■■■■■■■■■■■■■■■■■■■■■
🌿 إلى إبني:
لا أستطيع أن أعدك بأنني سأظل موجودًا لبقية حياتك؛
ولكني أعدك بأنني سأظل أحبك لأخر حياتي".. 🌿
••••••••••••••••••••••••••••••••••••••••••••••••••••••••••••••
♧وتعدي الشهور الأولى من حمل عمتي وخالتي حسناء من احلى مايكون عمي كان محاوطهم بإهتمام كبير بالأخص عمتي اهتمامه بيها كان مبالغ فيه؛لما يكون موجود في القصر شبه مايفارقش فيها ولما يطلع لازم كل شويه يتصل ويكلمها هي بنفسها مايكتفيش بالسؤال عنها لأي حد غيرها يرد ع الهاتف..
وهالاهتمام ماكانش منه هو بس حتى حنينة زكيه لدرجة انها تقعد تحرص ع العمه هانيه لما تجيهم ماضايقهاش بنظرة..
وهالحال اكيد بيضايق الكناين الكبار لكن..
خالتي نزيهه قعدت ع حالها دابها داب شغلها معاش تختلط هلبه بالعيله..
اما خالتي فريحه حاولت تحسن علاقتها بعمتي ربيعه وعمتي لأن قلبها طيب ونيتها صافيه ديما تعاملت معاها عادي ولاكأن صار شي...
🌿خلال هالفترة تسعه الى جانب هدا كله كان مشغول بشراء املاك واحد من اهم وجهاء الألف والخمسين "النعاجي" وحتى كمال البندار يسعى للحاجه هادي لكن هالمرة خش معاهم منافس جديد..عبد الحافظ البدري اللي كان حاط عينه ع محلات ليه في السوق الكبير يبي ياخدهم وهالرغبه حرضاته اخته وديعه ع تنفيذها..
والنعاجي اللي كان سعيد جدا بتهافت المشتريين عليه عرف كيف يرضي الجميع ويبيع لكل واحد مايرضيه..
باع لتسعه ارض كبيره موقعها استراتيجي وسعرها في العلالي ولأنه عارفه يدفع ويمسكش في يده ع الحاجه اللي تستاهل باعهاله طول مع انه كمال كان يبيها..
لكنه عرف كيف يرضي كمال لما عرض عليه ارض تانيه جايه ع البحر واقنعه انه يقدر يدير عليها مشاريع ناجحه جدا بسبب موقعها وكمال بعد استشار شري الارض هادي بالسعر اللي يبيه النعاجي..
اما محلاته في السوق الكبير باعه جزء منهم لعيلة البدري وجزء منهم لكمال البندار تسعه مافكرش فيهم لأن الأرض اللي خداها كانت مهمه عنده اكثر منهم..
وماقعد من املاكه من حياش وغيره باعهم لناس جايه من مدينه تانيه بش تستقر في الالف والخمسين...
🌿🌿🌿🌿🌿🌿🌿
ويبدا العام الدراسي الجديد..
السنه هادي سلامه وكريم شهاده اعداديه..
لكن توزيعهم ع الفصول هالمرة فرقهم عن بعض بس عزة حتى المرة هادي جت مع سلامه في نفس الفصل..
وفي نفس الفصل انضم طالب جديد اول مرة يقرا في مدرسه "نور المعارف" جاي من طرابلس حتى هو ويعتبر من الطلبه المتفوقين جدا والمميزين اسمه "عز العرب الهنشيري"
وعزة اللي كانت معاهده نفسها تتفوق ع سلامه العام هدا ماحطتش في بالها انها حتقابل منافس اخر شرس وهالمنافس حيكون لسلامه كذلك..
🌾🌾🌾🌾🌾🌾
في البنداريه..
تحديدا حوش كمال البندار اللي كان دايره عزومه زي العاده وهالعزومه لتجار كبار مع رجاله المقربين وعديله وعزم معاهم الشيخ صفي الدين بإعتباره ولى ليه قيمه كبيره في البنداريه ولازم يحضره في عزايمه ومناسباته بش يتبارك بيه..
🌾=السوق العالي ولت ليه كلها..
الساعدي قال..
/في كل مكان حاط يده وصلتني معلومات انه ناوي يجي هني..
كمال قال..
/يجي هني وين يعني!؟
الساعدي قاله..
/للألف والخمسين بيستقر فيها..
واحد من الحضور قال..
/الالف والخمسين ولت وجهة للتجار والناس الكبار..
الزقطي قال..
/الخدمه كلها فيها والدوله مدايره لكبارها الف حساب..
=مزبوط..لكن وصلتني دوة انهم ناويين يديرولها رئيس بلديه..
كمال:زيها زي باقي المدن في البلاد مدام الوضع فيها ليه سنين مستقر خلاص..المهم توا المشري وين قاعد في الباب العالي ولا ولى لتونس؟
=ولى لتونس قالوا بيصفي شغله غادي وبيروح..
كمال قال..
/خلاص كان شفته قوله كمال البندار يبي يهدرز عليك..
=حاضر يابيي..لكن راهو نبي ننصحك ردي بالك منه راهو هدا ابليس كبير..
صفي الدين اللي كان طول ماهما يحكوا مركز بنظره في مسبحته ويسبح لما سمع الكلام اللي قاله ضيف كمال رفع عيونه فيه..
وكمال رد على ضيفه بإبتسامه كبر..
/واني نلبس ابليس شلاكته بالمقلوب..
ضحك صفي الدين..
كلهم شافوله وكمال بضحكه قال..
/سامحنا ياشيخ مرات نقولوا دوة ماتعجبكش..
كمكم صفي السبحه وقاله..
/عجيب امر بني آدم يابيي كمال فيه من الكبر مايخليه يشوف نفسه اخبث وادهى حتى من ابليس..
كمال ضحك وقال..
/وراسك ياشيخ في بنادميه فايتين ابليس غادي في الشر والشطانه..
