■■■■■■■■■■■■■■■■■■■■■ 🌿مع أنني أستطيع أن أؤذي الآخرين أنا أيضًا إذا شئتُ، لكن لا أريد أن ألطّخ يدي بذلك، وأفضل أن يبقيا طاهرتين، أمضي في طريقي مستقيمًا لا أراوغ، لأنني أمقت الطرق الملتوية وأتركها للآخرين، لا أحب الكلام المبطن الذي يحتمل معنيين اثنين، وأكره الوشاية والنميمة، ولا ألبس القناع في حياتي، لا ألبسه حتى في حفلات التنكر.. دوستويفسكي🌿 ••••••••••••••••••••••••••••••••••••••••••••••••••••••••••••• قصر ذهيبة.. في جناح هانيه..كانت هي وبلقيس ومعاهم غزلان واقفات قدام مزهريه فيها ورد هانيه تحكي عنه وهما يسمعوله.. 🌱"عطهالي وقالي تحبي الورد؟" بلقيس قالت بإبتسامه.. /باين عليه جنتل مان وكلاس.. هانيه بإبتسامه.. /هلبه يابلقوسة.. غزلان وهي تتأمل في الورد قالت بإبتسامه خجل.. /بنقوللكم حاجه.. وجهوا انظارهم ليها وبلقيس قالت.. /قولي حاجات.. شافتلهم بخجل وقالت.. /عامر ولد عمتي كميله يبي يعطي فيا كلمه بعد ناخد الشهاده الاعداديه.. الابتسامه اللي كانت ع وجوه بلقيس وهانيه تعكرت.. شافت هانيه لبلقيس بعدين ردت نظرها لغزلان وهي تقول.. /لكن مازال بكري عليك حبيبتي.. غزلان قالت بضحكه خجل.. /مش متزوجه توا بعد ماناخد الشهاده الثانويه ان شاء الله.. تعبوا عيون بلقيس بالدموع وهي تشوفلها.. هانيه وهي تحاول تخفي ضيقها قالت.. /انتي معجبه بيه؟ نزلت غزلان عيونها وقالت بإبتسامه خجل.. /هو كويس ومحترم وناجح.. شدت بلقيس ع قبضة يدها بقوة بعدين اغتصبت ابتسامه ع وجهها وقالت.. /ربي يكمل ع خير حبيبتي..التفتت لهانيه وقالت..بنمشي نشوف عبودي..وبسرعه طلعت هاربه بدموعها وقلبها موجوع ع حال خوها اللي تعرف انه يحب غزلان ويستنى امتى تاخد الشهاده الثانويه بش يطلبها من بوها،اكثر شي وجعها ان غزلان ميالة لولد عمتها يعني حتى لو عرفت مشاعر قيس اتجاهها مش حتقبلها لأنها تبي غيره..تخيلت ردة فعل خوها لما يعرف كيف حتكون مجرد ماتخيلت هالشي حست بوجع مضاعف انضاف ع اوجاعها اللي مازال قاعده تعاني منهم خشت في تركينه فاضيه وقعدت تبكي بحرقه وكتمان وقلبها المكلوم مفطور من الألم... 🌿وقلب كريمه كان مليان خوف ع ربيعه اللي كانت مقعمزة قريبه ع مدخل القصر وهي تراجي في مراوحها.. ويفتح باب القصر وتخش تعويضة ناضت كريمه ومشتلها بسرعه وهي تقول.. /وين ماما ربيعه؟ تعويضه قالت بإبتسامه.. /بتقعد يومين في المستشفى بعدين تروح.. كريمه بحزن.. /هي مريضه هلبه.. مسحت تعويضه ع راسها وقالت.. /لاحبيبتي مريضه شويه تو تولي كويسه وتروح.. هزت كريمه راسها بحزن ومشت وعيون تعويضه معاها وهي تشوفلها بإبتسامه ود بعدين مشت للباب اللي يطلع ع الجهة اللي فيها الصالون وغرفة المعيشة بش طمن زكيه عن حالة ربيعه.. 🌿واتصلت عصمت تسأل عن ربيعه واللي ردت ع اتصالها برنيه خبرتها عن اللي صار لربيعه وهي بدون اتنظار مشت بسرعه للمستشفى... 🌿🌿🌿🌿 وفي إيطاليا.. اللي كان مسافرلها تسعه لأجل موضوع مهم يخص شغله تم هالموضوع بنجاح وكان فرحان بيه للغايه.. 🌱"وتم احسن مماكنت نبي الحمد لله" جمال وهو ماشي معاه قال.. /المصنع اللي في الخمس خديناه.. ضحك وقال.. /حلو حلو..الحمد لله الحمد لله.. وصل لمكان فيه هاتف وقال.. /نبي ندير مكالمه لليبيا..تباعد عنه جمال شويه وهو وقف ع الاستعلامات طلب منهم يستعمل الهاتف وهما سمحوله وع طول دار اتصال بالقصر... 🌿وفي القصر... طلعت فريحه من دار المعيشه وهو متوجهه للباب رئيسي وهي ماشيه سمعت الهاتف الموجود في الصالون يرن غيرت طريقها للصالون وخشتله.. وصلت في الهاتف ورفعت السماعه حطتها ع وذنها وقالت.. /ايوه.. "السلام عليكم" هي بفرح قالت.. /تسعه! "اني مش في مكان مناسب يخليني نرد عليك الرد اللي تعودتي تسمعيه مني" ضحكت بخجل وقالت.. /حبيبي.. سمعت صوت تنهيدته اللي حاول يكتمها بعدين قال.. "شن حالكم" وهي مبتسمه بحب قالت.. /الكل كويسين الحمد لله اما اني توا بس وليت كويسه.. ضحك ورد عليها.. "ربي يهديك ويسامحك" وفريحه تضحك وقلبها طاير وسط ضلوعها لكن سرعان ماهالقلب انقبض والضحكه تلاشت لما سمعاته يقول.. "شن حال ربيعه" احمر وجهها من الغيرة رفعت حاجبها وقالت بنبرة صوت عاديه.. /كويس حالها خير من قبل.. "حداك هي؟" غمضت عيونها بشده بعدين فتحتهم وقالت.. /لالا في دار البنات.. سكت شويه بعدين قال.. "باهي باهي..المهم مانوصيكش عليها يافريحه قبل لنسافر وضعها ماعجبنيش باين عليها تاعبه غير تكابر" نزلت فريحه عيونها للطاوله وع وجهها تداخلت ملامح الغضب مع الغيرة ومع هدا تحكمت في مشاعرها وقالت.. /قتلك كويسه طمن بالك واني مش حنخليها.. "هدا اللي مطمني..باهي سلمي ع الجميع السلام عليكم" هي قالت والدمعه في عينها.. /وعليكم السلام..وسكرت السماعة بغضب بعدين توجهت للباب الصالون وهي تمشي بعصبيه.. 🌿🌿🌿🌿 "ربوعه شن حالك حبيبتي" ربيعه وهي تشوف لعصمت بإبتسامه تعب قالت.. /الحمد لله.. عصمت وهي شاده يدها بإيديها الزوز قالت.. /شكلك لاتاكلي ولاتشربي.. هنادي قالت.. /الفترة الاخيره نغصب عليها تغصيب في الماكله.. ربيعه قالت بتعب.. /مايقعد في بطني شي ياابله عصمت حتى الميه.. مررت عصمت نظراتها القلقه عليها وهي تقول.. /معليشي بنتي هدا كله من الوحم ياخد وقته ويمشي..رفعت عيونها في هنادي وقالت..ماجي معاها حد غيرك انتي؟ هنادي قالت بضيق.. /كانت معاي تعويضه ممكن ليها ساعه مروحه.. بدت ع وجه عصمت ملامح الغضب ردت نظرها لربيعه لقتها مغمضه عيونها قلبها زاد انوجع عليها وفي نفس الوقت كان مليان غضب ع نساء عيلة بيت المال.. 🍃كانت تجيها زيارات بين الفترة والتانيه وخلال هالزيارات لاحظت ان وضع ربيعه مع نساوين العيله شبه سيء وهالشي بان عليها اكثر في عزاء اسيا ومحمد راجل بلقيس🍃 🌿🌿🌿🌿 ومع العصر تطلع نتيجة غزلان وتنجح نجاح باهر خلاها الأولى ع مستوى منطقة الألف وخمسين وهالنجاح فرح كل احبابها بالذات امها اللي مابطلتش تحضن فيها وهي دمع من الفرحه وعيون كريمه عليهم كانت نظراتها كلها شغف بالمشهد اللي تشوف فيه..