#ولاد_تسعة "الفصل الاول/سميه تسعة" #جمان_فريد الجزء_الرابع "عصر تسعة1" ⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔ ⚠️ملاحظه.. لما يبدا الكلام بالرمز هدا (♤) هذا يعني ان البطل يسرد في الاحداث اما لما يبدا بهذا (🌿) يعني الكاتبه هي اللي تسرد.. #ذكر_الله قَال ٱلحبيّب عليّه الصَلاة السَلام ..أفضّل ماطلعت عليّه الشمّس🍃 سُبْحَانَ اللَّهِ والحمدلله وَلَا إلهَ إلَّا اللَّهُ وَاَللَّهُ أَكْبَرُ ■■■■■■■■■■■■■■■■■■■ 🌿قيمة الحكمة تفوق قيمة الذهب بكثير،بل إنها لا تقدر بالمال فبدون حكمة يفقد المال من يملكه🌿 •••••••••••••••••••••••••••••••••••••••••••••••••••••••• ♤اجتازوا بوي ومحفوظ امتحان القبول في وحده من اكبر الجامعات في بريطانيا بتفوق وبعدين بدوا دراسه في كلية الاقتصاد..كانوا غادي فوق قرايتهم يخدموا في المشروع اللي دايره جدي سلامة غادي..كانوا يخدموا موظفين عاديين يبدا دوامهم بعد مايكملوا محاضراتهم ويروحوا اول مايليل الليل وباقي اليوم يمشي كله قرايه..قال بوي ماكناش نرقدوا اكثر من اربعه ساعات في اليوم.. وهدا الصح..العمر هدا عمر الجد والاجتهاد والخدمه،البنادم يكون في العمر هدا في عز قوته ونشاطه وحيويته..تقول حناي الصحة للدود والتراب..فعلا..رب العالمين وحده من الحاجات اللي حيسألنا عنهم يوم القيامه.. شبابك فيما افنيته!؟ افنيته في اللعب والضحك والعلاقات من بنت لبنت!!؟ في من تمشي المرحله هادي من عمره في المحرمات كلها بجميع انواعها الكبير منها والصغير..شباب وصحة وقوة يمشوا كلهم هباء منثورا في جرة سفاسف الدنيا ووسخها!؟ حرام والله حرام... وبوي لأن تربى ع الدين وع ان يكون راجل من صغره كان يشبح للشي المهم في الدنيا ويترفع عن التافه فيها..لما خاض تجربة الغربه ماالتفتش للمغريات من الفتن اللي شافها في بلاد اوروبيه فيها كل شي مباح لأنه شخص عنده نظره عميقه من صغره ويملك الحكمه..شاف للوجه التاني المشرق في هديكا البلاد..شاف للحضارة والتطور وشاف لنجاح مشاريع بوه فيها وسمع عن بوه من معارفه غادي ماخلاه يتخذه قدوة في كل مراحل عمره ويبدا من غادي في التخطيط لبناء امبراطوريته الخاصه بيه بعيد عن اسم بوه ونجاحه.. ولد عمه محفوظ اللي كان يشترك معاه في هلبه صفات وكذلك طريقة التفكير العمليه حتى هو كان يخطط يبني مجد لنفسه يخطط كيف يستثمر الورث اللي خلاه بوه ويشتغل عليه صح بش يكبر بيه.. الزوز هادم في هديكا المرحلة كان تفكيرهم بعيد كل البعد عن اللهو واللعب اللي ينشغلوا بيهم اغلب الشباب في سنهم بالذات اللي ربي ناعم عليهم... خلال السنه الاولى ليهم في الغربه مرضت جدتهم ذهيبه وتوفت..قالت جداي خشينا في حالة حزن شديد عليها استمرت قرابة العام..وسلامه من بعد موتها معاش ولى سلامة الأول.. ويعدوا من بعدها السنين ويتخرجوا بوي ومحفوظ ولد عمه ويروحوا لليبيا وهما رافعين رووس عيلة بيت المال بنجاحهم الباهر.. قالت جداي جدي سلامة دارلهم مهرجان سمعت بيه المنطقة الغربيه كلها وياما عطي من عطايا للناس المحتاجه يشكر بيها الله سبحانه وتعالى. 🌿🌿🌿🌿🌿🌿🌿 "معقوله ياراجل تقعد لتوا من غير زواج" مرعي بضحكه:لاخلاص نوينا.. محفوظ قال بإبتسامه.. /نويت حق المرة هادي!؟ مرعي:ايه وان شاء الله بنبعت امي تخطبلي الايام الجايه.. تسعة اللي كان شاد خشبه صغيره ينحت فيها بخنجر كان يسمع فيهم وهو يفكر.. شافله مرعي وقال.. /شيخ تسعة وين سافرت؟ رفع عيونه فيه وقال.. /معاكم.. مرعي:مافيش مبارك؟ ابتسم وقال.. /نبي نديرها معاك حتى اني.. محفوظ بضحكه.. /والله توقعتك.. مرعي قال بإبتسامه.. /في بالك وحده؟ قاله:لاوالله لتوا لا..