■■■■■■■■■■■■■■■■■■■■■
🌿﴿ وَجَاؤُوا عَلَى قَمِيصِهِ بِدَمٍ كَذِبٍ قَالَ بَلْ سَوَّلَتْ لَكُمْ أَنْفُسُكُمْ أَمْرًا فَصَبْرٌ جَمِيلٌ وَاللَّهُ الْمُسْتَعَانُ عَلَى مَا تَصِفُونَ ﴾🌿
••••••••••••••••••••••••••••••••••••••••••••••••••••••••••••
♤سألت أمي قلتلها مااستغربتيش اللي داره بوي ع ولادتي؟
قالتلي استغربت وهلبه لكن فرحتي بيك ماخلتنيش نفكر وندور ع تفسير،فرحتي بيك خلتني نشوف اللي داره بوك شويه عليك..
🌿أسبوع كامل من لما جي الخضر ع الدنيا وتسعه يحتفل الالعاب الناريه كل ليله لازم تزين سماء الألف والخمسين هدا غير العطايا غرق ناسها بالعطايا وخلاهم كلهم فرحانين معاه..
وفي نفس الوقت كان يجهز لحفل كبير بيديره في القصر واتفق مع محفوظ يخليه حفل واحد للخضر وسبأ..
تسعه عزم ع الحفل هدا كباريه الألف وخمسين كلهم حتى كمال البندار عزمه..
فرحته العارمه خلاته يتسامح مع الجميع،واخيرا رضي ع فريحه ونزيهه..
لكن نزيهه مافرحتش برضاه عليها لأنها عارفه سببه كويس فرحته بجية ولد ربيعه
عكس فريحة اللي كانت فرحانه ومااهتمش ابدا للسبب..
🌾🌾🌾🌾🌾
"ماصدقتش لما قالي عليها لكن يبيني نمشي بريان وحيان مش عارفه شن بيكركرهملي"
نجية "اخت فطيمه" قالت..
/مش قلتي بيمشوا معاك حماتك وعزوزتك خلاص خلي حماتك تشد ريونه..
فطيمه قالت بضيق..
/باهي شن بنلبس؟
اختها قالت..
/ماتخمميش تو نجيبلك حاجه جديده من عندي..
تنهدت فطيمه بحسرة وقالت..
/عارفه روحي بنروح مقهورة من غادي..
تنهدت نجيه بملل وحركت راسها يمين ويسار..
🌿🌿🌿🌿🌿
"ترا جيبولي اللي عندكم خل نشوف ونختار"
هادي وديعه تكلم في نساوين خوتها او تعطي فيهم امر من اوامرها وهما سمعا وطاعه..
بعد ماطلعوا من الصاله امها قالت..
/حرام ماعندهم حاجه عليها القيمه كان اللي خديناه في كساويهم هادي نجوى بكبكت راحت زي البرميل حتى دبش كسوتها معاشيجي عليها..
عقدت وديعه حواجبها وقالت..
/ايه صح نجوى سمنت هلبه..
وبعد ثواني خشوا عليهم وفي ايديهم ملابس حطوهم قدام وديعه وهي تتفرج وتشوف بعدين قالت..
/البسي البدله هادي ياوهيبه..
وهيبه قالت:حتى اني فكرت فيها..
وديعه:شن عندك غيرها تفكري فيه! مافي شي يسوى..
وجه وهيبه تغير لونه واضايقت ع الاخر..
وديعه شافت لنجوى وهي تقول..
/انتي مانظني مازال في شي يجي عليك وليتي حاله راهو نقصي شويه..
نجوى وهي مصدومه..
/قصدك سمنت!؟
عائشه قالت..
/حتى لهادي مش مستاقظه! شدي لروحك ياماما شدي كان حملتي حتى الباب معاش يدخلك وبوعجيله ولدي مايحبش المراة السمينه ردي بالك..
شدت دموعها وهي تقول..
/حاضر..
تنهدت وديعه وقالت..
/تو نقوله يطلعنا بش ناخدولك حاجه باهيه..هي ارفعوا..
كل وحده خدت حوايجها ومشت..
نجوى وهي ماشيه دموعها نزلوا ووهيبه تسرقلها في النظر وهي مضايقه ع خاطرها لكن لاتقدر تواسيها ولاتقوللها كلمه طيب خاطرها..
🍃وفي الصاله..
وديعه:ان شاء الله عاتكه ورقيه ياخدوا حاجه باهيه..
امها قالت..
/امس زدتهم فلوس..
وديعه ضحكت بتعجب وقالت..
/حتى اني عطيتهم راهو..
ضحكت امها وقالت..
/ريتي الزوفريات ماقالوش!
وديعه وهي تضحك حركت راسها يمين ويسار وهي تقول..
/جزاهم الله..
🌿🌿🌿🌿🌿
"هاه شن رايك؟"
ربيعه وهي تشوف للمرايه قالت بإبتسامه..
/وشن بيكون رايي في حاجه انتي دايرتيها ا؟يهبل زي العاده..
ضحكت عصمت وقالت..
/سلمها ياربي..
ويطلع صوت بكاء الخضر ..
ربيعه نست نفسها ومشتله بالفستان اللي لابساته خداته من سريره وهي تقول..
/حبيبي ياماما حبيبي خلاص ياروحي..
عصمت قالت بضحكه..
/تو يتلبز القفطان بالحليب..
ربيعه وهي تتأمل في ولدها بحب قالت..
/بعدين نديروله حل..
ابتسمت عصمت وهي تدعي في نفسها ربي يديم عليها فرحتها...
🌿🌿🌿🌿🌿
وجي يوم حفلة الاسبوع..
من الصبح القصر كان زي خلية النخل الكل يخدم ع قدم وساق لتجهيزات الحفله..
انفتح المطبخ الخارجي اللي يبعد بمسافه لاباس بيها عن حديقه القصر وتحت اشراف برنيه كانوا يجهزوا فيه لإعداد عشي الليله..
وكبيرة القصر كانت مشرفه ع تجهيز قاعة الاحتفالات النسائية وهالمرة كان التنسيق فخم جدا زي نظام الحفله اللي حيكون جدا مميز...
🌿"نبي كل شي يكون زي ماوصيت"
الموظف المسؤول عن تجهيز قاعة الرجال قال..
/كون هاني يابيي كل شي حيكون احسن من اللي وصيت عليه..
ابتسم تسعه وهو يمرر في نظره ع المكان..
ع خشة المرزوقي راجل تعويضه وهو يقول..
/المهندس خير الله جا يابيي..
تسعه حرك راسه بإيجاب وهو ماشي بسرعه بيطلع من القاعه والمرزوقي لحقه...
🌾🌾🌾🌾🌾
واقف هو وواحد من رجاله والزوز كانت انظارهم موجهه لفوق سطوح حوشه كانوا يشوفوا للعمال اللي قاعدين يركبوا في مجسم سأل عن مهيته الساعدي وهو يقول..
/ليش النخلة بالذات؟!.
كمال تنهد بإبتسامه وقال..
/ياسيدي ليا فترة نشوف في حلم يتكرر عليا قريب كل ليله..نحلم بنخله تطلع في وسط حوشي وتقعد ترقى وترقى لين فاتت السطوح وقريب مست السمي..وين حكيته للشيخ صفي الدين قالي النخلة في الحلم خير وانتم ناس فيكم خير وبيجيكم خير وبيجي منكم خير زيكم زي النخل..شاف للساعدي وكمل يقول..قالي ازرع في حوشك نخله ماديرش غيرها بش ترمزلكم انتم عيلة البنداريه..واني قلت بندير ماقالي وفوقها بندير حاجتين المجسم هدا...رفع يده ووجهها للساعدي وقال..وخاتم منقوش عليه رسم النخله..نزل يده ورجع وجهه نظره للمجسم وهو يقول..بنخليه ورث لولادي وولاد ولادي كل حد بيقعمز ع كرسي سيادة البنداريه يلبسه..
