#ولاد_تسعة "الفصل الاول/سميه تسعة" #جمان_فريد الجزء_السادس "رحيل" ⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔ ⚠️ملاحظه.. لما يبدا الكلام بالرمز هدا (♤) هذا يعني ان البطل يسرد في الاحداث اما لما يبدا بهذا (🌿) يعني الكاتبه هي اللي تسرد #الدعاء ألَا إنَّه ما قُرعت أبواب السَّـماء بشيءٍ مثل الدُّعاء، وعلى المرء ألَّا يستكثرَ شيئًا في الدُّعاء، فإنَّ كل ما يظنُّـه كثيرًا فهوَ في مُلك اللَّه قلِيل، وكلّ ما يراهُ عسيرًا فهو في جَنب اللَّه يَسير. - سعُود الشريم.■■■■■■■■■■■■■■■■■■■■■ 🌿مِن النِّساءِ مَن إذا رأيتها حَسبْت رُوحَها زجاجةً مُلِئت عِطرًا. - الرافعيّ🌿 •••••••••••••••••••••••••••••••••••••••••••••••••••••••••••• ♤وجوا خوتي "التوأم الفريد" ع الدنيا "وسام"و"ثريا" ووسام جي قبل ثريا بنص ساعة.. لكن هادي المرة الأولى اللي مايحضرش فيها بوي ولادة صغاره لأن كان مشغول بحال للاة اللات... 🌿في مشفى خاص يملكه تسعه في الألف والخمسين.. كانت ربيعه موجوده في وحده من الغرف راقده ع السرير ودايريلها تغذية.. بعد بضع دقايق فاقت،ولما فاقت تفاجئت بالمكان الموجوده فيه.. "لاباس عليك" شافت للممرضه اللي كلمتها بعدين قالت.. /شن صارلي؟! الممرضه وهي تشوفلها قالت.. /هبوط في الضغط توا بعد يكمل كيس التغذيه يولي حالك باهي.. تنهدت ربيعه وقعدت ساكته.. الممرضه قالت.. /لاباس عليك مرة تانيه.. قالتلها:لايوريك باس.. ومشت الممرضة طلعت من الحجرة ويتلقاها تسعه وهو يسأل.. /فاقت؟ قالتله:ايه فاقت يابيي.. تسعه قال:نقدر نخشلها؟ هزت راسها وهي تقول.. /ايه عادي مافيش مشكله.. قاللها:باهي خشيلها عطيها علم.. قالت:حاضر...ورجعت للحجرة وخشتلها.. غير تسعة نظره لنهايه الممر شاف جمال جاي من بعيد.. "تفضل يابيي" تسعه رفع يده واشر لجمال وجمال زاد سرع خطواته لين وصل فيه.. تسعه شاف للممرضه وقال.. /مشكورة..ومشي لباب الحجرة ومعاه جمال.. والممرضه بعد ماقالت.. /العفو..مشت في طريقها.. 🌱وقف تسعه قدام الباب دق عليه.. "تفضل" فتحه وخش وجمال خش بعده.. سكر تسعه الباب وهو يقول.. /اسف مضطر نسكر الباب.. ربيعه وهي مقعمزة ع السرير ومنزله عيونها لإيديها اللي كانت ضامتهم في بعض هزت راسها بدون ماتنطق بكلمه وجمال مركز عليها.. حط تسعة ايديه ورا ظهره وقال.. /اول شي لاباس عليك يا... قالت:ربيعه.. تسعه قال.. /اسمك كامل.. قالتله:ربيعه ناجي الزروق.. هز راسه وقال.. /معاك تسعه بيت المال.. رفعت عيونها فيه وهي مندهشه الممرضه ماخبرتهاش عن هويته قالتلها "اللي جابك هني يبي يخشلك".. هو لما شاف عيونها ونظرتهم حس بشعور غريب مع ان النظرة نظرة دهشه بس كانت باينه فيها مسحة القوة،غير عيونه عنها طول وقال.. /تقدري تحكينا شن صار معاك بالزبط؟ نزلت عيونها وهي مضايقه ع الآخر.. هو بدون مايشوفلها قال.. /لو ماتقدريش تحكي توا نأجلوها لوقت تاني.. بلعت ريقها وقالت بألم وغضب.. /هدا واحد وسخ عديم رجوله طالع من عيله زيه بالزبط خسروني في بوي وامي وخلوني نشوف اسود ايام حياتي.. جمال قعد مركز عليها وتسعه رد نظره ليها وقال.. /كان هكي شن كنتي ديري معاه!؟ رفعت عيونها فيه وهالمرة نظرتها كانت حاره..جاوبت عليه بنبرة فيها حده.. /تعرضلي في الطريق واني مروحه للحوش هددني بكميه وخلاني نركب معاه السيارة غصب عني ولما وصل بيا لحوشهم حاولت نهرب منه والباقي تعرفه يابيي تسعه.. بدت ع وجهه مسحة ابتسامه غير نظره عنها ومازال بين عيونه نظراتها الحارة والقويه بعدين قال.. /وين تسكني!؟ نزلت عيونها وقالت.. /بعد ماتوا بوي وامي خدتني الخياطه عصمت كان تعرفها وسكنتني معاها في حوشها.. قاللها:ماعندك حد؟ قالت:لا.. تنهد وقال:تمام.. هي قالتله:مات الواطي هداكا؟ قاللها:خليناه في مكانه.. بحقد قالت.. /احسن خل يقعد غادي لين يموت ولاتنهشه الكلاب المسعورة.. يدوب ابتسم جمال وتسعه اللي ابتسم تعجبا قال.. /مش خايفه!؟ هادي جريمه عقوبتها اعدام.. قالتله:الموت بشرف عمره ماكان عقوبه يابيي.. نزل عيونه وهو مبتسم بعدين رفعهم وقال.. /طمني بالك مادام اني وراك ماحد يقدر يوصل فيه.. رفعت عيونها فيه وشافتله بنظره اربكت قلبه عقد حواجبه وشاف لجمال وهو يقول.. /نخلوها ترتاح.. هي قالت:دقيقة يابي ياريت تعطوا علم لأبله عصمت اكيد بتموت من خوفها عليا.. هز تسعه راسه بدون مايشوفلها وقال.. /حاضر..لاباس عليك مرة تانيه..شاف لجمال.. جمال مشي فتح الباب وطلع وتسعه طلع وراه وسكر الباب وخلوا ربيعه تخمم في اللي مازال بيصير معاها بعد هاليوم.. 🌿وتسعه وهو ماشي مع جمال متوجهين برا المشفى تلاقوا مع المدير اللي بعد عطوه علم بجيته طلع يشوفه من فوره.. وصاه تسعه ع ربيعه بعدين كمل طريقه هو ونديمه.. 