عشية خميس ربيعيه الأجواء فيها كانت تنعش الروح وتفرفح النفس..
في مستراح الجنان الواسع لحوش كمال البندار كانوا الرباعي مدايرات جلسة حلوة..مفرشات حصيرة حاطين عليها سفر القهوة والحلو...
حواء كانت تنسق وهبه شاده هاتفها وتصور حسب توجيهات حواء وجميله تتفرج عليهم بإمتعاض..
اما مديحه ماكانتش معاهم بكل كل شويه تسرق النظر لآدم اللي كان مشغول بغسيل سيارات سلطان وعمران بعيد عليهم..
جنبهم من الجهة التانيه ع سياج مستراح الدروج اللي يرفعوا لكوجينه ريان..كان ريان واقف يتفرج ع الورد وجنبه قفص الببغاء متاعه اللي اختارله من الأسماء "عاشور"..
"تي هيا انتي وياها القهوة صقعت ونقعت"
ابتسم وهو عاقد حواجبه بعد ماسمع جميله قالت الجمله هادي بعصبيه لحواء وهبه وهما تظاهروا بالخوف لما شبحولها بفجعه مصطنعه..
مديحه قالت بضحكه..
/هي خلاص ياسركم..
هبه وهي تشوف لجميله بإزدراء..
/صبي القهوة يانويرة..
جميله قلبت عيونها وبدت تصب في القهوة..
هبه قالت..
/ايه خلوا لمحرز من الكعك الملون تعرفوه عشقه..
حواء ابتسمت بخجل وهي تشوف للصور في هاتف هبه..
مديحه:حتى خويا اني خلوله من البسبوسه تعرفيه ماعنداش الروح مع بسبوستك فرخة جميله..
جميله بإبتسامه..
/من غير قولكم انتم الزوز خليت لكل واحد فيهم الحاجه اللي يحبها..
ع طلعة حيان وفي يده تليفونه لما شافهم شن دايرات قال..
/سم..
التفت ريان وقاله بفزة..
/والعياذ بالله..
حيان قال بضحكه..
/سامحنا ياشيخ سهينا ونسينا..
جميله:ع الدعوة هادي مانك ذايق فيها حاجه..مديحه اسكتي ولاكلمه ولاحرف..
قعدوا يضحكوا البنات وحيان قال..
/غير جيتي صاحبة اختي بس..وشاف لريان لقاه يشوفله بإمتعاض شد ضحكته بعدين قال..
/شن رايكم نطلعكم كلكم زردة غدوة..
البنات مع بعض قالوا بفرح .
"الله!"
حيان بضحكه..
/والله!
ريان قاله برفعة حاجب..
/وشن شكلها الطلعة هادي!!؟
جميله شافتله بإزدراء وحيان قال بضحكه..
/كلنا كلنا بأمهاتنا بأبهاتنا..
هبه بحماس..
/الله احلى شي..
ريان قال..
/اني تعرفني مانحبش الزرادي وجو الزرادي..
جميله بتهكم..
/غير شن تحب انت !
كيف جي بيرد عليها سبقه الببغاء اللي قعد يردد..
"جميله..جميله"
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
