#ولاد_تسعة "الفصل الاول/سميه تسعة" #جمان_فريد الجزء_السابع "للة اللات 2" ⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔ ⚠️ملاحظه.. لما يبدا الكلام بالرمز هدا (♤) هذا يعني ان البطل يسرد في الاحداث اما لما يبدا بهذا (🌿) يعني الكاتبه هي اللي تسرد.. #الدعاء سمع النبي صلى الله عليه وسلم رجلاً يدعو: اللهم إني أسألك بأن لك الحمد لا إله إلا أنت، المنان بديع السماوات والأرض يا ذا الجلال والإكرام، يا حي يا قيوم. فقال النبي صلى الله عليه وسلم: «لقد دعا الله باسمه العظيم الذي إذا دعي به أجاب، وإذا سئل به أعطى» [رواه أصحاب السنن وغيرهم/ صحيح أبي داود: 1495]. ■■■■■■■■■■■■■■■■■■■■■■■■■■■■■■■■■■■ 🌿"وأعذبُ الوصلِ وصلٌ كنتَ تحسبُه من المحالِ فأضحى صدفةً قَدَرَا."🌿 •••••••••••••••••••••••••••••••••••••••••••••••••••••••••• طلعت من الحوش متوجهه للمحل اللي في أول الشارع بش تاخد بعض الحاجات... وصلت في المحل وخشت وهي تقول.. /السلام عليكم.. صاحب المحل ردوهو مركز عليها.. وهي مشت طول خدت كياس وبدت تاخد في الحاجات اللي تبيهم وبعد ماكملت توجهت للكاصه حطت الكياس عليها.. صاحب المحل قال.. /خوديهم ياابله وتفضلي.. ربيعه بعدم فهم قالت.. /كيف؟ ابتسم وقال.. /حسابك مدفوع.. رفعت حواجبها وقالت.. /مدفوع!من اللي دافعه ترا؟ قاللها وهو مغير عيونه عنها.. /سامحيني مانقدرش نقول.. بدت ع وجهها ملامح الامتعاض وهي تقول.. /حتى اني مانقدرش ناخدهم.. ومشت طلعت طول وخلت الراجل ينادي فيها ولما يأس انها تولي رفع سماعه الهاتف وضرب ع رقم معين وبعد لحظات قال.. /مابتش تاخدهم.. 🌵وربيعه بعد ماطلعت من المحل اضطرت تمشي مشوار للشارع اللي وراهم بش تاخد حاجاتها من المحل فيه.. ▪▪▪▪▪▪ "خيرك عطلتي" ربيعه وهي دس في الحاجات قالت.. /مشيت للمحل في الشارع اللي ورانا.. عصمت قالت بإستغراب.. /وخيره المحل اللي هني؟ وقفت ربيعه قدامها وقالت بنرفزة.. /السفتول بعد ماخديت الحاجات وعطيتهوله بش يحسب حقهم قالي حسابك مدفوع.. عصمت قالت بإزدراء.. /تفي عليه تفي.. ربيعه:المشكله نديد بوي هاللي لايستحي ولايتحشم.. عصمت:ماهم اغلب الرجاله هكي لما يشيبوا يخيبوا.. ضحكت ربيعه وقالت.. /خل نمشي نبدا خياطه جبة الزبونه التاجوريه.. عصمت قالت بإبتسامه.. /جري جري.. طلعت ربيعه بسرعه وهي تضحك وخلت عصمت تدعيلها.. "ربي يقوي سعدك" 🌿🌿🌿🌿🌿 واقفه ورا باب الفيرندا اللي يطل ع الجنان كان باين من ملامح وجهها انها عايشه حالة انتظار.. دق باب دارها التفتت شافتله طول.. "حسناء راجلك جي" بدت ع وجهها ملامح اللهفه اللي حاولت تخفيها في صوتها لما قالت.. /شويه وطالعه.. وبسرعه مشت وقفت ع المرايه بش دير نظرة ع طلتها.. فردت شعرها الذهبي ع كتافها بعدين خدت العطر وزادت حطت منه..عاودت ركزت بالنظر ع زينتها بعدين نزلت عيونها لاحمر الشفاه اللي كان ع الزيانه..خداته وزادت حطت منه ورداته لمكانه.. وبعد مادارت نظره اخيره ع نفسها خدت نفس عميق و توجهت للباب فتحاته وطلعت.. 🌿في الصالون.. كان تسعه مقعمز يهدرز ع نبيهه اللي كانت هدرزتها ممتعه وماينملش منها.. 🌱"نحاول نفضي روحي الايام الجايه بش نرفعكم لزوارة وبالمرة نشوفها" نبيهه قالت:مامشيتلهاش قبل؟ بإبتسامه قال.. /نهائي.. "السلام عليكم" وجه نظره للباب وقال بإبتسامه.. /وعليكم السلام.. وعيون نبيهه مع بنت اختها وهي خاشه لما تفحصت شكلها ولبسها ابتسمت من قلبها.. وصلت حسناء في تسعه وهو وقفلها..مد يده وقال.. /كيف حالك؟ صافحاته وهي تقول.. /الحمد لله..شن حالك اتت؟ طلق يدها وقال.. /الحمد لله.. هي حست بشي من الضيق لما سحب يده لكن مابينتش قعمزت مقابلاته وقالت.. /ليك تلاته ايام ماجيتش ان شاء الله المانع خير! نبيهه قالت في نفسها.. "قصدها تقول استاحشتك"..وشدت ضحكتها.. تسعه رد يقول.. /والله كنت مسافر اليومين اللي فاتوا لبريطانيا عندي فيها شغل حسناء:ايه نعرف عندكم شركه غادي.. هز راسه بصمت.. هي عقدت حواجبها وقالت.. /فكرت ان في شي صار منعك من الجيه والاتصال.. نبيهه قالت في نفسها.. "قصدها ع حكايه زواجه الرابع..اهو سؤالك هدا بروحه فاضحك يابنت اختي" هو ابتسم وقال.. /عارف في شن فكرتي.. احمر لون وجهها وهي تقول بضحكه ربكه.. /في شن فكرت ترا؟ هو قال بإبتسامه.. /موضوع ولاد نور الدين..طمني بالك اني قاعد ماشي فيه وقريبا ان شاء الله نوصلوا لشي مهم.. انخطف لون وجهها مع انها قعدت محافظه ع ابتسامتها نبيهه وهي تشوفلها كملت حديثها مع نفسها.. "ياروحي بنت اختي ضغطها هبط" حسناء وهي مبتسمه بالغصب قالت.. /وانت مازال مصر درق عليا التفاصيل.. رفع حواجبه ونزلهم وهو مبتسم.. نبيهه:مش مهم المهم يفكك منهم طيور الشر هادم.. تسعه قال.. /فعلا هدا المهم..وتوا خلينا منهم وقوليلي شن هو الموضوع المهم اللي تبيني فيه؟ تنهدت وقالتله.. /ليا قريب تلاته اسابيع قاعده في الحوش واني مش واخده ع التقعميز نبي نخدم.. شاف لشعرها وهو يفكر في كلامها..حسناء ماكانتش محجبه وفكرة انها تقعد تطلع من غير حجاب وهي ع ذمته لايمكن يتقبلها.. نبيهه:وشن عندك بديري بيها الخدمه مايجي من وراها كان وجع راس.. حسناء قالت.. /تعرفيني خالتي اني مانرتاحش الا في خدمتي.. تسعه قال.. /ماعنديش مشكله مع خدمتك لو كانت معاي وانتي مغطيه شعرك.. نبيهه قعدت تشوفلها وهي تراجي في ردها.. حسناء:لاالموضوع هدا ما يحق لحد يدخل فيه لأنه يخصني ويخص قناعاتي.. ناضت نبيهه وقالت بشي من الارتباك.. /خل نمشي ندير قهوة.. ومشت طلعت بسرعه وهي تدعي ماتصير مشكله بيناتهم. تسعه بعد ماشافها طلعت رد نظره لحسناء وقال.. /في دينا الزوجه مفروض عليها طاعة زوجها في اي شيء يأمرها بيه مدامه يرضي الله..واني هني امرت بمعروف او بمعنى اصح طاعه..لله قبل لتكون ليا اني.. حسناء قالت.. /الامور الدينيه تخص العبد وخالقه بس.. ابتسم وقالت.. /النيه هي اللي تقعد بينك وبين الله اما الامر بالمعروف هدا واجب حتمي ومش هكي وبس..هادي ابرز حاجه تميزنا حني المسلمين عن غيرنا.. حسناء قالت بشي من عدم التقبل.. /تمام..لكن بصراحه اني مش مقتنعه بالحجاب،مافيش نص واضح وصريح في القرآن يأمر بيه.. تسعه قاللها.. /تقري في القرآن ديما؟ نزلت عيونها وهي منحرجه ومعصبه في نفس الوقت وقالت.. /قتلك امور زي هادي بيني وبين ربي.. ابتسم وقال.. /عندك حق في هادي..بس اني لما سألتك السؤال هدا كان قصدي نفكرك بآيتين موجودات في سورة الأحزاب وسورة النور مضمون هالآيتين فرض الحجاب.. "وليضربن بخمرهن على جيوبهن" "ياأيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى ان يعرفن فلايؤذين" زمان العرب قبل الاسلام وبعدين في فترة من عهد الرسول كانت المراة تلبس غطا ع راسها ينقاله بالفصحى خمار لكن ماكانش يحجب شعر المراة تماما ولامفاتنها زي رقبتها وصدرها فالله سبحانه وتعالى لما امر بالحجاب قال بمامعناها قوللهم يغطوا بخمارهم الرقبه والصدر ويشدوا عليه بقوة بش ماينفكش هدا معنى كلمة "يضربن" وعلل الامر هدا بأنه حمايه للمرأة للآذى واللي هو التحرش بجميع درجاته اللي اولهم النظر..مع العلم ان في من فسر الآيه هادي ع ان الخمار لازم يغطي حتى الوجه..اشر بيده ع اعلى راسه وهو يقول..من هني.. بعدين نزل بيده لأسفل صدره وهو يقول لهني..تنهد بإبتسامه وقال..