسعة ابتسامه حلوة.. ضحك بوه وهو يقول.. /ماشاء الله ماشاء الله..وين رفع عيون عنه يشوف لعيون امه لقاها تتأمل فيه ودموعها مابطلوش نزول.. هو ابتسم ومسح دموعها وطبع قبله ع جبينها.. وهي بنبرة باكيه قالت.. /الله يسامحك ياسي سلامة.. ضحك وقال.. /معاش نبي نشوف دموع عيون الريلا.. قالتله:كان معاش تبعد عنهم وتجفاهم معاش ينزلوا دموعهم.. رجع طبع قبلة ع راسها وهي ابتسمت من وسط دموعها.. ♤واستمرت الحياة بعد هكي اربعة سنوات كلها راحة وايام حلوة ورخاء..ربي زاد فتحها ع جدي سلامه وزاد كبر اكثر واكثر..ممكن كان ربي يجازي فيه ع بره بأمه،جداي قالت جدي كان بار بأمه هلبه وحتى معاملته لصغار خوته ماكانتش تفرق عن معاملته لولده نهائي كانوا يجوا يقعدوا عندهم بالأيام وهو في هديكا الايام كان يتفرغلهم كلهم..قالت كانت علاقة بيهم قويه وحلوة يحبوه هلبه بالذات مرعي كان متعلق بيه..اما محفوظ كان متعلق ببوي وبوي متعلق بيه ديما مع بعض ومحفوظ يحب القعاد في حوش جدي اكثر من حوشهم ع خاطر رفقته مع بوي.. وبعد هالاربعه سنين جداي جابت بنيه عمتي" هانية" كانت فرحانه بيها هلبه ومدللتها اخر دلال عكس تربيتها لبوي كانت تبيه يولي راجل من صغره،دخلوه للقرآنيه في عمر الخمسة سنوات ولما خش المدرسة جابوله هو محفوظ اساتذة خصوصيين.. يعني الاهتمام ببوي ماكانش بالدلال لا..كانوا هما الزوز..كيف بنقوللكم!؟..ايه..كأنهم يصنعوا فيه صناعة..يصنعوا في ولي العهد اللي حيخلف سلامة بيت المال ويولي كبير الالف والخمسين.. لكن تعرفوا..الثروة والعز والجاه غالبا يكونوا ابتلاء مش نعمه ممكن لو تشوفوا قلوب الناس اللي عايشه في رخاء ونعيم دنيوي حتلقوها مظلمه فيها حزن هم شي فاضي المهم معنى الراحة التامه والسعادة الحقيقيه مش موجود عندهم طبعا هني نقصد بكلامي الناس اللي تحساب السعادة بكثرة الفلوس والسلطه ومحسوبكم واحد منهم.. المهم..جدي اللي زاد اسمه كبر زي ثروثه ونفوذه دار مشاريع في اوروبا وكان اكبر مشاريعه في "بريطانيا" وغادي تعرف ع رجل اعمال وفي نفس الوقت رجل دوله وقرر هالراجل يخش معاه شراكه..جدي شاف في الراجل هدا فرصه لتثبيت شغله وتوسيعه في بريطانيا وكان يبي يزيد يقوي علاقته بيه..ولأن عقليته تشبه عقلية اغلب رجال الاعمال والتجار فكر في اكثر طريقه مثالية لربط العلاقات..بس قبل لينفذها لازم ياخد الاذن من شخص مهم... 🌿"ماشاء الله ماشاء الله" زكية وهي تمسح ع شعر ولدها قالت.. /ديما يجيني يقولي علميني الانجليزي ياامي.. سلامه وهو يشوف لولده قال.. /كويس..لكن رد بالك تهمل حفظ القرآن.. تسعة قال:لابوي الا القرآن ديما نمشي لمرعي يحفظ فيا .. ابتسم بوه وقاله.. /كويس كويس..حتى في المدرسه ارفعلي راسي نبيك ديما الاول ماترضاش بغير الاول.. قاله:من غير ماتوصي يابوي زي ماجبت في صف الاول الاول ع المدرسه حتى في صف تاني نجيبه ونقعد هكي ديما حتى في الجامعه.. ضحكوا الزوز وبوه قال.. /ماشاء الله ماشاء الله.. امه مسحت ع شعره وقالت.. /خلاص امي توا وقت نومك برا لدارك.. تسعة مرر نظره عليهم وهو يقول.. /تصبحوا على خير.. واستناهم لين يردوا عليه بعدين توجه لداره.. سلامة:ربي يحفظه ويرعاه.. زكيه بإبتسامة قالت.. /آمين..