.......................
"قبل لنجي ع الدنيا قبل ماتحمل بيا امي بوي شافني في الحلم ع هيئة نخلة واني شفت ولدي هدا في الحلم بنفس الهيئه.."
محفوظ وهو يتفرج ع العمال كيف يركبوا مجسم نخله في اعلى قمه في القصر قال بضحكه..
/اها فهمت فهمت..فهمت وعرفت سبب فرحك المبالغ فيه بولدك هدا..
تسعه وهو مبتسم قال..
/كان جاتك بنت تانيه بعد سبأ نبيها للخضر..
ضحك محفوظ وقال..
/كانك عليا حتى سبأ نبيها لواحد من ولادك مش حيلقوا خير منهم..
تسعه قال..
/نحكي جد يامحفوظ..
محفوظ قال بإبتسامه..
/واني ندوي من جد جدي بناتي لولادك وكان جوني ولاد وجوك بنات بعدين بيكونوا لولادي..
تسعه حط يده ع كتف محفوظ وقال بإبتسامه فرح..
/بإذن الله..
♧الهدف حماية المصلحة العليا،ماننكرش ان علاقة بابا بعمي تسعه علاقه خوت وصحاب مش بس ولاد عم بس في الحاجه هادي كل واحد فيهن فكر في مصلحته..
شغلهم واحد ومصالحهم وحده اكيد حيفكروا يتشاركوا حتى في النسب بش تقعد المصالح وحده..
وحاجه تانيه حني اغلب حياتنا حتكون في الخارج فأكيد بابا بيخاف علينا تحديدا حني البنات لهذا فكر في الموضوع هدا بش يحمينا لكن مع هذا يقعد تفكير اناني..
♤تفكير مصالح زي ماقلتي في البدايه مش اناني وبعدين هما حاطين في بالهم يفرضوا علينا الحب زي ماحاولوا يفرضوا النصيب..مع اني ضد اللي داروه لأن مالهمش حق ياخدوا قرار في موضوع مصيري زي هدا لكن بجد ممنونهم..
♧اني مش ممنونه غير لله سبحانه وتعالى اللي خلاك من نصيبي برغم كل شي..
🍂🍂🍂🍂🍂🍂🍂🍂
مقعمز في مكتبه سرحان بفكره وع وجهه باديه ملامح الهم..
استاقظ لما سمع الباب يدق شافله بلهفه وهو يقول..
/خش..
انفتح الباب وخشت ممرضة سكراته وراها بعدين قدمت للمكتب وقفت قدامه وقالت..
/مافيش الا حاله وحده عند الدكتور عبد القادر توأم ولد وبنت واليوم موعد الولاد..
فرحات غير نظره عنها وهو يفكر ويحدث في نفسه..
"ماجوش كان لعبد القادر الحصلة هدا مستحيل التفاهم معاه..فرحات اخدم ع المضمون خيرلك ماتهبعش بروحك"
رفع عيونه فيها وقال بضيق..
/اطلعي..
شافتله شويه بعدين قالت..
/كان تبي نساعدك في حاجه قولي دكتور..
شافلها شويه بعدين قال..
/ماتقدريش..
قالتله:علاش مانقدرش! اني شن ماتطلب مني ندير وسري عندك وسرك عندي مستعده ع خاطرك ندير كل شي..
غمض عيونه بملل وهو يقول..
/اطلعي..
هي قالت بحزن..
/حاضر..ومشت طلعت من مكتبه وسكرت الباب..
فتح عيونه وهو مستاء جدا بعدين غير نظره للهاتف دام النظر ليه للحظات بعدين قربه ورفع السماعه وضرب ع رقم محدد..
🍂🍂🍂
"شن بديري في الالف وخمسين!؟ خليك بعيده ياعمتي خيرلك"
رفعت حاجبها وقالت..
/ضروري نمشي اختك تبيني في حاجه مهمه..
منصور قال وهو يفكر..
/باهي شن رايك نبعت من ياخدها من غادي ويرفعها لباب الورد وغادي نتلاقوا في حوش عمي..
قعدت تشوفله بتفكير وهي ساكته..
وهو قاللها:هكي امان اكثر ياعمتي اسمعي مني..!
تنهدت بعدين هزت راسها بالموافقه..
ويرن هاتف الشقه ناض منصور بش يرد عليه وعمته تشوفله..
🍃رد منصور ع المكالمه اللي كانت من فرحات صار فيها نقاش وعمته تسمع بتركيز وانتهت المكالمه بعركه🍃
عمته قالت..
/خير بلاه!؟
قعمز منصور جنبها وقال بإنزعاج..
/تي طلبه مستحيل نلقاه..
عمته قاله..
/مستحيل حق..زوز صغار كيف مزيودين منين بتجيبهم وكيف!؟ الحكايه صعبه هلبه..
منصور:قالي اخطفهم من مستشفى وخيره مايخطفهم هو اللي يخدم دكتور نساء وولاده في مستشفى هكي كبره!
عمته وهي تفكر قالت..
/يبيك انت اللي تحصل كان انكشفت الحكايه وهو يطلع منها..لكن اني خاطري نعرف شن يبي فيهم!؟
منصور بلامبالاة قال..
/شن دخلنا بيه..المهم افتكيت منه ومن بلاه..
قالتله بحسرة..
/خسارة كان جبناله مايبي رانا حصلنا هبرة باهيه وطلعنا من هالبلاد الحرفه..
منصور قال..
/ماهو كان يسقدوا ارواحهم اللي قاعدات في قصر ذهيبه يجيبوا ثار صلاح وفي نفس الوقت ياخدوا اللي ياخدوه من غادي رانا قداش لينا هاجين ياعمتي منوبيه..
منوبيه قالت بحقد والدمعه في عينها..
/اختك قالت قريب خلاص..بعد شهرين نوصلوا في اللي خططناله وقعدنا سنين نفدوا فيه..
منصور قال..
/علاش شن بدير في هالشهرين!؟
قالتله:ماهو هدا اللي بنتلاقى اني وياها ع خاطره بش تقولي ع شن ناويه..غير ان شاء الله ماتخيبش خيبتك انت..
منصور:انتم اللي خبتوا ياعمتي مش اني..اني بعت الراجل وين ماقلتولي هي اللي ماطلعتش غادي وبعدين اني عرفت كيف نتصرف ونخلي التهمه تركب طليق اللي ماتت مكانها وطلعتكم منها زي الشعره من العجين..
منوبيه قالت بنرفزة..
/هديكا الكلبه بختها قوي..رفعت ايديها فوق وهي تدعي من وسط قلبها الحاقد..ياالله ياربي طيحه هالبخت خليه ينردم في الوطا ردم...
🌿🌿🌿🌿🌿
الساعه التاسعه ليلا..
في جناح ربيعه كانت معاها مزينه تحط في اخر اللمسات ع طلتها..
ولأول مرة تلبس ربيعه العربي في حياتها..بدلة كبيرة..ومكياج الصدرة ابرز جمال ملامح وجهها..
المزينه:تبارك الله عليك ياللا طالعه زي الغزاله..
ربيعه وهي مبتسمه قالت..
/بارك الله فيك..
دق باب الجناح قالت ربيعه..
/تفضل..
انفتح الباب وبعد لحظات خشت عليهم هنادي لما شافت ربيعه ابتسمت من قلبها وهي تقول..
/ماشاء الله تبارك الله..زي الغزاله ياللا ربي يحفظك..
ربيعه وهي مبتسمه قالت..
/سلمك ياهنوده..
هنادي وهي مبتسمه قالت..
/البيي يبي يشوفك ياللا..
المزينه خدت شنطتها وقالت..
/ربي يحفظه ويفرحك بيه ياللا..