قعد يضحك صفي الدين وهما يضحكوا معاه..
كمال:هدا الحق..
هدا صفي الدين ضحك بعدين هز راسه بإيجاب ورجع يسبح بالسبحه...
🌾ومن مضافة كمال البندار لحوشه اللي كانت كوجينته مزحومه بالخدم واللات وهما يتعاونوا ع الغدي..
🍃"باهي بتجيب غادي ولاهني؟"
زاهيه قالت..
/لا وين هني ياللا خديجه لازم تجيب في المستشفى غادي الدكتور اللي عالجها قال مفروض تقعد غادي حتى بعد جيابها..
خديجه قالت..
/معناها بتمشيلهم غادي..
زاهيه:قالي مسعود راجي لين نقولك تعالي..
خديجه قالت..
/ان شاء الله تحل عويناتها ع خير وتفرحوا بالعيل..
زاهيه قالت..
/آمين يارب العالمين وحتى انتي ياللا خديجه تحلي عويناتك ع خير..
خديجه والموجودات معاها في الكوجينه قالوا...
/آمين..
🌾ومن داخل الحوش لجنانه..
وين ماكانوا الصغار يلعبوا..
كانت جليله مع بنات اخت فطيمه يلعبوا بالألعاب..
العاب جليله مختلفه عن العابهم كلها جديده ومن النوع الغالي
=محلاهم العابك جليله من وين شريتيهم؟
جليله:بابا جابهولي من ايطاليا..مدت يدها وقالت..وجابلي الخاتم والحديده هادم..حطت يدها ع رقبتها وقالت..وجابلي السنسله هادي..كله جابوهلي من ايطاليا حتى القفطان والكندرة..
وحده من البنات قالت..
/سعدودك..
والتانيه قالت..
/عطيني الخاتم نلبسه شويه..
قالتلها:لا قولي لبوك يشريلك..
البنات شافوا لبعض بنظرات ضيق بعدين ردوا نظرهم ليها وهما يتفرجوا ع حاجاتها..
🌾وحداهم بمسافه بسيطه..
كانوا الولاد الصغار يلعبوا منهم ريان وخوه عمران..
ريان وهو يلعب فجأه وبدون سابق انذار طاح مغمى عليه..
الصغار قعدوا يشوفوله وخوه يكلم فيه..
"ريان ريان نوض نوض"
شافولهم البنات بعدين مشولهم يجروا..
جليله قالت..
/من طيحه!؟
عمران قال..
/حد..
ووحده من بنات اخت فطيمه خشت تجري بش تخبر النساوين..
ويطلعوا كلهم يجروا وفي مقدمتهم فطيمه وهي مرعوبه تقول..
"حي عليا ولدي حي وينه وينه"
وتوصل فيه وطبس عليه ترفعه في حضنها وهي تضرب ع خدوده وتقول بهلع..
/ريونه ماما ريان..
اختها قالت بخوف..
/من طيحه!؟
عمران وهو خايف زيهم قال..
"هو..بروحه"
ولأن ريان كان زي الجثه الهامده ماتحركش صرخت فطيمه صرخه فجعه بأعلى حسها وصلت للرجاله فلمضافه وسمعوها قبلهم سلطان ومحرز اللي كانوا مقعمزين قدامها وطول مشوا جري للحوش ويطلعوا وراهم كمال ورجاله وعديله..
وين وصلوا في الباب اللي يدخل للحوش خش كمال بس والباقي قعدوا برا..
الساعدي بقلق..
/ان شاء الله مش الصغار بس..
"يلطف بيه الله يلطف بيه الله"
التفتوا وشافوا صفي الدين وهو يحرك في السبحه وع وجهه باديه ملامح الأسف...
🌿🌿🌿🌿🌿
"نجيه نجيه تبارك الرحمن عليه"
تعويضه وهي مبتسمه قالت..
/سلمك ياللا..
ربيعه وهي تشوف لولد تعويضه اللي كانت شداته زكيه قالت..
/ماشاء الله زي الغزال..
تعويضه قالت..
/سلمك يااللا..
زكيه قالت..
/معاش نعرفك ياتعويضه بتحملي تاني جيبي هني وحني نعانوك ونربوا صغارك مع صغارنا..
بلقيس وهي مبتسمه قالت..
/كلنا فقدناك مش غير امي ياتوتي..
ضحكوا وهي قالت..
/والله حتى انا توحشتكم واجد..
زكيه قالت وهي مبتسمه..
/خودي هالسمح وارفعيه للصغويرة خل يلعب معاهم وانتي بري شوفي شغلك هي..
قدمت تعويضه خدت ولدها وهي تقول بإبتسامه..
/حاضر ياللا..
ومشت بولدها وهما معاهم بعيونها زكيه قالت..
/مانطمنش كان ليها هي بعد برنيه ..
ربيعه:امينه هلبه وتخدم بقلب ورب..
زكيه:ايه وينعبا عليها..
فريحه:ماشاء الله ع وليدها نقيشته تهبل.. بلقيس:ايه سموح هلبه..شن قالت اسمه ادهم؟
ربيعه بضحكه قالت..
/ايه قالت حناه ام بوه مصريه حكمت عليهم يسموه ادهم..
زكيه:قنين الاسم..
فريحه:ايه ومميز..
زكيه:ع سيرة مميز..الروضة اللي فيها وسام وثريا كلموا تسعه عليهم قال ماخلوا ماشكروا فيهم وحطوا قالوله مستوى استيعابهم عالي واذكياء ويتكلموا كويس..
فريحه قالت بإبتسامه..
/ايه صح ديما يقولولي وسام اكبر من عمره في هدرزته وطريقته في الكلام.
زكيه:المديرة قالت لتسعه مفروض يخشوا المدرسه العام الجاي..
بلقيس:العام الجاي يسكروا اربعه سنين معقوله!؟
ربيعه:اللي زيهم الله يبارك عليهم يقولوا عليهم نوابغ..