🌱جمال:اطمن يابيي الامور كلها تمام.. هز تسعه راسه بصمت بعدين فتح الباب الخلفي وركب وجمال ركب جنب السواق اللي طلع بيهم من باحة المشفى وتوجه للقصر واول ماوصل غادي تلقاته امه بالأخبار السعيده.. 🌱"ماشاء الله ماشاء الله تبارك الله" زكيه وهي مبتسمه قالت.. /كان بتمشي ارفعني معاك.. قاللها:بنمشي مالا شني! وتي روحك يااللا.. زكيه قالت بضحكه.. /هي راجي شويه..ومشت بسرعه بإتجاه جناحها وهو مشي بسرعه وطلع من القصر.. ▪▪▪▪▪▪▪▪ "حمد لله ع السلامه ياشيهانه" قال تسعه هالكلام لنزيهه بعد طبع قبله ع جبينها وهي ردت عليه بإبتسامه.. /الله يسلمك ياغالي.. تسعه قال.. /حالك باهي؟ قالتله وهي مبتسمه.. /بشوفتك ولى باهي.. مسح ع راسها وهو مبتسم بعدين قال.. /ها شن استقريني ع اسم للصبيه؟ شافت لسرير بنتها وقالت.. /ثريا..وان شاء الله تكون اسم ع مسمى.. شاف لبنته وقال.. /مدام بنتك انتي اكيد حتكون اسم ع مسمى.. غيرت عيونها وشافتله بنظرات تغزل في الحب.. وامه حداهم تراقب فيهم وهي مبتسمه... ▪▪▪▪▪▪▪▪ "الحمد لله ع سلامة روح قلبي ومهجة روحي" فريحه قالت بإبتسامه.. /الله يسلمك حبيبي.. رجع طبع قبله تانيه ع جبينها وقال.. /ربي مايحرمه منك حبيبك هدا.. ضحكت ضحكه خفيفه.. هو غير نظره عنها لولده بعدين شافلها وقال.. /ها شن قاعده عند رايك تبيني اني نسميه.. هزت راسها بإيجاب وهي مبتسمه.. رد نظره لولده وقال.. /وسام.. فريحه قالت بإبتسامه.. /يهبل.. قرص خدها قرصه خفيفه وقال بضحكه.. /انتي اللي تهبلي.. 🌿🌿🌿🌿🌿 خشت عليها الحجرة وهي تقول بخوف.. "ربيعة!" نزلوا دموع ربيعه وهي تقول.. /ابله عصمت.. مشت عصمت قعمزت جنبها وضمتها وهي تقول.. /هادي قلة الماكلة متاعك ياربيعه والله توقعت يصير فيك هكي يوم من الايام.. ربيعه لما سمعتها شن قالت فهمت ان تسعه يبي يتكتم ع اللي صار تماما وهكي تأكدت من صدق نيته في حمايتها.. 🌱وروحت بيها عصمت لحوشها وقعدت باقي اليوم مهتمه بيها لكن مابطلتش تفكير في عواقب الحادثة اللي صارت.. 🌿ومع طلوع فجر تاني يوم.. لقوا مجموعه من الشباب اللي كانوا يمارسوا في رياضة الجري في الغابه صلاح وهو مرمي ع الأرض والدم مغطي راسه ومن فورهم اتصلوا بالإسعاف ولما جوا المسعفين وفحصوه لقوه متوفي.. ♤وطبعا خشت الشرطه في الحكايه بعد ماتأكدوا من الطب الشرعي ان سبب الوفاه ناتج ع ضربه في الراس مع اثار تانيه كانت عليه تبين انه خش في عركه واللي تعارك معاه هو اللي قضي عليه..مسحوا البصمات ودوروا ع اي أثر ممكن يوصلهم لشي لكن عبث،جمال نديم بوي مسح أي اثر لأمي حتى في السيارة اللي ركبها فيها صلاح وحتى الحاجات اللي كانت واخدتهم ماخلا شي يدل عليها وهني الشرطه استنتجوا ان اللي دار فيه هكي افراد تنظيم عصابي شغلهم منظم مايخلوا شي وراهم،ولأن صلاح كان يتعاطى في الحشيش توقعوا ان المشكله صارت بينه وبين مروجين للمخدرات المهم ان بوي طلع امي منها زي الشعره من العجين.. 🌿وتتلقى منوبيه الصدمه بعد ماروحت من طرابلس وكادت تنجن ع فقدها لولدها الوحيد.. 🌱"غمة وانزاحت والله كنت خايفه عليها منه هلبه" جارة عصمت قالت.. /لكن تعرفي شكلها نية امها الباين منوبيه حق افترت عليها.. عصمت:من الاول باين لكن انتم ماتبوش تصدقوا..هي توا خليني نتسقد لقصر ذهيبه اللات يراجوا فيا.. جارتها قالت بضحكه.. /سعدودك اللي تقدري تمشي غادي وتخالطيهم.. عصمت قالت بضحكه.. /قل اعوذ برب الفلق.. ضحكت جارتها وعصمت قالت بضحكه.. /هي بالسلامه توا.. جارتها قالت.. /بالسلامه.. 🌿ومشت عصمت من قدام حوش جارتها لعند ماوصلت للطريق وقفت سيارة اجرة وركبتها وتوجهت بيها هالسيارة لقصر ذهيبه.. كانت رافعه معاها فساتين فصلوهم عندها نزيهه وفريحه لحفلة اللمه بش بيديروا عليهم بروفا.. 🌱عصمت وهي تشوف في الفستان اللي لابساته نزيهه كانت تقول.. /قالوا اشبح مع مني متعارك ضربه ضربة قتلاته.. فريحة اللي كانت واقفه جنب نزيهه قالت.. /يستاهل القتل.. ونزيهه قالت.. /وهديكا اللي تخدم عندك شن دايرة معاها؟ عصمت:زي قبل ياللا بنيه ماشاء الله عليها مهنيتني ع الحوش والخدمه.. نزيهه:ومع هذا ردي بالك منها.. عصمت قالت.. /نعرفها من سنين يااللا ماينخافش منها بكل.. نزيهه؛والله اني نبهتك وانتي حرة.. عصمت:بارك الله فيك ياللا..وخرت عنها وقالت..هاه اموره تمام ؟ نزيهه وهي تشوف لروحها في المرايا قالت.. /تمام التمام..يعطيك الصحة..وجهت نظرها ليها وقالت..