ربيعه قالت..
/تسلمي بارك الله فيك..
مشت المزينه بتطلع وهي تقول..
/تصبحوا ع خير..
ردوا عليها..
/قدامك كل خير..
ورافقتها هنادي وطلعت معاها وسكرت باب الجناح وخلوا ربيعه واقفه ع ولدها تتأمل فيه بحب وبعدين بدت تغنيله..
" بيك جبر وبيك جبر .. وإن شاء الله وليدي يكبر
يركب فوق حصان اشقر .. مايهابش صحراء ووعر
بيك جبر وبيك جبر .. بيك جبر وبيك جبر
متنقب في جرد حرير .. وركابه فضه وذهب
يسبق في الأرياح يطير .. اللي شبحه للعين طرب
بيك جبر وبيك جبر .. ياربي وليدي نجيه
سند لسيده ويحاديه .. بيك جبر وبيك جبر
وجبر جبير وجبر جبير ..إن شاءالله وليدي ايولي كبير
ويبدا يجبد فوق البير .. واللي يقول عليه يصير
بيك جبر وبيك جبر.. وعدوك ما يطق شهر
وبيك جبر وبيك جبر.. تحرثلي وديان البر
وبيك جبر وبيك جبر ..وتجيب الحمل مكعبر
بيك جبر وبيك جبر ... ولا تشبح عازه ولاشر
بيك اجبار وبيك اجبار ... واعدوك ما يطق انهار
زينك زين و زينك زين .. وزين الخشم و زين العين وزين الحاجب والعنيين..وزين وبيك ضي العين..
🌸من لما بدت تغني تسعه خش الجناح قعد يسمع فيها وهو مبتسم من قلبه وصل في الباب وقف عليه وبدي يتأمل فيها وهو يسمع في غناها خدت عقله بكل معنى الكلمه قعد هايم فيها وخلاص..
وهي حست بوجوده ريحة عطره هي اللي وقظتها لكن كملت غناها لعند ماوصلت في اخر مقطع غناته وهي تشوفله بإبتسامه حب واعجاب شديد..كان لابس عربي حتى هو ومعروف تسعه بالعربي يزيد وسامه وجاذبيه..
تسعه بإبتسامة اعجاب..
/ماشاء الله ماشاء الله تبارك الله ع للة اللات..
وهي مبتسمه بخجل قالت..
/حتى انت الله وحد عليك..
قدملهم ووقف ع سرير ولده ابتسم بحب وهو يشوفله بعدين طلع من جيب فرملته رشقة الفضه..
طبس عليه وهو يقول..
/بسم الله..
حط الرشقه ع القماط وساواها كويس بعدين وخر وعيونه يتأملوا في ملامح ولده اللي كان غارق في النوم..
ربيعه وهي مبتسمه بإستغراب قالت..
/انت دايرها؟!
جاوبها وعيونه ع ولده..
/مالا منو؟..
ربيعه قالت بإبتسامه..
/شن ناقش عليها ماشفتش كويس..
شافلها وقال..
/نقشت رسم النخله وكتبت اسمي واسمه ع يمينها ويسارها..
"الخضر تسعه"
ربيعه وهي مبتسمه بفرح قالت..
/اول مرة ديرها..
قال:درت وحده زيها ذهب لأخته جيانا..
ربيعه:وكان جو بعدهم صغار بديرلهم حتى هما ولا؟
ضحك وهز راسه بإيجاب..بعدين طلع من جيبه التاني علبه متوسطه الحجم مشي حطها ع الزيانه وهو يقول..
/ودرتلك حتى انتي حاجه زيهم لكن شكلها بروحها..التفت شافلها وهو يقول..قبل بنحطهالك لكن مالقيتش مكان وسط هالبقاج اللي لابستيه..
ضحكت والفرحه تتناثر من عيونها بعدين قالت...
/بنغير بعدين ونلبس قفطان تو نحطه عليه..
ابتسم وقال..
/كويس..هي ياللا يراجوا فيك لوطا..
ومشي شد يد الكروسه وهو يقول..
/هي امشي قدامي..
وهي مبتسمه قالت..
/حاضر..
🌿🌿🌿
وتخش ربيعه قاعة الاحتفالات وهي تدفع بكروسة ولدها..
واول ماخشت تلقوها الزغردات زغردوا عليها وهما ينثروا في الورد والمعازيم يتفرجوا بذهول وحماس..
لكن في اللي كان بينفجر من الغيظ زي هانيه وحماتها تيسير واكيد حتى نزيهه..
اما فريحه ماكانتش حاسه بأكثر من مشاعر الغيره اللي قاعده تحاول التحكم فيها..
ووصلت ربيعه للكرسي متاعها حطت كروسة ولدها في مكانها وقعمزت بمساعده بلقيس وحداهم قعدت زهره بش ترد بالها من الخضر..
🌿وبين المعازيم التعليقات كانت شغاله..
🌱وديعه:ماشاء الله جت الاخيرة وخدت القدر كله..
رقيه:مش هوينه باين من وجهها لكن صحة ليها..
عاتكه:شوفوا ضرايرها بنت الزايدي تقول مقعمزة في عزي وبنت البندار تتبسم بالسيف..
وديعه:لكن الزواريه تبان عاديه..
رقيه:ايه وتبان فرحانه علاقتهم حسيتها احلا من علاقة بنت الزايدي وبنت البندار..
عاتكه؛حتى اني..
وديعه غيرت نظرها عن ربيعه وشافت لأمها والكناين اللي كانوا مقعمزات في طاوله تانيه بعدين قالت..
/باهي مشي حالهم نساوين خوتكم..
شافولهم ورقيه قالت..
/دف تولع..مررت نظرها ع المعازيم وهي تقول..وكان نلقوا وحيده لعبد الحافظ تعوضنا ع هالنكبتين..
وديعه:مادخلكمش فيه عبد الحافظ موضوعه عليا اني..
رقيه شافتلها وقالت..
/وراس ودو اختاريله حاجه باهيه تربحي..
وديعه:اول شي لاتحلفي بغير الله تاني شي اني نعرف شن لازم نختار لخوتكم..
عاتكه:فاهمين عليك لكن نبوا كنة تتورى للناس ياوديعه مش زي الهفشوكات هادم..
هزت راسها بالموافقه وهي تساير فيهم مسايرة مش ناويه دير كان اللي في راسها بس..
🍀وتعلا اصوات الزغاريد مرة تانيه ع خشة عبير اللي كانت لابسه بدلة كبيره حتى هي وتدفع في كروسة بنتها وحمواتها حواليها..
اهلها كانوا ع راس الحاضرين للحفله عجبتهم هلبه خشتها وانبهروا بجمال طلتها بالزي الليبي وفرحهم غني حمواتها عليها وسبأ...
استنوها لين وصلت في الكرسي وقعمزت جنب ربيعه بمساعده حمواتها بعدين ناضوا ومشولها..
🌾وفي هاللحظه..
تخش السيارة اللي جابت كمال البندار بعيلته ووراها سيارة مرافقه..
سيارة المرافقه وقفت في مكان مخصص بالسيارات اللي زيها..
اما سيارة كمال درست في مكان يخص سيارات المعازيم..
وينزل هو وولده سلطان والزوز كانوا لابسين عربي بس اللي مزيهم العمايم اللي غطوا رووسهم...
ونزلوا بعدهم ام كمال واخته اللي كانت شاده ريان وفطيمه وولدها حيان في حضنها عمران الوحيد اللي ماجابوشي خلاته امه عند اختها...
ويمشوا النساوين للجهة اللي ترفع لقاعة الاحتفالات النسائيه
لكن الرجاله وهما ماشيين بإتجاه قاعة الرجال كمال وهو يمرر في نظره ع القصر تفاجئ مفاجأة قويه لما شاف مجسم ع هيئة نخله موجود اعلى قمة في القصر وكان يضوي باضواء الوانها مختلفه ابيض واصفر واخضر..