زكيه:ايوه هكي قالت عليهم المديره لبوهم..
فريحه وهي مبتسمه قالت..
/كان هكي خلاص نديروا اللي قالت عليه الابله..
🌿وين ماكانوا موجودين الصغار..
كانوا اشرف وكريمه واقفين ع وسام وثريا يشوفوا فيهم كيف يكتبوا في الارقام..
كريمه كانت مذهوله واشرف متفاجئ..
ثريا بعد كملت مدت كراستها لخوها وقالت..
/صح شروفي!؟
وسام قلدها وقال..
/حتى اني..
شاف اشرف كراستهم وقال وهو مبتسم بمفاجاة ..
/صح كله صح..شاطرين هلبه انتم..
ابتسمت ثريا بفرح ووسام شافلها بإبتسامه..
لكن كريمه كانت تشوف لأختها بنظرات غيره ممزوجه بالحزن وهي تتخيل في أمها كيف تشكر وتمدح فيها..
🍃للاسف بعد اللي صار نزيهه زادت في الجفاء والابتعاد عن كريمه وهي لولا وجود ربيعه في حياتها راهو نفسيتها دمرت تماما🍃
🌾ونفسية فطيمه كانت مدمرة..تبكي وتندب وتنادي بإسم ولدها واللي حواليها ع قد ماحاولوا يهدوها ماقدروش..
🍃وريان في المشفى بعد ماداروله الفحوصات اللازمه دخلوه للعنايه فورا والطبيب المشرف ع حالته خبر بوه خبر قسمله قلبه لما قاله..
"ولدك مصاب بمرض السكري"
ومش هدا بس اللي قاله عاتب وعارك ع الاهمال اللي ماخلاهمش يلاحظوا عليه الاعراض لين وصل لهالحالة الخطيره..
وعاد كمال لما سمع كلامه روح طول للحوش وهو مايشوف في شي..
ولما وصل غادي وخش نادى فطيمه بصوت مخيف..
هي طلعتله تجري ملهوفه من خوفها ع ولدها واول ماوصلت فيه ينزل ع خدها بصفعه من قوتها انفها نزف لااهتم لكونها حامل ولامفجوعه ع ولدها نزل فيها بأقبح وافضع الشتائم مسح بيها الارض والنساوين داخل يسمعوا اختها وزوجات رجاله المقربين والخدم..
"والله ياكلبه والله تصير فيه حاجه نطلقك وبعد تجيبي ناخد منك العيل ومعاش تحلمي تشوفي الصغار لأخر يوم في عمرك"
وبعد قال كلامه طلع يجري بش يولي للمشفى وخلاها في حالة صدمه من اللي سمعاته عن حالة ولدها..
طلعتلها اختها ومعاها باقي النساوين..
اختها اللي كانت تبكي لما شافت انفها ينزف قالت بفجعه..
/حي عليا!
فطيمه وهي ترجف قالت..
/الحي عليا اني يانجيه ريونه فيه السكر وليدي فيه السكر ياروحي عليه ياروحي..
وطيح بين ايدين اختها فاقده الوعي...
🌿🌿🌿🌿🌿
الساعه الرابعه عصرا..
في النادي..
كانت هانيه موجوده مع حماتها وصديقتها تيسير مقعمزات في مدرجات المتفرجين في ملعب التنس وحتى فداء كانت موجوده معاهم وعمتها مطلعتها بأحلى طله وهي ملبستها ملابس تشبه ملابسها..
🌱تيسير:ماشاء الله عليه سلامه شخصيته زي بوه..
هانيه قالت بضحكه..
/ماما مشبهاته لبابا الله يرحمه ديما تقول وين نستاحش بوك نقعد نتفرج عليه..
تيسير قالت بإبتسامه..
/الله يرحمه وربي يحفظ سلامه..
هانيه وهي مبتسمه قالت..
/آمين..
🌸من جهة تانيه كانت عزة مع صاحبتها وداد يتفرجوا ع سلامه وهو واقف ع بنت يكلم فيها..
البنت هادي حتى هي طالبه جديده في مدرستهم لكن تقرا تاني اعدادي وكذلك عضوة جديده في النادي..
🌿"لاعادي ماعنديش مشكله لكن وين؟"
ميسون قالت..
/عادي تجينا لحوشنا تقرينا؟
ضحك بتعجب وهو يقول..
/كان بوك وامك عندهم عادي نجي..
قالتله:ايه عادي مافيها شي..
قاللها؛باهي نستأذنك بنمشي نلعب..
هي هزت راسها وابتسامتها وجهها وهو ردلها الابتسامه بعدين مشي وهو يحرك في شعرع بيده من الامام للخلف..
🌸وداد:شن تبي منه هاللصيقه مش ساد شاداته في المدرسه!؟
عزة وهي ممتعضه احتفظت بصمتها وعيونها ع سلامه وهو يلبس في الربطة ع راسه..
"شن جو"
غيروا انظارهم للشخص اللي وقف عليهم وكلمهم..
عز العرب وهو مبتسم..
/نقعمز عادي؟
عزة رفعت حواجبها ونزلتهم بعدين قالت..
/قعمز..
ضحك وقعمز جنبها بمسافه بعدين قال..
/قداش ليك عضوة هني؟!
وداد ابتسمت وعزة قالت..
/من السنه اللي فاتت..
قاللها:شن جوه النادي؟
قالتله:اعرفه بروحك..
قال بضحكه:خيرك ديما عصبيه انتي؟
عزة:مش عصبيه اني عاديه..
عز العرب قال بضحكه..
/لا والله ديما عصبيه تكلمي فيا بطريقه كأنك تكرهيني!؟
رفعت حواجبها وقالت..
/نكرهك!!؟
ضحكت وداد..
هو قال بضحكه..
/هاه شوفي كيف تكلمي فيا حتى في المدرسه لما نكلمك ع حاجه تكشخي..
