■■■■■■■■■■■■■■■■■■■■■
🌿 يقال : إن الإنسان ينتقم ، لأنه يعد ذلك عدلاً . فهو إذن قد وجد المبدأ الأساسي الذي كان ينشده : العدل . وهو يشعر إذن بطمأنينة كاملة ، فينتقم هادئاً كل الهدوء ، وهو يظفر بالانتقام ظفراً تاماً ، لاقتناعه بأنه يقوم بعمل عادل شريف .
دوستويفسكي🌿
••••••••••••••••••••••••••••••••••••••••••••••••••••••••••••
في ورشة تصميم المجوهرات...
كان تسعه سهران ع قطعة فنية جديده يخدم عليها بكل حب وع وجهه ابتسامه شغف.
وكالعاده لازم مرعي يقطع عليه انسجامه في الخدمه..
"مازال ماكملتهاش!؟"
تسعه قال بإبتسامه..
/بديت في حاجه تانيه..
ركز مرعي بالنظر ع الشي اللي في يد تسعه شاف قطعة فضه قاعد ينقش عليها قاله بتساؤل..
/شن هادي؟
تنهد تسعه وقال..
/رشقه بنديرها ل"الخضر"..
ابتسم مرعي وقال..
/اول مرة دير حاجه زي هادي لصغارك؟
تسعه قال بإبتسامه..
/هدا بروحه يامرعي هدا بروحه..
وخر عنه وقال..
/تسعه رد بالك..
رفع تسعه عيونه فيه وهو يشوفله بإستغراب..
مرعي بكل جديه قاله..
/تصرفاتك قاعد تبين انك تميل لحد دون الباقي يعني انت قاعد دير في الفرق مش بس بين نساوينك حتى بين صغارك وهادي حاجه خطيره ياتسعه..
عقد حواجبه وقال..
/مادرتش الفرق بين زوجاتي ولاحنديره بين صغاري والرشقه هادي بندير زيها لعيل زوجتي الثالثه ولباقي صغاري اللي بيجوا بعدهم ان شاء الله..
مرعي:اني عليا ننصحك ياولد عمي وصاحبي بش مايصيرش في المستقبل مايخليك نادم بعدين..
هز تسعه راسه بالموافقه ع كلام ولد عمه ومن داخل كان حاس بقلبه انغم عليه..
♤بوي قالي وقتها لأول مرة مانحبش كلام قاله مرعي حسيته خرب عليا فرحتي بيك لكن تحسابني وقفت عند كلامه هلبه فيسع نسيته وكأني ماسمعته ورجعوا سيطروا عليا فرحتي بيك وشوقي ليك وتنهد تنهيده طلعت من وسط قلبه بعدين قال..وياريتني سمعت كلامه..
🌿🌿🌿🌿🌿
وفي يوم جديد..
في مدرسة نور المعارف..
تحديدا فصل الصف التاسع اللي يقرا فيه سلامه..
كان مقعمز ع المقعد متاعه وهو ساند ظهره ع الحيط شاد ذقنه بيده وعيونه ع زميله عز العرب ونظراته ليه كلها كبر ممزوج بالغيره..
كان عز العرب واقف ع مقعد وقدامه كتاب يشرح في مسألة لثنين من زملائه..
عز العرب الى جانب تفوقه كان متواضع جدا ومايحبش يتفاخر بنفسه نهائي يخلي مميزاته تبان عليه بدون مايحكي عنها وهالشي خلاه محبوب بين زملائه ومنهم عزة اللي كانت تتعامل معاه بأريحيه مع انها قاعده خاشه معاه في منافسه..
"عز"
غير سلامه نظره لعزة لما شافها جايه لعز العرب وهو عاد اول ماشافها جاياته رسم ع وجهه ابتسامه عريضه وقال..
"نعم"
عزة:شن صار في الفكرة اللي قتلك عليها فكرت فيها؟
قاللها:ايه هي عجبتني من البدايه لكن بعد فكرت فيها قلت لو ندخلوا معانا سلامه اسلوبه في الشرح قاعد احسن مني ومنك..
عزة قلبت عيونها بملل ضحك عز وقال..
/تو نكلمه ونشوفه..
عزة قالت..
/هو مش فاضيلنا يقري في بنات الصف الثامن..
عز العرب وهو يضحك قال..
/ خل نكلمه قبل..ومشي عز بإتجاه سلامه وعزة تشوف لسلامه بطرف عينها..
عز وصل في مقعده وقال..
/نبيك في حاجه..
نزل سلامه عيونه بعدين ناض طلع من المقعد خداه عز من ذراعه وتباعدوا شويه وفتح معاه الموضوع..
🌸وداد جت لعزة اللي كانت تشوفلهم وقالتلها..
/خيرهم؟
عزه قالت..
/يبي يكلمه ع الفكرة متاعي قال يبيه يشترك معانا..
وداد:عنده حق سلامه شرحه يهبل..
عزة قالت وهي رافعه حاجبها..
/يخليه لميسون والسنكوحات صاحباتها..
ضحكت وداد..
قلبت عزة عيونها وبعدين ردت نظرها للولاد..
🍀سلامه:ايه فاضي..
عز العرب قال بضحكه..
/معناها عادي تخليك ميسون؟
رفع سلامه حواجبه متعجبا..
ضحك عز وقاله..
/نبصر عليك..خلاص اول مانحصلوا حصة فاضيه نبدوا..تباعد عنه ووقف قدام السبورة وقال..ترا اشبحولي..وبدي عز العرب يتكلم عن الفكرة اللي نسبها لعزة وسلامه وهو يسمع قعد يشوف لعزة كيف تبان فرحانه بكلامه حرك عيونه لعز وشافله من فوق لتحت...