سلطان وهو متفاجئ قاله..
/ريت يابوي!
كمال رفع حاجبه وقال..
/ريت يابوي ريت..وحتى انت ريت كيف التسعه هدا هو اللي يدور ورا بوك ويماري فيه في كل شي يديره..
سلطان شافله وهز راسه بإيجاب..
نزل كمال نظره لولده وقال بإبتسامه كبر..
/وهدا الفرق بين الصغير والكبير ولدي..
سلطان هز راسه بإيجاب ورجع شاف للمجسم اللي كان في نظره احلى من مجسم حوشهم العادي جدا..
"هيا ولدي"
شاف سلطان لبوه وهو ماشي بعدين لحقه..
🌿ويستقبل تسعه كمال استقبال كويس ودخله هو وولده ورفعهم لمكانهم زي مادار مع كل المعازيم..
وطبعا الجميع كان يراقب في حالهم واكثر من مركز عليه عبد الحافظ البدري وفي عقله قاعد يدور كلام اخته وديعه..
..من جهة تانيه في قاعة الرجال..
كانوا موجودين الشباب الصغار..
ولاد تسعه من سلامه لوسام ومعاهم كريم وولاد خوات مرعي ومحفوظ اللي حتما حيكون بينهم عامر اللي كان قيس يسرقله في نظرات غيرة ممزوجه بالكره..
الكره اللي من غير مبررات في نظرات اشرف وسلطان لبعض حتى بعد هالسنين اللي مرت مازال شعور الكره موجود بيناتهم كره مالاش أي سبب واضح..
وطبعا الناس كانت فاتحه عيونها في ولاد تسعه..
ستة ولاد كل واحد منهم يقول الزين عندي بصحة تامه ومتفوقين ويبانوا متربيين احسن تربيه..
..زي ماكانت العيون مفتوحه ع بناته من كريمه لهدى كل وحده فيهم عندها من الجمال مايخليها تزهى في العين لكن اكثرهم جمال وجذب للأنظار ثريا..
🌱"زي الغزاله البنيه هادي زعما بنت مني فيهم"
فطيمه قالت..
/نقشها يشبه نقش بنت الزايدي..
حماتها قالت..
/ايه صح..
ريان ضرب امه ع رجلها وقال..
/شكولاته ماما..
خدت فطيمه طرف بالدرقه عليه وعطاته لحماتها..
ريان:امي!
استمرت فطيمه في التجاهل وهي تراجي في حماتها تبدل غلاف طرف الشكولاته الحلو بالسادا اللي جابوها معاهم..
ريان بغضب..
/امي نكلم اني..
ضحكت عمته ومدت لأمه الطرف في يدها وفطيمه قالت..
/نعم امي؟
ريان وهو عاقد حواجبه قال..
/نبي شكولاته..
فطيمه بضحكه..
/سامحني وليدي ماسمعتكش..
ودارت روحها خدت طرف من المترد اللي ع الطاوله ومداته وهي تقول..
/خود امي..
خداه منها وفتحه وبدي ياكل وامه وعمته وحناه يشوفوله بإبتسامة بحب ممزوجه بالشفقه..
🍂🍂🍂🍂🍂🍂
"يعني ضروري الصغار يكونوا كيف مزيودين حتى اكبر بيوم بيومين لا!!؟..
=قتلك هما يبوهم طازه صغار اليوم اللي يجوا فيه..
سكت فرحات وهو مضايق ع الآخر..
=فرحات فكنا من اللعب وخلي موعدنا بعد شهر وشويه،في نفس التاريخ اللي تفاهمنا عليه بتعطينا الصغار..
هز راسه بالموافقه استسلاما بعدين فتح باب السيارة ونزل وسكره وهو يشوف للراجل اللي فالسيارة كيف يهدد فيه بالنظرات..
قاله وهو ممتعض:عطيتك كلمه مستحيل نولي فيها..
قال الراجل وهو يهدد فيه بنظره وكلامه..
/ماتقدرش..رقبتك تحت امواسنا يادكتور..وشغل السيارة وتحرك طول وعيون فرحات تلحق فيها وهو يقول بغضب ممزوج بالألم..
"الحاجه الله يلعنها"
🌿🌿🌿🌿🌿
ناضت فطيمه من كرسيها وخدت ريان معاها ومشوا بإتجاه ربيعه..
وهي ماشيه كانت العيون والهمسات عليها،هيئتها وشكلها
طلتها كانت متحسنه عن قبل لكن تقعد اقل الحاضرات من جميع النواحي..
وصلت في عبير وربيعه وقالت بإبتسامه..
/مساء الخير..
ردوا عليها..
"مساء الخير مساء النور"
فطيمه:مبروك المزيودين يتربوا في عزكم ان شاء الله..
الزوز مع بعض قالوا..
"آمين..ان شاء الله"
شافت فطيمه لربيعه وقالت..
/زبطتيني! اني فطيمه مرت كمال البندار..
ابتسمت ربيعه وهي مضيقه عيونها تقول.
/ايه ايه زبطتك..اخر مرة ريتك فيها في عرسي..
ضحكت فطيمه وقالت..
/ايه..قدمت لكروسه الخضر طبست عليه وقالت..
/تبارك الرحمن عليه..وطلعت من شنطتها فلوس وحطتهم..
ربيعه قالت..
/كلك بياض..
"امي شوف بيبي"
شافتله امه وقالت..
/لالاعيب امي..
عقد حواجبه بغضب وقال..
/نبي شوفه..
ضحكت ربيعه وقالت..
/خليه يشوفه عادي..
ابتسمت فطيمه ورفعت ريان في حضنها وقرباته من الخضر وهي تقول..
/هاه تريحت توا..
ريان قال..
/محلاه..مسه ترا..
فطيمه قالت بضحكه..
/عينك..
ريان بغضب..
/مسه مسه..
ربيعه وهي تضحك قالت..
/خليه يحط ايديته ع خده..
تنهدت فطيمه وقالت..
/سلامتك ياولدي عنايدي درجه اولى.
خدت يده وحطتها ع خد الخضر بعدين حولتها وريان يقول..
/بيبي حلو..
عبير بضحكه..
/سكر الله يحفظه بيجنن..
ابتسمت فطيمه والدمعه في عينها وهي تقول..
/تسلمي..
بعدين مشت بريان لسبأ حطتلها فلوس وهنت امها عليها وولت بريان للطاوله..
وتجيهم بلقيس وهي تقول..
/هيا نوضوا بش تبدلوا..
ناضوا وربيعه تقول..
/وين زهره؟
زهره اللي كانت مع البنات الصغار قراب عليهم سمعتها تسأل عنها مشتلها طول وهي تقول..
/نعم ياللا..
ربيعه:تعالي معاي الخضر راقد نبيك تقعدي معاه في الجناح..
زهره:حاضر ياللا..
..وعبير جوها حمواتها ومعاهم حسناء ورفعوها لجناح حسناء القديم بش تبدل فيه..
🌳🌳🌳🌳🌳
لبست ربيعه قفطانها اللي فصلاته عصمت بمساعدتها بعدين جتها بلقيس دارتلها تسريحه بسيطه وغيرتلها شويه في مكياجها..
وتلبس بعدين طقم الزمرد واخر شي خدت العلبه متاع البروش فتحاته لما شافوا اللي فيها هي وبلقيس وعصمت بدت ع وجوههم ملامح الانبهار..
البروش كان ع هيئة اغصان زيتون من الألماس وتتوسطه حبة لولو صغيره كان اجمل من بروش نزيهه وفات حتى بروش زكيه في جماله وفخامته..
عصمت وهي مبهورة قالت..
/ماشاء الله ماشاء الله ماشاء الله..