تخيلت لو العام الجاي نجحت بتفوق زي غزلان وفرحت امها بهالنجاح تخيلت ردة فعل امها تكون زي ردة فعل فاطمه توا..بدت ع وجهها البريئ ابتسامة أمل وقلبها الصغير نبض بقوة..غيرت نظرها لأمها لما سمعتها تقول.. "ماشاء الله عليك ياغزيله ماشاء الله ديما ارقيها بنتك هادي يافاطمه" زكيه قالت بإبتسامه.. /ايه والله حق حافظه للقران برواية قالون وتوا تحفظ فيه برواية حفص وناجحه في قرايتها وفالحه ع صغر سنها ومؤدبه ماشاء الله ماشاء الله تبارك الله عيني ماضرك يابنتي.. غزلان قالت بإبتسامه من بين دموعها.. /ربي يحفظك ويطول في عمرك حنينه.. زكيه قالت بضحكه.. /نجيها ياربي..تعالي تعالي..فتحت حضنها وغزلان مشتلها وضمتها وزكيه حضنتها وبدت تقرا عليها وفاطمه تشوفلهم بإبتسامه.. فريحه وهي مبتسمه قالت.. /ربي يفرحنا بيها ونشوفوها عروسه.. زكيه قالت.. /بعد تاخد الشهاده ان شاء الله..ولا انتي تبي قبلها ياغزيله!؟ ضحكت غزلان بخجل.. زكيه مررت نظرها عليهم وقالت.. /شكلها تبي الراجل قبل الشهاده.. غزلان قالت بخجل.. /لامش هكي.. ضحكوا.. زكيه قالت.. /شن لامش هكي..هكي هكي.. ضحكت غزلان وهما ضحكوا ماعدا هانيه اللي كانت تشوفلها بإبتسامه الضيق وعقلها عند خوها قيس.. 🌾🌾🌾🌾🌾🌾 "اني تفاهمت معاك يابنادم انت قتلك راجيني نشوف الحاج ونرد عليك ولا!؟" هدا الزقطي يتكلم هاتفيا مع الراجل اللي كان مخطط كمال يشري منه المصنع متاعه.. "والله انتم قعدتوا تلفوا ودوروا بش تخلوني نبيعه بخسارة لكن تسعه بيت المال كان معاي دغري ودفع حق المصنع بمايرضي الله" الزقطي وهو في قمة الغضب قاله.. /غير راك تنساها عملتك هادي..ونعته بلفظ نابي بعدين سكر عليه وهو يسب ويشتم.. ▪▪▪▪▪▪▪▪▪ "صار هكي ياشعبان العامري!؟" الزقطي قال بضيق ممزوج بالغضب.. /لولا الخوف من الله راهو بعتله من يطلع روحه الوسخ كمال وهو عاقد حواجبه بغضب قال.. /خليه ع تركينه حسابه يجي بعدين..اني توا نبي نعرف اللي سماه تسعه كان يعرف اني حاط عيني ع المصنع هدا!؟ الزقطي قال.. /مش عارف لكن في هلبه غيركم كانوا ناويين ياخدوه موقعه وحجمه يخلوا العين عليه تباعد كمال عن الزقطي وقعد يمرر في نظراته الغاضبه ع المكان ويفكر هل الحركه هادي رد عليه من تسعة ولامحض مصادفه! ▪▪▪▪▪▪▪▪ "قالي كان ناوي يبيعه لكمال البندار والنصاب هداكا جي بيشريه منه بتراب الفلوس" جمال:مش جديد عليه هادي صنعته يشري الشركه الخاسرة ولاالمصنع الواقف بتراب الفلوس وبعد فترة يبيعهم بأسعار خياليه.. تسعه ابتسم ابتسامه جانبيه.. /عارفه شن يدير كويس..ع الله لما توصله المعلومه مايفكرش اني درتها فيه بلعاني مش فاضي للعب معاه.. جمال:هادي اول حاجه حتجي في باله.. دام تسعه النظر لجمال للحظات بعدين قاله.. /الموضوع هداكا شن صار فيه؟ جمال:ماشي كويس يابيي.. تسعه قاله.. /خليني ع اطلاع بكل خطوة تخطيها في الموضوع هدا.. جمال:أكيد يابيي.. هز تسعه راسه وقال.. /تقدر تمشي.. مشي جمال طول طلع من غرفة الفندق اللي قاعد فيها تسعه وخلاه ناض للهاتف اللي في الغرفه بش يجري اتصال بليبيا.. 🌿والإتصال هالمرة ردت عليه امه اللي بعد ماسألت عن حاله وهو سأل عن احوالها وهي طمناته عن حال الجميع بدون تخصيص لكن هو خصص في سؤاله عن ربيعه.. "حالها باهي ولدي خير من قبل" هو هز راسه وقال.. /باهي..مانوصيكش عليها يام.. "ماتوصيش حريص ولدي ماتوصيش حريص" قاللها:ربي يحفظك يام..نخليك ترقدي وترتاحي تصبحي ع خير.. "قدامك كل خير ولدي" ماسكرش السماعه الا بعد ماهي سكرت بعدين خدي المصحف من ع الكامدينو وخش للسرير قعمز عليه وهو ماد رجليه وفتحه وين ماكان واصل وبدي يقرا.. 🌿🌿🌿 ويجي اليوم اللي بعده.. وتمشي عصمت لزيارة ربيعه تلقى عندها فاطمه مرت مرعي قعدت فاطمه وقت الزيارة كله بعدين روحت ومايجي حد غيرها.. ربيعه كان حاز في نفسها الشي هدا لكن مابتش تشكي ولاتحكي لعصمت وعصمت اللي كانت معصبه ع الآخر حاولت قدامها تبان عاديه.. 🌿ومع العصريات توصل نزيهه بصغارها لحوش اختها بدريه بش يحضروا حفله نجاح بنتها بعد ماسمحلهم تسعه.. الحفله ماكانتش عاديه كانت فخمه جدا عزمت فيها بدريه ناس من صفوة المجتمع المخملي اللي يكونوا اغلبهم امهات وقريبات لزميلات بنتها.. وطبعا كل غرض بدريه من الحفله هادي التباهي ولفت الأنظار لكن خشة اختها الكبيره نزيهه خطفت منها الانظار وخلت المعازيم ينسوها بالمرة.. من اول ماخشت نزيهه وهي متأنقة ببدله بنطلون من ماركه عالميه مشهورة وبروش الشمس اللي كانت مزينه بيها ياقة الجاكيت يبرق ويلمع في عيون كل من يشوفه استقبلتها امها احلا استقبال وباقي خواتها جوها يجروا يسلموا عليها بحرارة.. 🍃من يوم يومها وهي محبوبه بشدة وليها قيمه عاليه في قلوبهم.. امها متعلقه بيها هلبه لدرجة انها احيانا تعتبر في نزيهه امها وخواتها حالهم من حال امهم يحبوها حب جم وديما رافعين رووسهم بيها.. هدا غير بوها اللي قعد لأخر يوم في عمره عاطيها قيمه كبيره زادت رفعت شانها وسط عيلتها.. عيلتها كلها ماعدا شخص واحد اختها اللي جت بعدها "بدرية" اللي كانت من صغرها متحسسه منها وكل ماتكبر شعور التحسس هدا يتطور لعند ماوصل للحسد والحسد معروف عنوان يضم تحته كل المشاعر المريضة اللي تفسد قلب بني آدم... حاولت تجاريها حاولت تكون خير منها ماقدرتش لهذا بش تبرد ع نفسها شويه كانت تقتنص اي فرصه تجي قدامها تخليها تنغص عليها وتقلل منها او من أي شي او حد يخصها🍃 تصنعت ابتسامة ود ومشت بإتجاه اختها بش تسلم عليها.. لكن بنتها غاده بكل براءة وقلب صافي سلمت ع صغار خالتها وهنت كريمه بنجاحها.. 🌱كريمه:ماما ربيعه قالت بابا بيديرلي حفله نبيك تجي باهي؟ غاده بإبتسامه فرح.. /خل نقول لماما.. خدت غادة يد كريمه ومشوا مع بعض لأمهاتهم اللي كانوا واقفات مع جدتهم وباقي خالاتهم.. 🌱بدرية بإبتسامه ود مزيفه.. /باهي اللي خلاكم تجو.. نزيهه وهي مبتسمه قالت.. /قتله خل نبعت الصغار بس قالي لا امشي معاهم وغيري جوك.. امها قالت.. /راجلك مايحزنش لاحظت عليه الحاجه هادي بعد وفاة بوه.. نزيهه:صح ديما يقول ربي شرع الحزن ع الميت تلاته ايام بس ماعدا حزن الأرملة ع راجلها.. وحده من خواتها قالت.. /ع سيرة الارمله شن دايرة حماتك مسكينه؟ ابتسمت نزيهه بحزن وقالت.. /اهي مسكينه تحاول تشد حيلها ع خاطر وليدها.. امها قالت.. /ربي يصبرها.. "ماما" التفتت بدريه لبنتها وقالت.. /سلمتي ع خالتك؟ غادة بإبتسامه احراج.. /اسفه خالتي كيف حالك.. طبستلها نزيهه ضمتها وباست راسها بعدين قالت.. /مبارك عليك غدو وان شاء الله ديما من الاوائل.. غادة بإبتسامه.. /ان شاء الله..شكرا خالتو.. بدريه قالت لكريمه.. /وانتي شني ياشوينه ماتعرفيش تسلمي!؟ نزيهه قالت تهكما وهي تنفص فيها.. /ماشاء الله عليك! كريمه بخوف قدمت لخالتها مدت يدها وقالت.. /كيف حالك خالتي.. صافحتها بدريه وقالت.. /الحمدلله..باهي اللي نجحتي المرة هادي وماعاوديتش سنة مرة تانيه... امها وخواتها شافوا لنزيهه لقوها تشوف لبنتها بإبتسامه مصطنعه والضيق باين في عيونها غيروا نظرهم عنها لغاده لما قالت.. /نجحت ممتاز ماما وجابت الترتيب السابع.. كلهم تفاجئوا وبدريه قالت لأختها بدهشه.. /وعلاش داستيها خايفه من العين؟ ضحكت بإحراج وقالت.. /ماهيش حاجه مستاهله نخبر بيها.. امها قالت.. /كيف مش مستاهله!؟ بنتك مانجحتش نجاح عادي يانزيهه.. وحده من خواتها قالت.. /ايه حق يانزيهه هدا نجاح بتفوق.. بدريه قالت بضحكه.. /شوره نجاح بالواسطه هدا علاش قالت مش مستاهل.. غاده فهمت كلامهم اكثر من كريمه وقالت.. /لالا ماما هي نجحت لأن قرتها امها الجديده..شافت لكريمه وقالت..شن اسمها حقه؟ كريمه وهي تشوف لأمها بخوف قالت.. /ربيعه.. كلهم كانوا مستغربين وبدريه قالت.. /مش قلتي مش متعلمه!؟ كريمه قالت.. /لالا ماما ربيعه قرت للأولى اعدادي بعدين بطلت.. غاده:قالت كريمه بوها بيديرلها حفله نبي نحضر ماما.. ام نزيهه قالت.. /حفلة شني ماقلتيش عليها!؟ 🍃ماقالتش عليها لأنها ماتعلمش بيها من الأصل🍃 بدريه قالت.. /لارسمي خايفه من العين نزوهه.. بلعت نزيهه ريقها وهي تحاول تحافظ ع هدوئها ع قد ماتقدر وقالت بإبتسامه.. /ياودي مش هكي..حكاية الحفله هادي مش اكيده.. غاده شافت لكريمه وقالت.. /حقه؟ كريمه قالت:ماما ربيعه قالت بابا بيرفعنا نديروها في المزرعه.. رفعت بدريه حاجبها وهي تقول بإبتسامه فيها شي من المكر.. /شكلها ماما ربيعه هادي بتبدا تبسط سيطرتها.. ضحكت نزيهه ضحكه تخفي بيها حجم الغضب اللي مستعرة ناره في جوفها بعدين قالت.. /يعطيهالك يابدريه..توا وليتي غابيه في نظام تسعه! كل وحده فينا واجب عليها تربي صغاره كلهم ليها ولامش ليها وهو كلفها ترد بالها من قراية كريمه لإني زي ماتعرفي مش ديما فاضيه.. امها قالت.. /ايه صح انتي بنتي سيدة اعمال ديما وقتك ماشي فالخدمه مش زي ضرايرك فاضيات ماوراهم شي خل يشدوا الصغار.. ضحكوا خواتها ماعدا بدريه ونزيهه قالت بضحكه.. /عطيك الهني يام.. بدريه قالت بضحكه.. /لكن قبل فضت روحها لكريمه بش تشدلها وفي الاخير البنت سقطت وعاودت السنه ربيعه هادي قدرت دير اللي انتي ماقدرتيش عليه يانزوهه توا بس عرفت علاش تسعه طاير بيها هكي.. ..وكعادتها بدريه لايمكن ضيع الفرصه تحط كلامها بدون ماتهتم لحد زي مادارت توا مع نظرات امها وخواتها المهم تبرد ع نفسها بس... ونزيهه قدام كلام بدريه بالذات تولي غير قادرة ع الرد مش لأنها ماتعرفش ترد بل لإنها ماتبيش تبين لأختها او لأي حد من اللي حواليها ان كلام زي هدا ممكن يأثر فيها ولايحرك فيها شعرة... "المهم نجحت بنيتي وفرحتنا كلنا" قالت الكلام هدا ام نزيهه وهي تمسح ع شعر كريمه ومن بعدها خالاتها بالوحده قعدوا يهنوا فيها بالأحضان والقبل.. وعيون بدريه تشوف في ملامح وجه اختها نزيهه اللي يبان فيهم الغيظ مهما حاولت درقه..ويااه ع المتعه اللي تحس بيها بدريه توا.. غادة:ماما نمشي عادي؟ بدريه شدت ذقن بنتها بلطف وقالت.. /نشوفوا بابا قبل حبيبتي... وحده من خواتها قالت.. /تعالي نزوهه نعرفك ع وحده من بكري تراجي فيك.. هزت نزيهه راسها بدون ماتنطق بحرف ومشت مع اختها وباقي خواتها لحقوهم وقعدت امهم اللي التفتت شافت لبدريه بحده.. ضحكت بدريه وقالت.. /يام تعرفيني صريحه واللي في قلبي ع لساني.. امها غيرت نظرها عنها وقعدت توزع فيه ع الناس وهي تهز في راسها.. ضحكت بدريه مرة تانيه بعدين قالت لبنتها.. /ارفعي كريمه لصحباتك ماما.. غادة:حاضر...وخدت كريمه من يدها ومشت وين مافي زميلاتها اللي كانوا برفقة خوتها احمد وايهاب وصحابهم ومعاهم معاذ وهشام... 🌿واختهم ثريا في غرفة المعيشة في القصر فايقه وتلعب بإيديها وخوها وسام جنبها حتى هو فايق وعويناته يشوفولها.. وعوينات تانيات بلونهم الأزرق يراقبوا فيها وفي حركات ايديها بفضول طفولي.. عبد المتين ولد عمتها اللي كان مقعمز جنبها ويتفرج عليهم.. "عبودي ماما تعالى عندي" شافلها واشر بصبيعه الصغير عليهم وهو يقول.. "بيبي ماما" ضحكت امه واللي معاها في الغرفه.. فريحه وهانيه اللي قالت بضحكه.. /نجيه ياربي.. بلقيس قالت بإبتسامه.. /سلمك هنو... فريحه وهي تشوف لهانيه قالت.. /كان معاش تقصي شعرك خير هنو.. بلقيس:بالعكس القصير يطلع عليها احلى.. قالت هانيه وهي تلعب بشعرها.. /ويزيد يصغر فيا.. فريحه:مش عارفه اني نشوف في الطويل عليك احلى طوليه لكتافك واصبغيه بصبغة هكي لونها احمر في القهوي تشوفي كيف طلعك حاجه تانيه.. هانيه وهي تفكر قالت.. /تو نشوف.. 🌿ومن غرفة المعيشه لكوجينه القصر.. اللي كانت فيها هنادي مقعمزة ورا الطاوله تحكي وتعويضه ومعاها شغاله تانيه اسمها "مجيده" يسمعوا فيها.. 🌱هنادي:عصمت سكرت راسها تقعد معاها وغصبت عليا نروح.. قعدت تعويضة ساكته وهي مستاءة كانت تبي تعقب ع كلام هنادي بس وجود "مجيده" مانعها.. 