قالت:انت دير في روحك فالح لما تقعد تصلح في اجاباتي..
ضحك وقال..
/نساعد فيك..
عزة:مانبيش مساعده شكرا..وياريت تسكت وتخليني نتفرج..
ضحك ووداد تضحك معاه..
اما عزه ركزت ع المباراة بين سلامه وواحد من اعضاء النادي..
وداد شافت لعز العرب وقالت..
/تلعب تنس!؟
هز راسه وهو مبتسم..
قالتله:وشن تاني؟
هو قال:كرة الطايرة وكرة القدم..
وداد:امم..
ركز عز العرب ع سلامه وهو يلعب بعدين قال..
/لعبه مليح..
عزة قالتله..
/وانت؟
ابتسم وقال..
/يقولوا..
شافتله وقالت برفعة حاجب..
/تقدر تغلب سلامه؟
ضحك وقال..
/مش عارف..
تأففت بتذمر وقعدت ساكته وعز العرب يشوفلها وهو مبتسم..
🍀ويتم اول شوط بتقدم سلامه وهو ماشي بش يشرب ميه شاف للمدرجات ابتسم لعمته وصاحبتها اللي حيوه بعدين ضحك لما شاف فداء رافعه يدها تحي فيه حتى هي وردهالها..
خدي شيشه الميه من واحد صاحبه ولما جي بيشرب منها عيونه جو ع عزه وهي تهدرز ع عز العرب..
فتح الشيشه وبدي يشرب وهو يشوفلهم وكريم ووداد معاه ع الخط...
🌸عزة بدهشه:حي امك صاحبة ماما؟
ضحك عز العرب وقال..
/حتى اني اول مرة نعرف..
عزة بإبتسامه؛تهبل امك..
هو بإبتسامه قال..
/شكرا..
وداد:اهو طلعتوا معارف..
عز العرب:وان شاء الله نولوا صحاب..
ابتسمت عزة وردت نظرها للملعب لقت الشوط التاني كيف بادي..
🌿🌿🌿🌿
"شن صار في المزين متاعك امتى بتفتحيه"
بلقيس:الشهر الجاي بإذن الله..
ربيعه:باهي بنطلب منك خديمه..
ابتسمت بلقيس وقالت..
/ادللي..
ربيعه قالت بإبتسامه..
/سلمها ياربي..فدوى اخت نوال صاحبتي دور ع خدمه طلع منها مصروف قرايتها زي ماتعرفي هي بتبدا تقرا طب وقراية الطب تبي..هي فالحه في المكياج وماشاء الله عليها تتعلم بسرعه وناشطه ناشطه ينعبى عليها..
بلقيس وهي مبتسمه قالت..
/خلاص اعتبريها ولت تخدم معاي..
ربيعه وهي مبتسمه قالت..
/ربي يجبر بخاطرك حبيبتي..تو نكلمها ونقوللها تجي تتفاهم معاك امتى يناسبك؟
بلقيس:الاربعاء الجايه..
ربيعه قالت بإبتسامه..
/خلاص تو نقوللها..
وتخش عليهم حسناء لدار المعيشه وهي تقول..
/السلام عليكم..
ردوا عليها السلام وهي قعمزت جنب ربيعه وقالت..
/خلاص بنفوت الخدمه لين نجيب معاش قادرة..
ربيعه:قتلك وحمك واعر ماتقدريش عليها الخدمه وهدا حالك..
حسناء:كملي عليا كملي مش ساد تسعه اللي عطاني محاضرة طويله عريضه في السيارة وكل شويه يقول..اني قتلك لكن انتي راسك مسكر..
ضحكوا على تقليدها لطريقه تسعه في الكلام..
وتخش اروى تجري وهي تقول ببهجة وفرح..
/عمو قيس جي عمو قيس جي..
بلقيس صاحت بفرح وناضت تجري وطلعت ورا اروى وخلت نساوين خوها يضحكوا...
▪▪▪▪▪▪▪▪
"مش مصدقه مش مصدقه!"
قيس وهو يضحك قال..
/باهي حولي خنقتيني..
طلقاته وشدت ايديه وهي تقول..
/قداش بتقعد؟
قيس قال وهو مبتسم..
/بنولي بداية السنه الجايه ان شاء الله..
صاحت بلقيس بفرح وولت تعنقاته بقوة وهو يضحك..
🌿وجو معاه محفوظ وزوجته عبير اللي كانت حامل في الشهر السادس زي ربيعه بالزبط وكالعاده اول مكان يروحوا عليه حوش خواله بش يشوفوا امه..
🌿🌿🌿
وتاني يوم داروا عزومة غدي ع خاطر مرواحتهم التمت فيها العيله كلها ويافرحة ربيعه بجية عبير تقول شافت اختها..
🍀"وانا كمان كتير اشتقتلك طمنيني شو عامله مع الحمل"
ربيعه قالت؛سبحان الله ياعبورة في حملي هدا ماتعبتش بكل الحاجه الوحيده اللي مخليتني متأكده اني حامل كثرة ايكالي..
عبير قالت بضحكه..
/ماشاء الله وكمان بطنك برزت..
ربيعه وهي مبتسمه قالت..
/ايه..وانتي؟
عبير قالت:بالبدايه كثير تعبت والله حتى محفوظ صار عم بيضل معي بالبيت من خوفوا عليا بس هلأ صرت احسن الحمد لله..ان شاء الله رح نضل هون لحتى خلف..
ربيعه بفرحه:بالله!
ضحكت عبير وقالت..
/والله..هي رغبة محفوظ بدوا امه تحضر ولادة ابنه البكري..
ربيعه قالت؛واهلك؟
عبير:رح يجوا ع الولاده..
جتهم حسناء قعمزت جنبهم وقالت..
/عاودوا من الاول..
ضحكوا وعبير عاودتها بإختصار شن كانوا يهدرزوا..
عبير:بدي يجيني بنت بس محفوظ بدوا ولد..