بس في بالي مواصفات معينه مش عارف كيف بنلقى صاحبتهم.. مرعي قال:قول لامك عليهم وهي دورلك.. قال تسعه:ماهو هني المعضله نبي وحده زي امي بالزبط.. محفوظ:ياودي هادي صعبه شويه امك ماظنيش في منها في البلاد كلها.. تسعة بضحكه انزعاج.. /ماتسكرهاش في وجهي.. ضحك محفوظ ومرعي قال بإبتسامه.. /ادعي الله يرزقك بالزوجه الصالحه اللي تسر قلبك وخاطرك وتعينك ع عمل الدنيا والآخره.. ابتسم تسعة وشاف للخشبه اللي في يده وقال.. /إن شاء الله.. ▪▪▪▪▪▪▪▪▪ "هالنهار المبروك المسعود اللي نراجي فيه من غدوة نمشوا لحوش الشيخ البدري نخطبلك بنت من بناتهم" مرعي برفض:لالا..اني في بالي غيرهم يام.. امه بإستغراب قالت.. /بنت مني؟ قاللها:حماة اختي كميله فاطمه.. امه وهي تفكر قالت.. /قنينة ومحترمه وبنت عيله وخير من بنات البدري كلهم.. ضحك مرعي.. ابتسمت امه وقال.. /خلاص من غدوة نكلم اختك تفتح معاهم الموضوع.. مرعي:معليشي يام كان صار منه نبيك تمشي انتي وزكيه مرت عمي.. رفعت امه حاجبها وقعدت ساكته.. هو برجاء قال.. /ارجوك يام المراة هادي ليها مكانه كبيره عندي عمرها مافرقت بيني وبين صغارها وديما تود فينا اني وخواتي بالباهي.. قعدت امه ساكته وع وجهها باديه ملامح عدم التقبل.. هو قال برجاء:ع الاقل ع خاطر عمي يام.. تنهدت بضيق وهزت راسها بالموافقه ع مضض.. ♤وتزوج مرعي وجدي دارله عرس كبير وماخلاشي يحط فيه قرش واحد وجداي زكيه عولت فيه وكأنه عرس ولدها مع ان ام مرعي كانت تعامل فيها معامله جافه وسطحيه لكن هي ماعدلتش ودارت واجبها..وحتى الافرنجيه اسيا حاولت ديراللي تقدر عليه المهم ماتخليش جداي زكيه خير منها في شي.. ماعلينا دوة نساوين مانبيش نوقف عندها هلبه..المهم ان بعد عرس مرعي بوي عقد العزم ان يتزوج بس قبل ليبدا يدور ع سعيده الحظ قعمز مع جدي وفتح معاه الموضوع.. 🌿سلامة وهو مبتسم.. /جيت بنفتح معاك نفس الموضوع لكن امك قالت خليه ع راحته.. تسعه وهو موجه نظره القدام حياءا من بوه قاله.. /باهي شن عندك تنصحني في الموضوع هدا؟ تنهد تسعة وقال.. /الراجل بطبعه اول مايشوف في المراة شكلها وهادي فطرة..هدا علاش بنقولك اختار اللي شكلها يسر عينك وراهو مانقصدش هني شكل الوجه بس حتى الهيئة والهندام والاسلوب والتصرفات هدا كله يبان عليك من المراة اول ماتشوفها..كان عجباتك في هداكا كله شوف ماليها دور وراهم بش تعرف الحوش اللي طالعة منه شن شكله.. قاله تسعه:مهم تكون مكافئة ليا اجتماعيا؟ سلامه:مهم..لكن مش الأهم يعني كان لقيت بنت ناس وعيله حتى لو كانوا ع قد حالهم وانت مقتنع بيها وعاجباتك خودها وماتفكر في شي تاني..الغنى ياولدي غنى الاخلاق والسمعه الباهيه الباقي كله زايد.. هز تسعه راسه وهو مبتسم بعدين قال.. /باهي يابوي دلني وين نلقى وحده زي امي!؟ ضحك سلامه بعدين قال.. /هني اعذرني ماعندي وين ندلك ولابشن ننفعك.. ضحك تسعه ضحكه خفيفه.. حط بوه يده ع ظهره وقال.. /لكن في حاجه بنقولك عليها تخص الموضوع هدا وانت حر تاخد بيها ولاتخليها.. شافله تسعة بإنتباه.. تنهد سلامه وقال.. /كيف ماتشوف ربك مارزقنيش بغيركم انتم الاربعه هدا نصيبي وحامد ربي وشاكره عليه..لكن انت..نتمناك دير عزوة كبيره ياولدي تعينك ع الرزق اللي بيقعدلك من بعدي..خوك مانشوفش فيه زيك من نظرتي فيه ع صغر سنه واضح يبي يختار طريق بعيده عن طريقك ماظنيش يقدر يساعدك في شي..لكن ظنوتك ياولدي وين تربيهم زي ماربيتك تلقاهم بعدين يكبرولك ويقيموا معاك الحمل زي ماانت داير معاي توا..وحتى يزيدوا نسل بيت المال اللي يحملوا اسمك واسمي..والشي هدا مايتحققش الا بحاجه وحده..التعدد..