🍃مجيده جت جديده للقصر من اسبوع فات تتعامل معاهم بسطحيه في حدود الخدمه فقط وهما ماقدروش يرتاحولها بالذات وان اللي جابتها للقصر نزيهه🍃 هنادي وهي تشوف لتعويضه كيف ساكته فهمت انها ماتبيش تتكلم قدام مجيده تنهدت بعدين قالت.. /بنمشي نرقد شويه بالله كان عطلت في النومه تعالي فيقيني.. تعويضه هزت راسها بصمت وهنادي ناضت ومشت طلعت من الكوجينه.. ركبت الدروج وهي تثاوب وتقول.. /غير امتى نوصل للدار.. وصلت في نهاية الدروج من فوق وطلعت من الباب وقعدت تمشي بإتجاه الباب اللي يطلع ع الملحق متاع الخدم.. وهي ماشيه سمعت اصوات هدرزة ميزت صوت زكيه لكن ماعرفتش صوت الراجل اللي يهدرز معاها.. وعاد فضول هنادي كان حركها مايوقفه شي غيرت طريقها بإتجاه الجهة اللي ترفع للمدخل الرئيسي للقصر.. وين وصلت غادي ادرقت ورا الحيط وبينت راسها شافت زكيه ماشيه مع واحد طول بعرض اشقر يضوي ضوي ووسيم للغايه..انسحرت فيه بكل معنى الكلمه وقعدت تلحق فيه بنظراتها المذهوله وهي تسمع في زكيه تقوله وسط كلامها.. "ولدي" وتباعدوا لعند مادرقوا عنها هي وخرت وحطت يدها ع قلبها وقالت.. /ياحليلي هدا منو!؟..اللا زكيه تقوله ولدي وهي ماعندهاش ولاد كان سيدي تسعه!..رفعت حواجبها وقالت..زعمه هدا توم اللا بلقيس!!!؟ 🌿واول مايبان ع بلقيس تومها برغم فرحتها بجيته كان قلبها واجعها عليه ناضت من مكانها ومشتله بسرعه ضماته بقوة وقعدت تبكي وهو يطبطب ع ظهرها بيد وباليد التانيه يمسح ع شعرها.. واللي حواليهم متأثرين وعيونهم دمعت بألم.. "ماما" نزل قيس عيونه لمتين ضحك وقال.. /اووو مكركب.. تباعدت بلقيس عنه وهي مبتسمه من بين دموعها تشوفله كيف طبس ع ولدها خداه ورفعه في حضنه وهو يقول.. /شن جو عبودي.. رد عليه عبد المتين بلغة طفوليه.. "حلو" ضحكوا عليه وقيس قال بضحكه.. /ماشاء الله ماشاء الله بدي يدير لسان هالمكركب.. هانيه قالت.. /باهي سلم علينا.. شافلها بعدين فتح يده وقال.. /اوو قطوسه.. قدمتله تجري وخشت في حضنه وهو ضمها بيد وحده.. فريحه قالت بإبتسامه.. /حمد لله ع سلامتك.. بدون مايشوفلها قال.. /الله يسلمك مرت خوي.. تباعدت هانيه وقالت.. /روحت بروحك ؟ قاللها:لاروح معاي محفوظ لكن ع حوش جدوده بس يشوف امه.. هانيه:امم.. زكيه:باهي خلوه يقعمز ويرتاح.. هو قال.. /اني نبي داري بنرقد جعان نوم.. خدت منه بلقيس ولدها وقالت.. /باهي برا ارقد وارتاح بعدين نهدرزوا.. قاللها:وهو كذلك..نستأذن خالتي.. زكيه قالت بإبتسامه.. /اذنك معاك ولدي.. مشي قيس طلع من حداهم وبلقيس وهانيه معاه بنظراتهم الحزينه.. ▪▪▪▪▪▪▪▪ "قلبي واجعني عليه هلبه ياهانيه" هانيه بضيق:يحبها هلبه؟ بلقيس ودموعها ينزلوا قالت.. /هو ماحكاليش عن مشاعره كل اللي قاله انه يراجي فيها لين تطلع من الثانوي بش يخطبها لكن وين تشوفي شبحاته ليها وين يشوفها ولا وين تجي قدامه فجأه تحسيه ميت عليها مش غير يحبها ياهانيه.. تأففت هانيه بضيق وبلقيس قالت بنبرة ألم.. /ربي ينسيه فيها ويعوضه بخير منها.. هانيه قالت بحزن.. /آمين.. 🌿🌿🌿🌿🌿 "اليوم جاني المعرض وفتح معاي الموضوع" هدا مرعي يحكي لزوجته فاطمه عن جية راجل اخته لمعرض الاثاث اللي يملكه بش يفتح معاه موضوع عامر وغزلان.. فاطمه:وانت شن قتله؟ مرعي:قلت نرد الشيرة ع العيله قبل..انتي شن رايك؟ فاطمه قالت.. /عامر ولد خوي وولد اختك نعرفوه زين نعرفوا ربايته واخلاقه وغير هكي بنتهنوا ع غزلان عند خالها وعمتها.. مرعي قال بإبتسامه.. /والله حتى اني هكي فكرت ومع هدا لازم ناخدوا راي غزلان.. هزت فاطمه راسها وقالت بإبتسامة.. /بإذن الله غدوة نفتح معاها الموضوع... 🌿ويقعد قيس راقد في داره لفجر تاني يوم من تعب السفر ومحفوظ وزوجته عبير كذلك قعدوا في حوش جده من امه لتاني يوم وبعد الفطور روحوا لحوشهم ماقعدوش فيه اكثر ساعتين وبعدين توجهوا لقصر ذهيبه.. 🌱"الحمد لله كلهم بخير وبيسلموا عليكم" زكيه:سلمهم وسلم من جاب سلامهم.. عبير قالت بإبتسامه.. /الله يسلمك خالتي..غيرت نظرها لنزيهه وفريحه بعدين قالت بإبتسامه استغراب.. /لكان وين ربيعه؟ نزيهه حافظت ع ابتسامته بالغصب عكس ابتسامه فريحة اللي تعكرت.. وجواب سؤال عبير طلع من زكيه.. /الوحم تعبها هلبه ليها قريب يومين راقده في المستشفى.. عبير بقلق:شو صرلها؟ زكيه:مايديره الوحم في المراة الحامل يابنتي ترجيع حشاك ودوخه وتعب.. عبير قالت بضيق.. /الله يهون عليها يارب..طيب هي بأي مشفى موجوده؟ زكيه قالت.. /مستشفى ولدي تسعه لكن بنقولك وقت الزيارة في العشيه.. هزت راسها بصمت ونزيهه وفريحه يشوفولها.. ع خشة هانيه ووراها بلقيس بولدها طلقوا السلام وهي ردت بعدين ناضت بش تسلم عليهم.. 🌿🌿🌿🌿 "انتي ماما شن رايك؟" فاطمه بإبتسامه قالت.. /الراي رايك انتي ماما اني نشوف بنت كبيرة وواعيه وتقدري تاخدي قرار عقلاني في الموضوع هدا.. غزلان وهي مبتسمه بخجل قالت.. /هو عامر كويس واخلاقه كويسه وامه عمتي وبوه خالي وخواته اعز من خواتي.. فاطمه قالت بضحكه.. /خلاص معناها موافقه.. ضمت غزلان ايديها لبعض وهي تقول بضحكه خجل.. /ايه.. ضحكت امها بعدين ضمتها وهي تقول.. /مغلاك عليا يابنتي.. ضمت غزلان امها بقوة وهي تقول.. /واني نموت فيك فطومتي.. ضحكت فاطمه وعيونها معبيات دموع... 🌿🌿🌿🌿 "لامعمر ونعم الرجل نعرفه عن قرب راجل مستقيم وراقي جدا" هانيه قالت بإبتسامه.. /ريحتني.. محفوظ قال بإبتسامه.. /ربي يتمم ع خير ان شاء الله.. هانيه وهي مبتسمه قالت.. /آمين.. قيس:لازم نقعمز ونهدرزعليه ونشوفه كان يستاهل ياخد هالليدي ولالا.. ضحكت هانيه بخجل ومحفوظ قعد مبتسم.. قيس شافلها وقال.. /نحكي جد..نبي نتعرف عليه اكثر مش شايفه كان كم مرة وماصارش بيني وبينه دوة.. هانيه:تمام تو نقول لأخته تقوله.. محفوظ:بلاش منها هاللفة والدورة ارقامه كلهم عندي تو نكلمه ونتفق معاه ع موعد ونشدوه اني وياه ونعطوه ع راسه هانيه اختي حتى اني راهو.. ضحكت هانيه وقيس قال بإبتسامه.. /It's a deal "اتفقنا"... 🌿🌿🌿🌿🌿 الرابعه عصرا.. في مشفى "ابن البيطار" اللي قاعده فيه ربيعه.. كانت عبير جايتها زيارة وربيعه فرحت هلبه بجيتها.. 🌱"كيفك حبيبتي هلأ ان شاء الله احسن؟" ربيعه قالت بإبتسامه.. /الحمد لله حالي باهي هلبه وجيت نبي نطلع اليوم لكن في ناس ماخلونيش..