ربيعه؛هو قالك؟
عبير:ماقال بصريح العباره انا فهمت من تلميحاته..
حسناء:المهم يجي عيل سليم معافى ولد ولابنت..
عبير وهي مبتسمه قالت..
/ايه مزبوط..
وغيرت نظرها لهانيه لما شافتها خاشه وفداء شاده في قفطانها وهي تقوللها..
"أمتو هوبا"..
هانيه ضحكت ورفعتها في حضنها وهي تقول..
/انتي بترقدي خلاص..شويه فيري نمشي نرقد فدو ونجي..
ومشت هانيه طلعت بفداء..
غيرت عبير نظرها لربيعه وقالت..
/تعلقت فيها كثير..
ابتسمت ربيعه بحزن وقالت والدمعه في عيونها...
/حتى عمتها متعلقه بيها..يقولوا في صغار هكي يحبوا الناس التانيه اكثر من امهاتهم..
حسناء غيرت الموضوع وهي تقول..
/سمعت تسعه بكري يقول غزلان بنت مرعي بيجيبولها بيان..
تفاجئوا وربيعه قالت..
/امتى!؟
حسناء:الاسبوع الجاي..
ربيعه شافت لفاطمه اللي كانت مقعمزة بين بلقيس وفريحه تهدرز معاهم قالت..
/ماقالتش بكل فاطمه..تعرفوا باين عليها حامل حتى هي ضاعفه ووجهها اصفر..
حسناء بضحكه:حتى اني لاحظت وقصقصت تسعه نعرف اسرار مرعي عنده قال ايه عياله حامل..
عبير:مابعرف ليش بتخبي شي رح يبين مع الوقت..
ربيعه قالت..
/واحنا مالنا..
ضحكوا حسناء وعبير..
وع ضحكهم خشت نزيهه وخشتها تقول ياارض اشتدي ماعليكي قدي..
وجه ربيعه انقلب لما شافتها بعدين غيرت عيونها عنها..
وهي سلمت ع فاطمه بعدين التفتت لعبير قدمتلها وعبير ناضتلها سلموا ع بعض وسألوا عن احوال بعض وولت نزيهه لفاطمه وفريحه وبلقيس وقعمزت معاهم...
🌾ومن لمة ع الود والفرح للمة ع الهم والحزن..
فطيمه كانت بتموت ع ولدها تبي تمشي تشوفه طمن قلبها شويه لكن قوانين راجلها تمنعها حتى من الحاجه هادي..
اختها نجيه حكت لأمها وخواتها ع اللي داره فيها كمال خواتها تسخطوا عليه لكن امها كالعاده عطاته مبررات وركبت بنتها الحق ودارتها هاملة ولدها..
🍃دلالة؛اخر مرة جتنا فيها حسيته مش مزبوط قلتلها ولدك هدا فيه حاجه تقولي لايام بعيد السو عليه مافيه شي غير حركي وناشط هلبه..
نجيه؛كلنا هكي كنا فاهمين يما..
بنت تانيه من بناتها قالت..
/ماناش دكاترة ولامتعلمين زي هالنساوين بش نعرفوا المريض من الصحيح يما..
عكرشت دلالة وجهها وقالت..
/عليك سبل..سكري فمك سكريه..
بناتها التزموا الصمت وهما في قمة الاستياء وهي قعدت تفكر بخوف في حاجة وحده بس تهديد كمال البندار..
🌾كمال اللي مافارقش المستشفى بكل..
وين شاف حالة ولده في العنايه قلبه تفتت وروحه انحرقت بكي عليه بدموعه..
🍃"تو تشوف يابوي كيف يولي حاله باهي"
كمال بحزن:هدا سكر ياولدي والسكر اللي عند خوك بيقعد متعبه عمره كله..
سلطان قال بحزن..
/كيف يابوي؟
تنهد كمال بحرقه وقال..
/سلم ولدي خليني توا مانبي ندوي في شي..برا روح مع عمك الزقطي برا..
سلطان:لالا مانروحش ونخليكم يابوي..
ضمه كمال وقعد يطبطب ع كتفه وسلطان في حضن بوه كان شاد دمعة الألم ع حال بوه وحال خوه الصغير..
🌿🌿🌿🌿🌿
"بسم الله ارقيكم بسم الله ارقيكم"
هادي وديعه مقعمزه حدا ولاد خواتها ترقي فيهم وهما الزوز مقعمزات يشوفولها بإبتسامه..
ع خشة امهم قعمزت حداهم وهي تشوف لوديعه كيف تقرا ع الصغار ابتسمت بعدين قالت..
/شنو قالوا متاعينك ع عزومتك يارقيه؟
رقيه؛اييه يما ماخلوا ماقالوا من شكر يام عمتي قالت مانعرف ناكل كان عندكم انتي واختك..
ضحكوا ووديعه قالت..
/قوليلها سلم الام اللي علمت وورت..
الزوز قالوا مع بعض..
"ايه والله..ربي يطول في عمرها..
عائشه"امهم" قالت وهي مبتسمه..
/سلم بنياتي سلمهم..
ع خشة الكنه "نجوى" مرت بوعجيله بسفره القهوة والحلو..
مشتلهم بسرعه وبدت تفرق عليهم..
رقيه خدت فنجان القهوة وقالت..
/ان شاء الله عرفتي دير قهوتك زي ماعلماتك وديعه؟
قالتلها:ايه حتى انشديها..
وديعه قالت:ايه ولت معقوله..
عائشه قالت..
/لكن مازال تبي بش تجيبي البصله كويس..
عاتكه قالت..
/صح طبيخة البصله باسله شويه..
هي حطت السفره بعد مافرقت عليهم وقالت..
/درت زي ماقالت عمتي بالزبط مانعرفش علاش جت هكي..
وديعه:تو تتعلمي تو تتعلمي..بري توا حطي العشي ع النار..
رقيه:في طريقك جيبي لهاية ولدي منقعتها في طنجرة ميه سخونه..