🌿🌿🌿🌿🌿
"ساهله الحق طبق القانون تحلها"
هشام:ايه..ترا نشوفوا هادي ونخلوا اللي قبلها لسلامه يشرحهالنا..
وجهت ربيعه نظرها لسلامه اللي كان مقعمز بعيد عنهم كتاباته قدامه مفتوحات لكن هو مش معاهم نهائي..
بإستغراب قالت..
/حال سلامه مش عاجبني المده الاخيره..
هشام وهو يشوف لسلامه بإبتسامه قال..
/والله شن بنقولك ياامي..
شافتله ربيعه بقلق وقالت..
/خيره قول؟
ضحك وقال..
/ماتخافيش مافي شي يخوف..القصه ومافيها الولد اللي جي جديد هداكا عز العرب..
ربيعه:ايه خيره..
هشام:منكد عليه شويه..
ربيعه:كيف قصدك مولي خير منه في القرايه؟
هشام:لامستواهم زي بعض مافي حد فيهم فايت التاني الا في حاجه وحده..
ربيعه:شن هي!؟
ضحك هشام ونزل عيونه للكتاب بعدين قال..
/عزة هي وعز العرب صحاب..
ربيعه قعدت تفكر في كلام هشام..غيرت نظرها لسلامه اللي لقاته ولى يقرا لكن ع وجهه باديه ملامح الضيق..
ضحكت وشافت لهشام وهي تقول..
/لاعاد ياهمي مازال صغيرين ع الدوة هادي..
هشام:صغيرين شني ياامي اني قريت قصص لناس بدوا يحبوا وهما اصغر من هكي..
ربيعه بضحكه؛حب شني يانهاري! امتى سيبتوا الرضاعه انتم!؟
هشام قعد يضحك وهو محرج..
ردت ربيعه نظرها لسلامه وقالت..
/خاطري نشوفها هالعزة..
هشام:شن رايك تمشي معانا للنادي غدوة؟
ربيعه وهي مندهشه قالت..
/زعمه يخليني بوك واني بحالي هدا؟.
هشام:انتي قوليله وشوفي..
ربيعه قالت..
/تو نشوف..
قام سلامه عيونه ووخر شعره للخلف وشافلهم لقاهم يشبحوله سألهم..
/خيركم!؟
بإبتسامه عريضه قالوا مع بعض..
"شي"
هو ضحك بعدين قال..
/شويه نكمل اللي عندي ونجيكم..
وهما يشوفوله هزو رووسهم بإيجاب ومازال ع وجوههم ملامح نفس الابتسامه..
🌿🌿🌿🌿🌿
"والله ماشاء الله عزومه كبيرة جوه فيها ناس من طرابلس ومصراته وحتى من الشرق.."
وديعه وهي تطوي في حوايج بوها قالت..
/شوف وين ماينادوك في عزايم زي هادي برا بش دير معارف وعلاقات المعارف والعلاقات تكبر شغلك واسمك في السوق..
عبد الحافظ قال..
/وهدا اللي نفكر فيه..
حطت وديعه سوريه بوها بعد طوتها وقالت..
/في بالي شي..
حرك راسه بتساؤل..
وديعه قالت..
/شن رايك نوسعوا المربوعه اللي برا ونفرشوها بفرش جديد ونديروا حمام اوسع من اللي برا ونديروا حداه مغاسل..
قاللها؛علاش هدا كله؟
قالتله؛شن علاش ياعبدو..لازم حتى انتم ديروا عزايم غيركم من التجار مش خير منكم..
عبد الحافظ قعد يفكر في كلامها بصمت..
وديعه وهي تشوفله قالت..
/اعزموا حتى كبار الالف والخمسين رجال بيت المال والهاشميه والبوعليه والبنداريه..
عقد حواجبه وقال..
/لا البنداريه فكينا منهم..
قالتله:علاش!؟
قاللها:شن علاش حتى انتي..ماتسمعيش في الدوة اللي تطلع عليهم بين الفترة والتانيه!؟
وديعه قالت..
/كلها دوة سلم وخيي كلها دوة حني لينا الظاهر بس والظاهر متاعهم كويس..
عبد الحافظ بعدم تقبل قال..
/حتى الباطن متاعهم واضح..
قالت بإبتسامه استغراب..
/أشققت على قلوبهم ياعبدو!؟ الباطن لله سبحانه وتعالى مالناش بيه دخل..وخيي التاجر اللي دماغه يفكر صح..اللي يبي يكبر ويدير لروحه شان لازم تكون علاقاته بالجميع كويسه حتى في الدوله مايكونش مع هدا ضد هدا مايخسر حد بش مايخسرش هو بعدين بالعكس يقعد مستفيد ديما..
عبد الحافظ وهو يفكر في كلامها قال..
/عندك حق..
ابتسمت وولت تطوي في باقي الحوايج وهي تقول..
/مدام عندي الحق علاش ماتسمعش كلامي وتخلينا نخطبولك مع بسوطه!؟
قاللها:لالالا..مازال مازال بالي مش فاضي للموضوع هدا راجي عليا عامين تلاته كان عطانا ربي عمر..
وهي مبتسمه قالت..
/ياودي براحتك المهم نهارك تعقد العزم قولي بش نختارلك بروحي وحده تليق بيك..
ابتسم وهو محرج وقال..
/ان شاء الله ان شاء الله..
🌾🌾🌾🌾🌾
في البنداريه..
في حوش كبيرهم كمال البندار كان الشيخ صفي الدين مقعمز في المربوعه ومعاه سلطان يهدرز هو وياه..
وكمال في طريقه ليهم وهو جايب ريان في حضنه يبي صفي الدين يقرا عليه..
وصل في المربوعه وخش وعيون ريان اول ماشافوا صفي الدين بدت ع وجهه البريئ ملامح الكره..