الخلاصه ان فريضة الحجاب زيها زي غيرها من الفروض الأمر بيها جي في نص قرآني وبدل المرة اتنين .. طول ماهو يتكلم كانت تسمعله بكل مافيها اسلوبه خلاها تقتنع قناعة تامه بحكم الحجاب اللي ياما سمعت بيه من غيره بأسلوب فظ ومتعالي خلاها تنفر منه.. "هاه مازلتي عند رايك؟!" ابتسمت ابتسامه حلوة وقالت.. /شكلك متوسع في الثقافه الدينيه.. قاللها بإبتسامه.. /الدين مش ثقافه الدين نظام حياة كامل من جميع النواحي.. نزلت عيونها وهي تضحك بعدين رفعتهم فيه وقالت.. /باهي خليني نقول انت متدين.. ضيق عيونه وقال.. /نوعا ما..هز راسه وقال..نحاول قاعد نحاول.. ع خشة نبيهه بسفرة القهوة والحلو لما شافتهم مبتسمين ابتسمت وهي تقول.. /اهي جت قهوة نبيهة المزهره.. وقفت قدامه وقالت.. /تفضل.. هو خداها وقال.. /صحيتي..قهوتك تاني قهوة نتكيف بيها بعد قهوة امي.. قعمزت نبيهه وهي تقول.. /هادي القهوة الطرابلسيه ديما بنتها غير.. ضحك وقال.. /وامي طرابلسيه ابا عن جد.. نبيهه قالت بضحكه.. /هدا علاش.. رشف من القهوة بعدين قال.. /زعمه حسناء تعرف دير قهوة زي هادي! فنصت حسناء ونبيهه قالت بضحكه.. /تعرف الوز.. حسناء شافتله وهي تفنص فيها وتسعه قال بضحكه. /واضح واضح.. حسناء شافتله وقالت.. /شن هو اللي واضح؟ قاللها:ماتعرفيش طريق الكوجينه.. نبيهه:لابيي تعرفها لما تجي تشرب ولا تاكل..حتى الماعين اللي تاكل وتشرب فيهم اني نجيبهم من دارها ونغسلهم.. حسناء وهي بتتبخر من الاحراج قالت.. /خالتي! تسعه بضحكه.. /والله واضح واضح ماعندك مادرقي ست البيت يبان عليها راهو وانتي مراة مركزه ع حياتك العمليه بس.. هي نزلت عيونها والاحراج مسيطر عليها اول مرة في حياتها تنكسف من كونها انسانه ماتفقه شي في امور تدبير المنزل حتى القهوة ماتعرفش ديرها.. ابتسم وناض وهو يقول.. /عطيك الصحه خالتي نبيه..ومشي بيحط الفنجان في السفرة.. حسناء وهي تشوفله حست ان صوت قلبها مسموع من قوة الدق..قلبها اللي كان يبيه يقعد خلاها تلقائيا تقول.. "اقعد للغدي" 🍃نبيهه شافتلها وهي متفاجئه اول مرة تطلب منه الطلب هذا قبل يجي ساعه ويروح وماياخدش اكثر من فنجان قهوة،مع ان نبيهة كانت تحاول تخليه يتغدا ولا يتعشا عندهم لكن هو كان يرفض بإعتذار لطيف.. وسبب رفض تسعه هو شعوره ان حسناء ماتبيشي يطول في وجوده عندهم والحقيقه اللي يجهلها غير هكي تماما...🍃 حط الفنجان وقال بإبتسامه.. /والله ياريت بس عندي مواعيد وارتباطات مانقدرش نتأخر عليها ولانلغيها.. هي اضايقت وهالشي بان في عيونها..خالتها بعد ماشافتلها قالت.. /خلاص غدوة غداك عندنا.. هو قال بنفس الابتسامه.. /لاخليها الخميس بنجيب معاي العيله يتعرفوا عليكم.. تفاجئت حسناء.. نبيهه قالت.. /مرحبتين بيهم والله حتى اني خاطري نتعرف عليهم.. ابتسملها بعدين شاف لحسناء وقال.. /وانتي؟ ناضت وهي تقول.. /من بيجي بالزبط؟ قاللها:امي ومرت بوي واختي وزوجاتي.. اخر كلمه قالها حستها نار اخترقت مسامعها..بلعت ريقها وقالت.. /مرحبتين بيهم.. ابتسم وقال.. /خلاص نتلاقوا الخميس ان شاء الله.. شدت حسناء ع قبضة يدها بقوة بسبب شعور الضيق اللي حست بيه بيرجع يغيب عنها اربعه ايام مش عارفه كيف بتفوتهم من غير ماتشوفه.. "ماتبوا شي" نبيهه قالت.. /سلامتك ولدي.. هو قال.. /السلام عليكم..ومشي وخلا نظرات حسناء وقلبها عقلها يلحقوه زي مالحقاته خالتها بش تسقده.. ونبيهه بعد سقداته ولت للصالون مالقتهاش ابتسمت وحركت راسها يمين ويسار اسفا... 🌿🌿🌿🌿 ويجي يوم العزومه اللي كانت متشوقتله هانيه لكن فريحه كانت حاسه بجبل قاعد قلبها لليوم قاعده هاجره تسعه واللي زاد قهرها انه مافكرش يرضيها ولايدورها من أصله وهالشي خلاها تصعد من موقفها اللي خداته منه لدرجة انها في مشيتهم لحوش ذهيبه خلت هانيه ترفعها في سيارتها لأنها ماتبيش تركب معاه.. 