قالت:ايه ايه ريتها..ولفت ومشت طلعت من الصاله..
وديعه رفعت حواجبها ونزلتهم وهي نقول..
/عليك مقلب درتيه فينا ياعاتكه.
ضحكت رقيه..
عاتكه وهي محرجه قالت..
/هما اللي داروا فيا المقلب ياوديعه امها وحده كذابه
رقيه بضحكه..
/وانتي فيسع ينضحك عليك..
عاتكه ضحكت بسخريه وقالت..
/يازقطيه انتي..
ضحكت رقيه..
وديعه:لو بوعجيله راضي عليها نقولوا لكن حتى هو مش مريحاته..
عاتكه بضيق قالت..
/علاش شن قالك؟
وديعه:قالي مش زي ماكنت نتمنى لكن الله غالب هدا نصيبي والحمد لله ع كل حال..
عائشه:معاها معاها تو تنصلح..
وتخش عليهم بعد ماسمعت اخر كلامهم وهي شاده دموعها قالت..
/خودي رقيه..
خدت رقيه اللهايه وقالت..
/صحيتي..
وهي لفت وهربت بدموعها اللي تعودت تطلق سراحهم لما تقعد بروحها في الكوجينه...
🌿🌿🌿🌿🌿
"سلامتك ياوسام سلامتك مكلوب كلب هالولد يالطيف"
هادي هنادي تمشي بإتجاه دار الغسيل في القصر وهي رافعه المفرش اللي لوثه وسام بالعصير..
وهي ماشيه سمعت حد يقول..
"لوسمحتي"
قلبها قريب وقف التفتت ووجهها محمر..
/نعم ياسيدي..
قيس:بيجيني واحد توا ديري قهوة..
هي قالت..
/حاضر..
قيس قال بإبتسامه..
/يشكروا في قهوتك هلبه قلنا خل نجربوها..
ابتسمت من قلبها وقالت..
/والله نخليك تشرب قهوة وتقول بعدين لاذقت قبلها ولابعدها..
ضحك وقال..
/تو نشوفوا..ومشي وخلاها وهي تبع فيه بقلبها وعيونها ومجرد مااختفي عن نظرها تنهدت من قلبها وقالت..
/ياعليك راجل ياربي ياعليك راجل..
نزلت عيونها للستار بعدين قالت بإستعجال..
/فيسع حطيه في الغساله وبري ديري القهوة فيسع..
🍃ومن جهة تانيه تستمر محاولات مجيده مع جمال..
بعد ماحطت زينه ع وجهه وكثرت وطلعت جمتها من الشاربه وحطت عطر خدت سفره فيها مشتلت بالعسل مع طاسة شاهي ومشتله في مكانه اللي يحب يقعمز فيه..
وين وصلت فيه قالت..
/جبتلك المشتلت زي ماتحبه ومعاه طاسة شاهي احمر ثقيله زي ماتشرب فيه..
شافلها شويه بعدين قال..
/مجيده..من عرفك ع اللا نزيهه؟
انخطف لون وجهها وهي تقول..
/وحده اسمها رويسه معروفه هلبه هي اللي تجيب في الخدم للات في الالف وخمسين..
شافلها شويه بعدين قال..
/ارفعيها قدمتله وقالت بشي من المياعه..
/كان نعرف علاش هكي مسكر ع روحك علاش ما تبيش تعيش حياتك تحب وتتزوج..
قعد يشوفلها بصمت بدون مايصدر منه اي تعبير حتى ع وجهه..
هي نزلت راسها وقربتله وقالت..
/اني نحبك هلبه جمال نموت عليك..
وتجيها صفعه كادت طير راسها من مكانه..
شدت ع خدها اللي معاش حست بيه وهي مصدومه ومفجوعه..
وهو قعد مقعمز في مكانه وقال بنبره هاديه عكس ملامح وجهه..
/كان خاطرك تقصري ايامك في الدنيا عاوديها مرة تانيه..
وهي ترجف جت بتمشي هو قال بصوت غاضب..
/ارفعي اللبز اللي جبتيه..
بخوف شديد خدت السفرة ومشت وهي ترعش..
من بعيد بلعيد اللي شاف كل شي كان يشوفلها بإزدراء تعبى قلبه اتجاهها بالكره والاشمئزاز لكن واحد من الحراسات كان من اصحاب النفوس الخبيثه لما شاف الموقف تأكد ان مجيده فريسه سهلة المنال يقدر يوصل فيها ويشبع رغباته الدنيئة..
لكن هالمشهد ماكانوش هما بس اللي شافوه حتى حسناء شافاته وهي جايه من الحديقه الخلفيه للقصر..
▪▪▪▪▪▪▪▪▪
"انتي فهمتي غلط يااللا والله العظيم هو اللي يبي يدير معاي الغلط"
حسناء قالت بغضب..
/سكري فمك واسمعي كويس هادي اخر فرصه اخرلك فرصه..
وبعد مارمقتها بنظرة تهديد مشت وخلتها وهي تشوفلها بنظرة حقد ممزوجه بالوعيد..
🌿ومن حديقه القصر لصالون الضيوف..
كانوا بلقيس وربيعه مقعمزات مع فدوى وهما يسمعوا منها..
🌱فدوى:مانقدرش ع الخدمه يوميا لازم يكون عندي وقت للقرايه..
بلقيس:تخدمي تلاته ايام في الاسبوع؟
ابتسمت وقالت..
/كويس هلبه..
ابتسمت ربيعه وبلقيس قالت بإبتسامه..
/خلاص تفاهمنا واني نعطيك وعد نراعيك ونساعدك لو صار معاك ظرف مفاجئ..
فدوى وهي مبتسمه بإمتنان قالت..
/بارك الله فيك ياللا..
بلقيس ابتسمت وقالت..
/فيك بارك الله..
شافت فدوى لربيعه ابتسمتلها ربيعه ودارت حركه بأنفها خلت فدوى تضحك..