كمال:اهو جبتهولك ياشيخ..قعمز حداه وقاله..هي ربي يبارك فيك اقرا عليه..
صفي شاف لريان ولاحظ نظرة الكره في عيونه ابتسم بتصنع بعدين مد يده بش بيحطها ع راسه ريان لكن قبل لتوصل شدها ريان وعضها بغل..
انصدموا كمال وسلطان اما صفي قعد يضحك بإرتباك وهو يقول..
/غيرك خيرك خيرك..مش دايرلك شي ياودي..
كمال:ريان عيب ريان..
طلق ريان يد صفي الدين بعدين شاف لبوه وقال..
"خي هو غوله"
ضم كمال ولده وقال بإرتباك..
/اسكت ياولد..بالله سامحنا ياشيخ قاعد عيل مايفهمش..
صفي وهو يضحك قال..
/مش مشكله مش مشكله تو نقراله ع الميه وخلاص..
ناض كمال بولده وهو يقول..
/باهي راجي نجيبلك بيدون ميه..
ومشي طلع بولده من حداهم..
سلطان شاف لصفي الدين وقال بإحراج..
/بالله سامحنا ياشيخ..
حط صفي الدين يده ع راس سلطان ومسح ع شعره وهو يقول بإبتسامه..
/ولايهمك..حصل خير..حصل خير..
🍂🍂🍂🍂🍂🍂🍂
ومن مربوعه كمال البندار لمربوعه تانيه في شقه موجوده في بنايه من بنايات احدى مناطق ضاحية السوق العالي..
كان فيها الدكتور فرحات جاي ضيف لصاحبها منصور وعمة منصور واقفه ع الباب تتصنت بعد ماسمعت حديثهم قالت همسا..
/عمري ماتريحتله هالدكتور من وجهه باين عليه مش مزبوط..
وتوخر بسرعه عن الباب لما سمعت اصواتهم تبين انهم طالعين..
وفعلا فتح منصور الباب وطلع مع فرحات سقده ولما ولى خش داخل تلقاته عمته وقالت..
/صغويرة شني اللي يبيك تجيبهم فرحات هدا!؟
منصور قال بملل..
/كان تبطلي هالعاده ياعمتي..
شدت ذراعه وقالت..
/والله لما تحكيلي ورجليك فوق راسك..
تأفف وقال..
/ياودي اني هكي ولاهكي ناوي نحكيلك بالك تساعديني..رفع حاجبه وقال..الحكايه فيها فلوس يافلوس ياعمتي.
ابتسمت بمكر ونظرة الطمع بانت في عيونها بعدين ضرباته ع ذراعه وقالت..
/احكي احكي..
🌿🌿🌿🌿🌿🌿
ويعدي هاليوم ويجي اللي بعده..
وتمشي ربيعه بمرافقة بلقيس وهشام وسلامه للنادي..
ولما وصلوا غادي مشوا وين مافي ملعب التنس اللي كانوا هانيه وصاحبتها موجودات فيه وحتى هما جو معاهم فداء وخالد ولد اخ تيسير..
🌱تيسير:هانيه مرت خوك الشلافطيه جايه مع اختك بلقيس..
هانيه وهي مصدومه قالت..
/وينهم؟.
اشرتلها عليهم تيسير بعيونها وهي شافتهم بعدين قالت بإزدراء..
/شن جيبها!؟
🌵"بالله بلقيس بري جيبلي فداء"
ناضت بلقيس وهي تقول..
/شويه بس..ومشت بطريقها لهانيه وصاحبتها..
ع جية هشام لربيعه وقف عليها وقال..
/شفتي البنت اللي شعرها بني!؟
شافت ربيعه جهة بنات واقفات مع بعض ركزت ع اللي قال عليها هشام ضحكت وقالت..
/زي الغزالة..
هشام ابتسم بعدين قال..
/شوفي ع يسارك اللي لابس طاقيه بيضا..
ربيعه شافت وين ماقاللها بعدين قالت..
/عز العرب؟
هشام:ايه وبيلعب ضد سلامه بعدين شويه..
ربيعه قالت بضحكه..
/وليدنا يغلب بإذن الله..
ع جية بلقيس بفداء وهي تقول..
/اهي ماما..
ربيعه وهي فرحانه مدت ايديها وقالت..
/تعالي ماما تعالي..
فداء كبشت في بلقيس وقالت بزعل..
/نبي أمتو.."عمتو"
تعبوا عيون ربيعه بدموع الحزن وهشام شافلها بأسف..
بلقيس:باهي اقعدي مع ماما شويه بعدين نرفعك لهنو..
تقوسوا شفايف فداء والدموع طاحوا من عيونها..
ابتسمت ربيعه بألم وقالت..
/رديها لعمتها يابلقيس..
بلقيس وجعتها ربيعه وهي تقول لفداء..
/ماما جايبتلك شكلاطه وحلوة صوف..
بنبرة باكيه فداء قالت..
/أمتو..
ربيعه بقلب موجوع قالت..
/ماتخليهاش تبكي يابلقيس رديها لعمتها بالله عليك..
بلقيس هزت راسها بإيجاب وهي مستاءة بعدين مشت بفداء لهانيه..
ربيعه وهي تلحق فيهم بعيونها نزلوا دموعها وهشام اشفق عليها هلبه قربلها وطبع قبله ع جبينها وهي شافتله بإبتسامه من وسط دموعها..
🍃وبعد رفعت بلقيس فداء لهانيه ولت لربيعه وخلت اختها تقول..
هانيه:ريتي كيف مش طايقتها؟
تيسير:وشن فيها ماينطاق هادي! كان نعرف خوك شن عاجبه فيها..
هانيه قالت بضحكه..
/لغز مش لايقيله حل غير السحر..
تيسير قالت..
/ومافيش غيره...
🍀🍀🍀🍀
وتبدا المباراة بين عز العرب وسلامه وكانت الاولى بيناتهم..