لازم تجي ياعصمت بيجوا صديقات ليا من طرابلس ومن بنغازي كلهم نشدوني عليك يبوا يلبسوا من تحت ايدياتك.. عصمت قالت:نجي ياللا كان عزمتوا ربيعه مانقدرش نخليها بروحها في الليل.. فريحة:عادي مافيهاش مشكله جيبيها معاك.. ردت نزيهه نظرها للمرايه وع وجهها باديه ملامح عدم الرضا وفريحه وعصمت لاحظوها.. ▪▪▪▪▪▪▪ "شن بيقعد وحده زي هادي وسطنا ووسط معارفنا" فريحه:زيها زي عصمت يانزيهه.. قالتلها:لامش زيها يافريحه مش زيها البنت هادي شغاله عندها يافريحه.. فريحة قالت بإستياء قالت.. /خلاص هي هالمرة ومعاش تتعاود ان شاء الله.. زفرت نزيهه بعصبيه وكملت طريقها لجناحها وفريحه معاها بنظرها وهي تحرك في راسها يمين ويسار بعدم رضا.. 🌿🌿🌿🌿🌿🌿 "نمشي معاك!؟" عصمت وهي تقص في قماش بالمقص قالت.. /ايه من غيرك مش قاصتها خطوة.. ربيعه بضيق.. /وشن بندير غادي نعاون خدمهم!؟ ردت عليها عصمت تقول.. /شن تقولي انتي!؟ ربيعه:هدا الحق ياابله عصمت شن بندير ماشيه للمة ناس زي هادم كان مش خادمتهم ولا بش نولي مضحكتهم!؟ شافتلها عصمت وهي تقول بزعل ممزوج بالعصبيه.. /هدا ظنك فيا انتي!؟ ربيعه:غصب عني بنفكر هكي ياابله عصمت اني حتى لبس باهي ماعندي.. عصمت قالت.. /ياستوبيد "غبيه" كيف تقولي كلام زي هدا واني موجوده..سيبت اللي عندها وخدت يد ربيعه ومشت بيها لوحده من الديار.. في الدار هادي كان علاقه افقيه معلق عليها مجموعه من الفساتين والبدالي خدت عصمت بدله وورتها لربيعه وهي تقول.. /شن رايك!؟ ضحكت ربيعه وهي مندهشه بعدين قالت. /منك جد؟ قالتلها:مالا مني بصارة ياسوتبيدا؟ عضت ربيعه ع شفها السفلي وهي تضحك بعدين قالت.. /هو حلو..لكن عادي نختار حاجه تانيه؟ ابتسمت عصمت وقالت.. /عادي.. وقدمت ربيعه للعلاقه وحطت يدها ع فستان موديله مميز وحلو بالمرة ويبان لأي حد يشوفه بدله.. عصمت قال بضحكه.. /والله ذوقك مليح ياجحشه..ابتسمت وقالت..خلاص خوديه.. خداته ربيعه وهي تضحك.. عصمت وهي مبتسمه قالت.. /في عندي تعليقه ذهب قنينه تطلع عليك والشعر والمكياج تو نخلي المزينه اللي بتجيني ديرلك معاي.. شافتله ربيعه بإبتسامه امتنان بعدين ضمتها بقوة وقعدت تبكي. عصمت قالت بضحكه والدمعه في عينها.. /بتبكيني ياجحيشة.. 🌿🌿🌿🌿🌿 "اهلا سيد تسعة" بإبتسامه قال.. /اهلا بيك استاذة كيف حالك من بعد هداكا اليوم.. وهي مبتسمه بجديه ردت.. /زي ماتشوف فيا عايشه حياتي ونخدم في خدمتي مافيش خير من حالي.. ضيق عيونه وقال.. /صح بأمارة الفندق اللي قاعده فيه انتي وخالتك بعد ماتهجموا ع حوشها وتشوا فيه النار.. اختفت ابتسامتها وقالت بإستغراب.. /انت شن تبي بالزبط؟ قاللها:نبي نساعدك.. قالت:واني قتلك شكرا مانبيش منك ولامن غيرك شي.. تنهد وقال.. /ولاد نور الدين حيقعدوا وراك لين يخلوك تتنازلي عن كل شي بعد يومين لو خدوا الحوش في المزاد حيبدوا بتنفيذ تهديداتهم والنماذج اللي زيهم الغايه عندهم تبرر الوسيله هادم ماخافوش الله في بوهم توقعي منهم كل شي.. ابتسمت بتهكم وقالت.. /من الاخير هما باعتينك بش تقنعني بالتنازل!؟ ضحك ضحكه هاديه بعدين قالت.. /ماتعرفيش عني غير اسمي ومانملك لهدا بنعذرك ونحاول نوضحلك الصورة مع اني توقعت تكوني اذكى من هكي.. بحده قالت.. /رد بالك من كلامك لوسمحت.. ابتسم وقال.. /شوفي انتي لاعندك قدرة ولاطاقه تخليك تخشي مواجهه معاهم لكن لو خلتيني نساعدك نخليهم حتى في احلامهم مايوصلوش فيك.. رفعت حاجبها وقالت.. /وكيف تبي تساعدني!؟ بملامح وجه عاديه قال.. "نتزوجك" ضحكت بصدمه وهو يشوفلها بنفس الملامح.. اشرت عليه بسبابتها وقالت بضحكه.. /انت توا تدوي جديات!؟ هز راسه بإيجاب.. بضحكه قالت.. /قول والله.. قال:والله.. خفت ضحكتها وقالت.. /فهمت توا..ووالله من البدايه شكيت فيك..انت زي البحر تحب الزياده من النساء والاملاك نوعيتك نعرفها كويس.. تنهد وقال.. /حاليا مش حناقشك بش نثبتلك العكس بعد الزواج ان شاء الله تعرفي كل شي بروحك.. رفعت حواجبها تعجبا وهو قال.. /عندك يومين فكري فيهم كويس وحاولي تقدمي مصلحتك ومصلحة اللي حواليك ع عنادك الزايد،راهو تسكير الراس حيوصلك لنهايتك.. وناض ومشي بإتجاه الباب وهو يقول.. /ان شاء الله مانتلاقوش في المزاد.. وفتح الباب وطلع وخلاها في حالة صدمه.. ▪▪▪▪▪▪ "والله من كثر ماحرقلي دمي قريب طلعت المسدس وفضيت المخزن في راسه" خالتها قالت بضحكه.. /ماقلتيها ع الشياطين هدوكا.. حسناء قالت بغيظ.. /حرقلي دمي اكثر منهم تصدقي!؟ ضحكت خالتها بعدين قالت.. /باهي قوليلي شن شكله؟ حسناء بتعجب.. /خالتي! قالتلها:غير قولي قولي قنين ولاشخصيه ولا قنين وشخصيه مع بعض! اني قبل سمعت انه قاعد في نص الثلاثينات..معناها راجل الاحلام ياحسناء.. حسناء بصدمه قالت.. /تي قتلك واخد زوز.. شافتلها بنظرة خبيثه وقالت.. /اها معناها كان مش متزوج حيكون ليك رايي تاني!؟ احمر وجهها وهي تقول بعصبيه.. /فايقه ورايقه.. ابتسمت خالتها وقالت.. /زيدي فكري في عرضه ع اقل من باب خوفك ع نفسك هدوكا الشياطين يديروا كل شي بش يوصلوا لغايتهم.. قعدت حسناء ساكته وهي تفكر وفي داخلها خوف كبير ديما تحاول جاهده اخفائه.. 