🌿ومن صالون الضيوف للمربوعه..
وين ماكان قيس مقعمز مع صديقه المقرب "عبد الوهاب"..
🍀عبد الوهاب صديق لقيس من ايام الثانويه وكان من ضمن الأوائل ع البلاد لكنه طلع يكمل دراسته في بريطانيا ع حسابه الخاص خش كليه الطب بعد اجتياز امتحان القبول وقري فيها وكان من الطلبه الليبين المتفوقين في بريطانيا وحتى بعد تخرج اصبح طبيب ناجح ومازال قاعد يخدم ويقرا في بريطانيا سعيا لنيل الدرجات العليا في مهنته🍀
🌱"خلاص والله ماعاد فيها كيف معاش نقدر عليها العزوبيه"
قيس قال بضحكه..
/معناها جديات مش مولي قبل لتتزوج!
عبد الوهاب قال..
/مالا بصارة!..والله حياة العزوبيه مش للبنادميه بالله..
ضحك قيس بصدمه..
عبد الوهاب:ندوي جديات لافي من معدل عليك ولامهتم بيك تقعد مبوم بروحك مافيش من يونسك ويغيرلك جوك ويريحك من ضغط الخدمه والقرايه مافيش من يشاركك فرحك وحزنك وافكارك وقرارتك..خي عليها من عيشه خي..
قيس قال بضحكه..
/يجيك يوم ونفكرك بكلامك هدا ونخليك تدفل ع روحك..
قاله:والله مافي واحد يستاهل الدفال غيرك انت اللي عاجباتك هالعيشه اني مش عارف كيف مادعاكش خوك حتى شويه..
قيس وهو يضحك قال..
/لاتسعه حاله خاصه مافيش منها..
وينفتح باب المربوعه ويخش محفوظ ووراه تسعه الزوز لما شافوا عبد الوهاب قالوا..
"اووو دكتور!"
ضحك وناض سلم عليهم بعدين قعمزوا مع بعض..
..تسعه:نبيك ديرلي تشك كامل ياغالي..
عبد الوهاب:تي انت ماشاء الله عليك الصحه والشباب كلهم عندك..يحطوك حدا هادم الزوز يقولوا خوهم الصغير..
ضحكوا وقال محفوظ..
/في هادي صدقت مع انه يجري ليل نهار وواخد اربعه لكن صحته بومب..
تسعه غمض عيونه وقال..
/قل اعوذ برب الفلق قل اعوذ برب الفلق..
محفوظ قال بضحكه..
/عيني ماضرك عيني ماضرك..
عبد الوهاب قال..
/والله حيقعد عمره كله في صحة وشباب لان عنده بدال الونس اربعه..
اشر تسعه عليه وهو يشوف لقيس يقول..
/اهو الناس اللي تفهم..
محفوظ:يقولها لروحه اللي قاعد لتوا وحداني..
تسعه قال..
/قل لي من تخالل اقول لك من انت..كان يفوت الراهب هدا تو يتزوج..
ضحك قيس وعبد الوهاب قال..
/صادق والله صادق مانيش مولي الا بونيستي بإذن الله..
محفوظ قال بضحكه..
/وهدا الصح..
تسعه وهو يشوف لخوه بطرف عينه قال..
/الفال للباقي يارب..
شافله قيس بإبتسامه تخفي وراه وجع كبير..
🌿وشدوا عبد الوهاب ع العشي زي ماشدوا ربيعه وبلقيس فدوى ع العشي
هي واقفت بسبب الحاحهم وبش يجنبوها الاحراج تعشوا معاهم برواحهم في صالون الضيوف..
▪▪▪▪▪▪▪▪▪
"بجديات ياربيعه مافيش منك ان شاء الله مانفقدوك ياوخيتي"
ربيعه وهي مبتسمه قالت..
/ولانفقدكم ياغواليا..
ع جية هنادي قالت..
/بلعيد ولع السيارة ياللا..
ربيعه قالت..
/مانوصيكش عليها..
بضحكه قالت..
/في عيوني..
ربيعه بضحكه قالت..
/يسلموا يارب..تصبحي ع خير فيدو..
فدوى وهي مبتسمه قالت..
/قدامك كل خير ربوعه...
🍀في حديقه القصر..
كان قيس واقف هو وصديقه عبد الوهاب ع سيارته وهما يهدرزوا..
🌸عبد الوهاب:مافيش مهرب ياغالي خالتي حلفت بتحنثها..
قيس قال بضحكه..
/ياودي باهي غدوة نكون عندكم ان شاء الله..بعدين حرك نظره اتجاه هنادي وفدوى عبد الوهاب ركز عليه وبتلقائيه التفت يشوف وين يشبح في اللحظه اللي انفك فيها سير صندل فدوى تأففت وقالت..
/شويه بس..
وقفت هنادي وهي تسرق في النظر لقيس وصاحب قيس قعد مسهم في فدوى وخلاص..
قيس ركز عليه ضربه ع كتفه وهو يضحك..
قاله :برا غادي..
قعد يضحك قيس..
وفدوى بعد ماساوت سير صندلها رفعت عيونها جو في عيون عبد الوهاب هو لما شاف عيونها ابتسم تلقائيا وابتسامته هادي احرجتها وخلتها بسرعه تغير نظرها عنه وتكمل طريقها مع هنادي..
لحقها عبد الوهاب بنظره وقال..
/قسوسه من هي هادي؟
قيس قال بإبتسامه..
/تقريبا صديقه لأختي..
ابتسم عبد الوهاب وهو يلحق بنظره في السيارة اللي طلعت بفدوى..
🌾🌾🌾🌾🌾
ويعدي اسبوع ويطلع ريان من المشفى وبوه ماخلاشي يفارق حضنه كمال كان يلقى يدخله في قلبه وياخد عنه الآلام والتعب..
🍃وامه في الحوش تراجي فيه بلهفة الدنيا كلها..