عزه وهي في صفوف المتفرجين كانت تراجي في فوز عز ومن اول المباراة بانت قوة عز العرب كمنافس لسلامه ومع ان مش اول منافس قوي يواجهه لكن لأنه كان منغاظ منه وهو عارف ان عزة تتفرج عليهم المشاعر اللي حسها وقتها سيطرت عليه وخلاته يفقد الكنترول ع لعبه ويرتكب اخطاء خسراته في الشوط الاول..
كريم انصدم فيه هلبه وهشام تفاجئ...
اماعمتهم هانيه اللي كانت مستاءة قالت..
/كل منها وجه الشوم هادي مش قتلك وجه نحس..
تيسير قالت بريبه..
/اعوذ بالله..
🍀وربيعه الوحيده اللي فهمت شن خلا سلامه يخسر هالشوط وجهت نظرها لعزة لقتها تتفرج عليه بعدين غيرت نظرها لجهة تانيه وهي مضايقه وشافت مارسم ع وجهها ملامح المفاجأة ..
شافت تسعه واقف بعيد وهو لابس "كاجوال" شتوي وع راسه طاقيه ومغطي عيونه بالنظارات لما شافاته ابتسم ورفع يده حياها وهي ضحكت وردتهاله..
هدا كله شافاته تيسير اللي كانت طول الوقت تراقب في ربيعه شافت لهانيه وقالت..
/خوك تسعه هني..
هانيه قالت بمفاجأة..
/وينه؟..
التفتت تشوف وين ماتشبح صاحبتها لقاته وقالت..
/ايه والله هو عمره مادارها!
غيرت تيسير نظرها لربيعه وهي تشوفلها بغيره وكره..
🌳وربيعه بعد ماشافاته قالت لهشام..
/نادي سلامه نادي..
هشام شاف لسلامه وناداه..
وسلامه شاف ناحيتهم لقي ربيعه تأشرله يجي..
ومشالها وهو يجري،وقت الاستراحه بين الاشواط مايفوتش الدقيقه..
🌸عزة وهي تشوفلهم قالت..
/من هي اللي وقف عليها هادي؟
وداد:نعرف اللي عيونها زرق عمته..
عزة:معناها امه..
وداد:لاامه نعرف شكلها مش هادي امه حلوة هلبه..مرات تكون وحده من نساوين بوه..
عزة قعدت تشوفلهم بصمت..
🌳"سلم ولدي خليك زي مانعرفك ديما رايق وواثق من روحك العيون عليك"
بعد ماقالت ربيعه كلامها هدا شافت لتسعه واللي معاها شافوه حتى هما وتفاجئوا..
سلامه بدهشه:بوي!..
رفع تسعه سبابته وهو مبتسم لما شافله سلامه..
والحركه هادي خلت سلامه يشتعل حماس ضحك وحيا بوه بيده وهو يهز في راسه بإيجاب بعدين ولى يجري للملعب..
بلقيس وهي تضحك قالت..
/اول مرة يجي للنادي..
هشام وهو مبتسم قال..
/صح..
ربيعه شافت لتسعه بإبتسامه حب وهو كان يبادل فيها بإبتسامة حلوة..
🌸وداد:هداكا شكله بوه معناها المراة هديكا مرت بوه..
ابتسمت عزه وهي تمرر في نظرها بين تسعه وربيعه..
🍀ويرجع اللعب مرة تانيه ويرجع معاه سلامه لمستواه المعروف..
واشتدت المنافسه بينهم والمتفرجين تحمسوا حماس رهيب مع المباراة..
بس الغريب ان عزة اللي كانت تبي عز العرب يفوز ع سلامه بدون ماتحس كانت تشجع في سلامه وتفرح بكل نقطه يسجلها وصاحبتها وداد تضحك ع حالتها..
وبعد ساعات من المنافسه الحاميه فاز سلامه ع عز العرب وهالخسارة استقبلها عز بروح رياضيه ومشي لسلامه هناه ع الفوز..
🌸عزة وهي مبتسمه قالت..
/نبي نمشي نتعرف ع عيلته..
وداد ضحكت وقالت..
/باهي بري..
ومشت عزة وهي متحمسه ووداد معاها ولما وصلوا في مكان ربيعه وبلقيس سلموا عليهم..
🌸عزة:اني عزة نقرا مع سلامه في نفس الفصل وحتى وداد تقرا معانا..
بلقيس وهي مبتسمه قالت..
/سلمهم ياربي محلاهم..
ربيعه قالت بإبتسامه..
/ايه زي الغزالات..عزه عاد حني نعرفوك من قبل سلامه حكالنا عنك..
وجهها أحمر خجلا وهي متفاجئة في كلام ربيعه..
بلقيس بضحكه:ايه حكي عليك هلبه..
ربيعه:قال تقرا معاي بنت شاطره وقويه اسمها عزة لكن ماقالش حلوة هلبه..
ضحكوا وعزة ضحكت معاهم وهي في قمة الخجل..
ربيعه وهي مبتسمه قالت..
/اني ربيعه مرت بو سلامه وراهو سلامه عندي زي ولدي واني زي امه مايناديني كان ياأمي..
عزة وهي مبتسمه قالت..
/فرصة سعيده..
ربيعه وهي مبتسمه قالت..
/سلمها ياربي..
🍀🍀🍀🍀🍀
في الطريق..
تحديدا سيارة بلقيس،كانوا راكبين فيها معاها هشام وسلامه اللي يسأل..
/هديكا البنت علاش وقفت عليكم؟
بلقيس عقدت حواجبها وقالت..
/اما بنت..
هشام شد ضحكته وسلامه قال..
/تي هادي اللي عيونها خضر..
بلقيس ضحكت وقال..
/اها...عزه اللي تقرا معاك..