التعدد في الزواج.. ابتسم تسعة وقال.. /من قال ربي يكتبلي في الدنيا نجيب ولاد مرات يعطيني بنات بس.. ابتسم سلامه وقال.. /لا بإذن الله يعطيك الولاد حلمت بيك حلم من قبل ماتجيبك امك تفسيره ان ربي حيعطيك ولاد... سكت تسعة وهو يفكر في كلام بوه.. طبطب بوه ع ظهره وقال.. /يقعد مجرد اقتراح وانت حر تاخد بيه ولاتخليه.. شافله تسعه بعدين ابتسم وقال.. /باهي اني نبي نقترح عليك اقتراح بعيد عن الموضوع هدا.. ▪▪▪▪▪▪▪▪▪▪ علقت بالطوه ع الشماعة وهي تقول.. /والله توقعته يفكر في الحاجه هادي.. خش سلامة للسرير وهو يقول بإبتسامه.. /فرحني هلبه.. ابتسمت زكيه وقالت.. /باهي ماكلمكش ع الزواج؟ قاللها:كلمني كلمني وقالي وين نلقى وحده زي امي قتله ماعندي وين ندلك مايندريش ان امه نزلتني من الجنه.. ضحكت زكيه وهي تقول بخجل.. /يعطيك الخير ياسي سلامة.. قعد مبتسم وهو يتأمل فيها.. وهي بعد مارتبت حوايجه قعمزت ع السرير وقالت.. /سي سلامة..في ناس كلموني ع هانيه.. عقد حواجبه وقال.. /واني شن قايل ع الموضوع مش قلت سكريه منك ليك.. زكيه:البنت خشت العشرين خلاص.. قاللها:مازال عليها مازال تتخرج من جامعتها وبعدين تتزوج.. زكيه:سي سلامة لما خديتني كان عمري 16 عام.. رفع حاجبه وقال.. /هداكا وقت وهدا وقت يازكيه وبعدين انتي نادمه ولاشنو!؟ بصدمه قالت.. /هدا مافهمت من كلامي!؟ تنهد وقال.. /زكيه الموضوع هدا معاش نبي كلام فيه لين تتخرج بنتك من الجامعه..نقطه انتهى.. 🌿🌿🌿🌿🌿 تاني يوم حل تسعة ضيف ع حوش مرت بوه كان جاي يشوف خوته ويقري خوه قيس.. 🌱قيس:تشرح خير من الاستاذ تسعة قال بإبتسامه.. /قولي قيس..شن في بالك لبعدين قصدي لما تطلع من الثانويه في شن تبي تكمل؟ ابتسم قيس وقال.. /اني نحب الكيمياء نبي نولي عالم فيها.. ابتسم تسعة وقال.. /حلو قيس:بعد نطلع من الثانوي نبي نقرا في بريطانيا حتى اني..جدي قالي نخليك تقرا ع حسابي.. عقد تسعه حواجبه وقال.. /وخيره بوك ماعنده بش يقريك؟ قيس:علاش انت طلعت ع حساب الدوله مش ع حسابه هو؟ قاله:لإني جبت الاول ع البلاد والدوله عطتني بعثه مش لأن بوي مايبيش يطلعني ع حسابه.. سكت قيس ونزل نظره لكتابه الدراسي.. تسعه وهو يشوفله قال.. /بوي مقصر معاك في شي!؟ شافله وقال.. /لالا..لكن اني حسيته مايشجعش فيا زي مايشجع فيك حط تسعه ذراعه ع كتاف خوه وقاله.. /بوي مايشجعش فيا بوي يساعد فيا لأني نخدم معاه يبيني نتعلم بسرعه بش نعاونه هادي حاجه..الحاجه التانيه بوي مستحيل يقصر في حقك ولما يشوفك ناجح في اي شي تحبه حيفرح بيه اكثر منك..ثالث حاجه وهادي اهم حاجه ياقيس..تعلم تشجع روحك بروحك وتقيم روحك بروحك بش كان جاك نهار مالقيت فيه حد معاك تلقى روحك واهم حاجه ياقيس اعتمد اعتماد كلي ع ربي هو اللي بيده امرك كله وكل تفاصيلك وتفاصيل حياتك هكي تولي قوي من داخل مايغلبك شي ياقيس.. ابتسم قيس وهز راسه بالموافقه ع كلام خوه.. ع جية آسيا قالت وهي مبتسمه.. /ياريت تشوف بلقيس متعب جدا في الدارسه لايستوعب شي شيت ريكي "شيط ريقي" ضحكوا قيس وتسعة اللي بعدين قال.. /وينها الجبنه من لما جيت ماريتهاش.. قيس بإبتسامة متهكمه قال.. /شادتها مسجل واغاني.. تسعة قال.. /بالله ناديهالي ياقيس.. خدي قيس كتاباته وناض وهو يقول.. /حاضر..بعدين مشي.. راجاته امه لعند ماتباعد بعدين قعمزت وقالت.. /تسعة نبي نقولك ع شي.. قاللها؛قولي خالتي.. بضيق قالت.. /لما تمشي بلقيس للقصر تشوف هانيه هانيه تعاملها معامله مش حلوة ديما تروح منها تبكي.. بدت ع وجه تسعة ملامح الاستياء.. اسيا والدمعه في عينها قالت.. /تقول ماما اختي لاتحبنا انا وقيس.. شافلها وقال.. /هي هانيه هدا طبعها حتى معاي اني.. اسيا قالت بضيق.. /لاتسعه هانيه من هي صغيرة ماتحبش قيس وبلقيس وتعامل فيهم معامله مش حلوة..انا ماقدرتش نقول لأمك خفت تزعل هي لاتريد من يوصل فيها وخفت نقول لسلامة يزعلها وتزيد تكره خوتها..