بعدين شافتله وكملت تقول..ايه بنقولك امس اني وعمتي مشينا لعيلة البندار ع خاطر مرواحة "عبد العزيز البندار" من الحج.. قاللها:من قبل لنروح مشيت طقيت فيهم.. زكيه:لكن تعرف ياسي سلامه اللي سمعته عنهم ماريتاش وين مشيتلهم.. قال بإبتسامه:باهي شن ريتي وين مشتيلهم.. ضمت ايديها لبعض وقالت.. /ريتهم ناس تخاف ربي ويبانوا هكي قاعدين قدم شويه.. سلامه قال.. /هما بعد اللي صار فيهم داروا رواحهم تابوا وبيغيروا اسلوب حياتهم.. قالتله:القلوب مايعلم بيها الا ربي ياسي سلامه من قال توبتهم مش صادقه؟ تنهد وقال.. /تعلمت مانصدق حد يازكيه تعلمت نشوف الناس بوجه غير اللي يوروا فيه.. حطت يدها ع كتفه وقالت.. /حتى اني ياسي سلامه!؟ شافلها بإبتسامه وقالت.. /وانتي دايرة روحك من الناس يازكيه؟ انتي حاجه نازله من الجنة لسلامه.. ضحكت بخجل.. وهو مسح ع شعرها وعقله يفكر في الموضوع اللي يبي يفتحه معاها.. نزل يده وشد بيها يدها وقال.. /وتي روحك غدوة ان شاء الله بنمشوا لطرابلس عندي فيها خدمه بنحطك عند ماليك ونقضيها وبعدين ناخدك وندهور بيك.. ابتسمت وقالت.. /بنباتوا غادي؟ قال:لا مروحين في نفس اليوم بإذن الله.. هي قالت.. /إن شاء الله.. ♤ورفع جدي جداي زكيه لطرابلس خلاها تتغدا عند ماليها وبعد العصر طلع بيها لميدان الشهداء وغادي كان دايرلها مفاجأة ركبوا هو وياها الحنطور اللي قعد يدهور بيهم،جداي قالت..كنت فرحانه هلبه هداكا اليوم مانحسابش جدك بينسف هالفرحة نسف لما خلاني نعرف ان المفاجأه الحقانيه اللي دايرهالي مش الدهوير بالحنطور.. 🌿مقعمزين قرب السرايا لبسها عقد الفل وقال.. /ماراح فل كان لما لبستيه.. ابتسمت بخجل.. شافلها شويه بعدين تنهد وقال.. /زكيه.. شافتله وقالت.. /نعم.. قال:نبي ندوي معاك في موضوع..في حاجه نويت نديرها لكن مانقدرش نفذها قبل لتعطيني الإذن.. بدت ع وجهها ملامح الاستغراب وهي تقول.. /حاجه شني هادي اللي ماتقدرش ديرها من غير اذني ياسي سلامة؟ بلل شفايفه بعدين ضمهم لداخل ورخاهم وقال.. /تعرفي المشروع اللي درته في بريطانيا من شاركني فيه ولا؟ قالت:نعرف.. قال:وتعرفي ان شغلي غادي لازم نلقى من يدعمه دعم قوي بش يثبته ولا؟ قالت:ايه انت قتلي هكي قبل المشاريع اللي يديروها العرب في بلاد النصارى تبي من يدعمها بش تولي قويه وتكبر.. بإبتسامه قال.. /صحة ليك..واني نبي نقوي العلاقه بيني وبين الراجل اللي مشاركني بش يزيد يدعمني ومايستغناش عن شراكته معاي..هدا علاش فكرت في حاجه لو درتها حتخلي بيني وبينه رابط قوي هلبه.. عقدت حواجبها وقالت.. /شن هي الحاجه هادي؟ حط ايديه ع بعض فوق رجليه وقال.. /الراجل هدا عنده بنت نبي نتزوجها.. ♤قالت جداي لما قالي الكلمه هادي تمنيت ربي خدي روحي قالت عمري ماتخيلت يجيني نهار ياخد فيه سلامة عليا..