هو قال..
/ايه هادي شن قالتلكم؟
بلقيس قالت بضحكه..
/جت سلمت علينا وتعرفنا هو هدا..
رفع حواجبه وقال..
/ماقالت شي تاني!؟
بلقيس وهي مبتسمه قالت..
/لالا..
غير نظره لخوه لقاه يشوفله بطرف عينه وهو شاد ضحكته..
تنهد بملل بعدين شاف لروشن السيارة..
🌳وفي السيارة اللي قدامهم...
سيارة تسعه...
🌱ربيعه وهي مبتسمه قالت..
/قالوا اول مرة ديرها..
تسعه قال بإبتسامه..
/نتفكر مشيت مرة قبل هادي بش نوصي المسؤولين فيه ع الصغار.. وهي مبتسمه قالت..
/امم..المهم جيتك فرحتني..
قاللها:علاش!؟
قالت:حسيتك جيت ع خاطرنا..
ضحك ومرر نظرها عليها وع بطنها بعدين رده للطريق وقال..
/احساسك في محله..
ضحكت ربيعه بعدين غير نظرها للطريق حتى هي..
🌿🌿🌿🌿🌿🌿
وتعدي الايام..
وحال عزة تغير من بعد لقائها بربيعه او بالاحرى بعد ماسمعت منها الكلام اللي قاله عنها سلامه حسب مافهمتها ربيعه..
بدت كل ماتشوفه تخجل منه وتتجنب الحديث معاه بينما علاقتها مع عز العرب قعدت زي ماهي..
وفكرتها تنفدت عن طريقهم الثلاثه واستفادوا منها زملائهم ولما سمعوا بيها مدرسيهم اثنوا عليهم وحكوا عنهم لطلبة باقي الفصول وحثوهم ع تقليدهم وفعلا بدوا طلبة باقي الفصول من كل السنوات ينفدوا في فكرة عزة..
وعاد عز العرب ماضيعش الفرصه في شكر عزة ومدحها قدام المدرسين لأنها صاحبة الفكرة وهي كانت تفرح هلبه بتصرفه هدا عكس سلامه اللي كان منزعج للغايه بالذات وانه ملاحظ كيف عزة تغيرت عليه ولت شبه ماتتعاملش معاه حتى بالمناوشات..
🍃ويجيبوا عيلة البدري كنة جديده بالمواصفات اللي تبيهم وديعه..قطوس في شكارة،ربة بيت،المستوى المادي لعيلتها عادي،متوسطة الجمال..ولأنها من اختيارها عبد الباسط وافق عليها من غير مايدير نظرة شرعيه وحتى البنت ماطالبتش بيها لأن المقابله الشرعيه في عرف اهلها"عيب"..
وداروا عرس كبير عزموا عليه كبارية الالف والخمسين حتى فطيمه عزموها لكن كمال ماخلاهاش تمشي يبيها تقعد في الحوش وتهتم بصغارها بالذات ريان مريض السكري..
ويتلاقوا تسعه وكمال لأول مرة في مناسبه من بعد قرابة الاربعه سنوات لكن ماجاش بينهم حتى السلام ومافيش واحد فيهم اهتم بوجود الثاني..
اما عند النساوين..
هالمرة حال ربيعه تغير جدا بين نساء الالف وخمسين ولوا يتقربولها ويتوددولها حتى اهل الفرح كانوا مهتمين بيها هي زي اهتمامهم بعزوزتها..
🌱"في اما شهر توا؟"
ربيعه وهي مبتسمه قالت..
/السابع...
وديعه:معناها تجيبي في اخر العام ان شاء الله..
ربيعه قالت..
/ان شاء الله..
وديعه:تحلي عويناتك ع خير..
قالتلها:تسلمي..
ع جية رقيه بولدها قعمزت جنب اختها وهي تقول بإبتسامه ود..
/كيف حالك ياللا ربيعه..
ربيعه وهي تشوف للولد قالت بإبتسامه..
/الحمد لله..ماشاء الله ماشاء الله ربي يصون ويبارك..
رقيه قالت..
/تسلمي..نشوفوه عندك قريب..
ربيعه ابتسمت وقالت..
/إن شاء الله..
🍃وحالها هدا كان تحت نظر ضرايرها..
منهم اللي برغم غيرتها منها اختارت تتقبل اللي قاعد يصير و ترضى بالامر الواقع..فريحه..
ومنهم اللي كانت راضيه من قلبها لأنها تحب ربيعه محبة الاخت لأختها وهالمحبه الصافيه قتلت كل شعور ليه علاقه بالغيره منها في قلبها..حسناء..
ومنهم اللي لايمكن ترضى ولاتتقبل لكنها مجبور تتأقلم مع الوضع وتتعايش معاه بش ماتخسرش اكثر من اللي خسراته..نزيهه..
🌿🌿🌿🌿🌿
بعد مرور شهرين..
في جنان حوش البدري..
فرشتين كبار عجميات مفرشات ووديعه واقفه قدامهم وهي تقول..
/اغسلوهم فيسع لكن كدوا زين وركزوا ع النص اكثر من الجناب..
نجوى ووهيبه زوجات بوعجيله وهما واقفات وشادات المكانس قالوا..
"باهي..حاضر"
وديعه:سقدوا ارواحكم كملوا فيسع بش تلحقوا ديروا الغدي في وقته..
قالت كلامها هدا وخشت داخل..
ومن بعد ماخشت كل وحده فيهم شدت فرشه وبدت تنفد في الاوامر..
🍃علاقتهم ببعض كانت عاديه لكن مش عميقه لو تكلموا مع بعض كلامهم يكون في مواضيع عامه لايمكن يجبدوا سيرة اي فرد من افراد عيلة ازواجهم حتى ع ازواجهم مايحكوش..