🌹🌹🌹🌹 "اشيه اشيه اشيه شن هدا شني" حسناء وهي شادة ابتسامتها قالت.. /اللي يسمع يقول اول مرة نلبس هكي!.. نبيهه قالت بضحكه.. /لامش اول مرة لكن مش عارفه ليش حسيتك محلوة بزياده.. ابتسمت حسناء بخجل وهي تقول.. /باهي وريني شن درتي.. ضحكت نبيهة وقالت.. /تعالي يابايرة.. بدت ع وجه حسناء ابتسامه امتعاض وهي تشوفلها... ويسمعوا صوت الباب الخارجي وهو ينفتح.. بربكه ولهفه قالت حسناء.. /جو جو! ضحكت خالتها وخدتها من يدها وهي تقول.. /تعالي.. 🌿ويستقبلوا نبيهه وحسناء نساوين العيله.. هانيه لما شافت حسناء عجبتها من كل نواحي وحتى زكيه وآسيا اعجبوا بيها وبالنسبه لنزيهه ماكانتش فارقه معاها هلبه عكس فريحه اللي كانت حاسه روحها تموت بالعرق.. 🌿🌿🌿 واجتمعوا ع طاوله الغدي.. تسعه ع راسها والباقي ع طرفيها.. 🌱نبيهه:لاوالله ربي ماكتبليش نتزوج لتوا.. زكيه قالت.. /نصيبات.. هانيه قالت لحسناء.. /سمعت انك خديتي الماجستير في مصر.. حسناء قالت بإبتسامه.. /صح.. هانيه:شفت يومها اعداد قديمه لمجلات نسائيه معروفه كاتبين عنك كلام حلو.. حسناء وهي مبتسمه قالت.. /طلبوا يديروا معاي لقاءات لكن اني رفضت ماعنديش بال لأسئلة الصحفيين.. تسعه:بالها مش واسع وماتعرفش تجامل.. ابتسمت وهي تشوفله ونزيهه وفريحه اللي كانت شاده دموعها بالسيف يراقبوا فيها.. 🌿وتتواصل الاحاديث الممتعه ع طاولة الغدي وتسعه وفريحه كانوا اغلب الوقت مستمعين.. بعد الغدي..طلعوا مع بعض للحديقه اللي كانت مزينتها الاجواء الربيعيه..قعمزوا فيها يشربوا الشاهي وكملوا باقي احاديثهم.. شويه وناض تسعه وطلب من حسناء تنوض معاه ومشوا تباعدوا عنهم وعيون فريحه اللي كانت مليانه بنظرات الحزن والغيره تلحق فيهم.. 🌱"فكرتي" بإبتسامه قالت.. /وقررت..موافقه نخدم معاك.. قاللها بإبتسامه.. /نقصد الحجاب.. قالت وهي مبتسمه.. /اوامر ربي مافيش معاها تفكير تتنفذ طول.. وهو مبتسم قال.. /الله يبارك الله يبارك..معناها لازم نعطيك الحاجه اللي جبتهالك معاي.. هي بإبتسامه مفاجأة قالت.. /شن هي!؟ قاللها؛تعالي معاي.. ومشي بإتجاه سيارته وهي لحقاته وقلبها يدق بقوة.. وصلوا في سيارته وهو جي للباب اللي جنب السواق فتحه وخشلها فتح الدرج متاعها وطلع منها علبه مجوهرات بعدين طلع منها وسكرها.. قدملها وقال.. /ان شاء الله يعجبك.. خدت العلبه وفتحتها وترتسم ع وجهها ملامح الانبهار.. كان موجود في العلبه "هيدبيس" من الذهب الابيض مزين باللؤلؤ الطبيعي.. قاللها:اني صممت شكله لامااشتغلش عليه لو ماعجبكش نديرلك غيره.. وهي مبهورة قالت.. /قصدك انت تصمم في مجوهرات!؟ ابتسم وقالت.. /هوايه.. حسناء وقتها حست بمشاعر حلوة عبت قلبها وخلاته في حالة عمرها ماعاشت زيها في حياتها.. هو لما طولت في الصمت قال.. /شكله ماعجبكش.. بنبرة حلوة قالت.. /بالعكس.. ابتسم وقال.. /كويس..اهو تقعدلك ذكرى حلوة تتفكرينا بيها.. تعكرت ابتسامتها ونزلت عيونها للعلبة بعد ماسكرتها وقالت.. /شكرا.. قاللها بإبتسامه.. /العفو... 🌿🌿🌿🌿 "تي وين مشي ياهمي وين" قالت هالكلام مرت الشيخ البدري وهي تصيح وسط الحوش.. جوها بناتها يجروا وولادها طلعوا من ديارهم وهما مفزوعين.. عاتكه قالت بفجعه.. /خيرك يام!؟ خبطت بإيديها ع رجليها وقالت.. /تاكمي الذهب مالقيتاش باكوه قاعد لكن هو مهناش ياغبارتي السودا.. بوعجيله قال.. /تي غير زيدي دوري يام.. قالتله:قلبت عليه الدنيا قلب مهناش.. ولدها الوسطاني عبد الباسط التفت ع خواته وقال.. /وحده فيكم خداته.. شهقوا عاتكه ورقيه اما وديعه قالت.. /وشن بنديروا بيه!!؟. عاتكه قالت.. /مرات واحد فيكم خداه وباعه وصرفه ع صحاباته.. وتجيها صفعه ع وجهها من بوعجيله وتلقحها التانيه ويطيح فيها ضرب.. خواتها هربوا لدارهم وسكروا عليهم الباب وخلوا امهم تحاول تحز بوعجيله عن اخته في الوقت اللي فيه ولادها التانيين واقفين يتفرجوا ويشجعوا في بوعجيله ع اللي يدير فيه.. 🍃والتاكم اللي صار ع خاطره هدا كله قاعد ينباع في احدى محلات الذهب خارج الألف وخمسين.. عادل بعد ماخدي حقه وحطهم ع الفلوس اللي خداهم من وديعه مع طقم الذهب توجه لحوش واحد من اصدقائه.. 🍃"خلال يومين يكون كل شي واتي ونطيروا من هني" عادل قال بضحكه.. /واخيرا بنقبروا الفقر..لكن تصدق قداش كانت عندي نيه فيها وديعه هادي.. قاله صاحبه.. /بعد يومين بتلاقي السويديات ومازال طامع فالشلايك اللي هني!؟ ضحك وقال.. /ع قولتك..ماعندكش حاجه ناكلوها.. قاله صاحبه:في كل خير.. ومشوا مع بعض للكوجينه وهما يحكوا عن خططهم لمسقبل بيبنوه ع حطام قلوب المغفلات الغافلات... 🌿🌿🌿🌿🌿 في مستراح الحوش.. واقفات مع بعض وهما يمرروا في انظارهم اللي كلها استغراب ع صناديق الفواكه والخضرة والمواد التموينيه بكل انواعها وحتى من اللحم اللي كان سقيطه كامله.. هدا كله جابه معاه زوج تعويضه اللي كان يقول.. /تسلم عليكم اللا الكبيره وتقوللكم من اليوم قضيتكم كلها علينا.. عصمت وهي متفاجئه قالت.. /اللا زكيه! قاللها:ايه يااختي..نستأذن..السلام عليكم.. ومشي طلع من الحوش وسكروراه الباب.. عصمت بعدم استيعاب قالت لربيعه.. /فهمتي حاجه!؟ ربيعه وهي تفكر قالت.. /لا.. عصمت:زعمه في حد كاذب عليها وقايللها وضعنا مولي بالهون! ربيعه قالت.. /اتصلي بيها وافهمي منها.. عصمت هزت راسها وقالت.. /هو هدا... 🌿🌿🌿🌿🌿🌿 "باهي قولي شن سر هالاهتمام المفاجئ بعصمت التركيه" ضحك تسعه.. زكيه قالت بصدمه.. /ان شاء الله هادي اللي ناوي تاخدها.. وتعلا ضحكه تسعه اللي صدح صوتها في حديقة القصر.. ضرباته امه ع ذراعه وقال.. /سادك ضحك وتكلم.. تسعه بضحكه.. /غدوة بإذن الله تعرفي كل شي.. ع جية تعويضه وقفت قريبه عليهم وقالت.. /عصمت تبيك ع الهاتف ياللا.. ابتسم تسعه وقال.. /قوليلها غدوة تعرفي كل شي.. قدم لأمه وباس راسها بعدين لف ومشي وخلاها في حيرة من أمره.. ▪▪▪▪▪▪▪ "شكلها جايبتلك عريس" ضحكت عصمت بخجل وقالت.. /زعمه! ربيعه قالت.. /ايه وشكله العريس هدا هو اللي باعت الحاجات مش هي.. عصمت ضربتها ع كتفها وقالت بضحكه.. /يتار كز يتار"ياسر يابنت ياسر" ربيعه قالت بإبتسامه وهي رافعه حاجبها.. /غدوة تجي لكلامي.. شدت عصمت ذقنها وهي تفكر بخجل في كلام ربيعه... 🌿🌿🌿🌿🌿 ويجي تاني يوم.. وبعد العصر مباشرة يدق باب حوش عصمت.. "شكلها اللا جت اطلعي افتحيلها ياربيعه" ربيعه طلعت من دارها وهي تقول.. /حاضر.. رفعت شاربتها ع راسها ولبستها كويس ومشت بسرعه لبست في رجليها وطلعت لباب الخارجي وبدون ماتسأل من وراه فتحاته طول ولما شافت اللي كان وراه جمدت في مكانها.. تسعه اللي كان مدرق عيونه بالنظارات السود قال بإبتسامه.. /السلام عليكم.. هي من قوة من المفاجأه اللي سيطرت عليها لما شافاته ردت في وجهه الباب وخشت تجري بدون ماتشوف قدامها لين اصطدمت بعصمت.. عصمت بخوف قالت.. /خيرك!؟ ردت عليها بتوتر وارتباك.. /البي تسعه.. عصمت قالت بصدمه.. /نهار ابيض!..ومشت طلعتله بسرعه وخلت ربيعه واقفه وهي حاطه ايديها الزوز ع قلبها المفجوع.. 🌱"تفضل يابيي تفضل زارتنا البركه" تسعه وهو واقف في مستراح الحوش قال.. /تسلمي.. عصمت وهي مبتسمه بإرتباك قالت.. /راجي شويه نجيبلك كرسي.. قاللها:لالا مش لازم كل اللي نبيك ديريه تناديلي ربيعه.. عصمت وهي متفاجئه قالت.. /ربيعه؟ هز راسه بإيجاب وهو مبتسم.. ▪▪▪▪▪▪ "شن يبي فيا!؟" عصمت قالت.. /لما تطلعيله تعرفي.. ربيعه قالت بخوف.. /يارب خير يارب.. عصمت قالت بضحكه استغراب.. /علاش الخوف هدا كله.. سكتت ربيعه وهي تفرك في ايديها ببعض بتوتر ماخطرش في بالها وقتها شي غير قصة موت صلاح.. عصمت قالت.. /تي سقدي اطلعي الراجل يستنى.. خدت ربيعه نفس ومشت بتطلع.. 🌿وهو قاعد واقف يستنى ع نار.. وتطلع ربيعه وتشوفه كيف واقف وهو حاط ايديه ورا ظهره ومركز بنظره ع جهة معينه.. بدت ع وجهها ملامح ابتسامه اعجاب فيسع خفتها لما وجه نظره ليها.. نزلت عيونها وقالت.. /السلام عليكم.. بإبتسامة قال.. /وعليكم السلام..كيف حالك ياربيعه.. قالتله:الحمد لله...خير يابيي في شن تبيني.. وهو مبتسم قال.. /في خير ياربيعه في خير.. قالتله:وشنو هالخير يابيي.. "كان خطبتك ترضي بيا" حست قلبها انتفض لما سمعت سؤاله قامت عيونها فيه وهي مصدومه .. كرر سؤاله بصيغه تانيه.. /ترضي بيا ولالا؟! قعدت تشوفله وهي ملتزمه الصمت مش قادرة تصدق اللي هي فيه في بالها انه حلم من احلامها اللي شافاته فيهم.. عقد حواجبه وقال بإبتسامه.. /السؤال صعب ولاصادم!؟ هني ربيعه رجعت لوعيها لما فسرت كلمة صادم بطريقه مست شي من كرامتها.. استمرت في التزامها للصمت للحظات بعدين قالت.. /الزوز.. قاللها بنفس الابتسامه.. /كيف ترا؟ قالتله:طبيعي طلبك يصدمني وفي نفس الوقت يخليني نسأل علاش؟..ع خاطر اللي صار!؟ تبي تحميني يعني!؟ولاتبي تستغله بش تخليني نوافق عليك!؟ قالها بضحكه استغراب.. /نستغله!؟. تنهدت وقالت.. /سامحني يابيي بس اللي زيك ياما سمعت وقريت عنهم بش يوصل في الحاجه يبيها يدير كل شي،كانهدا شن يخلي راجل بقيمتك من عيلة كبيرة ومعروفه ومتزوج نساوين مكافئين ليه في كل شي يطلب الزواج من وحده في نظره ماتملك شي ولاعندها من يسندها ولايحامي عليها.. ماردش عليها حتى بملامح الوجه قعد يشوفلها بس.. هي بلعت ريقها وقالت.. /واضحه يابيي من جيتك بروحك واضحه..واني حال زي هدا مستحيل نرضاه لروحي..شوف طلبك عند غيري.. بدت ع وجهه ابتسامه خفيفه وهو يشوفلها بعدين لبس نظاراته والتفت للباب ومشاله فتحه وطلع وسكره وراه.. نزلوا دموع ربيعه وهي خاشه داخل قابلتها عصمت اللي سألتها بنبرة حزن.. /وين شايفك؟ بنبرة مرتعشه ردت ربيعه.. /مانعرفش. بعدين حطت ايديها ع وجهها وانهارت بالبكي.. وجعتها نفسها ووجعها قلبها هلبه وعصمت ضمتها وهي تقول بحزن.. /معليشي حبيبتي معليشي.. 🌿🌿🌿🌿🌿 خش لدار امه وسكر الباب.. قعد واقف يستنى فيها لعند ماخشت عليه وقالت.. /خيرك.. تسعه مشي سكر الباب بعدين التفت عليها وقاللها.. /نبيك تمشي انتي ومرت بوي ونساوين عمامي الهادي ومنصور وارفعوا معاكم مرت مرعي لحوش عصمت بش تخطبولي ربيعه.. امه قالت بدهشة.. /ربيعه!؟ هز راسه وهو يقول.. /ايه يام ربيعه..ماتفكريش تعترضي نهائي انتي بروحك ياما شكرتي فيها.. امه شافت في عيونه اصرار عمرها ماشافت زيه هدا غير الناس اللي طلب منها ترفعهم معاها بش تخطبهاله هدا كله حسسها ان ولدها راغب ربيعه من وسط قلبه.. ابتسمت وقالت.. /حاضر ياأمي حاضر بس قبلها نبي نعرف علاش ماتبيش نزيهه وفريحه يمشوا معانا.. تنهد وقال.. /الموقف صعب هلبه ع فريحه مانبيش نوجعها اكثر من هكي ونزيهه عارف كيف حتكون نظرتها للموضوع وعارفها مش حتهني روحها.. زكيه؛كيف قصدك حتى ربيعه بتسكنها بروحها؟ قاللها:اكيد لا..