بلقيس قالتبإبتسامه..
/فنان خوي فنان ربي يبارك..تستاهلي ياسبرينجه..
ضحكوا وربيعه قالت بضحكه والدمعه في عينها..
/سلمك حبيبتي..
🌸وخدت بلقيس البروش وحطاته ع صدر الفستان زاده جمال ع جماله..
وزاد في قوة حضور ربيعه اللي خلت المدعوات في حاله من الانبهار وهما يتفرجوا عليها بانت عليهم ملكه مش بس اللا وكانت زي البروش متاعها ليها بريق يخطف الأبصار..
🌱"واو البروش حاجه ماصارتش ولاالطاكم اللي لابساته شكله مغروم بربيعه هادي هلبه ياهنو"
قالت الكلام هدا عاطفه سلفة هانيه وهانيه لانها مقعمزة مع عيلة زوجها اكتفت بإبتسامه صفراء ردا ع عاطفه..
وتيسير جنبها عيونها ماحولتهمش عن ربيعه نظراتها ليها كانت كلها غيره وحسد..
وكذلك كانت نظرات الكثير من المدعوات اللي تمنوا يكونوا مكانها يوما ما..
واللي عطتها مكانها بسبب قلة حكمتها وقلة عقلها قاعده تحترق بصمت..نزيهه..اللي من لما شافت البروش تيقنت انها خسرت اهم شي حاربت ربيعه ع خاطره..
🍀وفي هالحفله ماكانتش ربيعه بروحها الملفته للأنظار حتى عبير الجميله طلعت بطلة فاتنه ومبهره..سواء فستانها ولامجوهراتها لكن تقعد احلى صفة فيها التواضع اللي مالاش حد..
🌿🌿🌿🌿
وانتهت الحفله ع خير وكانت هالليله من اجمل الليالي اللي تمر ع ربيعه وتسعه اللي كملها معاها هي والخضر..
🍃🍃🍃🍃
بعد مرور عدة ايام...
في باحة القصر كانت مجيده ماشيه بإتجاه بوابه القصر وعيون نفس الحارس تلحق فيها..
استناها لعند ماطلعت وبعد لحظات طلع وراها بدون مايخلي حد ينتبه عليه..
................
"مجيده مجيده وقفي"
وقفت والتفتت وهي تقول..
/خيرك لاحقني!؟
وقف عليها وقال..
/وين ماشيه؟
هي قالت:مش قتلك قبل بيجيني حد من عيلتي هني بنمشي نشوفه..
قاللها:خليني نرفعك..
قالت بإستعجال:تبيهم يذبحوني! برا برا ولي للقصر قبل ليشوفنا حد..ولفت ومشت بسرعه كملت طريقها وهو قعد واقف في مكانه يشوفلها بغيره وانفعال خلاها تتباعد شويه بعدين لحقها..
ويقعد وراها لعند ماشافها ركبت تاكسي ركب تاكسي تانيه ولحقها وتوصل بيها التاكسي لشارع نزلت منها وخشتله وهو نزل ولحقها..
وقعد وراها لين شافها وقفت قدام حوش دقت ع بابه فتحتلها مراة كبيره في العمر ودخلتها..
هو ابتسم بإرتياح ورجع لوين ماجي..
🍃ومجيده طلعت من الباب الخلفي لنفس الحوش وهي لابسه جلابيه وشاربه لقت سيارة تراجي فيها ركبت من الخلف وتحركت بيها السيارة..
وبعد ماقطعت مسافه طويله بعض الشي وصلت لمدينة"باب الورد" بعد ماخشوا من بوابتها نزلت من السيارة ومشت لسيارة تانيه فتحتها وركبت فيها وهي تقول..
/منصور..
ضحك وقال..
/منظرك مش عادي..
هي بضحكه قالت..
/تحرك خيرلك..
...وتحرك بيها لحوش اخ منوبيه الموجود في وحده من الاحياء الشعبيه الشبه معدمه..
اول ماوصل للمنطقه درس سيارته في مكان آمن ونزلوا هو واخته وكملوا طريقهم مشي للحوش..
🍃مجيده وهي تشوف حواليها قالت..
/سبحان الله ع الدنيا تقول كنت فوق الوطا وتوا نزلت تحتها..
ابتسم خوها بتهكم وقعد ساكت..
ويوصلوا لحوش عمهم اللي كان ع قولتنا"تريله" او براكه..
دق الباب فتحت بنت صغيره ابتسمت في وجوههم مسح منصور ع شعرها وخش ومجيده خشت بعده وسكرت الباب..
البنيه وهي تشوف لمجيده قالت..
/وين زهره؟
مجيده ردت عليها بلامبالاة..
/تو تجي تو تجي..وين عمتي منوبيه..
منصور قالت..
/واصله قبلنا من الصبح..
هزت راسها وخشت معاه داخل..
🍃البراكه اللي كانت زي علبة الكبريت مزحومه بالصغار كانوا ع رووس بعض اللي يجري ويلعب واللي راقد واللي يطلب في حاجه ياكلها وامه تقول بتذمر..
/راجي الغدي يافرخ..
والام سمعت صوت مجيده وهي تسلم بدت ع وجهها ملامح اللهفه ومشتلها بسرعه وهي تقول..
/زهره وين!؟
مجيده وهي دور ع عمتها بعيونها قالت..
/في القصر..
ام زهره قالت بألم والدمعه في عينها..
/علاش ماجبتيهاش معاك ليا تلاته سنين ماريتها..
تجاهلت مجيده كلامها وهي تنادي.
/عمتي..عمتي منوبيه..
"في الدار في الدار تعالوا"
منصور اشر ع الدار وهو يقول..
/شكلها مع عمي..
مشوا الزوز بإتجاه الدار وخلوا ام زهره تبكي بألم وصمت..
🍃في الدار..
خشوا مجيده وخوها وهما يقولوا..
/السلام عليكم..
ناضت منوبيه وخدت بنت خوها في حضنها..
/مرحبتين مرحبتين.
مجيده قالت..
/رحب بيك عميمتي..
واب زهره اللي كان مقعمز ع الفراش يشوفلهم وع وجهه ملامح الحزن..
تباعدت مجيده عن عمتها وشافتله وقالت..
/شن حالك عمي..
قاللها بحزن:مابياش يابنتي مابياش زهره شن حالها..
قعمزوا مجيده وعمتها ومعاهم منصور وهي تقول لعمها..
/في خيار خيرها ياعمي عايشه بييه في قصر ذهيبه..
هز عمها راسه وهو مضايق وقلبه مغموم بعدين غير نظره لرجله المبتورة وقعد يشوفلها بقهرة وألم...
▪▪▪▪▪▪▪▪
في مكان مستخطي حوالين البراكه قعمزوا منوبيه ومجيده بش ياخدوا راحتهم في الكلام..
🍃مجيده:انتي ياعمتي لو تشوفي الامن غادي والحراسات ترعشي غير هكي العيون علينا شن مانديروا كان ماشافكش حد كبير المفرخ يشوفوك تي والله لتوا مش عارفه كيف طلعت منها المصيبه هديكا خلنقولك هادي..عند تسعه كلب اسمه جمال ع اساس حارس شخصي وهكي شيطان رجيم ماتفوته الفايته بعد هديكا المصيبه نشدني من اللي عرفك ع اللا نزيهه..
منوبيه وهي عاقده حواجبها قالت..
/عارفه عارفه من قبل مانبعتكم قلت مرات قعادكم غادي يطول..عضت ع شاربها بغيظ وقالت..لكن لعند امتى بتفلت هالوسخه بنت الوسخه..لامتى بيقعد تار ولدي هكي امتى بنشفي غليلي ونبرد نار قلبي اللي كل يوم والعه..
نزلوا دموعها وهي تتكلم بحقد..
شدت مجيده ع يدها وقالت..