وشافت لعصمت بطرف عينها.. عصمت قالت:الدكتور قال تقعدي تلاته ايام يعني تقعدي تلاته ايام..شافت لعبير وهي تقول..لقوا دمها 6 وعندها سوء تغديه.. ربيعه:ماتبالغيش ابله عصمت.. عصمت بنرفزة: بالله صوس صوس.."اسكتي" عبير:معها حق ياربيعه وبعدين انتي ليش هامله حالك هيك!؟ ربيعه قالت.. /والله ناكل لكن مايقعد في بطني شي حتى الميه... عصمت رفعت حاجبها وقالت.. /كان لقت من يهتم بيها راهو ماوصلتش لهني.. ربيعه شافت لعصمت وفنصت فيها وعصمت متجاهله نظراتها وعبير تشوفلهم وشبه فاهمه كل شي حطت يدها ع ركبة ربيعه وقالت.. /المهم انك صرتي منيحه وان شاء الله مابتعودي تتعبي هيك مرة تانيه.. عصمت:لاوين ماتتعبش قاعده في الشهور الاولى مازال ياما بتشوف القدام.. عبير قالت بريبه.. /ولي!! لهالدرجة!! ربيعه قالت بضحكه.. /تو حتى انتي تجربي وتشوفي.. عبير قالت بضحكه ريبه.. /والله بعد اللي سمعتوا بدي ارجع فكر بالموضوع.. ضحكوا ربيعه وعصمت.. 🌿وقعدت عبير لنهاية وقت الزيارة وهي مروحه مع راجلها كان محور حديثهم في السيارة.. 🌱عبير:الباين نظرتنا كانت غلط بعلاقة تسعه وربيعه.. محفوظ:كيف يعني؟ عبير:بقصد ان زواجو منها كان مجرد نزوة مش اكثر.. محفوظ عقد حواجبه وهو يقول.. /وشن اللي خلاك تفكري هكي!؟ قصدك هي شكتلك منه؟ عبير:لاوالله ابدا بس فهمت لحالي،بعزا الست آسيا الله يرحمها لاحظت انها مثل المنبوذة مع انو عم تحاول تكسبهن بس هما عم يعاملوها مثل الغريبه وهلأ المسكينه تمرض وتتعب وتنام في المستشفى وحسب مافهمت ان مافي حد راح لعندها ابدا اساسا لما حكيت اني بدي روح زورها توقعت يروح معي حدا منهم لكن مافي مين اهتم.. محفوظ:هو اني متوقع الحاجه هادي الحق لكن فكرة ان زواج تسعه منها نزوة هادي مستحيله.. عبير:لو كان غير هيك كان عمللها قدر وقيمه عندهم لو هما بيعرفوا ان تسعه رح يزعل من معاملتهم الها كانوا عملولها الف حساب.. سكت محفوظ للحظات وهو يفكر بعدين قال.. /مش عارف شن نقولك..لكن اللي نعرفه ان تسعه مش هكي بكل واكيد في شي صاير حني مانعرفوشي.. تنهدت عبير بعدين هزت راسها بصمت.. 🌿🌿🌿🌿 في حديقة القصر .. كان قيس مقعمز مع توأمه ع احد المقاعد وولدها يلعب قدامهم.. 🌱"تصدق طلع مخليلي رساله مع تسعه قبل ليمشي" قيس وهو يشوف لعبد المتين قال بأسف.. /قالي عليها تسعه.. نزلوا دموع بلقيس وهي تقول.. /وصاني على امه قالي ماتفارقيهاش هي تحبك زي ماتحبني مايحسابش انها مش حتصبر ع فراقه وتلحقه طول.. شافلها قيس بحزن.. رشفت وقالت.. /لقبل تجي كنت نحس بالدنيا فاضيه مافيها حد غيري فراغ ووحده موحشة الدنيا من غير ماما انطفي ضيها في عيوني.. شد دموعها وقربلها خداها في حضنه وهو يشوف لولدها ويقول.. /ادعيلها ادعيلها وبس يابلقيس وديما تفكري انك ام انتي توا ضي عيون ولدك.. ابتسمت بألم وهي تشوف لولدها بعدين قالت.. /واني شن اللي مصبرني ومخليني قاعده عايشه غيره هو.. ابتسم قيس وقال.. /ربي يعينك ع تربيته وتشوفيه احسن الناس احسن حتى من خواله.. ضحكت بلقيس.. هو تنهد بعدين قال.. /جبت معاي هديه لغزلان.. اختفت ضحكة بلقيس وانغم ع قلبها.. ابتسم وكمل يقول.. /بمناسبة نجاحها نبي نعطيهالها وجه لوجه وبنصارحها.. تباعدت اخته وقالت.. /بشن بتصارحها؟ مرر نظره القدام وهو مبتسم بإحراج.. /بشن بنصارحها يعني..ضحك بعدين قال..ع العموم بنقوللها بنعطي فيك كلمه..الحق الحق نبي نحوزها خايف تريح مني.. قلب اخته انعصر من الألم ماقدرتش تتكلم قعدت تشوفله وبس.. شافلها وقال.. /خيرك ساكته؟ بلعت ريقها بعدين قالت.. /مش عارفه..بتوتر كملت تقول..اجلها شويه.. عقد حواجبه وقال.. /علاش؟ بلقيس من التوتر ناضت وخدت ولدها وهي تقول.. /مرات يقولولك مازال..وبعدين بوها معاش يخليها تجي هني.. كلامها مش مترابط ومش مفهوم خافت تصارحه وتصدمه ماتحملتش تقول بلسانها شي يوجع خوها.. ناض وهو يقول.. /قصدك مرات يردني مرعي كان كلمته عليها؟ بلقيس وهي هاربه بعيونها عنه قالت.. /مرات..مرات يقول مازال صغيره وهكي يعني..اجلها خير.. سكت للحظات وهو يشوفلها بعدين قال.. /باهي..لكن الهديه نبيها توصلها في اقرب وقت تمام.. ابتسمت بحزن وهزت راسها بإيجاب بعدين غيرت عيونها عنه وقالت.. /بنخش بعبوديداخل المغرب قريب.. ومشت وخلاته يشوفلها وهو يفكر في حالتها كيف كانت لما فتح موضوع غزلان وتفكيره قاده لتفسير واحد لهالحالة انها مازال قاعده حازنه ع امهم وراجلها وشايفه الوقت مش مناسب للكلام في موضوع زي هدا.. ضم شفايفه لداخل بأسف بعدين قال.. /حتى انت غبي ياقيس مش وقته بكل.. لف ورجع قعمز ع الكرسي ورجع فكر في غزلان اللي كان مشتاقلها ومش لاقي صبر بش يستنى الوقت المناسب للإرتباط بيها.. 🌿وخلاتك بلقيس غافل ياقيس زي ماخلا تسعه نزيهه وفريحة غافلات..هكي تفكر نزيهه.. من امس لليوم وهي تغلي من غضب قاعده تخفي فيه عن الجميع بالذات فريحه ماتبيهاش تعرف حاليا بحكاية الحفله اللي كانت واثقه ومتأكده ان تسعه حيخلي ربيعه بس تحضرها مدام هي بس اللي تعلم بيها مع معرفتها ان تسعه لازم يكافئها ع نجاح مهتمها مع بنتها كريمه يعني الحفله لكريمه وربيعه من الاساس.. نزيهه اخفت الحاجه هادي عن فريحه لأنها ماتبيهاش ترجع دير اللي داراته لما تزوج عليها.. تكرار هجرانها ليه حيخلي تسعه مع الوقت يتعود ع بعدها وهكي تطلع من قلبه وتحل محلها ربيعه وتسيطر عليه تبي فريحة تقعد ديما مالكاته.. ♤خضر رغم كل اللي داراته خالتي نزيهه في عمتي ربيعه الا انها تقعد في نظره الوحيده المناسبة لبوه مع اني في نظري وفي نظر هلبه ناس امه هي الانسب لكن طبيعه شخصيته كانت مشابهه لشخصية خالتي نزيهه طريقتها ع التخطيط وتحريك المشهد كيف ماهو يقول كانت ذكيه جدا..يعني سعيها في أن تقعد ضرتها اللي هي خالتي فريحه الأولى في قلب راجلهم اللي هو عمي تسعه كان لسبب واحد شخصيه خالتي فريحه..شخصيه عاديه هاديه ماكانتش قويه لافي حضورها ولافي طموحاتها ولا في عقلها لهدا هي ماتعتبرش منافسه ليها في شي عكس عمتي ربيعه.. بتقولوا فريحة هي حبه الوحيد يعني فازت بكل شي نقوللكم مش مع عمي تسعه الحاجه هادي..