انت تسعه عقلك كبير حاول فيها خليها تحب خوتها هادم خوتها.. هز تسعه راسه وهو يقول.. /حاضر خالتي حاضر.. ▪▪▪▪▪▪▪ "عليك حركات دير فيها" تسعة بإستياء:حركات شنو بس المراة عندها الحق.. زكيه بنرفزة:حتى انت تبي تاخدك مني.. ضحك تسعه غصب عنه وقال.. /ربي يهديك يام..نعرفك مراة فهيمه وديما تحكمي في عقلك تصرفات بنتك واضحه من زمان غير انتي ماترضي فيها شي.. قالتله:بنطلع اني الغالطه توا.. بهدوء قال.. /لايام حاشاك..لكن ركزي مع هانيه شويه فيها هلبه حاجات مش عاجبتني وشكله هدا علاش بوي مايبيهاش تتزوج توا يبيها تحط عقلها في راسها قبل.. زكيه بضيق:حرام عليك ياتسعه مش لهالدرجة.. ع نزلة هانيه من فوق وهي في قمة الاناقه فاتت من جنبهم وقالت.. /طالعه ماما.. تسعه قال بحزم.. /ولي اركبي.. وقفت وشافتله برفعة حواجب بعدين شافت لأمها.. زكيه قالت بربكه.. /بتمشي لعيلة الهاشمي صاحباتها ملتمات غادي.. تسعه بإنزعاج قال.. /جو الطلوع ولمات الصاحبات هدا مش خاش راسي وبعدين شن اللبس اللي لبساته هدا شن المكياج هدا ولأمتى بتقعدي من غير حجاب ياأبله!!! رفعت حاجبها وقالت.. /خوي الكبير ع عيني وع راسي لكن مالكش حكم عليا.. "ليه حكم عليك ونص" ناضوا تسعه وزكيه وقفوا.. سلامه وهو يقدم لهانيه قال بغضب.. /خوك الكبير هدا حكمه حكمي واللي يبيه هو يصير فاهمه! نزلت عيونها بخوف وقالت بصوت يدوب طالع.. /فاهمه.. سلامة بغضب قال.. /تحركي لدارك.. لفت ومشت بسرعة للدروج وهي تبكي بصمت وامها معاها بعيونها وهي مضايقه ع الآخر.. سلامة قال.. /هيا تسعه.. هز تسعه راسه وقال.. /هيا.. التفتت زكيه شافت لسلامة لقاته يشوفلها بحده نزلت عيونها وهي مضايقه بعدين قامتهم وشافاته كيف طلع هو وولدهم من باب القصر.. تنهدت بضيق بعدين مشت بسرعة للدروج بش تركب لبنتها وترضيها.. ♤الحاجه الوحيده اللي خابت فيها جداي زكيه تربيتها لعمتي هانيه..عمتي هادي طبعها لئيم واناني والدلال زادها سوء ع سوئها.. 🌿من جهة تانيه كان ولد عمه مرعي يعاني من امه اللي كانت تعامل في زوجته معامله قاسيه خصوصا ان فاطمه قربت تسكر العام مع مرعي وماحملتش فكر مرعي يطلع مع مرته لحوش بروحها لكن مرته رفضت وطلبت منه معاش يدخل بينها وبين امه.. ♤خالتي فاطمه ع ماسمعت عنها كانت عمله نادرة بنت اصل بمعنى الكلمه وتخاف من ربي ع قد مادارت فيها ام راجلها تحملت وعاملتها وكأنها امها... المهم..بوي خطط يدير مشروع يتشارك فيه هو ومحفوظ ولد عمه دعمهم جدي سلامه بجزء من راس المال وهما كملوا الباقي وبدوا بتنفيده..المشروع كان مشروع مصنع ألبان وعصاير..ولأن بوي يبي العصير يكون طبيعي ودرجة اولى حط عينه ع وحده من المزارع الموجوده في وحده من المدن القريبه من "الألف والخمسين" مزرعه كبيرة هلبه والفواكه اللي فيها من افضل واحسن الأنواع.. صاحبها كان واحد من اصدقاء جدي لهدا طلب منه بوي يمشي معاه بش يكلمه في موضوع شغلهم مع بعض بخصوص مشروع المصنع.. ومشي بوي مع جدي سلامه بش يلاقي الراجل في مزرعته اويلاقي حاجه تانيه احلى من الفواكه ومايجي منها... 🌿🌿🌿🌿🌿 "ماشاء الله ماشاء الله" سلامه قال الجمله المكررة هادي ويمرر في نظره ع المزرعه اللي كانت اشبه بالجنة..تسعه كان مبهور بيها وبنظامها وبشجر الفواكه اللي كانت تدلى منها ثمارها.. وهو يمرر في نظره عليهم ثبته ع مجموعه نساء كانوا يقطفوا في الفواكه من الشجر ويحطوا فيهم في حاويات واسعه جدا وكبيره..