■■■■■■■■■■■■■■■■■■■■■
🌿﴿ وتولى عنهم وقال ياأسفى على يوسف وابيضت عيناه من الحزن فهو كظيم ﴾ 🌿
•••••••••••••••••••••••••••••••••••••••••••••••••••••••••••••
درس بسيارته قدام حوش اشبه بالكوخ..
نزل وسكر الباب بعدين مشي فتح الباب الخلفي وهو يقول..
/هاتي هي..
عطاته الممرضة الخضر خداه وهو يقول..
/بسم الله..انزلي بالتاني بالشويه عليك..
هي نفذت امره ونزلت بجيانا بعدين هو سكر الباب..
ومشوا مع بعض بإتجاه باب الكوخ..
صباح"الممرضة" قالت بقلق..
/المكان يخوف..
قاللها:هدا اكثر مكان أمن..
سكتت وهي تمرر في نظرها حواليها من الخوف..
ويطلع صوت الخضر وهو يبكي..
شافله فرحات وقال..
/هي راجي شويه بس..
وصل في الباب طلع المفتاح من جيبه وفتحه وخش..
والممرضة خشت بعده..
هو مشي فتح الضي وقال..
/بري ع ايدك يسار تلقي دار حطي العيل اللي عندك فيها وتعالي..
هي هزت راسها بإيجاب ومشت وين ماقاللها وخلاته يهز بالخضر وهو يمشي ويجي..
🍃في الدار..
اللي كان خاشلها ضي القمر حطت جيانا ع السرير بانت عليها ملامح وجهها ابتسمت وقالت..
/ماشاء الله زي القمر..متأكده انك بنت..
وخرت عنها وهي تشوفلها بنفس الابتسامه بعدين مشت طلعت ورجعت لفرحات..
🍃"تعالي معاي"
مشي وهي لحقاته لعند ماوصلوا للكوجينه خشوا وهو يقوللها..
/تلقي الحليب في الدولاب وجنبه باكو مرضعه تعرفي كويس شن لازم ديري..
هي قالت..
/دقيقه مش انت قتلي في واحد منهم اكبر من التاني بشهرين..
شاف للخضر وقال..
/اللي عندي هو الكبير..
ابتسمت ومشت للدولاب وهي تقول..
/لكن تعرف مايبانش عليهم،البنيه تبان في عمر الوليد..
ابتسم وقال..
/تأكدتي انها بنت..
طلعت الحاجات من الدولاب وقالت بإبتسامه..
/عيب عاد دكتور راهو ليا سنين في الصنعه..
ضحك ع كلمة صنعه بعدين قال..
/باهي سقدي روحك..شاف للخضر اللي كان ساكت ويبان يسمع فيهم وقال..ماتخليش الزعيم يستنى..
🍃ودارتله الحليب وهو رضعه في البدايه الخضر ماتقبلش لكن فرحات عرف كيف يخليه ياخدها ورضع الخضر لين شبع بعدين مشي بيه فرحات ومعاه الممرضه للدار..
خشولها ومشي فرحات طول حط الخضر جنب اخته..
وقف وقعد يتأمل فيهم وهو يتفكر في جية منصور عنده للشقة يوم ولادة توأم مسعود..
◀️في وقت سابق◀️
"شكلك طالع"
فرحات وهو عاقد حواجبه قال..
/ايه ومستعجل..
خش منصور سكر الباب وهو يقول..
/حتى اني مش معطل عليك..
قعد فرحات يشوفله بإستغراب..
ومنصور قرب منه وقاله..
/عندي ليك مصلحة يعني مادام خشيت للكار متاع خطف الصغار قلت نفيدك نستفيد..
قاله:كار شني يازفت انت..حول من قدامي مش فاضيلك..
منصور بضحكه..
/تي غير راجي اسمعني قبل..عندي ليك بضاعه مش عاديه زوز صغار قاعدين في قماطهم بنيه ووليد الوليد عمره في الشهرين والبنت انزادت اليوم وحمر بيض حاجه صح..
قاطعه فرحات لما شده من ذراعه وفتح باب الشقه وهو يقول .
/ماعندي ماندير بيهم..
طلعه وطلع معاه وسكر الباب وهو يقول..
/خلاص اخطاني معاش نبي شي ومعاش نبي نشوفك..
ومشي بإستعجال بإتجاه الدروج ونزل..
ومنصور نزل وراه وهو يسب فيه همسا..
لكن فرحات لما وصل لأخر الدروج وقف في مكانه لما خطر عليه خاطر قعد يفكر فيه..
ومنصور وراه يشوفله