الشخص اللي يقدر يثبت نفسه من كان يكون زوجه ليه واحد من صغاره او حد يخدم عنده يعطيه قيمه كبيره اشمل بهلبه من الحب والمشاعر وهدا اللي كان يهم خالتي نزيهه حسب تركيبة شخصيتها مع انها تحب عمي تسعه هلبه لكن حبها لنفسها كان اكبر... 🌿وتسعه بعد قري ورده من القرآن غط في نوم عميق في أخر ليله ليه في ايطاليا قبل ليرجع لأرض الوطن.. لكن وهو راقد رجع شاف منام شبيه لحد ما بالمنام اللي شافه قبل زواجه من ربيعه.. 🌠شاف نفسه مع ربيعه يتمشوا في نفس الأرض الواسعه الخضراء لعند ماوصلوا في مكان فيه شجرتين.. شجرة سدر وشجرة زيتون مابيناتهم شخص لابس ابيض ويشوفله بإبتسامه.. ابتسم من قلبه لما شافه وقال لربيعه.. "هدا جدي الخضر..تعالي سلمي عليه" وخداها من يدها ومشوله..لما وصلوا فيه قاللها تسعه "سلمي عليه.." خدت ربيعه يد الخضر وقبلتها بعدين وقفت ع حيلها وشافتله بإبتسامه.. "بري بنتي قعمزي تحت شجرة الزيتون" نفذت ربيعه امره ومشت قعمزت تحت شجرة الزيتون.. "تسعه قعمز تحت السدر" شاف لجده شويه بعدين مشي قعمز تحت شجرة السدر ومجرد ماقعمز تحتها طاحت عليه ثمار الشجرة "النبق" "تسعه شوف" وجه نظره لربيعه لقي اللولو ينزل عليها من شجرة الزيتون لعند ماعبى الارض كلها وماجاش منه عليها كان حبة لولو وحده كبيرة لقتهاعالقه في حزامها خدتها بعدين ورتهاله وهو لما شافها ابتسم بفرح... 🌠ويفيق من الحلم والمشاعر الحلوة اللي رافقاته في الحلم معبيه صدره بدت ع وجهه ابتسامه سعاده وهو يفكر في الحلم بعدين قال.. /اول مانروح بنمشي طول للشيخ نور الدين... 🌾🌾 ومش هو بس اللي شاف منام غريب شغل عقله حتى غريمه كمال البندار شاف منام ماقدرش يتجاهله نهائي بعد ماصلى الفجر في الجامع مشي بروحه لحوش شيخ اسمه "صفي الدين" الراجل هدا كان عابد زاهد في الدنيا عايش بروحه في طرف منطقة البنداريه في حوش بسيط اشبه بالكوخ.. اهل البنداريه كانوا يقدروا فيه هلبه وزي ماهو شائع عندهم انه راجل عنده كرامات ومرفوع من عليه الحجاب.. 🌾"ياشيخ جيتك من صبح ربي نبيك تفسرلي حلم قلقني وشغلني" صفي الدين قال بإبتسامه.. /خير اللهم اجعله خير. كمال بدي يحكي وهو يشرح بإيديه.. /شفت روحي في مكان هكي زي الصحرا كان فيه الكرسي متاعي اللي دايره في مضافتي تعرفه ياشيخ..المهم شفت روحي واقف قدام الكرسي شوي شفت جنبي لقيت ولدي سلطان قتله ياسلطان برا قعمز ع الكرسي سمع الولد كلامي ومشي للكرسي لكن وين وصل فيه ماقعمزش عليه مش عارف منين طلع سيف وحطه ع الكرسي بعدين مشي واني قعدت نضبح عليه ياسلطان ياسلطان مشي في حاله وماردش عليا..شويه ياشيخ شفت السيف يتحرك بروحه نزل من الكرسي وانغرس في الارض وشقها ويطلع من هداكا الشق ميه صافيه ياشيخ روت الارض هديكا كلها وخلتها جنه بعد كانت صحرا..حط ايديه ع ركابه وقال بقلق..شن تفسيره ياشيخ.. تنهد صفي الدين وهو رافع حواجبه بعدين نزلهم وشاف لكمال وقال.. /ولدك سلطان بيربي ولد الولد هدا بيولي سيد بيحكم البنداريه وماابعد منها.. كمال قال بفرح.. /قصدك الولد هدا يكون ولد ولدي سلطان يعني حفيدي؟ شافله صفي الدين شويه بعدين هز راسه بإيجاب.. غمر الفرح قلب كمال وهو يقول.. /قتلي بيحكم ما ابعد من البنداريه.. قاله:والله أعلم.. ضحك كمال وهو يمرر في نظره القدام بعدين رده للشيخ وقاله.. /اطلب وتمنى.. ضحك صفي الدين وقال.. /ماتحكي منامك هدا لحد... 🌿🌿🌿🌿🌿 "ماشاء الله ماشاء الله تبارك الله" تسعه وهو مبتسم بفرح ولهفه قال.. /فسر ياشيخ مش طايقني صبر.. ضحك الشيخ نور الدين بعدين قال.. /زي ماهو معروف عن جدك الخضر رحمه الله راجل صالح ومصلح وسيد عظيم في زمانه وفي مكانه شجرة السدر اللي شفتها ادل عليه هو وع صفاته راجل كريم ومن أصل كريم ومبارك وانت من نسله يابيي تسعه بإذن الله رب العالمين حيرزقك من زوجتك اللي شفتها في الحلم بمولود ذكر حيجيك زيه في كل شي وحيدير زي مادار جدك يعني ولدك هدا حيكون ليه شأن عظيم وحيكون سيد في زمانه.. ضحك تسعه ضحكه فرحه خفيفه وعيونه لمعوا بالدموع.. كمل الشيخ يقول.. /زوجتك هادي بالذات مراة مباركه شجرة الزيتون دل ع صفاتها المعنويه حيجيك من وراها خير هلبه يعني حتكون وجه سعد عليك وحتكون هي أم اعظم ابنائك شأنا.. تسعه قال بإبتسامه سعاده.. /والله ياشيخ من بعد ماخديتها وربي زاد وسعها عليا واموري كلها متيسرة والحمد لله.. الشيخ قال.. /اللهم بارك اللهم مبارك..انت عبد محظوظ يابيي تسعه وهادي نعمه عظيمه بش تحافظ عليها خليك ديما عبد شكور متوكل على الله مسلم احكامه لله في كل وقت..وبننصحك نصيحه مهمه..الرؤيه هادي ماتخبر بيها حد حتى زوجتك اللي شفتها فيها ماتحكي لحد عنها.. تسعه ضم شفايفه لداخل وهو مبتسم وهز راسه بالموافقه.. 🌿🌿🌿🌿 العاشرة صباحا.. كانت الساعه اللي بتطلع فيها ربيعه من المستشفى واللي جوها بيروحوا بيها فاطمه مرت مرعي وعبير مرت محفوظ اللي جابهم مرعي في سيارته.. 🌱"بنوصيك انتي يااللا فاطمه لإني نعرفك مراة تخاف ربي حق..بالله ياللا فاطمه ماتخلي ربيعه بروحها المراة يتيمه وماعندها حد ديريها صاحبتك زي مادرتي ضرايرها صاحباتك،المراة مكسورة جناح وماعندها حد زي ماعند كل وحده فيكم راعوا ربي فيها.." فاطمه بضيق.. /علاش هي شن قالتلك بش تقولي هكي؟ عصمت قالت بألم.. /والله ماقالت حاجه لكن وضعها يخبر بروحه يااللا فاطمه..معقوله ترقد تلاته ايام في المستشفى مايجيها منهم حد!؟ تي حتى اللي جابوها هني الخدم يااللا فاطمه وراهو مش هي قالتلي الحاجه والله ماسمعتها منها هي.. استغفرت فاطمه بعدين قالت بضيق.. /والله ماعندي مانقول كان ربي يهدي وخلاص.. عصمت قالت بأسف.. /آمين.. حطت فاطمه يدها ع ذراع عصمت وقالت.. /ان شاء الله ندير معاها اللي نقدر عليه.. عصمت حطت يدها ع يد فاطمه وقالت بإبتسامه.. /ربي يحفظك ويطول في عمرك ياللا.. 