حتعيش هني زيها زيهم ووقتها مش حيتجرأ حد يعفسلها ع طرف.. امه قالت.. /باهي امتى بتعطيهم علم.. قاللها:بعد نخطبها يام وانتي اللي بتخبريهم.. ♤قالت جداي فهمت من طلبه هدا وقتها انه مايبيش يشوف ولايسمع منهم شي يستفزه ويخليه يزعلهم..المهم اتصلت جداي بسلفاتها وبمرت مرعي وطلبت منهم يمشوا معاها لحوش عصمت بدون ماتوضح السبب وهما ماقالوش لا وتاني يوم مع العصر تسقدوا كلهم لحوش عصمت ولاعصمت ولاامي ولانساوين بوي عندهم علم بحاجه.. 🌿"تفضلوا تفضلوا آنستوا وشرفتوا" زكيه قالت.. /بوجودك.. وقعمزت عصمت في صالون الضيوف وقعمزت معاهم.. بعد السؤال عن الاحوال والهدرزة المقتضبه في مواضيع مختلفه..استأذنت منهم عصمت بش بتجيب ضيافه لكن زكيه وقفتها لما قالت.. /قبل لضيفينا اسمعي مني السبب اللي جيتك ع خاطره وجبت معاي هالوجوده الطيبه.. عصمت وهي مبتسمه قالت.. /تفضلي يااللا قولي اللي عندك.. 🌿في هالوقت كانت ربيعه مقعمزه وهي قمة التوتر ودقات قلبها كانت قويه ومتسارعه قعدت عايشه حالة الانتظار حوالي عشرة دقايق لعند ماخشت عليها عصمت وهي تقول بضحكه.. /تي غير شن درتي البي تسعه اللي بعت هادم كلهم بش يخطبوك.. ربيعه وهي مبتسمه بتوتر ممزوج بالفرح قالت.. /يخطبوني!؟ عصمت:ايه ياحنة ظلمتي الراجل يابنت.. ابتسمت بخجل وهي تفرك في ايديها ببعض.. عصمت بنفاد صبر قالت.. /تي هيا نوضي يراجوا فيك.. ناضت وهي تقول.. /راجي خل نساوي شعري.. ومشت وقفت ع المرايا وعصمت تغنيلها.. /بوسالف ع الظهر رماته..ياسعد اللي تكون مراته.. احمر وجهها وهي تضحك بخجل وعصمت تضحك معاها.. 🌿وتطلع ربيعه ع الخطابه.. ام مرعي كانت تشوفلها بتكبر لكن الباقي كانوا مبتسمين.. هي مشت طول سلمت ع زكيه وقالت.. /كيف حالك.. زكيه قالت بإبتسامه.. /الحمد لله.. وتسلم ربيعه ع الباقي بعدين قعمزت جنب عصمت.. زكيه قالت.. /شوفي بنتي ولدي يبيك ع سنة الله ورسوله وبعتني اني ونساوين العيله بش نتكلموا فيك..الحق يابنتي اني من اول ماريتك عجبتيني وخشيتي خاطري ونقولهالك من توا حتكوني عندي زيك زي ضرايرك بنتي اللي ماجبتهاش.. آسيا قالت.. /انت محظوظ ربيعه بحماتك وزوجك وحتى ضرايرك بنات اصل ويخافوا الله.. جت نزيهة بين عيون ربيعه ابتسمت في داخلها بتهكم.. زكيه:هو هدا وبإذن الله بنديرولك اللي درناهولهم مش حنقصروا معاك في شي.. ربيعه قعدت ساكته وهي منزله عيونها للارض.. فاطمه سألتها.. /عندك سؤال ولاشرط؟ ربيعه رفعت عيونها فيهم وقالت.. /شروطي القدر والاحترام والمعامله بما يرضي الله يااللا..صح اني ماعندي حد لكن كان لقيت في المكان اللي نعيش فيه معامله مهينه نولي نعيش في البراكه ولانقعد فيه.. زكيه:هدا اول شي قلنا عليه يابنتي ونزيد نطمنك مدام بتولي مرت تسعه بيت المال مايقدر حد يخطم حتى من ركنك.. آسيا ابتسمت وقالت.. /هاه شن قلتي ياحلوة.. ▪▪▪▪▪▪▪ "قالت عطوني يومين نفكر ونرد عليكم" ضحك تسعه ضحكه خفيفه.. أسيا قالتله.. /عجبني كتير اعتزاز بالنفس عندها.. زكيه:حتى ثقلها ورزانتها.. آسيا:صح..صفاتها كلها صفات بنت عز.. زكيه قالت.. /صدقتي.. تسعه وهو مبتسم قال.. /عرفتوا علاش نبي ناخدها.. ابتسمت امه اما اسيا قالت بضحكه.. /من يومك ذوقك خطير ياخطير انت.. ضحكت زكيه وهو ضحك بإحراج.. 🌿هديكا الليله كملها تسعه في ورشة صناعة وهو مشغول بعقد للة اللات ع قولة ولدها.. وللة اللات ماقدرتش ترقد غمضه من فرحتها..فرحتها اللي ماكانتش بحظها ونصيبها اللي ياما يتمنوه ويحلموا بيه.. فرحتها بتسعة نفسه اللي عندها مايساويه شي من اللي يملكه... 🌠تسعه اللي تسلط عليه النوم في الورشه وخلاه يبات فيها شاف في نومه هدا حلم جميل بالمرة.. شاف انه واقف مع ربيعه في ارض كلها خضرة وزاهيه بالألوان.. شويه حطت ربيعه يدها ع بطنها وطلعت منها حبة لولو كبيره وورتها لتسعه وهي فرحانه.. هو شد يدها اللي فيها حبة اللولو وقعد يتأمل فيها.. فجأة ولت الارض من تحتهم مفرشه لولو وهما يشوفوله بفرح.. 