وطبعا هدا كله من الخوف خوف من وديعه بالدرجة الاولى..
هي في وحده فيهم قدرت تنسى كيف ليلة دخولها خشت عليها وديعه قبل راجلها بش تعطيها التعليمات وتعلمها القوانين اللي لازم تمشي عليها لو تبي تعمر بيتها وتخليه عامرطول العمر!؟..
ومن بعد هديكا الليله ولت عندهم رهبه من وديعه اكثر من ازواجهم بالذات بعد ماشافوا قدرها الكبير عند افراد عيلتها اللي حتى بوها مايدير الحاجه الا بعد ماياخد شورها..!
♧قوة السيطرة عند النساء اكبر من الرجال في نظري المراة لما تسيطر تمشي رجاله بشناباتهم ع كيفها الكبير فيهم والصغير ووديعه اقوى نموذج لهالنوعيه من النساء مع انها زمان زي مايحكوا عنها كانت عاديه جدا مالهاش شخصيه ولاوجود لكن التجربه اللي مرت بيها طلعت الجانب التاني من شخصيتها..القاسي القوي المسيطر والمتجبر..
♤طينة البنادم ياقرة قلبي طينة البنادم في اللي طينته فاسده والحاجه هادي تبان عليه من البدايه لو بشي بسيط وبعدين كان مر بحدث او موقف اثر فيه بقوة يبدا يشكل طينته ويوضح معالمه ويطلعه بصورته نهائيه..
🌿وتطلع نتيجة الفترة الاولى وزي العاده صغار تسعه من الاوائل..
الا ان كريمه زادت تقدمت بترتيب وجابت التاني بس مع ذلك مافرحتش لأنها ع الجهد اللي باذلاته كانت طامحه تجيب الاولى بش تنهي الجفاء اللي بينها وبين امها..
وللأسف هالجفاء ولى جدار متين حال بينهم..امها بدت تصب في جل اهتمامها ببنتها النابغه ثريا ومعاملتها الغير عادله لبناويتها بدت تبني في حاجز بيناتهم..
🌸من جهة تانيه..يستمر نجاح سلامة في محافظته ع المركز الأول وخلا الثاني لعز العرب وعزة كانت الثالثه..
لكن هالمرة عزة لاانغاضت ولاغارت منه بالعكس مشت لعز العرب وطلبت منه يمشي معاها بش يباركوله..
🍀بعد ماطلعوا من الفصل نهاية الدوام..
لقوا سلامه حاضن كريم اللي جاب الترتيب الاول ع فصله والزوز كانوا في قمة الفرح لبعض بنجاحهم ..
قدمولهم عز وعزة ولما وصلوا فيهم تكلم عز وقال..
/مبروك..
كريم تباعد عن سلامه ومد يده وهو يقول بإبتسامه..
/الله يبارك فيك..
اما عزة وهي خجلانه قالت لسلامه..
/مبروك سلامه..
ضحك سلامه بتعجب وقال..
/كيف صار!؟
عز العرب قال..
/روح رياضيه اللي ينافس لازم تكون عنده روح رياضيه..مبروك..
سلامه قال بإبتسامه كبر..
/شكرا يافيلسوف زمانك..بعدين شاف لعزة وقال..ع خلطتك بيه توقعتك تجيبي زي سنه اللي فاتت صدمتيني بالثالث الحق..في الجديد الهي بقرايتك وشدي كويس وفوتي التسهويك الزايد..
قال كلامه ومشي وكريم لحقه وهو مصدوم..
عز العرب بعد ماكان يشوفله بغضب غير نظره لعزة لقاها مصدومه ودموعها ينزلوا قاللها..
/اسف..مانحسباش تافه هكي..
مسحت دموعها وشافتله وقالت..
/علاش تتأسف اني اللي جبتك معاي بش تباركله وهو زي ماقلت عليه تافه ومغرور مايستاهلش المعامله بإحترام..
ومشت بسرعه وهي تبكي ع جيه وداد قالت لعز العرب..
/خيرها عزة!؟
قاللها بضيق:بريلها بري..
مشت وداد تجري وهي قلقه وخلت عز العرب مستاء ومضايق..
▪▪▪▪▪▪▪▪
"حي عليه حي !"
هشام:قال كريم البنت روحت وهي تبكي..
ربيعه وهي مستاءة قالت..
/هالعنطزة والتكبر اللي عنده بيهبعوا بيه..
هشام قال..
/هادي مشكلته..هو راهو قال هكي لسبب تعرفيه ولا!؟
ضحكت وقالت..
/عارفه عارفه..المشكله تو بتبدا عطلة نص السنه مافيش كيف يصلح الغلط متاعه..
هشام:ع اساس كان مافيش عطله تحسابيه بيمشي يقوللها اسف! كان نعرف خوي كويس مش حيعترف انه غالط حتى بينه وبين نفسه..
ربيعه قالت بأسف..
/كان بيقعد هكي بيتعب هلبه في حياته..
وتخش عليهم حسناء وهي تقول بإبتسامه..
/جايتكم اخت جديده ياهشام..
ابتسم هشام..
وربيعه قالت بفرحه..
/بنيه؟
ضحكت حسناء وقعمزت جنبها وهي تقول..
/ايه..
هشام:تو يولوا هي وخضر توامه زي وسام وثريا..
ضحكوا الزوز..
هشام وهو مبتسم قال لحسناء..
/شن تبي تسميها امي؟
حسناء وهي مبتسمه قالت..
/جيانا..
هشام قال..
/حلو..
حسناء قالت بإبتسامه..
/قلبك الحلو امي..
ابتسم هشام وهو محرج وربيعه تمسح ع شعره..
حسناء:ايه حقه نسيت نقولك عبير في المستشفى جاها وجع الولاده..
حطت ربيعه ع بطنها وقالت بقلق..