🌿"تتصنع في القوة ماعندها كان العناد وبس" جمال:لاحظتها تحاول تظاهر بالقوة لكن عيونها مليانات خوف.. الجملة اللي قالها جمال جابت بين عيون تسعه البنت القويه اللي كل مافيها يعبر عن قوتها..افعالها..نظراتها..نبرة صوتها.. "مش خايفه!؟ هادي جريمه عقوبتها اعدام.. الموت بشرف عمره ماكان عقوبه يابيي" بدت ع وجهه ابتسامه خفيفه لما شافها جمال ابتسم وكأن عرف في شن قاعد يفكر.. استاقظ تسعه من سرحانه وقال.. /ع كل حال الحوش حناخده بإذن الله وبعد ناخده لكل حادث حديث.. 🌿ويعدوا يومين ويجي يوم المزاد اللي اصرت حسناء تشارك فيه بكل تحدي حتى لو ماقدرتش تاخد الحوش المهم عندها انها تحدت وماسمحت لحد يستضعفها... 🌱من امام القاعه اللي حيتم فيها المزاد كانت مقعمزة تشوف لساعتها وهي تستنى بفارغ الصبر.. ماحستش الا وفي حد قعمز جنبها.. شافتله لقاته ربع ايديه وهو موجه نظره القدام ويقول بإبتسامة.. /ماجستير في تسكير الراس.. غيرت نظرها عنه وهي تقلب في عيونها بملل.. هو قال بنفس الابتسامه.. /في حاجات مايمشيش معاها العناد والعنترة الكذابه اللي انتي خاشه عليه توا اكبر منك.. شافتله وقالت.. /الحوش حناخده يعني حناخده مش حطولوه لاهما ولاانت يا.... شافلها وقالت بإبتسامه.. /تسعة سلامة بيت المال.. "المزواج" قالت الكلمه هادي وهي مبتسمه بمكر.. هو غير نظره القدام وقعد يضحك ضحكه هاديه بدون صوت استفزتها هلبه.. هو هدا ضحك بعدين شافلها وقال.. /مش قتلك نظرتي نظرة..بعقلك هدا ماتقدي شي كبير ولاصغير.. "بي تسعة" شافلها واشر ع المكان اللي بيخشوله وقال.. /وداخل حنثبتلك.. ناض ومشي وهي تبع فيه بعيونها اللي نظراتها كلها غيظ.. ♤في هداكا المزاد بوي كان خاش وهو مرتاح وضامن انه حياخد الحوش وللأسف ثقة بوي في نفسه احيانا تكون زايده عن اللزوم ماتخليشي يحط كل الاحتمالات في راسه واولهم احتمال ظهور عنصر المفاجأة.. 🌿وبدي المزاد بسعر80الف دينار.. واحد من ولاد نور الدين قال.. /90الف.. مقدم المزاد قال.. /90الف 90 الف من يزيد.. حسناء قالت.. /95 الف.. شافلها ولد نور الدين بحده وهي مثبته نظرها ع المقدم اللي كان يقول.. /95الف 95الف من يزود.. واحد من الحضور قال.. /100 الف.. المقدم:100الف 100من يزود.. حسناء قالت.. /150الف.. شافلها ولد نور الدين وهو يقول.. /200الف.. شافتله بحقد وتسعه يشوفلهم بعدين شاف للمقدم وقال.. /300الف.. غيرت حسناء نظرها ليه وقالت بتحدي.. /350الف.. ولد نورالدين قال.. /420الف.. ردت حسناء نظرها عليها ونار الغضب تاكل فيها شافت للمقدم وقالت.. /500الف.. اغلب الحضور انذهلوا وبعضهم انسحب من المزاد وهو قاعد في مكانه.. المقدم ردد اخر رقم قالاته حسناء اكثر من مرة لعند ماتسعه قال.. /550الف.. حسناء شدت ع يدها بقوة وهي مستاءة ع الأخر معاش تقدر تزيد اكثر من هكي.. ولد نور الدين ابتسم بتهكم وقال.. /700الف.. المقدم تحمس هلبه الارقام اللي يحطوا فيها تخطت السعر الحقيقي للحوش كرر اخر رقم اكثر من مرة لعند ماقال تسعه.. /900الف.. ولد نور الدين كان مقعمز جنبه المحامي متاعهم شد ذراعه بقوة شافله بغضب المحامي غمض عيونه وفتحهم بعدين قال.. /خلاص.. خبط بيده ع رجله من غيظه وحسناء شافتله بإبتسامه شماته.. والمقدم يكرر في 900الف اكثر من مرة وكان حينهي المزاد لكن في شخص وقفه في اخر لحظه لما قال.. "مليون وخمسمية الف" الصدمه حلت ع كل الموجودين واولهم تسعه وجه نظره للشخص اللي تكلم ماعرفاش لكن شكله بالنسبه ليه كان مألوف.. حسناء قعدت تشوف لتسعه ولاإراديا كانت تتمنى لو يحط مبلغ اكبر ويفوز بالحوش لكن تسعه معاش قدر يشارك كان محدد مبلغ معين مايبيش يزيد عليه لأن نوعيته ماكانش مبذر حتى لو خش تحدي زي هدا كان يبي يربح بالمعقول.. ومبلغ مليون وخمسميه ألف في زمان مضى كان يعادل ثروة وهو يبي يعرف من هو اللي حط هالمبلغ الكبير في حوش حقه مايفوتش نص المبلغ.. ونهي المقدم المزاد واعلن عن اسم اللي فاز بيه.. "الساعدي علي" 🌾🌾🌾🌾🌾🌾 "والله مانحكيلك يابي حالته مانقدرش نوصفهالك المهم تمسح ع الكبد.." كمال بضحكه قال.. /لاتوصف ولاتعب روحك نعرفها كويس وحافظها حفظ وتخيلتها من امس.. ضحك الساعدي.. ع جية زوز من الشباب اللي يخدموا عند كمال وهما رافعين سفرة كبيره عليها خروف مكتف.. حطوها قدامهم وطلعوا وينادي كمال بصوت عالي.. /سلطان...محرز.. لحظات ويخشوا عليهم يجروا وسلطان يقول.. /خوي جي يابوي.. ضحك كمال:وجاب الخير معاه...اممم سميته عمران.. الساعدي قال.. /مبارك المزيود.. كمال قاله:الله يبارك فيك..شاف لولاد وقال..