/قريب ياعمتي قريب..نخلوها تشرب نفس المر اللي شربتهولك لما نرزوها في ولدها اللي طايرة بيه..
رفعت منوبيه حاجبها وقالت..
/كيف قصدك بتقتليه؟
مجيده بقشعريره قالت..
/لالا حاجه زي هادي مانديرهاش اللي في بالي شي تاني ياعمتي..
منوبيه قالت..
/شني في بالك؟
مجيده قالت بمكر..
/نخطفوهم..
منوبيه بعدم فهم..
/نخطفوهم! قصدك هو وومايته!؟
مجيده قالت..
/تي لا..نبي نخطف ولد الوسخه ربيعه وبنت الحقيره حسنا اللي قعدت حاطه راسها براسي وتعامل فيا ازفت معامله وديما في صف الوسخه هديكا ديما..
منوبيه قالت بكره..
/لا كان ديما في صف الوسخة ربيعه تستاهل..
مجيده قالت..
/ايوه..نخطفوهم ونلوحهم في طريق غابه وخل ينهشوهم الكلاب والذياب وحني في نفس الليله نهربوا برا البلاد ومعاد يعرفولنا طريق زي ماتفاهمنا قبل..
منوبيه وهي تفكر قالت..
/الحكايه مش ساهله يامجيده..مدام القصر زي ماقلتي مترشق حرس وعيون فيسع مايطبوكم..
مجيده:ماهو حني بنديروا الحاجه هادي في يوم يكون في مناسبه في القصر وهما في مناسباتهم الدنيا تزحم وتربخ واللي هدا لاهي في حاله هداكا الوقت يبدا ساهل علينا هلبه..
منوبيه:باهي امتى تصير عندهم مناسبه هالدعاوي..!؟
مجيده قالت..
/تسعه وامه بيمشوا للحج الايام الجايه ومرواحتهم حتكون ع جياب الحقيرة حسناء واكيد ع مرواحتهم بيديروا حفله كبيره مع اسبوع فرخة هديكا..
منوبيه:ايه باهي كان بيديروا سبوعها معناها الفرخه بتقعد حدا امها..
مجيده:اني لاحظتهم في كل السوابيع اللي ضرتهم العيل يقعد مع امه في اول الحفله بعدين يرفعوه الجناح امه وتقعد معاه يااما برنيه ولافرخة اسماها هنادي ولازهره..مانحكيلكش قداش يحبوا زهره بالذات ربيعه حتى الحقيرة حسنا اللي كانت مخنسه منها في الاول خشت خاطرها بعدين..
منوبيه قالت بضحكه..
/الفرخه هادي كانت ولت ممثله تفوت سعاد حسني غادي..
ضحكت مجيده وقالت..
/ايه والله..المهم اني مربطه حبالي مع واحد من الحرس
غادي تو نخليه يساعدني من غير مايحس..
منوبيه:كيف مربطه حبالك معاه يافرخه!
ضحكت وقالت..
/بالك نخليه يمسني!..فشر..في الاول كان يحسابني ساهله لكن خليته يعرف من هي مجيده ويهبل عليها..
منوبيه:باهي قوليله شن اللي مخططيله بالزبط؟
🍃وبدت مجيده تشرح لعمتها في الخطه ومنوبيه تسمع وتفكر فيها كويس وبعد ماكملت مجيده كلامها قالت..
/ايه باهي كويس خليني نحكي لمنصور وبعدين نرد عليك..قداش مازال ع جياب اللي سماها حسنا؟
مجيده قالت..
/شهر..
هزت منوبيه راسها وقالت..
/كويس..
🍂🍂🍂🍂🍂🍂🍂🍂🍂🍂🍂🍂🍂
في مدينة السوق العالي..
امام احد دور الايتام كان فرحات واقف مع واحد يخدم فيها..
فرحات:في التاريخ هدا كان جوكم صغار كيف مزيودين في نفس اليوم قولي طول...
الراجل قال..
/ولو ان طلبك غريب وصعب ونقولك ماتعباش عليا لكن تو نحاول..
قاله:ايوه حاول وشن ماتبي تاخد..
الراجل قال.
/ان شاء الله..لكن ماقتليش شن بدير بيهم..
طبطب ع كتفه وقال بإبتسامه...
/نستنى منك في تليفون..ومشي وخلاه يفكر بحيره..
🍃🍃🍃🍃🍃
وتروح مجيده في نفس اليوم للألف وخمسين زي ماروحوا منصور وعمته للسوق العالي..
وبعد مرواحتهم قعمزت منوبيه مع ولد خوها وحكتله ع خطة اخته بالتفصيل..
🍃حك راسه من الخلف وهو يفكر بعدين قال..
/زوز صغار!؟ كم اعمارهم ترا؟
منوبيه قالت..
/وشن بدير بيهم!؟
قال:مرات نبيعوهم ونطلعوا منهم بفايده..
منوبيه:لالا فكنا مرات نخشوا في معمعه تانيه معاش نطلعوا منها..
منصور:تي عيب ياعمتي ليا سنين نخدم في هالكار عمري ماخليت وراي حاجه وديما طالع منها..
تأففت بعدين قالت..
/خل نزيد نفكر ونشوف..
منصور:والله ماتبيلها تفكير اهي رزقه وجتنا لعندنا..
منوبيه:اختك وبنت عمك بيجيبوا من غادي ارزاق مش غير رزقه..
ضحك وقال..
/زيادة الخير خيرين يامنو..
سكتت منوبيه وقعدت تفكر في كلامه..
🌿🌿🌿🌿🌿🌿
وتعدي الايام..
ويسافروا تسعه وزكيه لأداء فريضة الحج..
لكن هالمرة تسعه سافر من غير جمال اللي خلاه في القصر ووصاه ع اهله زي ماوصى مرعي كذلك...
وفي غياب تسعه كانت الحياة في القصر ماشيه بهدوء..
ربيعه الى جانب اهتمامها بولدها مااهملتش قرايتها بالعكس
توا اصبح عندها حافز اكبر للتعلم تبي تكون ام لايقه بصغارها ماتبيش يجي يوم ويعايرهم حد بجهلها..
🌸اما حسناء فكانت هايمه في عالم بنتها اللي تراجي في جيتها بفارغ الصبر زي خالتها نبيهه اللي ماخلت ماخدت للبنيه من فرحتها بيها..
🍃ويحملوا نساوين بوعجيله وعبد الباسط وكل وحده فيهم شافت في الحمل حبل نجاة ينقذهم ولو لفترة من عذاب الاشغال الشاقه لكن مع وديعه مش حيكون في فرصه للراحه خلتهم يعولوا ويحوسوا في الحوش مع الإعفاء من بعض الاعمال اللي ممكن ضر حملهم،ولاخوتها ولاامها ولابوها ادخلوا في حاجه كلهم زي العاده عاطينها كل الصلاحيات وحرية التصرف..
لكن حتى لو حاولنا نطوعوا الدنيا ونخلوها تمشي ع كيفنا تغلبنا باللي دسهولنا من مفاجآت تطلع من حيث لانعلم..
🍀في احد فروع المصارف في مدينة الالف وخمسين..
خش عبد الحافظ بصحبة احد الاداريين فيه..
كان جاي يكمل بعد الاجراءات اللي تخص تعامله مع المصرف..
وصل هو وياه لمكتب وقاله..
/تفضل ياشيخ تفضل..
خش عبد الحافظ ومعاه الاداري اللي طلب منه يقعمز ع الكرسي وبعد قعمز حافظ قعمز مقابله الاداري وقعدوا يتبادلوا في الاحاديث لعند مادق الباب وسمعوا بعده
صوت انثوي يقول..
/السلام عليكم..
حافظ قاعد عاطي بالظهر ماباش يلتفت لكن رد عليها السلام..