🍃هالحديث دار قرب باب غرفة ربيعه اللي كانت فيها مع عبير.. عبير وهي تساوي لربيعه فشاربتها قالت.. /عم فكر البسه انتي بس ادعيلي الله يهديني.. ربيعه قالت بإبتسامه.. /ربي يهديك ويهدينا اجمعين.. تباعدت عبير وهي تمرر في نظرها عليها بإبتسامه.. /شو بيجنن عليكي التايور.. ربيعه قالت بإبتسامه.. /عندك علم اول هديه تجيني من حد في العيله.. عبير قالت بضحكه تخفي بيها استيائها.. /واكيد احلى هديه.. ربيعه ضحكت وقالت.. /لاقبلها ولابعدها.. ضحكت عبير بعدين جت لربيعه وضمتها وربيعه تحضن فيها بحب.. 🌿طلعوا مع بعضهم برفقة عصمت من المشفى.. عصمت ركبت سيارة اجرة روحت بيها لحوشها اما ربيعه ركب مع عبير في الكرسي الخلفي لسيارة مرعي.. تحرك بيهم مرعي بإتجاه القصر وهو يتبادل في الاحاديث مع فاطمه..ربيعه وعبير كانوا منسجمات مع هدرزتهم وحابين هلبه تناغمهم مع بعض..ديما فاطمه ومرعي يبانوا لأي حد يعرفهم كأنهم روح وحده في جسدين.. ربيعه وهي تسمع فيهم خطر عليها تسعه قلبها بدي ينبض بقوة وتنهدت تنهيده مكتومه وهي مبتسمه بشوق.. 🌿وحتى ضرتها الزواريه كانت مشتاقتله شوق كبير شوق لشوفته شوق للحديث معاه شوق للعيشه جنبه.. واهو اليوم حتلقاه وتعيش معاه ويقعد قريب عليها وقدام عيونها في كل وقت.. ايه..اليوم حسناء جت بش تعيش في القصر ومعاها خالتها نبيهه.. استقبلوهم زكيه وكناينها احلى استقبال بعدين رفعوهم لصالون العيله.. بعد وصولهم وصلت سيارة مرعي حط النساوين ومشي يشوف اشغاله.. 🌱"الحمد لله يازكيه انتي شن حالك شن حال صحتك؟" زكيه قالت بإبتسامه.. /الحمد لله في نعمه وخير.. فريحه:حالك باهي حسنا؟ حسناء ابتسمت مجامله وهي تقول.. /الحمد لله..تسعه مازال ماروحش؟ فريحه حافظت ع ابتسامتها بالغصب وهي تقول.. /بعد الظهر يكون هني.. نزيهه قعدت ملتزمه الصمت وهي مركزة ع حسناء وعقلها اللي مابطلش تفكير قعد ينسجلها في خيوط خطوة جديده في خطتها للتخلص من ربيعه.. وتخش عليهم ربيعه ومعاها عبير وفاطمه والثلاثه قالوا.. "السلام عليكم.." كلهم بدون استثناء عجبتهم طلة ربيعه بالبدله الرسميه نظام بنطلون كانت زايده ربيعه قوة في الحضور وجاذبيه.. بس في اللي هالاعجاب زاد سعر نار الغيرة والحسد في قلوبهم.. العيون الحاسدة لحقتها بالنظر وهي تشوففيها كيف جت لزكيه وسلمت عليها بعدين كبت ع راسها وزكيه تسأل عن حال صحتها.. بعد سلامها عليها سلمت ع نبيهه سلام كويس ومن ثم جت لحسناء.. ناضت حسناء سلمت عليها بالخد وهي تقول.. /خيرك لاباس عليك؟. ربيعه قالت.. /الوحم تعبني هلبه.. تباعدت وقعدت شاده يدها وهي تقول.. /وتوا شن حالك؟ ربيعه قالت بإبتسامه.. /الحمد لله..نورتي القصر.. ابتسمت حسناء وقالت.. /منور بأصحابه.. هدا كله يشوفوا ويسمعوا فيه فريحه ونزيهه اللي كانت مستاءة جدا بس مع هدا مش حتستسلم وحتحاول تنفذ اللي مخططتله.. تبعت ربيعه بعيونها وهي جايه لفريحه ناضت فريحه سلمت عليها بالخد وقالت.. /حمد لله ع سلامتك.. ربيعه قالت بإبتسامه.. /الله يسلمك.. وطلقت يد فريحه وجت لنزيهه اللي قعدت مقعمزة وحاطه رجل ع رجل..مدت رووس اصابعها وهي تشوف لربيعه بإبتسامة كبر.. ربيعه ابتسمت ومدت رووس اصابعها حتى هي ويدوب سلمت عليها بعدين التفتت شافت عبير وين مقعمزة مشت قعمزت جنبها وعيون نزيهه بنظراتها المخيفه عليها وحسناء مركزة معاها.. 🌿🌿🌿 ومن صالون العيله لجناح هانيه.. كانت معاها غزلان وهي تشوفلها كيف تلبس في تعليقة الذهب والساعه.. ابتسمت وقالت.. /يعجبوافيا هلبه اناقتك ونزاكتك هنو.. هانيه وهي تساوي في شعرها قالت بإبتسامه.. /ميرسي حبيبتي.. ناضت غزلان من الكرسي وقالت وهي مبتسمه.. /خلاص نطلعوا؟ كيف جت هانيه بترد رن هاتف دارها اشرت عليه وقالت لغزلان.. /اسبقيني لدار بلقوسه.. غزلان قالت بإبتسامه.. /باهي.. ومشت غزلان طلعت وخلت هانيه ترد ع الهاتف.. 🌸المسافه بين دار بلقيس وجناح هانيه كانت طويله بعض الشي لأنهم جايين في جهات مختلفه وبعيده عن بعضها في الدور الأول.. غزلان وهي ماشيه شافت قيس جاي من بعيد ارتبكت وتوترت.. مافيش بينها وبينه اي تعامل ولابأي شكل غزلان متدينه لهدا حاطه حدود في تعاملها مع الشباب البالغين الاجانب عنها.. حاولت دير روحها عاديه وهي تكمل في طريقها.. اما هو لما شافها قلبه كاد يطلع من صدره شوقه ليها كان جامح وشكلها الجميل والانيق والمحتشم مخليين قلبه اللي ذايب فيها يخاف هلبه يسبقه حد وياخدها منه ولأن مشاعره سيطرت عليه حكم قلبه وفات عقله ووين جت فايته من جنبه اعترض طريقها.. رفعت عيونها وهي مستغربه.. وهو مجرد ماعيونه يتلاقوا مع عيونها يضيع بالمرة.. "لوسمحت!" بلع ريقه وقال.. /مبارك النجاح.. نزلت عيونها وقالت.. /شكرا.. وكيف جت بتمشي وقف قدامها مرة تانيه شافتله بنظرة استنكار.. اربكاته نظرتها وخلاته يقول سؤال تلقائي من غير تفكير.. "عندك مانع ترتبطي توا؟" هي قالت بصدمه.. /نعم؟ غمض عيونه وضحك بتوتر بعدين فتحهم وقال.. /ماتفهمنيش غلط غزلان اني نيتي معاك صافيه.. هي بدون ماتعطيه مجال يزيد يوضحلها قصده لفت ومشت بسرعه وهو لحقها وقعد يقول.. /غزلان..غزلان..غير اوقفي شويه ارجوك واسمعيني.. وغزلان مكمله طريقها وهي تمشي بغضب.. سرع خطواته وسبقها ووقف قدامها حط ايديه ع بعض بوضعيه عموديه وهو يقول.. /ارجوك اسمعيني غزلان..ارجوك.. غزلان بغضب.. /حول من قدامي لوسمحت ماتخلنيش ندير تصرف مايصلحش.. ع جية هانيه وهي تشوفلهم بصدمه قالت. /خيركم شن في!؟ غزلان اشرت ع قيس وقالت.. /قولي لخوك يحترم نفسه ويحترم صلة القرابه اللي بينا ومايخلنيش نوصل تصرفاته لبابا.. قالت كلامها ومشت طول وهي معصبه وهو معاها بنظراته المستاءة اللي كانت مليانه حب.. خبط بقبضة يده اليمين راحة يده اليسار وقال.. /غبي غبي..ماتعرفش تتصرف ياغبي.. ومشي من الجهة التانيه وهو قمة الغضب من نفسه والندم مسيطر عليه.. وعيون هانيه تلحق فيه بنظراتها الحزينه.. "شن في!؟" التفتت شافت بلقيس جايه بولدها وصلت فيها وقالت.. /خيره قيس؟ هانيه قالت بضيق.. /شكله تهور وصارح غزلان وهي رفضاته.. بدت ع وجه بلقيس ملامح الحزن وهي تقول.. /معليشي ربي يجبر خاطره باللي خير منها.. هانيه قالت بحزن.. /يارب..