هيا انت وياه شمرواواقربوا.. ونفذوا سلطان ومحرز اوامره وكل واحد مشي قعمز جنب بوه وبدوا نهش في هالخروف زي الاسود الجعانه... 🌿"الساعدي اقرب واحد لكمال البندار من رجاله" ابتسم تسعة بغيظ وهو يقول.. /والله قلتها شكله مار عليا.. جمال قعد ساكت وهو يشوف للغضب الباين في عيونه.. "اطلع" لف ومشي طلع وع وجهه باديه ملامح الاسف وبعد ماطلع مباشرة خدي تسعة اداة من ادوات المكتب تخص الاوراق ورماها ع مرايا معلقه ع الحيط خلاها تنكسر لأجزاء مجزئة.. 🌿🌿🌿🌿🌿 "انت قتلته انت..انت قتلت ولدي" هادي منوبيه جايه لواحد من صحاب ولدها في مكان عمله في ورشة تصليح كانت شاداته من رقبته وهي تقوله في هالكلام.. شد ايديها ونزلهم وهو يقول.. /ورب العزة ماليا علاقه ياخالتي اقسملك بالله اخر مرة ريته فيها جاني هني طلب مني سيارتي وعطيتهاله والله هدا اللي صار.. وهي تبكي قالت.. /باهي وراس ولدي قولي قولي بالله عليك ماقالش في شن يبيها وين ماشي بيها!؟ مرر نظره حواليه بعدين نزل راسه لوذنها وقال.. /قال بيمشي ياخد ربيعه.. توسعوا عيونها بصدمه بعد ماسمعت اللي قاله وهني تفكرت ولدها لما اصر يروح للألف وخمسين بعد ماحطها في طرابلس وكان اخر ماقاللها.. "بعد تروحي بندير عرسي اني وربيعه" 🌿🌿🌿🌿🌿 اصوات الاغاني قالبه الحوش كانت جايه من دار بنات الشيخ البدري.. البنات الكبار "عاتكه" و"وديعه" يرقصوا واختهم الصغيره "رقية" تصفقلهم وترد ورا الأغنيه.. وبعيد عنهم في وسط الحوش كانت امهم شاده الهاتف تكلم في وحده من صاحباتها.. /ايه امس عزموني...والله حتى اني استغربت فيهم ع قد ماجابوا من صغار لاداروا لمات ولاحضروا حد من ناس الالف والخمسين......ايه صح صح شكله الحاج سلامه ماكانش يبي ايه......اكيد بنمشي وبنرفع معاي البنات بالك يشوفهم حد ويصيرلهم نصيب ونفتك من همهم.. 🌳وهي لاهيه بدق الحنك والقرمه ماسمعتش صوت الباب الخارجي للحوش لما انفتح.. خشت سيارة ولدها البكر بوعجيله بعد مادرس نزل وسكر الباب وهو يسمع في الأغاني في باله ان الصوت جاي من حياش الجيران مااهتمش لكن لما جي بيخش لداخل الحوش لاحظ ان الصوت بدي يقوى ويوضح اكثر.. وقف في مكانه وهو يسمع بعدين مشي لف ع الحوش وهو يتبع في مصدر الصوت لعند ماوصل لروشن دار خواته.. ويبين راسه منه ويشوفهم وهما يرقصوا وهايمات.. عيونه ولوا يقدحوا شرار من الغضب..فك سير البنطلون متاعه وفي لمح البصر قفع الروشن ونقزلهم داخل.. وهما في التلاته صكوها عيطه "صرخوا" وطلعوا يجروا مع بعض من الدار وهو في جرتهم.. بوعجيله بغضب.. /ياصايعات يافاسقات.. وهما يجروا ويتعايطوا ولما وصلوا وسط الحوش طلعت في وجوههم امهم وهي مفجوعه من عياطهم دفوها الثلاته وكملوا جري لباب الحوش ولما وصلوا فيه وقفوا وقعدوا يبكوا بإستسلام وهو وصل فيهم وطاح فيهم جلد.. وع قد ماحاولت امهم تحز ماقدرتش توقف بوعجيله اللي مافشش غله الا لما لقاهم دايخات من الضرب.. لف ومشي بإتجاه الهاتف وهو يقول.. /مرة تانيه ذبح يافاسقات ذبح.. وخدي الهاتف ومشي بيه لداره وخلا امه تعاني في خواته.. خش بالهاتف لداره وسكرها عليه بعدين مشي اتكا ع السرير وحط الهاتف ع صدره ضرب ع ازاره بعدين حط السماعه ع وذنه وقعد يراجي لين انفتح الخط ابتسم وقال بنبرة كلها هدوء ورومانسيه.. "يااحلى آلو" ♤بوعجيله هدا اكبر من عمي قيس بسنتين ولا تلاته مش عارف بالزبط..الانسان هدا فاشل تنبال ماينفع في شي حتى في الضحك ع البنات كان فاشل لكن وين تسمعوا امه وهي تحكي عنه وكأنها تحكي ع صلاح الدين الايوبي ولامحمد الفاتح.. هلبه ناس زي بوعجيله وامه وبوه وخوته وخواته عيلة ماتودوها للعدو.. 🌿🌿🌿🌿🌿🌿 وتعدي الايام ويجي اليوم المنتظر.. يوم الاحتفال بولادة "وسام وثريا" مع ان عمرهم قارب ع الشهر لكن بوهم اصر يديرلهم حفله كبيره من فرحته بيهم.. في صغاره الاولين كان بوه رافض المبالغه في الاحتفال بولادتهم وهو ماكانش يقدر يخالفه لكن توا معاش فيه شي يمنعه من اظهار فرحته خصوصا ان ولاد وسام وثريا كانت مميزة جدا.. وع الاحتفال هدا عزم اهم معارفه من الالف والخمسين وخارجها وبش يثبت لكمال البندار انه متأثرش باللي داره فيه يوم المزاد عزمه هو وعيلته.. 🌿🌿🌿🌿 مساءا.. كانت قاعة الاحتفال الخاصه بالرجال مزحومه بالمعازيم اللي من ضمنهم كمال البندار كان لابس عربي وعليه الجرد وحاط رجل ع رجل ورافع انفه في السمي مش عاجبه شي وولده سلطان مقعمز جنبه عيونه ع ولاد تسعه الصغار معاذ واشرف وفاضل.. وسبحان الله..اشرف ماكانش طايقه ولاهو كان طايق اشرف شعور بالنفور كانوا حاسينه اتجاه بعض مالاش اي تفسير.. 