/ربي ينوضها بالسلامه هي وبنيتها..
🌿ولادة عبير كانت صعبه ومحفوظ كان خايف عليها بشده وصاحبه المقرب تسعه قعد معاه وماباش يخليه لين جاهم خبر ولاده عبير لبنتها ع خير..
🌱"مبارك يابن عمي مبارك"
محفوظ قال بضحكه فرح..
/الله يبارك يابن عمي وربي يطمنك ع رفيقتك والعيل اللي جاي ان شاء الله..
تسعه وهو مبتسم قال..
/آمين..ايه قولي..شن بتسمي الصبيه؟
محفوظ قال وهو مبتسم..
"سبأ"
🌾🌾🌾🌾🌾
"ووك عليا ياربي ووك عليا..بنموت ياربي بنموت"
هادي فطيمه تصرخ وتستنجد من وجع المخاض هي حاليا موجوده في دار النوم معاها القابله واختها نجيه وعزوزتها ام كمال..
وصوت صراخها هدا يصدح في الحوش كله وواصل للكوجينه..
🌾مسعوده وهي حاطه يدها ع بطنها قالت بخوف..
/حسني خفت هلبه ياخالتي زاهيه معاش نبي نجيب خلاص..
ضحكت زاهيه وهي تقول..
/عليك مهبوله..هدا وجع ساعه ويفوت اول مايحطولك عيلك بين ايديك تنسيه مرة وحده..
تنهدت مسعوده بخوف وقالت..
/يارب سهلها عليا وع اللا فطيمه يارب..
زاهيه قالت..
/يارب ويسهلها ع كنتي وتخلص ع خير يارب..
مسعودة قالت..
/آمين يارب العالمين..
🍂🍂🍂🍂🍂🍂🍂🍂
"هاه شني يادكتور!؟"
فرحات وهو يشوف للشاشه قال بإبتسامه مصطنعه..
/واحد منهم ولد..
ابتسموا مسعود ومرته حويته بفرح..
وفرحات متابع يقول..
/لكن التاني مش واضح لأنه واخد وضعية السجود..
حويته قالت برجاء..
/يارب بنيه يارب..
فرحات غير نظره عن الشاشه وشاف للممرضه وهي فهمت نظرته وقدمت لحويته بش تساعدها..
ومسعود لحق الدكتور فرحات وهو يسأل فيه..
/المهم حالهم باهي؟
شافله فرحات من ورا نظاراته الطبيه وقال وهو مبتسم ابتسامه تخفي ألم كبير..
/ايه الحمد لله حالهم مافيش أبهى منه..
🌾🌾🌾
وجابت فطيمه ولدها الرابع اللي عطي بوه مهمة تسميته لخوه الكبير سلطان وسلطان اختارله من الاسماء اسم "حيان"..
🌿🌿🌿🌿🌿
الساعه العاشرة ليلا..
في حجرة نوم مرعي وزوجته..
سكرت فاطمه الشباك كويس وهي تقول..
/الشتي هدا مافيه كان الصقع المطر ماصبتش بكل..
مرعي وهو يلبس في شخشير الصوف قال..
/صبت في طرابلس ومصراته وغريان غرقت من كثر ماصبت فيها..الالف وخمسين وكم مدينه تانيه ماصبتش عليهم..
ربعت ايديها وقعمزت ع السرير وهي تقول..
/ان شاء الله مش غضب بس..
تنهد مرعي وقال..
/ان شاء الله..انتي حالك باهي معاش تحسي في شي؟
ابتسمت وقالت..
/الحمد الله الوحم طار وافتكيت منه..
ابتسم وقال..
/الحمد لله..شني مالا حبوبة بوها حتى الليله مش راقده حدانا..
قالت فاطمه بضحكه..
/هديكا عطيها زوله بس وين ماتمشي في جرتها تقول هي امها..
ضحك مرعي وقال..
/هالكركيبه جو عليها..
فاطمه قالت وهي تضحك..
/وكريم محصل هالجو وهي وين تشوفه تفرفش عليه..
ابتسم وقال..
/ربي يحفظهم لبعض ويخلي قلوبهم مليانه ود وحب لبعضهم..
فاطمه قالت..
/آمين..
تنهد بضيق وقال..
/مش عاجبني الحال اللي دايره تسعه بديت نشوف فيه يدير في الفرق..
فاطمه قالت..
/المشكله الاخيره اللي صارت لربيعه هي السبب والله كنت متوقعه يصير هكي..
مرعي:اللي مخوفني الفرق اللي بيديره بين صغاره من توا شوقه للولد اللي بيجيه من ربيعه يخلي اللي يشوفه يقول ماجاب ولاد قبله..
فاطمه قالت..
/فعلا وضعه هدا غريب هلبه..
مرعي قال بضيق..
/اني والله مانبي نسيئ الظن في المراة لكن مرات نفكر انها استغلت الموقف اللي صار معاها بش يجي لصالحها..
فاطمه قالت بحيرة..
/والله ماني عارفه تعرفني علاقتي بيها سطحيه مش قادرة نحكم عليها بكل..
تنهد وقال..
/يستر الله وخلاص..
فاطمه قالت..
/صاحب الستر طيب الذكر...
🌿🌿🌿🌿🌿
فجر تاني يوم...
في حديقة القصر..
كانت ربيعه متعنقه ذراع راجلها هي تتمشى وهو يساير فيها..
🌱تسعه:متأكده مش صقعانه؟
ربيعه وهي مبتسمه قالت..
/والله العظيم ماني صقعانه..
هو قال:ربي يرحمنا برحمته وينزل علينا المطر ع الاقل تخفف من هالصقع شويه..
ضحكت وقالت..
/شكلك انت اللي صقعان..
ابتسم وقال..