🌠استاقظ تسعه وهو موجه نظره لجهة وحده قعد ع حاله لثواني،بعد استعاد وعيه ناض قعمز وهو يفكر في الحلم.. ويسمع صوت المؤذن ينادي لصلاة الفجر حس ان الشعور الحلو اللي رافقه من الحلم زاد كبر اكثر واكثر.. ضحك بعدين وقف وهو يقول.. /صدق الحق وزهق الباطل.. 🌿🌿🌿🌿🌿 الساعه الحادية عشر صباحا.. في صالون العيله.. جمعت زكيه نساوين ولدها مع اخته هانيه بش تخبرهم.. 🌱زكيه وهي تمرر في نظرها عليهم قالت.. /امس مشينا خطبنا لتسعه.. غمضت فريحه عيونها بألم ونزيهه كانت تشوف لعزوزتها بنظرة ظاهرها عادي وتغير نظرها عنها لهانيه لما سمعتها قالت.. /من تكون ماما وبنت مني؟ سكتت زكيه للحظات بعدين قالت.. /بنيه محترمه وبنت ناس طيبه.. هانيه:ايه يعني نعرفوها ولالا؟ زكيه قالت.. /تعرفوها.. هانيه:ان شاء الله مش وحده من اقاربنا بس لايطاقوا.. فريحه ونزيهه قعدوا مركزين بالنظر ع عزوزتهم وهما يراجوا في الاجابه وزكيه قالت.. /لالا.. هانيه:باهي قولي من هي زكيه تنهدت وقالت.. "البنيه اللي عايشه مع عصمت..ربيعه" تنحت هانيه وهي تشوف لأمها.. اما فريحه انصدمت بقوة.. لكن نزيهه شككت في حاسة السمع عندها لهذا سألت عزوزتها.. /مني مني!؟ زكيه قالت.. /ربيعه اللي قاعده مع عصمت للحظه حست نزيهه ان الدنيا لفت بيها وفريحه جنبها تشوفلها وهي مصدومه لأبعد حد.. هانيه ضحكت بعدم استيعاب وقالت.. /تبصري صح؟قولي تبصري بالله عليك ماما..مستحيل نصدق انك رضيتي بوحده زي هادي كنة ليك انتي! زكيه قالت بحده.. /هانيه.. هانيه انفعلت وهي تقول.. /خيره تسعه شن جاه هبل ولاسحراته الشلافطيه هادي! معقوله يجيب وحده مش معروف اصلها من فصلها وسمعتها مش مزبوطه كنة لعيلة سلامه بيت المال! زكيه قالت بغضب.. /تعرفي لو خوك يسمعه كلامك هدا مايصيرش طيب.. "وشن مازال بيصير اكثر من هكي ياعمتي" كلهم وجهوا انظارهم لنزيهه اللي كملت تقول.. /ايه رضينا ياخد علينا لكن يجيبلنا وحده زينا راسها يتساوى بروسنا مش وحده من الشارع المفروض ان بتولي ام لصغارنا وبتجيب صغار يولوا خوت لصغارنا! وحده زي هادي كيف بتربيهم! زكيه:نزيهه ماتكتريش دوة قالت نزيهه بأنفعال.. /لا معليشي بنتكلم مانيش ساكته..انتي ياعمتي لما مشيتي خطبتيها فكرتي كيف بتعرفيها ع الناس!! فكرتي شن بيقولوا عليكم وعلينا لما يعرفوا ان وحده امها خريجة حبوس وطالعه عليهم دوة ماتنفعش بتولي من العيلة! هانيه قالت.. /عليك فضيحه فضيحه..لالا تسعه مش بوعيه رسمي دايرتله حاجه راهو بغضب قالت زكيه.. /خلاص سكري فمك انتي وياها معاش نبي كلام في الموضوع هدا..ناضت وهي تقول..العرس بعد اسبوعين..ومشت طلعت من حداهم خبطت هانيه ع رجليها وقالت.. /عرس!!! ناضت نزيهه وهي تقول.. /لالا الشي هدا ماينسكتش عليه لايمكن نسكت ومشت بتطلع من الصالون وتلقى قدامها تسعه اللي كانت زكيه وافقه وراه وهي تشوفلها بضيق.. تسعه برغم الغضب الباين في عيونه قال بهدوء.. /اللي مازال نسمعه يغلط في ربيعه بكلمه حنخليه يتفاجئ فيا هلبه..وانتي يانزيهه لو الحال هدا مش عاجبك نعاود نقولك نفس الكلام اللي قلته يومها..نسرحك بإحسان ونعطيك حقوقك كلها.. قعدت تشوفله بنظره غضب ممزوجه بالألم ودموعها في عيونها.. وهو هز راسه وقال.. /هدا اخر كلام عندي.. وهو ماشي شاف للصالون عيونه جو ع فريحه اللي كانت تبكي بصمت بدت ع وجهه ملامح الضيق بعدين غير نظره عنها وكمل طريقه...
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