🍃مرعي:ماريتش اخف من عقل هالراجل.. تسعه وهو يشوف لكمال بنظرات امتعاض قال.. /هذا علاش عزمته.. كمال وهو يمرر في نظره ع المكان جو عيونه في عيون تسعه ابتسم ابتسامه عريضه بعد رفع ايديه واشرله برقم سته ونزل يده التانيه واشر برقم خمسه.. كان يقصد المبلغ اللي خدي بيه حوش نور الدين الزواري.. تسعه غير نظره عنه وهو مبتسم بإمتعاض.. مرعي شد ضحكته وقال.. /بالشفا ياهلنا.. ضحك تسعه ومرعي ضحك وعيون كمال عليهم وهو مبتسم ابتسامه تخفي غيظه.. شويه وتسعه رفع يده وشاف الساعه بعدين قال.. /نستأذن نص ساعه وجاي.. مرعي قال.. /توكل وكون هاني.. استأذن تسعه من ضيوفه بعدين مشي طلع من القاعه وعيون كمال معاه اللي كان يراقب فيه جمال من اول ماخش.. 🌹وفي قاعة نساء.. كانوا زكيه وآسيا ونزيهه وفريحه واقفات جنب الباب يستقبلوا في المعازيم،وعيون الحاضرات كانت تراقب في زوجات تسعه ولبسهم ومجوهراتهم بالذات خاتم فريحه وبروش نزيهه كانوا قطع فنيه نفيسه شكلا ومضمونا وياقداش وحده من العازبات تمنت تنزل عليهم ضرة واولهم.. 🌱عاتكه وهي تشوفلهم قالت.. /ماعنديش مشكله نجي ع ضرة المهم نولي اللا.. اختها وديعة قالت بضيق.. /لالاياوخيتي اني راجلي كان مايبداش ليا بروحي مستحيل نعيش معاه.. عاتكه قالت بإزدراء.. /طيح سعدك ومزالك شوفي قداش وحده هني راجلها مش واخد عليها كيف يشوفوا لنساوين البي تسعه كل وحده تقول في خاطرها ياريتني مكانهم.. وديعة بعد ماسمعت كلام عاتكه شافت لأختها رقيه.. رقيه رفعت حواجبها وقالت.. /بصراحه كلام عاتكه كله صح.. ردت وديعه نظرها لنزيهه وفريحه وهي تقول في نفسها.. "مستحيل نرضى تشاركني وحده في عادل" 🍃بعد ماانقطعت علاقتها ببلقيس فقدت الامل من قيس وبدت دور ع واحد تاني تنساه بيه لعند مالقت واحد يخدم معاها في شركة حكوميه،ليها عام خاشه معاه في علاقه وصلت لإرتكاب بعض المحرمات لكن ماعمقتش المهم عندها تخليه يتعلق بيها وينفد وعده ليها بالزواج بعد مايكمل بناء حوشه كيف ماهو مفهمها🍃 🌿من جهة تانيه.. كانت هانيه جاذبه الانظار ليها بطلتها الجميله ودلعها وغرورها وهلبه محتارين فيها كيف اطلقت وقعدت لتوا من غير زواج.. 🌱"بالله عليك يافاطمة قنعيها خوي بيهبل عليها" تنهدت فاطمه وقالت بإبتسامه.. /باهي تو نكلمها لكن مانقدر نأملك بشي.. قالتلها مرت خوها.. /انتي حاولي فيها بس.. ضحكت فاطمه وقالت.. /حاضر.. ع جية وحده من خوات مرعي قعمزت حداهم وقالت لسلفتها.. /قلتيلها.. فاطمه قالت بضحكه.. /ايه قالتلي تو نكلمها وان شاء الله خير.. 🌱🌱🌱 "ماشاء الله ماشاء الله زي الغزاله طالعة لأمها" نزيهه قالت بإبتسامه.. /تسلمي اميمتي وحتى اني ماجبتاش من برا.. بدريه وهي تمرر في نظرها ع اختها قالت.. /لاهادي الباين عليها طالعتك حق مش زي كريمه.. امها التفت عليها وقالت . /وخيرها كريمه زي العسل.. قالت بدريه بضحكه.. /سامحيني نزيهه تعرفيني صريحه كريمه شوينه الحق مش عارفه لمن طالعه.. نزيهه حافظت ع ابتسامتها بالغصب بدون ماترد بكلمه لكن امها ردت تقول.. /خلي صراحتك لنفسك سلم بنتي من يومها نزوهه باهيه ومايجي منها كان الباهي..ربي يحفظلك صغويرتك كلهم بنيتي ويفرحك بيهم.. نزيهه قالت بإبتسامه.. /وانتي حيه يام.. بدريه قالت بضحكه.. /وااك يام حسستيني اشبح شن قلت..شافت لأختها وقالت..كان كلامي زعلك سامحيني . نزيهه قالت بإبتسامه.. /ولايهمك عارفاتك وعارفه نيتك.. ابتسمت بدريه وقالت.. /سلمها ياربي..ايه حقه..سمعت المده اللي فاتت قالوا راجلك صايرتله مشكله مع واحد من شركائه ورفع عليه قضيه.. نزيهه قالت.. /ايه وتسعة كسبها .. امها قالت.. /باهي الحمد لله.. بدريه:حتى هو وكل محاميه اشهر من نار ع علم اسمها"حسناء تاشفين" قالي عبد الرزاق كذا مرة شافها مع راجلك مرة في قصر العدل ومرة في المزاد اللي داروه ع خاطر حوش راجلها اللي توفى قالي كانوا موجودين مع بعض غادي.. امهم قعدت تشوف لنزيهه بقلق.. ونزيهه اللي دم في قلبها بدي يغلي قالت.. /ايه وكان يبيها تكون محاميته الخاصه لكن هي رفضت.. رفعت بدريه حواجبها وقالت.. /محاميته الخاصه!..ابتسمت بتعجب ومررت نظرها حواليها.. نزيهة ردت نظرها لبنتها وهي مضايقه ع الآخر وامها تشوفلها بأسف.. 🌹وبعيد عنهم بمسافه بسيطه كانت فريحة مع امها وخواتها حد ولدها يهدرزوا في هدرزة حلوة ويضحكوا ويبصروا وجوهم مافيش اجمل منه.. 🌿ومن بوابة القصر.. يخشوا عصمت وربيعه بعد ماحطتهم سيارة اجرة ومشت.. ربيعه لما خشت انبهرت بباحةالقصر.. بمساحتها..بتنسيقها..