قالت حسيت لساني انربط ماعرفتش نرد عليه كان بدموعي.. 🌿"زكيه قتلك بناخد اذنك كان ماتبيش والله ماهي صايرة" حطت يدها ع فمها وقعدت تبكي بصمت.. هو بضيق قال.. /غير صل ع النبي يازكيه..خلاص سامحيني ياغاليه وانسي اللي قلته.. حاولت تهدي بكي وقالت بنبرة باكيه.. /روح بيا.. هو عقد حواجبه وقال.. /وين!؟ قالتله:للألف والخمسين.. تنهد وقال.. /حاضر..مسح دموعها ونوضها ولما جي بيشد يدها هي جبدتها وحطتها ع يدها التانيه.. شافلها بضيق بعدين غير نظره القدام ومشوا مع بعض بطريقهم لسيارته... ♤قعدت جداي مخاصماته اسبوعين خصام مش باين لعزوزتها لكن ذهيبه حست ان في شي صاير وسألتها وجداي ماقدرتش تحكيلها خافت تمشيله تعاركه وتفسد العلاقه بينه وبين امه وهي طيح من عينه..قالت جداي لأني ماجاوبتهاش اجابه اقنعتها مشتله هو سألاته.. 🌿"خيرك هبلت! زكيه ياخدوا عليها!؟" هو بضيق قال.. /يام الزواج هدا زواج مصلحة.. امه قالت.. /قول الحق سلم ولدي عجباتك الفرنجية ولا؟ ضحك وقال.. /والله ماهكي يام.. ذهيبه قالت.. /مدام مش هكي معناها مصلحتك دورها بحاجه تانيه غير الزواج.. ♤لكن جداي قالت بعد ماقعمزت مع روحي وفكرت فيها لقيت ان المراة الصح واللي تحب راجلها حق ماتوقفش في طريق الحاجة اللي يحلم يوصلها قالت اني نعرفه كويس ونعرف طموحه ونعرف قدري عنده مفروض كبرت عقلي وتصرفت صح..راجل تاني كان خداها عليا نبي ولامانبيش ،هكي قالت جداي..مااستغربتش طريقة تفكيرها لأني عرفت من فكروا بنفس الطريقه ورضوا باللي هي رضت بيه.. 🌿في مكتب سلامه.. كان مقعمز يقرا في عقود عمل.. دق الباب وهو لأنه يميز الدقه كويس ابتسم وقال.. /خشي.. انفتح الباب وخشت زكيه تقول.. /فاضي ياسي سلامه؟ حط الوراق ع المكتب وقال بإبتسامه.. /كان مش فاضي نفضى للريلا.. حطت ايديها ع بعض ونزلت عيونها ومشت قعمزت ع الكرسي اللي مقابله وهو يتأمل فيها من كثر شوقه ليها.. هي حمحمت وقالت.. /شوف ياسي سلامه..اني فكرت في هداكا الموضوع كويس..بلعت ريقها وقالت..ماعنديش مانع لكن بشرط.. بإبتسامه قال.. /شن هو؟ قالت:ماتسكنهاش هني.. قال بنفس الابتسامه.. /بنسكنها هني.. رفعت عيونها فيه والدموع عبوهم وهي تقول.. /مانقعدش معاها في حوش واحد.. قال:واني مش مخليك معاها في حوش واحد.. عقدت حواجبها بإستغراب.. هو قال:من الاسبوع الجاي بتسكنوا في القصر انتي وامي وولي العهد.. بدت ع وجهها ملامح المفاجأه.. وهو بإبتسامه كمل يقول.. /راضيه يازينه الزينات؟ نزلت عيونها وقالت.. /عمري ماحنرضى بوحده تشاركني فيك ع خاطرك بس قبلت بالسيف عليا.. قال:خوديها مني كلمه قلبي مايقدر حد يشاركك فيه. . رفعت عيونها وشافتله بإبتسامه وعيونها مليانات دموع.. هو ناض من مكانه وقدملها لين وصل فيها شد راسها بإيديه وطبع عليه قبله بعدين قال.. /ربي يديمك عليا من نعمه.. رفعت عيونها المدمعات فيه وقالت.. /ولايحرمني منك ولامن حبك...
.....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