وهي مشت قعمزت ورا المكتب وكانت تقول..
/اسفه جدا ع التأخير صارتلي ظروف اخرتني شويه لكن الحمد لله عدت ع خير..
مديرها قال..
/ولايهمك استاذه يسرى..المهم توا جبتلك عميل مهم بدي يتعامل مع مصرفنا مؤخرا نبي نوصيك عليه تكملي معاه باقي الاجراءات..الشيخ حافظ البدري..
شافتله وقالت..
/اهلا وسهلا استاذ حافظ..
رفع عيونه وقال..
/الشيح عبد الحافظ..
هي رفعت حواجبها وقالت بإبتسامه..
/حاضر ياشيخ عبد الحافظ..
هو لما رفع عيونه وكلمها معاش قدر يحولهم من عليها بعد ماردت عليه..كانت جميله جدا وجذابه وابتسامتها المتعجبه زادتها حلاوة..
اما هي غيرت عيونها لما سمعت مديرها يقول..
/الشيخ حافظ من عيلة البدري استاذه يسرى..
رفعت سبابتها وقالت..
/شيخ عبد الحافظ لوسمحت..
ضحك مديرها وشاف لعبد الحافظ لقاه موجه نظره للطاوله وهو مبتسم ولون وجهه كان محمر قاله..
/يسرى ديما هكي ديما تعلق وتبصر لكنها من اكفأ الموظفات عندنا في المصرف..
هي بإبتسامه قالت..
/بارك الله فيك استاذ..هي خلينا نبدوا شغلنا مع الشيخ مانبوش نعطلوه..
لما ناض مديرها عبد الحافظ قاله..
/نفضل تقعد لين نكمل شغلي معاكم..
ابتسمت يسرى وهي تجهز في الوراق والمدير رجع قعمز وهو يقول بإبتسامه..
/اللي يريحك نديروه ياشيخ..
🍀وكمل عبد الحافظ شغله معاهم وطول الوقت كانت يسرى تتعامل معاه بجديه وهو مع ان يحاول يغض بصره عنها لكن عيون قلبه كانوا طول الوقت يشوفولها..
ومجرد ماطلع من المصرف جاته رغبه يرجع يخشله مرة تانيه ويمشيلها هي بس بعدين تعوذ من الشيطان رجيم وكمل طريقه لسيارته ركبها بسرعه وشغلها وانطلق بيها بسرعه وكأنه هارب..
🌿🌿🌿🌿🌿
بعد مرور ايام...
🌱"ايوه ياتسعه تسمع فيا.."
هادي ربيعه تكلم في تسعه هاتفيا..
"ايه نسمع فيك ياربيعه"
ربيعه قالت بنبرة فرح...
/جنانك زاد وريده..
ضحك وقال..
"جيانا جت"
ربيعه بضحكه..
/ايه جيانا جت ماشاء الله تبارك الله عليها بيضا حمرا والعيون ملونه..
"الله يبارك..باهي صحتها شني"
ربيعه قالت..
/ماشاء الله جت توزن اربعه كيلو اللي يشوفها يقول عمرها اسبوعين تلاته عينى ماضرها..
"تبارك الرحمن تبارك الرحمن..وحسناء شن حالها؟"
ربيعه قالت بإبتسامه.
/الحمد لله في خيار خيرها وفرحانه ببنيتها قريب طير..
"الحمد لله الحمد لله..".
ربيعه:ايه الحمد لله..قولي تسعه مازال مش معروف امتى مرواحكم؟
"نهار الثلاث بإذن الله"
قالت:بعد تلاته ايام ان شاء الله..تروحوا سالمين غانمين..
"إن شاء الله..وتوا قوليلي شن حال الزعيم؟"
بإبتسامه قالت..
/نجيه ياربي كل يوم يزيد قنانه..
ضحك وقال..
"المهم صحته كويسه"
ربيعه وهي مبتسمه قالت..
/الحمد لله..
"الحمد لله الحمد لله"
🍂🍂🍂🍂🍂🍂🍂🍂🍂🍂
"خايفه يامسعود خايفه بنموت حاسه روحي مش حنطلع منها"
مسعود قال والدمعه في عينه..
/تعوذي من الشيطان يامراة خيرك!
حويته قالت بتعب..
/بالله عليك كان صارت فيا حاجه ماتاخد بعدي وحده توري صغاري الويل خليهم لعمتي بالله..
مسعود وهو يمسح في دموعها قال برجاء..
/بالله عليك معاش تقولي هكي ارجوك..
سكتت وهي تبكي بصمت وهو طبع قبله ع جبينها بعدين التفتت يقول..
/وينه الدكتور فرحات لتوا!؟
▪▪▪▪▪▪▪▪
"والله يادكتور مافيها كيف طلبك ماجاش بكل من الاول قتلك صعب هلبه"
فرحات وهو محبط قال بصوت يدوب طالع..
/مش مشكله..مش مشكله..
سكر السماعه ودموعه نزلوا وهو يقول..
/معاش عندك حل تاني غيره يافرحات خلاص..وبألم كمل يقول..هدا نصيبهم..
🍃ويمشي يغسل ويبدل حوايجه وهو يفكر كيف بعد مايدير العمليه القيصريه لحويته كيف بيتحمل ردة فعلهم لما يقوللهم ان الصغار جو تعابنين ولازم يخشوا العنايه وكيف بعدين بياخدهم ويرفعهم للعصابه اللي تبيهم وكيف بيقعد اسبوع كامل يأمل في بوهم وامهم وفي النهايه يقوللهم توفوا...
هي هادي كانت خطته الاساسيه اللي حطلها خطه بديله في حالة لقي صغار غيرهم بش يسلمهم للعصابه لكن للأسف فات الاوان وهو لازم ينفذ الخطه الاساسيه اللي تعاون فيها مع وحده من الممرضات وموظف يخدم في المشفى وفي نفس الوقت يكون احد افراد العصابه اللي دل جماعته ع فرحات..
لكن يقعد تنفيد هالخطه صعب عليه لأنه مشفق جدا ع حال مسعود وحويته وفي نفس الوقت دار كبد ع الصغار زي مانقولوا مش هاينين عليه..
بس مش حيكونوا اغلى من امه واغلى من مهنته...
🍃وهو ماشي للباب سمع صوت دق عليه استغرب وفتحه ولقي قدامه منصور...
🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂
بعد مرور اسبوع...
"مرحبتين أهلا انستو يلي بيت الله لمستو
ياطيب جوني حجاجي عيني مقعدتش تراجي
يامبروك عليه الحج
اللي عمره ما دار عوج
مبروك الحجه ي غالي
اللي فوق جبل عرفات دعالي
عطاه الله زار الحرمين...
مشي بإسم وروح باسمين "
🌿في قصر ذهيبه كانت هالليله ضاويه بإحتفال كبير داره تسعه بمناسبه مرواحه هو وامه من الحج وفي نفس الوقت حفلة اسبوع بنته جيانا..
القصر كان مليان ناس من كبار القوم واصغرهم ايه تسعه دار وليمه للفقراء في قصره وخلاهم يتعشوا في خيمة كبيره دارها ع خاطرهم...
🍃🍃🍃
"حتى انتم من حقكم تاكلوا وتشربوا"
هادي مجيده جابت سفره عصير لوز وعبمبر للحارس صاحبها وطلبت منه يفرق ع صحابه..
هو بعد ماخدي السفرة قال..
/ضروري نهدرز عليك الليله..
ضحكت بمياعه وقالت..
/تو نشوف..
ولفت ومشت وهو يلحق فيها بعيونه لعند مادرقت عنهم بعدين مشي يفرق ع زملائه في العصير والحلو..
🍃🍃🍃🍃🍃
"والله مناسبه زي هادي يجوها من غير عزومه"
محفوظ:هو اللي اكدلي انه عيل بعد القطاف اللي قاله ع حكاية المجسمات..