غير نظره عنهم لوحده لابسه مانطو بني طوله واصل لنص الساق وباقي الساق مغطيه جورب لحمي لونه اسود وفي رجليها لابسه حذاء عالي لكن عملي وشعرها مغطي بإيشارب انيق ومافيش من الزينه ع وجهها الا كحل زاد ابرز جمال عيونها.. البنيه كانت واقفه وقفه كلها قوة واعتزاز حاطه ايديها ورا ظهرها وتراقب في النساوين شن يديروا.. غير نظره عنها لصاحب المزرعة لما سمعه قال.. /هادي بنتي نزيهة ايديا ورجليا هني،كيف ماتعرف يابي سلامة اني ربي ماعطانيش الولاد لكن عوضني ببنات الله يبارك عليهم وهادي خيرتهم بنتي نزيهه.. تسعة كان يسمع في الراجل شن يقول وهو يسرق في النظر لبنته "نزيهة" اما بوه قال.. /ماشاء الله ماشاء الله.. صاحب المزرعه نادى بصوت عالي.. /يانزيهة.. التفتت نزيهه وعيونها جو في عيون تسعه تلقائيا احمر وجهها وغيرت نظرها لبوها اللي اشرلها تجي.. مشت طول لبوها ولما وصلت فيه قالت.. /السلام عليكم.. ردوا عليها السلام وبوها قال.. /هدا عمك سلامة بيت المال واللي معاه ولده تسعة.. هي شافت لسلامة وقالت بإبتسامه.. /مرحبتين بيكم.. سلامة وهو مبتسم قال.. /رحب بيك بنتي.. اما تسعة قعد محتفظ بصمته وهو يمرر في نظره ع المزرعه.. هي يدوب سرقتله النظر بعدين قالت لبوها.. /هما اللي يبونا نشاركوهم في المشروع اللي قتلي عليه؟ تسعه وجه نظره ليها.. اما بوه قال بإبتسامه.. /كان سمحتيلنا.. ضحك بوها وهي قالت بإبتسامه.. /بشرط..مانبيش يجي نهار وتقولوا بنشروها،مانبيعوهاش لو تجيبوا حقها مايملا الارض ذهب.. ابتسم تسعة ابتسامه خفيفه بدون مايشوفلها.. اما سلامه ضحك بعدين قال.. /لايابنتي من هالناحيه ارتاحي البي تسعه مايبيش كان الشراكه.. شافتله وهو شافلها بعدين غير نظره لبوها وقالت.. /زي ماتفاهمت اني وياك ياحاج موسى.. صاحب المزرعه قال.. /عارف عارف..لكن المزرعة هادي غاليه ع نزيهه هلبه هدا علاش قالت اللي قالاته تبي تطمن بس.. تسعه وجه نظره لشجرة التفاح وقال.. /طمني بالك ياابله نزيهه.. هي هزت راسها بإيجاب وعيونها في الارض.. اما سلامه شاف لولده شويه بعدين ابتسم ع جنب.. ♤ومن هني بدت رحلة بوي في عالم حواء..هو بوي مش نسونجي ولاعينه زايغة لا..بس يعني..شن بنقوللكم القدام ممكن تفهموه اكثر..المهم جداي زكيه قالت بديت نلاحظ عليه التغيير وكأن في شي شاغله وديما يفكر فيه ومش الخدمه اللي شاغلاته حاجه تانيه مبدله حاله.. 🌿🌿🌿🌿 في حجرة موجوده في محل الذهب متاع مرعي.. كانت منوره بضي اباجوره موجوده ع طاوله مقعمز وراها تسعه وهو مشغول بشي.. ليه فترة لاهي بصنع خاتم ذهب مزين بحجر ياقوت حقيقي.. هو توا في المرحلة الاخيره من صناعة هالخاتم..كان ينقش في داخله اسم "نزيهة تسعة".. خدي نفس بعد ماكمله بعدين ابتسم،وهو يتأمل فيه جو بين عيونه ملامح وجه نزيهة وعيونها تنهد بعدين قال.. /خلاص ياتسعة آن الآوان.. ▪▪▪▪▪▪▪▪▪▪ "قصدك لقيت اللي زي امك؟" تسعة قال بضحكة احراج.. /تبعت نصيحتك واخترت كيف ماعلمتني.. ضحك بوه بعدين طبطب ع كتفه وقال.. /ع بركة الله... هو شد يد بوه وكب عليها بعدين قال.. /لكن يابوي نبي من البدايه نوضح لبوها كل شي.. عقد سلامة حواجبه بعدم فهم.. ابتسم تسعه وقال.. /بناخد بالاقتراح اللي قلت عليه.. ابتسم سلامه وحط ايديه ورا ظهره وقال.. /إن شاء الله خير.. 🌿مشي في البدايه تسعه بروحه لوالد نزيهه فتح معاه الموضوع وحط كل شي قدامه ع الطاوله زي مايقولوا والراجل تفهم نوعاما وقاله يفتح الموضوع مع بنته بعدين يرد عليه.. وقعد تسعه اسبوع كامل وهو يراجي ع نار وبعد هالأسبوع وصله الرد بالموافقه وهالرد فرحه فرحة كبيره وع طول مشي لأمه فتح معاها الموضوع وهي فرحت ع الآخر.. 🌱تسعة:نبيك تمشي انتي ومرت بوي.. زكيه بضيق:ضروري يعني!؟ تسعه ابتسم وقال.. /ايه ضروري يام وارفعوا معاكم هانيه.. تنهدت امه وقالت.. /باهي باهي إن شاء الله.. 🌿ورفع تسعة زكية وآسيا وهانيه للمدينة اللي تعيش فيها نزيهة كان يبي يدير مقابله شرعيه يبي يحكي مع نزيهه ويسمع منها... 