بديكوراتها.. ربيعه بذهول:ع قد ماسمعت عنها من امي ماصدقتش كنت ديما نقول انها تبالغ.. عصمت قالت بإبتسامه.. /مال لما تخشي داخل شن تقولي! ابتسمت ربيعه ورجعت تمرر في نظرها ع الحديقه لعند ماوصلوا في الباب اللي يوصل لقاعه الاحتفالات.. ويخشوا من هالباب وتبدا ربيعه تشوف عالم حتى في الخيال ماشافتش زيه.. قابلوهم زوز موظفات رحبوا بيهم وطلبوا منهم يحولوا جلابيبهم وهما نفذوا الطلب بعدين خدوا العاملات الجلابيب والشاربات وخدوا اسمائهم كتبوها في وراقي وعلقوهم عليهم.. الموظفه بإبتسامه قالت.. /تفضلوا.. مشوا مع بعض في ممر يرفع لباب القاعه المباشرة.. وين وصلوا في الباب وبدت تسمع ربيعه وتشوف في صخب هالعالم المختلف عن عالمها توترت ومع هدا قوت نفسها وحاولت تخلي روحها عاديه وتخش مع عصمت للقاعه.. اول عيون شافتهم وهما خاشين عيون فريحه ابتسمت وناضت ترحب بيهم،وترحيب فريحه بيهم لفتلهم الانظار.. اغلب الحاضرات اعجبوا بربيعه جدا بطلتها شكلها فستانها المميز شعرها الطويل اللي كانت قايمه منه شويه وفارد باقيه ومكياجها الناعم بالذات رسمة عيونها المميزات.. وبدوا يتسائلوا مني هادي اللي جايه مع عصمت التركيه!؟ وهالسؤال سمعاته نزيهه اللي كانت تشوف لربيعه بإمتعاض.. بعد مارحبت بيهم فريحه خدتهم ومشت بيهم للات الكبار.. زكيه اعجبت بربيعه كانت باينه فوق حلاوتها اكابريه وكأنها بنت باشا..كيف تسلم كيف تتكلم كيف تمشي اعتزازها بنفسها باين عليها هلبه... 🌱"هادي ربيعه اللي حكيتلك عنها ياللا" تفاجئت زكيه وقالت.. /ماشاء الله.. آسيا قالت بإبتسامه.. /ماشاء الله حلوة كتير وشعرها جدا جميل.. ربيعه قالت بإبتسامه.. /هدا من ذوقك ياللا.. ابتسمت زكيه وهي تشوفلها.. 🌵وكملوا سلامهم ع بلقيس وهانيه اللي كانت بطق غيره من ربيعه ناهيك ع انها مش قادرة تنسى اول لقاء جمعها بيهم.. وختامها مسك مع نزيهه اللي ناضت سلمت ع عصمت بعدين خدتها ومشت بيها لصاحباتها وخلت ربيعه واقفه بروحها ويدها ممدودة.. قهر الموقف ربيعه خصوصا انه صار قدام الناس لكنها حاولت تتماسك ع قد ماتقدر.. "تعالي قعمزي حبيبتي" التفتت شافت لفريحه اللي كانت مبتسمه ابتسامه حلوة ردتلها الابتسامه بعدين مشت معاها لكرسي فاضي قعمزت عليه وفريحه تقوللها.. /آنستينا.. ربيعه قالت بإبتسامه.. /بوجوك يااللا.. وتمشي فريحه وتقعد ربيعه بروحها قعدت تمرر في نظرها ع الموجودات لعند ماطاحوا عيونها ع مراة مظهرها مختلف عنهم لبسها ومكياجها وتسريحة شعرها كله قديم موضته طاحت وجنبها مراة كبيره في السن لابسه حولي حرير وشاربه ع راسها.. هادم يكونوا ام كمال البندار ومرته فطيمه ماكان في حد مهتم لأمرهم من الموجودات بل انه في من كان يعلق عليهم عيني عينك وبنت عمهم فريحه يدوب سلمت عليهم ولاهي ولااهلها جو جيهتهم.. ربيعه شافت ابتسامه ع وجه فطيمه هي ردتلها هالابتسامه بعدين غيرت عيونها عنها.. شويه جتها تعويضه بسفرة الضيافه وهي تقول.. /تفضلي ياسمحه.. ربيعه:يزيد فضلك..بعدين قالت بشي من الاحراج..نبي الحمام.. ضحكت تعويضه بعدين حطت السفرة ع الطاوله وقالت.. /تفضلي.. ناضت ربيعه ومشت معاها لعند ماطلعوا من قاعة الاحتفالات.. 🌵ربيعه بإنبهار قالت.. /القصر كبير هلبه ماشاء الله.. تعويضه قالت.. /سيدي سلامه الله يرحمه تمه سبعه سنين يبني فيه وقالوا جابله مهندسين من برا.. ربيعه قالت:قداش ليك تخدمي هني.. تعويضه قالت.. /تقريبا عام.. ربيعه:مرتاحه؟ قالت:واجد انا وراجلي لاقيين هنا الاحترام والاستقرار والراتب اللي يعطوه لنا ماياخدش نصه موظف في الدوله.. ربيعه قالت بإبتسامه.. /ماشاء الله ربي يزيد ويبارك.. تعويضه قالت.. /تسلمي..واهم الحمامات.. ربيعه قالت.. /تابعات للقاعه صح؟ ضحكت وقالتلها.. /صح.. ربيعه قالت.. /تقدري تمشي تشوفي شغلك تو نولي بروحي عادي.. تعويضه قالت بإبتسامه.. /ريحتيني من المراجاة مانحبهاش.. ضحكت ربيعه بعدين فتحت الباب وخشت وسكرت الباب.. تعويضه قالت.. /ماشاء الله عليها وع شعرها..فنصت وقالت..حي عليا وقت ع العشا!..ومشت بسرعه.. بعد لحظات طلعت ربيعه ومشت بإتجاه القاعه لكن وين قربت منها شافت باب تاني مقابل مردود ردان فضولها تحرك بقوة وخلاها تمشي بإتجاهه.. وصلت فيه وحطت يدها ع المقبض متاعه وفتحاته بحذر.. بينت راسها منه لقاته يطلع لجهة تانيه في القصر ماقدرتش تقاوم فضولها خشت وردت الباب وراها.. وقعدت تمشي وهي تتفرج بإنبهار كانت حاسه روحها في حلم اللي تشوف فيه توا موجود في عالم الاحلام والخيال بالنسبه ليها.. من كثر ماسحرها المكان ماانتبهتش لنفسها ولاوين قاعدين يرفعوا فيها رجليها لعند ماوصلت لبداية ممر.. كان طويل وفيه شي اثار استغرابها مرايا ع طول حيوطه شكلهم حلو بالمرة.. خشت للممر ووقفت ع المرايه شافت ظهرها من المرايه الخلفيه.. التفتت للخلفيه ومنها شافت نفسها في المرايه اللي وراها.. ضحكت بعدين قدمت للمرايه اللي قدامها وقعدت تشوف لنفسها كيف طالعه قالت بضحكه.. /حسيت روحي حلويت بزياده..حتى مراياتهم فيها الزايد.. 