اول ماوصلوا للحوش خشلها بيه كمال هي جاته تجري خداته منه وضماته بقوة وقعدت تبكي..
كمال طلع هارب بدموعه لكن ولده سلطان قعد واقف وهو يشوفلهم بألم وحزن..
♤معاناة البني آدم غالبا تبدا لما يوعى ع الدنيا لكن ريان معاناته بدت من قبلها،ايه صح مرض زي هدا ممكن التعايش معاه لكن مش بالساهل بالذات النوع اللي انصاب بيه ريان وانصاب بيه وهو صغير هلبه في السن يعني في اول محطة ليه في حياته حتبدا رحلته مع الحرمان،ويحط عليه هالمرض قيود تمنعه يعيش حياته في كل مراحله العمريه..بس لو نشوف للوضع بنظرة ايجابيه حنلقى ان الله اختار ريان زي مااختار هلبه عباد ابتلاهم اختاره بش يكون من المحبوبين عنده والصالحين..وزي ماقالي هو مرة اني حنعيش حياتي في الجنة مش في الدنيا.. الدنيا فانيه بكل شي فيها واللي في الجنه يقعد للابد والجنه لافيها مرض ولاهم ولاحزن ولاحرمان..
🌿🌿🌿🌿🌿
وكل حد ابتلائه ووجعه ع حد قدرته وطاقته..
زي قيس اللي قاعد يعيش اصعب لحظات حياته وهو يسمع في اجواء الاحتفال اللي صاحبت بيان غزلان..
جاها بيان كبير عمتها وخالها كبروا بيها وبخوتهم وماخلوا ماجابوا قاموا القدر زي مانقولوا،وغزلان اللي طلعت غايه في الجمال كانت في قمة الفرح وهي تشوف لعمتها تلبس فيها الدبله اللي حتزيد تربطها بالراجل اللي تحبه..
🍃نصيب كله نصيب🍃
🌿"بالله!"
بلقيس قالت بضحكه..
/قال قيس هبلني كل يوم وهو يسأل هاه شن صار معاك كلمت اختك!؟
ربيعه وهي مبتسمه بفرح..
/باهي شن تعرفي عنه شن وضعه هكي ووضع عيلته..تبدلت ابتسامتها لإبتسامه اسف وهي تقول..زعمه يرضوا ماليه ياخدوا وحده من عيلة ع قد حالها؟
بلقيس قالت..
/الصراحة سألته السؤال هذا قالي زي الراجل زي عيلته اللي يهمهم اخلاق البنت وسمعتها وسمعة عيلتها وهو سأل عليهم كويس وعرف عليهم ماخلاه زاد شد في الموضوع.
ربيعه وهي مبتسمه قالت..
/خل نكلم نوال نقوللها تمشي لحوش ماليها بش نتلاقوا غادي ونفتح معاها الموضوع..
🌿وكلمت ربيعه صاحبتها واتفقوا يتلاقوا في حوش اهل نوال اخر الاسبوع..
وجي يوم لقائهم وتلاقوا وخدت نوال ربيعه ورفعتها لدار فاضيه بش يهدرزوا ع راحتهم..
🌱"عريس لفدوى"
ربيعه بإبتسامة حماس قالت..
/ولئطه ع قولت المصاروة دكتور عايش برا في بريطانيا من عيله متسميه الله يبارك شاف فدوى لما جت للقصر ع خاطر موضوع الخدمه..المهم من نهار راها هبل فيها وقال مانيش مولي لبريطانيا الا وهي معاي
نوال بدهشه..
/احلفي!
ربيعه بضحكه..
/والله العظيم..ويخي قال بنخليها تكمل قرايتها غادي..
نوال وهي مصدومه قالت..
/احلفي بالقرآن..
ضربتها ربيعه ع رجلها وهي تقول بضحكه..
/تي خلاص عاد..
نوال ضحكت بفرح ودهشه بعدين قالت..
/باهي يعني..عارف وضعنا؟
ربيعه قالت..
/سأل عنها وعرف انكم عيلة غنيه بصيت الباهي والاخلاق والاحترام وزاد كبش في اختك..
نوال مسحت بإيديها ع وجهها بعدين ضحكت وقالت..
/يارب يصير منه يارب..
ربيعه وهي مبتسمه قالت..
/بإذن الله صاير منه..
🌿وبعد ماروحت ربيعه نوال فتحت الموضوع مع اختها اللي اتفاجئت ع الأخر..
🌸فدوى وهي مبتسمه بربكه قالت..
/ايه متفكراته لكن مانزبطش شكله كويس..
اختها قالت..
/مش مهم الشكل المهم دكتور وولد عيله متسميه وبيخليك تقري برا..مش انتي من صغرك تبي تولي دكتورة واهو ربي يبي يخليك دكتورة في بريطانيا..
ضحكت بعدين قالت بقلق..
/لكن مرات يصير فيا زي ماصار لربيعه مانقدرش نتحمل عيشه زي هادي تعرفيني..
نوال قالت..
/لالا ربيعه قالت لاهو ولاماليه يدوروا في الحاجات وبعدين ياهبله انتي بتعيشي معاه برا مانكش قاعده مع ماليه..
قعدت فدوى ساكته وهي تفكر..
نوال:قولي باهي يابنت فرصة عمر هادي!
ابتسمت بقلق بعدين شبكت اصابعها في بعض وقالت..
/هو اني تحمست للموضوع شويه لكن مانقدرش ناخد قرار قبل لنتكلم معاه
نوال:يديروا نظرة شرعيه وتكلمي معاه..
فدوى قالت..
/لالا نبي نتكلم معاه في مكان تاني بش نقول اللي عندي ونسمع منه..
نوال:وين ان شاء الله!!!؟
فدوى قالت..
/في الكليه..
سكتت نوال شويه وهي تفكر بعدين قالت..
/تو نقول لربيعه...
🍂🍂🍂🍂🍂🍂🍂🍂🍂🍂🍂🍂🍂