/لا والله العظيم لا..اني نتكلم بشكل عام اخر مرة صبت فيها المطر مرة وحده الخريف اللي فات وبعدها معاش ريناها..
ربيعه:مفروض يصلوا استسقاء..
تسعه قال..
/مفروض لكن مش عارف مكتب الاوقاف هني شن يراجو..
سكتت ربيعه بسبب ألم بدت تحس بيه..
وتسعه متابع يقول..
/المشكله قلة المطر العام هدا قللت المحاصيل الزراعيه الخضرة نجيبوا فيها من برا وتنباع للناس باالغلا والكوا..
ويشتد الألم ع ربيعه وهي تسمع فيه..حطت يدها ع بطنها ووقفت هو وقف معاها وقال بخوف..
/خيرك!؟
ربيعه بألم..
/مش عارفه..اه..تسعه!.
هو بخوف قال..
/لالا خلاص بنرفعك للمستشفى..هي تحملي وبري معاي..
ومشت معاه وكل ماله الوجع يزيد لعند ماوصلت لمرحله معاش قدرت فيها ع الوقوف وهو من خوفه الشديد رفعها بين ايديه وكمل بيها الطريق للسياره..
بلعيد اللي كان فايق بكري بكري زيه زي باقي الحراسات والخدم شاف اللي صار ومشي يجري لاخته هنادي طلب منها تجهز نفسها بش تمشي معاهم وهي ع طول لبست جلابيه وشاربه وطلعت تجري وهو تحرك طول لسيارته وشغلها..
ويركب تسعه ربيعه من الخلف وتركب معاها هنادي وهو طلب من بلعيد يقعد لأنه يبي يرفع مرته بروحه..
🍀وتوصل ربيعه للمشفى ولما خشوا بيها لحجرة الفحص وقف الوجع لكن مع هذا ماخلوهاش تروح وطلبوا منها تتمشى في حديقه المشفى ويقعد تسعه معاها وكمل مهمته اللي بدي فيها الفجر..
🌿ويوصل خبر لأهل القصر باللي صار بعد مافاقوا..
خشت زكيه في حالة قلق خلتها تشد المصحف وتبدا تقرا قرآن وكل ماتاخد فاصل من القرايه تقعد تدعي..
ويرجع الوجع لربيعه مرة تانيه لكن هالمرة كان وجع ولاده..
ومن لما خشت لحجرة الولاده وتسعه يدعي..
🌾🌾🌾🌾🌾
ومن التسعاويه للبنداريه..
كانت الحاجه دلاله ام فطيمه فوق السطح تعودت تصلي الفجر في الهواء الطلق وتقعد لين تطلع الشمس..
🌾"الباين مافيش شمس اليوم السمي غلقتها السحاب"
ناضت وخدت صلايتها ومشت نزلت من فوق..
وين وصلت سمعت صوت بكي بنت صغيره..
مشت وهي تبع في الصوت لقت جليله بنت الزقطي مقعمزة تبكي وين جت بتسألها خيرها شافت سلطان جاي ناحيتها وهو يقول..
/جليله شن ديري في الصقع!؟
جليله وهي تبكي قالت..
/كنت نجري عترت طحت معاش قدرت نوض..
ضحك وقال..
/وعلاش كنتي تجري؟
جليله:نبي نشد العصفورة لكن هي طارت مني..
ابتسم وقال..
/تو نجيبهالك اني..
بفرح قالت..
/حقه سلطان؟
وهو مبتسم قال..
/حقه ياجليله هيا نوضي خشي صقع..
قالتله:رجلي توجع مانقدرش..
تنهد بملل وقال..
/وااك منك ومن الدلع متاعك..قدملها طبس عليها ورفعها وهي تمسكت بيه ومشي بيها لباب الحوش شاف جداه قال..
/شن ديري في الصقع حتى انتي!؟
دلاله قالت بضحكه..
/سمعت الزرزورة تبكي جيت نشوف خيرها..
جليله قالت..
/شن هي زرزورة سلطان..
قال بإبتسامه..
/عصفورة ياعصفورة..
ضحكت جليله ودلاله ضحكت معاها وهي تقول..
/سلمها..
سلطان وهو ماشي بجليله حس بقطرة ميه نزلت ع انفه..نزل عيونه للأرض بعدين قال بإبتسامه..
/مطر..
جدته قالت وهي مبتسمه..
/ايه تبشبش..
جليله قالت..
/خليني خليني نتفرج ع المطر..
قاللها:ورجلك..
قالت:خلاص صحت..
ضحكوا سلطان وجدته بعدين نزلها هي قعدت واقفه جنبه شدت يده وقعدت تتفرج ببهجة ع المطر وهي تصب ودلاله تتفرج حتى هي وتدعي في سرها...
🌿🌿🌿🌿
"المطر تصب وعشانا بالرب"
هدا كريم يغني ومحبوبه تقلد فيه وتصفق معاه وحداهم فاطمه تتفرج عليهم وتضحك..
لكن غزلان زي عادتها اختلت بنفسها وبدت تدعي..
🌿🌿🌿🌿 "اللهم صيبا نافعا اللهم صيبا نافعا..الدعاء الدعاء ادعوا يانجوي ووهيبه ربي يرزقكم بالذريه الصالحه ادعوا يارقيه وياعاتكه ديروا حياش ملك ع ارواحكم"
وتقعد وديعه دور في الحوش وهي تبخر في الوشق وتقول لهدا وهداكا ادعي وادعوا وتحددلهم في الدعوات وامها وخواتها يدعولها في سرهم يجيها نصيبها نفس الدعاء اللي يدعوا فيه نجوى ووهيبه بش يخصلوا منها..
🌿🌿🌿🌿
"يامطر.. صبي صبي .. صبي علي حوش القبي
و القبي ماعنده عَشَىْ غير خبيزة بالترشي