🌿وهي عايشه جوها وناسيه نفسها والمكان اللي قاعده فيه.. في اخر هالممر كان موجود مكتب تسعه وهو مقعمز فيه يقرا في ورده من القرآن بعد مادار مجموعه اتصالات مهمه تخص الشغل.. كمل قرايه الورد بعدين ناض وحط المصحف في مكانه.. ومشي للمرايه دار طلة اخيرة ع نفسه ثم مشي طلع من المكتب.. وهو ماشي بإتجاه الممر سمع صوت غريب ويخش للممر ويشوف قدامه مايخليه يوقف في مكانه.. ربيعه كانت تقول بضحكه وهي تساوي في شعرها... /والله هانم ياربوعه من غير فلوس ولاجاه ربي خلقك هانم.. لما نزلت يدها طاح منها الخاتم طبست وخداته وهي تقول.. /مااكبر صوابعك ياابله عصمت..وتوقف ع حيلها وتشوف مايخليها تشهق بفجعه.. وتلف بسرعه وتجري هاربه وهي تقول بهمس.. /حي عليا هو والله هو..بدت ع وجهها ابتسامه خفيفه وهي تقول..محلاه بالعربي..وتختفي ابتسامه وتحل محلها ملامح العصبيه وهي تقول..شن تخرفي ياحمارة.. واستمرت في الجري لين لقت روحها قريبه ع الباب اللي خشت منه وبسرعه طلعت منه وسكرت الباب وراها.. 🌿اما هو بعد هربت منه استاقظ لنفسه غمض عيونه بشده وقال.. /تسعه..تسعه..تسعه.. ولف ومشي للحمام اللي كان جنب المكتب حول كشابيته وحطها ع الكرسي بعدين خش للحمام توضى الوضوء للصلاة وطلع منه وخش للمكتب صلى فيه ركعتين التوبه وبعد الصلاة طلع من المكتب خدي كشابيته ولبسها ومشي طول للممر اول ماخشله جت بين عيونه غمضهم بشده وقعد يضرب في جبهته بأصابعه وهو يقول.. /تسعه تسعه تسعه... وكمل طريقه لقاعة الاحتفالات متاع الرجاله وهو يصارع في نفسه وطيف ربيعه... 🌺🌺🌺🌺🌺 بعد ماعشوا المعازيم خشت فرقة الزمزامات وبدت بالوصلة متاعها.. وينوضوا بناويت الشيخ البدري يعرضوا مواهبهم.. وديعه كانت ترقص عادي لكن عاتكه ورقيه يدوروا في العريس. والمعازيم مابطلوش تعليقات عليهم كيف بنات شيخ ويكونوا ع هالشاكله.!!؟وينوضوا بعدهم هانيه وبلقيس الزوز كان رقيصهم حلو لكن العيون ع هانيه اللي تبان اصغر من بلقيس.. "ياسعدودي زوز بنات..وين نقيل ونبات" شدوا ايدين بعض وهما يرقصوا ويضحكوا وامهاتهم يشوفولهم بحب.. "اللهم صل ع النبي عينك ياحاسد للعمي" 🌺🌺 ويجي دور الضراير اللي كان رقيصهم مع بعض حلو بالمرة.. "ياهلي ترقص هي وياها..ان شاء الله ماتقعدش بلاها" ضموا بعض وهما يرقصوا.. هانيه قالت بصوت عالي.. /الله يبارك الله يبارك.. "اللهم صل ع النبي..عليهم حجب ياربي" 🌵"خاطري نرقص ابله عصمت". عصمت قالت بضحكه.. /نوضي.. خدت ربيعه نفس وناضت ومشت والعيون تلحق فيها ولما وصلت في نص القاعه بدت ترقص.. كانت جدا ملفته ومميزة بالذات شعرها خلت الزمزامات يغنوا عليها.. "يدرج تدريج حمامه..بو سالف نازل لحزامه" ونزيهه تمرر في نظرها عليها بإزدراء من فوق لتحت وربيعه وهي ترقص وتلف شافتها ابتسمت بتهكم وغيرت نظرها عنها وخلتها تغلي من الغيظ.. "بوسالف ع الظهر رماته..ياسعد اللي تكون مراته" ربيعه لما سمعت البيت هدا جي بين عيونها تسعه بدت ع وجهها ابتسامه حلوة وقلبها بدي يدق بقوة.. 🌿وهو في قاعة الرجال كان يحاول ع قد مايقدر يركز مع المعازيم رغما عن عقله اللي يبيه يفكر فيها بأي طريقه.. وقعد ع هالحال لعند ماتم الاحتفال وسقد معازيمه وكان اخر من سقد مرعي ولد عمه..بعدين مشي خش داخل وتوجه طول لمكتبه . اول ماخش للممر قعد يسمع في صوتها وهي تقول.. " والله هانم ياربوعه من غير فلوس ولاجاه ربي خلقك هانم" ابتسم ابتسامه خفيفه وشاف للمكان اللي كانت واقفه فيه لاحظ فيه شي يلمع..قدمله وقعمز ع رووس اصابعه وقعد يتفحص فيه لقاه زر صغير لماع واضح انه طاح من فستانها خداه بعدين وقف ع حيله ومشي لمكتبه وهو مبتسم.. 🌿بعد ماخشله حول كشابيته حطها ع الكرسي ومشي قعمز ورا المكتب..حط الزر عليه وقعد يتأمل فيه وهو يتفكر في المواقف اللي جمعاته بربيعه..كانت تلمع في عيونه وتبرق زي النجمه.. " تعرضلي في الطريق واني مروحه للحوش هددني بكميه وخلاني نركب معاه السيارة غصب عني ولما وصل بيا لحوشهم حاولت نهرب منه والباقي تعرفه يابيي تسعه..". ضحك ضحكه خفيفه وهالضحكه تتحول لإبتسامه لما تفكرها كيف دافعت عن شرفها بقوة قل نظيرها... " احسن خل يقعد غادي لين يموت ولاتنهشه الكلاب المسعورة.. مش خايفه!؟ هادي جريمه عقوبتها اعدام.. الموت بشرف عمره ماكان عقوبه يابيي.." ضحك بعدين شاف لملف قدامه خداه وفتحه وشاف اللي فيه ورقه مرسوم عليها تصميم لعقد..التصميم كان جدا مميز ومن اكثر تصاميمه دقه واحترافيه.. " والله هانم ياربوعه من غير فلوس ولاجاه ربي خلقك هانم" توسعت ابتسامته وهو يتأمل في التصميم بعدين سكر الملف ورده لمكانه ورجع يتأمل في الزر.. 🥀وهدا كله وفريحه تستنى فيه في جناحها لعند ماغلبها النوم ورقدت...
...يتبع...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