🌱مقعمز في المربوعه يستنى فيها تخش عليه.. سمع دقة ع الباب..الدقه كانت مميزة عجباته هلبه ابتسم بدون مايتكلم.. وهي خشت تمشي ع استحياء لين وصلت في الصالون قالت.. /السلام عليكم.. هو رفع عيونه فيها وقال.. /وعليك السلام.. قعمزت نزيهة وعيونها في الارض.. ابتسم تسعه وقال.. /نزيهة قيمي راسك.. رفعت عيونها فيه ووجهها محمر من الخجل.. بإبتسامه قال.. /اول شي كيف حالك.. قالت:الحمد لله..كيف حالك انت.. هز راسه وقال.. /الحمد لله..نزيهه..انتي موافقه عليا بإرادتك.. هي قالت.. /اكيد بإرادتي بوي عمره ماجبرني ع شي.. ابتسم وقال.. /يعني راضيه بالوضع اللي بتعشيه بعدين.. قالت:اني سمعت عن الحاج سلامه هلبه وسمعت كيف يعامل في نساوينه،هدا شفته بعيوني بكري شويه كل وحده ليها قدرها واحترامها وهالشي بان عليا من هيئتهم ووجوههم والحاجه هادي أكدتلي اني حنعيش زي ماهما عايشات لأن الناس اللي تشكر في بوك تشكر فيك حتى انت.. ضحك ضحكة خفيفه وقال.. /باهي خلينا نحكوا بصراحه..انتي نص موافقتك ع خاطر بوك صح؟ شافتله وهي متفاجئة.. قال:خفتي لو ردتيني ننهي شغلي معاه.. نزلت عيونها.. ابتسم وقال.. /مانديرهاش الحاجه هادي يانزيهة ولانقبل ناخد مراة مش راضيه بيا كان ماتبيش قولي عادي وصدقيني الشغل اللي بيني وبين بوك مش حيتأثر نهائي.. رفعت عيونها فيه وشافتله بنظره حلوة وخجوله وهو رد عليها بإبتسامة.. يدوب ابتسمت ونزلت عيونها بعدين قالت.. /اني راضيه تمام الرضا ياسي تسعه.. ضحك وقال.. /الحمد لله..لكن هاه خلينا متفاهمين من توا ماتنادنيش الا بإسمي المجرد..تسعة بس.. هزت راسها بالموافقه بعدين وقفت وهي تقول.. /نستأذن.. ومشت طلعت وهو يلحق فيها بنظراته المعجبه... ▪▪▪▪▪▪▪▪ "عليك عيله وعليك بنيه ياسي سلامه ماشاء الله عليهم" سلامه:نعرفهم من سنين ناس مقومه.. آسيا:حتى البنت حلوة كتير ذوقه خطير تسعة.. ابتسم تسعه بإحراج.. وسلامه شاف لنساوينه وقال بإبتسامه.. /ذاك الشبل من هذا الاسد.. اسيا وزكيه نزلوا عيونهم وهما مبتسمات بخجل وقيس يشوفلهم وهو شاد ضحكته... 🌱وفوق في دار هانيه كانت موجوده معاها بلقيس وهي تتفرج ع الزيانه المعبيه مكياج وحاجات حلوة.. هانيه كانت واقفه ع المرايه تحول في خراصها"حلق" وهي تشوف لبلقيس كيف تتأمل في الزيانه بإنبهار رفعت حواجبها وقالت.. /خيرك تشبحي هكي!؟ بلقيس بإنبهار وحماس.. /خاطري نتعلم ندير مكياج.. ابتسمت هانيه برفعة حاجب وهي تقول.. /مازال صغيره ع الحاجات هادي.. قالت:ولى عمري 16 سنة مش صغيره.. غيرت هانيه نظرها للمرايه.. بلقيس قالت.. /خاطري نولي زيك انيقه ونازكه.. هانيه عجبها الكلام وقالت وهي مبتسمه بغرور.. /اممم.. بلقيس وعيونها يلمعوا بلهفه وحماس قالت.. /تعلميني؟ مررت هانيه نظرها ع الزيانه وقالت.. /باهي.. بلقيس بفرح.. /باهي تخليني نبات معاك الليله.. هانيه:مانحبش حد يرقد معاي في السرير.. بلقيس:نرقد ع الارض عادي.. هانيه رفعت حواجبها بعدين نزلتهم وقالت.. /ok 🌿🌿🌿🌿🌿 ويتحدد موعد عرس تسعه وجي وقته،هالعرس اللي حضراته فاطمه مرت مرعي وهي حامل وبعد حملت عزوزتها رضت عليها وبدت تعامل فيها بلطف وحنان.. عرس تسعة ولد سلامة بيت المال اللي انقام سبعة ايام وسبعة ليالي كان مهرجان كبير لم فيه المعازيم من كل مكان في ليبيا وحتى معارفهم من برا البلاد جو حضروا.. سلامة اغلب الوقت كان مركز ع ولده كيف يتعامل مع الحضور من التجار ورجال الاعمال ورجال الدوله كان عنده هيبه جلية ويعرف يتكلم شافه خير منه لما كان في سنه وهالشي زي مافرحه ريحه هلبه.. من جهة تانيه كانوا من بين الحضور في العرس عيلة البندار وابرزهم كبيرهم عبد العزيز وولده الكبير والوحيد "كمال" اللي كان مركز تركيز تام ع تسعة... ♤"كمال البندار" من يومه كان متحسس من بوي من شخصه من مكانته ومن نجاحه اللي يحكوا بيه اهل الالف وخمسين من اكبرهم لأصغرهم... كان يحاول ينافسه بس هالمنافسه صعبه عليه هلبه بسبب الفروق الكبيره بينهم.. اول شي في تاريخ العيلتين يعني ماضيهم..