هاتي حبيب خالته.. مدت بلقيس ولدها لهانيه خداته منها ومشوا مع بعض بإتجاه صالون العيله... 🌿ولما وصلوا لصالون العيلة وخشوله بدوا يسلموا.. هانيه سلمت بحرارة ع حسناء وخالتها بعدين سلمت ع فاطمه وعبير وتجاهلت وجود ربيعه تماما.. الكل لاحظ الحركه اللي دارتها في اللي ضايق منها وفي اللي عجباته وفي اللي يدير روحه كأنه ماشاف شي والكلام اكيد عن زكيه.. اما بلقيس حطت ولدها وسلمت ع الجميع ووين وصلت في ربيعه سلمت عليها وقعمزت جنبها من الجهة التانيه تسأل عن حالها.. وولدها كان واقف يشوف للوجوه الغير مألوفه بس. حسناء وهي مبتسمه اشرتلها بيدها وقالت.. /تعالى عبودي.. شافلها شويه بعدين مشالها لما وصل فيها خداته وحطاته ع رجليها وهي تقول.. /شن جو ياحلو.. رد عليها.. "حلو" ضحكت وقالت.. /ماشاء الله.. وعيون فاطمه عليهم وهي تشوفلهم بإبتسامه وماانبتهتش لبنتها اللي كانت مقعمزه جنبها وهي مضايقه.. 🌿🌿🌿🌿 "وواك ياربي اكره مانكره قيمان سفر طواسي العصير بالذات هادوا اللي سيقانهم طوال عارفتهم يوم من الايام بيجو مني لوطا" هادي هناديماشية بسفرة العصير لصالون العيله ووراها مجيده رافعه مترد فيه شكلاطه.. وهما ماشيات بان عليهم قيس جاي من بعيد كان يمشي وهو معصب ووجهته باب القصر الرئيسي.. هنادي وهي تشوفله تسمرت في مكانها وقعد تبع فيه بعيونها وهو ماشي ماانتهبتش لنفسها وهي تلف بش تقعد لحقاته بنظرها ومجيده كانت تشوفلها من فوق لتحت.. هي بعد ادرق عنها قيس قالت بهويام.. /اللهم صل ع النبي اللهم صل ع النبي..وقعدت تمشي للخلف وعقلها مش معاها لعند ماتعتر في طاوله وطيح منها السفرة باللي فيها.. مجيده رفعت حواجبها بدهشه اما هي خبطت بإيديها ع خدودها وقالت.. /نهار مطيلس..! 🌿🌿🌿🌿 الساعه الواحدة والنصف بعد الظهر.. لصالون العيله خش اشرف وهو يقول.. "بوي روح.." ناضوا نزيهه وفريحه بسرعه وحسناء لحقتهم ومشت طلعت وراهم.. ربيعه الوحيده اللي ماكانتش موجوده في الصالون ركبت لجناحها صلت الظهر وقعمزت تقرا في القرآن ودموعها ينزلوا وهي تمسح فيهم.. 🍃اكيد مش حيضيعوا هانيه ونزيهه اي فرصة تجيهم للتقليل منها واهانتها،قعدوا يفتحوا في مواضيع ماتعرفش تتكلم فيها ربيعه واللي حواليها يتفاعلوا معاهم لأنهم يفهموا فيها.. غرض هانيه ونزيهه من الحركه هادي يخلوها تحس بعدم وجودها كانوا يبوها تحس بالنقص وتفهم ان مكانها مش بيناتهم وانها مجرد دخيله عليهم.. لكن هي كما هو معروف عنها لايمكن تبين لحد انه قدر ينال منها قعدت تسمع في احاديثهم بإنتباه وهي مركزه ع اسلوب كل وحده فيهم في الكلام..كانت تبي تتعلم وتاخد اللي ينفعها المهم تخلي الموقف المهين هدا يجي لصالحها..🍃 🌿"حمد لله ع سلامتك" هادي نزيهه قالت هالجمله وهي تسلم ع تسعه بالخد بعدين باست راسه وهو يقوللها.. /الله يسلمك يالشيهانه.. تباعدت عنه نزيهه وقدمتله فريحه ابتسم من قلبه وهي ردتله الابتسامه بشوق بعدين سلمت عليه زي ضرتها وهي تقول.. /حمد لله ع سلامتك هو رد عليها .. /الله يسلمك ياالشادن.. وبالسيف تباعدت عنه وجاته حسناء.. ضحك وقال.. /اهلا بالافوكاتو.. ابتسمت وصافحاته وسلمت عليه بالخد زيهم هو تفاجئ وفريحة ولعت فيها النار لكن نزيهه ابتسمت بتهكم.. حسناء ووجهها محمر اللون قالت.. /حمد لله ع سلامتك.. هو ركز ع خجلها ابتسم وقال.. /الله يسلمك..امتى جيتوا؟ قالتله وهي مبتسمه.. /من 11.. طلق يدها وقال.. /شفتوا جناحكم؟ قالت:لتوا لا..قلنا بعد الغدي نمشوله.. هز راسه بعدين وزع نظره عليهم وقال بإستغراب.. /ربيعه وين؟ رفعت نزيهه حاجبها وفريحه زادت ضايقت.. "ركبت لجناحها بش تصلي" شاف لحسناء اللي جاوباته وهو مستغرب علاش ماصلتش في دار المعيشه مدام كانت هني معاهم!.. "تسعه" التفت بلهفه شافها جايه ناحيته وهي مبتسمه.. هو كان يشوف في هيئتها زي ماشافها في الحلم وكلام الشيخ يتردد لمسامعه.. 《 زوجتك هادي بالذات مراة مباركه شجرة الزيتون دل ع صفاتها المعنويه حيجيك من وراها خير هلبه يعني حتكون وجه سعد عليك وحتكون هي أم اعظم ابنائك شأنا..》 لقي بروحه بدون مايحس ماشيلها ولما وصل فيها ضمها وباسها ع راسها.. هي اتفاجئت هلبه ونزيهه وفريحه انصدموا لكن حسناء برغم غيرتها قعدت مركزه مع تسعه.. هو تباعد عنها وحط ايديه ع ذراعاتها وقال.. /شن حالك؟ ربيعه وهي تشوفله بنظرات شوق وحب قالت.. /الحمد لله..الحمد لله ع سلامتك.. قاللها بإبتسامه.. /الله يسلمك..في هاللحظة استاقظ لنفسه تباعد عنها والتفتلهم بعدين عقد حواجبه وقال.. /راكب فوق نبدل حوايجي وننزل للمربوعه عجلوا بالغدي .. نزيهه وهي تحاول تتمالك نفسها قالت.. /حاضر.. هز راسه ولف ومشي وعيون ربيعه تلحق فيه وهي مبتسمه بحب لكن هالابتسامه اختفت بسرعه لما حست بألم قوي في كتفها الأيمن التفتتله شافت نزيهه وهي فايته من جنبها تمشي بغضب وفريحه وراها.. حطت يدها ع كتفها وهي تشوف لنزيهه بكره.. "باين انه غير مرغوب فيك" غيرت عيونها لحسناء وهي ملتزمه الصمت.. حسناء قالت بإبتسامه.. /انتي غير مرغوب فيك من العيله واني غير مرغوب فيا من راجلي.. بدت ع وجه ربيعه ملامح الاستغراب.. ضحكت حسناء وقالت.. /حالنا من بعضه مالناش غيره بعد الله.. ربيعه وهي تشوفلها بدت ع وجهها ابتسامه حزن وقالت.. /تعالي نولوا للصالون.. حطت يدها ع ذراعها وحسناء مشت معاها وهي تقول.. /ركزي اني بحتلك بسر معناها بتولي صاحبتي.. ربيعه قالت بضحكه.. /نولي عادي لكن بشروط.. حسناء قالت.. /شن هما؟ ربيعه وهي مبتسمه قالت.. /بعدين نهدرزوا ونتفاهموا..ووصلوا مع بعض لصالون العيله وخشوله... ♤سبحان الله..في ناس مافيش بينهم لا رابط دم ولاسابق معرفه لكن بعدما يسوقهم القدر لبعض يحسوا براحة متبادله من لاشيء ومع الوقت تطور العلاقه بيناتهم لعند ماتوصل لأعلى مستويات الترابط الانساني..الاخوة.. وامي وخالتي حسناء ورثونا اني واختي جيانا قوة هالترابط اللي ماريتش اعظم منه....
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