مرعي:لتوا خاطري نعرف من اللي داره الاول انت ولاهو..
تسعه قال بضحكه..
/تو هدا سؤال تسأله ياشيخ مرعي!؟
محفوظ قال..
/الراجل هدا تاعب تاعب وكل مايكبر يزيد هبال..
تسعه قعد يضحك ومرعي قال بضحكه..
/ربي يكفينا شر هباله..
🍃في قاعة الاحتفالات الخاصه بالنساء..
حسناء كانت تشوف لجيانا في كروستها كيف تنفجع وهي راقده من صوت غني الزمزامات تأففت بعدين شافت لربيعه استنتها تشوفلها بعدين اشرتلها تجي..
مشتلها ربيعه وقفت عليها وقالت..
/خيرك؟
حسناء قالت..
/نبي نرفع بنتي لجناحك بش تقعد مع زهره زي الخضر..
ابتسمت ربيعه وقالت..
/خليك انتي تو نرفعها اني..
ناضت حسناء وقالت..
/لاخليني نمشي معاك بش نطمن عليها..
ضحكت ربيعه وقالت..
/باهي..
ومشوا الزوز طلعوا من القاعه متوجهين لجناح ربيعه...
🍃وفي جناح ربيعه كانت زهره تلم في اللي خف وزنه وغلا ثمنه تعرف وين تحط ربيعه في مجوهراتها لأن ربيعه كانت مأمنة فيها لهالدرجه..
وتسمع صوت باب الجناح انفتح بسرعه سكرت الخزانه وخدت الشنطه لوحتها تحت السرير وولت قعمزت قريبه ع الخضر وشدت كتاب دايره روحها تقرا فيه..
ويخشوا عليها ربيعه وحسناء وهي دف في كروسة بنتها..
زهره لما شافت كروسه جيانا تفاجئت وفرحت فرحة مخفيه..
ربيعه قالت بضحكه..
/قريب تكمل الروايه شكلها..
حسناء:حتى هي روايه غراميه مش زي الكتب العلميه..
ضحكت زهره ضحكة خجل مصطنعه..
حسناء قالت..
/بنخلي جنونه حداك زهره ردي بالك عليها كان ماقدرتيش تسكتيها نزليهالي..
هي قالت..
/حاضر ياللا..
ربيعه وهي مبتسمه قالت..
/وليدي ماناضش بكل؟
زهره:ناض شويه هزيت بيه ولى رقد..
مشت ربيعه لسرير ولدها قعدت تتأمل فيه بحب بعدين قالت..
/نجيه ياربي..طبست عليه وطبعت ع خده قبله خفيفه..بعدين تباعدت عنه ومشت لحسناء وهي تقول..هيا..
حسناء وهي تشوف لزهره قالت..
/زي ماوصيتك..
زهرة قالت بإبتسامه بريئه..
/كوني هانيه ياللا..
القت حسناء نظره ع بنتها وهي مبتسمه بعدين لفت ومشت طلعت مع ربيعه..
قعدت زهره تستنى تسمع صوت الباب وهو يتسكر وبعد ماسمعاته ناضت ومشت تشوف بروحها بش تتأكد ولما تأكدت ولت خدت الشنطه من تحت السرير وهي تقول..
/وينك يامجيده حسناء جابتلي البنت لعندي..
وولت تلم في باقي مجوهرات ربيعه لين خلتها وماخلتلها شي..
دق باب الجناح بسرعه حذفت الشنطه تحت السرير بعدين قالت..
/خش..
وقعدت في مكانها تستنى لعند ماخشت عليها بنت عمها..
مجيده وهي متفاجئه..
/حي هديكا جابتلك بنتها!
زهره قالت..
/ايه..قولي شن صار معاك..
مجيده:الطريق السالكه للباب الخلفي الجماعه شويه تانيه ويطيحوا راقدين..
زهره:ومنصور؟
مجيده؛يراجي فينا..هي انتي بري خودي الولد واني تو ناخد البنت..
زهره لبست شنطتها ومشت تجري للخضر طلعاته من سريره ولحقت بنت عمها...
🍃ويطلعوا من الجناح ويمشوا بإتجاه ممر يرفع للباب الخلفي للقصر هديكا الجهه شبه مايجي جيهتها حد والحرس اللي يكونوا حدا الباب الخلفي باديين يغطوا في نوم عميق..
🍃واعزفي وغني يافرقة المالوف بالموشحات الدينيه..
واطربوا سمع تسعه وضيوفه..
وغنوا يازمزامات ع مرواح الحجاج وخلوا ربيعه وحسناء يرقصوا ع غناكم وهما طاربات وفي قمة السعاده..
🍂سعادتهم اللي قاعده تطلع من الباب الخلفي ع ايدين مجيده وبنت عمها زهره وتلاقيهم سيارة منصور اللي كان جايب معاه منوبيه ركبوا فيها وتحرك بيهم طول للسوق العالي..
🍂🍂🍂
وفي مكان خالي في الباب العالي كان فرحات واقف ع سيارته يراجي فيهم ليه قرب الساعه ويبان عليه ضي سيارة درست جنبه بالزبط..
قدملها وقال../هاه منصور..
منصور فتح الباب ونزل..
خدي جيانا من مجيده وعطاها لفرحات وفرحات خداها بسرعه ورفعها للسيارة وين ماكانت الممرضه صاحبته تراجي فيه خدت منه جيانا حطتها جنبها وهي ترعش من الخوف..
وهو بعدين يولي ياخد من منصور الخضر ويرفعه للممرضه..
ومنصور قعد واقف يراجي في الفلوس وجاه بيهم فرحات وهو يقول..
/لاريتك لاريتني..
ضحك منصور وقال..
/لانعرفك لاتعرفني..
وبسرعه مشي ركب السيارة وتحرك وعيون فرحات تلحق فيها بعدين ابتسم بتهكم ومشي ركب سيارته وتحرك بيها لوجهه مش معروفه..
🍃وفي سيارة منصور..
زهره قالت بخوف..
/كيف نهرب لتونس من غير ماليا!.
منوبيه قالت بضحكه..
/سبقوك غادي ياهبله..
بفرح قالت..
/حقه!؟
منصور وهو يشوفلها من المرايه قال..
/حق يا عمري حق..
منوبيه؛راك تتحشم شويه..
ابتسمت زهره بخجل ومجيده قالت بضحكه..
/هما يحبوا بعض هما يحبوا بعض..
ضربها خوها ع كتفها ضحكت وهي تتوجع..
وهو بعدين قال لعمته ..
/شني ياعمتي تريحتي توا!
منوبيه وهي مبتسمه بنصر..
/تريحت وشفيت غليلي وبردت قلبي..
ومجرد ماكملت كلامها شد ولد خوها فرينوا لما شاف سيارة واقفه قدامه..
مجيده بخوف..
/شن هدا!!؟
وينزلوا من السيارة جماعه ملتمين ويرفعوا السلاح الرشاش ويبدوا في اطلاق النار ع السيارة باللي فيه لعند ماقضوا عليهم كلهم...
🍃🍃🍃🍃🍃
"ياريتني متت وارتحت من هالعذاب"
مسعود وهو ضام مرته قال..
/مش عارف علاش ديما متشائمه الدكتور فرحات قال بعد اسبوع تاني يطلعوا..
حويته قالت بحزن..
/باهي علاش ماخلاناش نشوفوهم!؟
قاللها:ياودي مش قتلك خوف من العدوى الصغار مناعتهم ضعيفه وتاعبين شويه مايتحملوش..تو ان شاء الله يصحوا ويولي حالهم باهي ونروحوا بيهم للبنداريه ونديرولهم اسبوع كبير..
ابتسمت من بين دموعها وقالت..
/يارب...
....يتبع.....