ماضي عيلة بيت المال ناصع البياض وكله مشرف عكس ماضي عيلة البندار المظلم..كانوا معروفين انهم كبروا برزق الحرام واغلب ثروتهم جتهم بطرق غير قانونيه ولأنهم توغلوا في الحرام وألفوه هلبه صابتهم لعنته وهاللعنة جتهم في الذريه..اللي يجوه ولاد مايعيشوش هلبه ويقعدوله البنات بس وفي من عقم مرة وحده..مش بس عيلة البندار صار فيهم هكي حتى اهل منطقة البنداريه لأنهم عايشين بالحرام زي اسيادهم وهاللعنة او غضب الله اللي حل عليهم خلاهم يرجعوا ع تالياتهم ويتوبوا..وبالإجبار خلوا البنداريه حتى هما يتوبوا وحال هديكا المنطقه تغير مرة وحده اغلب الناس إلتزمت ومظاهر الحياة عندهم تغيرت وولوا محافظين بزياده وصلوا لدرجة التزمت... هو في الحقيقه اللي هما فيه ماكانش تدين صحيح بمعنى الكلمه بس يعني كانوا محافظين اكثر من باقي المناطق في مدينة"الألف وخمسين"... 🌿🌿🌿🌿🌿 يوم صبحية العرسان.. كانت نزيهه واقفه ع المرايه تمشط في شعرها.. خش عليها وهو لابس عربي سكر الباب ومشالها وهو مبتسم وقف وراها وخدي منها المشط وقعد يمشط في شعرها وهو يقول.. /ماشاء الله ماشاء الله تبارك الله.. ونزيهه تشوفله من المرايه وهي مبتسمه بخجل.. حط المشط ع الزيانه ولفها ليه وهو يقول.. /ربي يحفظك يانزيهة.. قالت بخجل.. /ويحفظك.. حط يده في جيب الفرمله وطلع منه الخاتم ومدهولها وقال.. /شوفيه.. خداته وهي تشوفله بإنبهار.. قاللها بإبتسامه.. /شوفيه من داخل.. قرباته لعيونها وشافاته من داخل ابتسمت بود وشافتله.. هو قال.. /الخاتم هدا صنعته بإيديا..بديت فيه بعد اول مرة ريتك فيها. بدت ع وجهها ملامح الدهشه مع الاعجاب وهي تشوفله.. وهو خداه منها بلطف بعدين خدي يدها اليمين ولبسهولها وهي تتأمل فيه.. بعد مالبسها الخاتم رفع يدها وطبع عليها قبله وشافلها وقال.. /ماتحوليشي بكل.. هزت راسها وهي مبتسمه بخجل وقالت.. /حاضر 🌿وتاني يوم يسافر بيها لمصر شهر عسل يستمر لمدة اسبوعين عيش فيه تسعة نزيهه احلى ايام حياتها وخلا قلبها يبدا يتعلق بيه.. 🌿🌿🌿🌿🌿 "تصدق سلامه في ناس خطبوا مني بلقيس" هو عقد حواجبه وقال.. /شني!؟ اسيا عطاته ربع التفاحه وقالت بضحكه.. /والله..تلاته كلموني عنها لكن انا قلت لا بنتي مازال بنبينو.. ضحك ضحك سلامة وقعد ينادي.. /بلقيس يابلقيس.. جاته بلقيس تجري وهي تقول.. /نعم بابي.. فتح يده وقال.. /تعالي حبيبتي تعالي.. ضحكت وقعمزت جنبه وخشت لحضنه وهو ضمها وقال.. /مش عاطيها بكل مايستاهلها حد.. ضحكت اسيا وكلت من التفاحة.. ▪▪▪▪▪▪▪▪ "ماشاء الله عليهاوع زينها كان تكلمي ضرتك عليها يازكيه" هادي اخت زكيه جايه زيارة لأختها بخصوص موضوع زواج.. وزكيه ردت عليها تقول.. /والله بوها ماحيرضى ياوخيتي هي هانيه ماباش يعطيها قال قاعده صغيره.. اختها قالت بإستياء.. /ربي يهديه.. زكيه رشفت من القهوة وهي ملتزمه الصمت.. واختها قالت.. /باهي شن داير تسعة مع مريته.. زكيه:ماشاء الله عليها مؤدبه وفالحه مهنيتني عليه.. قالت اختها:مازال مافيش حاجة في الطريق!؟ زكيه:ماحلهم ياوخيتي ليهم شهر وشويه مع بعض.. اختها ضحكت وقالت.. /ربي يعطيهم الذرية الصالحه.. زكيه قالت بإبتسامه.. /آمين.. 🌿ويعدي شهر ويتبعه شهر وتجيب فاطمه مرت مرعي بنت سماها بوها "غزلان" ام مرعي ماكانتش فرحانه بيها لأنها تبي الولاد ورجعت لمعاملتها الاولى مع فاطمه وفاطمه صابرة ومتحمله.. والشهور تبع بعضها ونزيهة ماحملتش والوضع بدي يبعت ع القلق عند سلامة وزكيه ونزيهة نفسها لكن تسعه ماكانش مهتم شايف ان مازال بكري ع الخوف والقلق من الحاجه هادي... 🌿🌿🌿🌿🌿 "ماتبيش ياولدي ماتبيش هي قالتهالي بروحها" كمال وهو معصب قال.. /علاش باهي عطوني سبب.. اخته قالت.. /من الاخير هي وماليها رافعين خشومهم علينا ومايحبولناش خلطة ياكمال.. كمال رفع حواجبه وقال.. /قصدك مش عاجبها!؟ سكتت اخته وهي مضايقه.. امه وهي تشوفله قالت بحزن.. /والله نخطبلك اللي خير منها الف مرة.. نزل عيونه للأرض وهو يفرك في اصابع يده اليمين في راحتها بغضب بعدين مشي طلع من حداهم.. اخته قالت:قتلك من البدايه فريحة مش طايقاته بكل يام.. امها قالت.. /عيلتها كلها مش طايقينا ولاطايقين البنداريه سمعت من عمتك قالوا بيحولوا لمنطقة بيت المال.. قال بنتها بتهكم.. /لو يعيشوا في امريكيا حيقعدوا بنداريه غصب عنهم... 🌱هالكلام اللي كان يدور بين ام كمال واخته عن عيلة واحد من ولاد عم "عبد العزيز البندار" الراجل هدا عاش فترة بعيلته في مصر بعدين روح لليبيا وقعد بيهم في حوشه بالبنداريه ليهم اكثر من خمسه سنوات ولأن نمط الحياة ماكانش عاجبهم قرروا ينتقلوا لمنطقه "بيت المال" الراجل هدا عنده بنت اسمها فريحة كانت جميله ومطيحه في حبها اغلب شباب البنداريه وع راسهم "كمال" وع قد ماجوا خطبوها كانت ترفض لأن ماشافتش فيهم الراجل اللي تتمناه.. 🌹🌹🌹🌹🌹 واقفه ع المرايه دير في اخر نظرة ع طلتها بعدين خدت كتاباتها وقالت.. /طالعه ماما. "في امان الله بنتي" مشت بإتجاه الباب فتحاته وطلعت للسيارة بسواق اللي دارهالها بوها بش ترفعها للجامعه.. ركبت فيها من الخلف وطلع بيها السواق برا الحوش متوجه للجامعه اللي كانت موجوده في منطقه بيت المال الجامعه الوحيده الموجوده في "الألف وخمسين" وقتها.. كانت هي من بين قلائل من بنات البنداريه يقروا في الجامعة باقي بنات المدينه كانت ممنوعه عليهم لأن في نظر اغلب ناس البنداريه القرايه في الجامعه للبنت عيب وفي من منهم يشوف فيها حرام.. 🌱وصلت السيارة للجامعه وهي نزلت منها ومشت خشت من البوابه.. °°من جهة تانيه في نفس الجامعه.. كان تسعه واقف ع محفوظ ولد عمه اللي كان يدرس في نفس الجامعة.. 🌿تسعة:خلاص قرارك نهائي؟ محفوظ قال بإبتسامه.. /نهائي ياولد عمي نهائي خلاص،اني حنلقى نفسي في بريطانيا مش هني.. هز تسعة راسه وهو يقول بإبتسامه.. /ربي يجعل الخيره فيما اخترت.. محفوظ قال.. /آمين.. "استاذ محفوظ" الزوز التفتوا وعيون تسعه تجي ع بنت قمة في الأناقه والجمال.. كانت لابسه تنوره واسعه وطويله لونها اسود ع بلوزة لونها اخضر في الذهبي يتوسط البلوزة حزام لونه اسود ومغطيه شعرها بإيشارب ذهبي في الاخضر في رجليها لابسه كندرة سودا كعب.. تسعه كان يشوفلها وكأنه عمره في حياته ماشاف نساوين قعد مسهم فيها وخلاص ونسي نفسه مرة وحده.. محفوظ قال بإبتسامه.. /فريحة.. هي بإبتسامه مدتله الكتاب وقالت.. /تفضل.. هو خداه وقال.. /كان خلتيه عندك ماعندي ماندير بيه خلاص اليوم اخرلي يوم في الكليه.. هي بإبتسامه اسف قالت.. /سمعت..ربي يوفقك استاذ.. قاللها:واياك..مانوصيكش يافريحة حافظي ع مستواك اني نتنبئلك بمستقبل باهر.. ابتسمت بإحراج وقالت.. /ان شاء الله استاذ..تستأذن.. قاللها:اذنك معاك.. مشت فريحة ومحفوظ التفت لولد عمه لقاه مازال مسهم في فريحة وعيونه يلحقوا فيها.. ضحك بإستغراب وقال.. /ولد عمي.. تسعه مازال قاعد هايم في عالم فريحة.. ضربه محفوظ بقبضة يده ع كتفه وقال.. /تسعة! شافله تسعه شويه بعدين استاقظ وقال وهو مرتبك بعض الشيء.. /هي مالا نتلاقوا بعدين..السلام عليكم.. ومشي وعيون محفوظ تلحق فيه وهو يضحك يإستغراب..
يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
