#ولاد_تسعة "الفصل الاول/سميه تسعة" #جمان_فريد الجزء_العاشر"شبح الماضي" ⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔ ⚠️ملاحظه.. لما يبدا الكلام بهذه الرموز (♤ ♧) هذا يعني ان البطل/ة يسردوا في الأحداث.. اما لما يبدا بهذا (🌿) يعني الكاتبه هي اللي تسرد.. #الباقيات_الصالحات قال ﷺ : (خُذُوا جُنَّتكُمْ منَ النارِ ؛ قولوا : سبحانَ اللهِ ، و الحمدُ للهِ ، ولَا إلهَ إلَّا اللهِ ، واللهُ أكبر ، فإِنَّهنَّ يأتينَ يومَ القيامةِ مُقَدِّمَاتٍ ومُعَقِّبَاتٍ وَمُجَنِّبَاتٍ ، وهُنَّ الباقِيَاتُ الصَّالِحاتُ) 📚 صحيح الجامع ■■■■■■■■■■■■■■■■■■■■ 🌿لا أعلم إلّا أن انفلاتنا من شبح الماضي ما هو إلا هربٌ مؤقت من شيء سيلاحقك لا محالة ربما في الساعة القادمة اليوم،الأسبوع ،الشهر القادم،لتعود لما كنت عليه.. لا أجد تعافيًا كاملًا من شيء نتذكره، نشعر به، نحسه ورغبتنا الملحة في الهرب من شيءٍ ما هي أهم سببٍ يجعلنا نلتقي به🌿 ••••••••••••••••••••••••••••••••••••••••••••••••••••••••••• قصر ذهيبة.. في صالون العيله كانت مجتمعه اللا الكبيره بكناينها وربيبتها وخالة وحده من كنانيها.. وقدامها زوز من الخدم وحده منهم تكلم فيها.. 🌱مجيده: البنيه امينه ومتربيه كويس اني نضمنهالك يااللا.. زكيه وهي تمرر في نظرها ع البنت اللي جايبتها مجيده قالت.. /بنجربك الشهر هدا كان لقيتك زي ماقالت عنك مجيده نخليك تكملي معانا.. البنت هزت راسها بالموافقه صمتا.. ربيعه وهي تشوف للبنت بتركيز قالت.. /شن اسمك.. وجهوا انظارهم ليها والبنت بعد ماشافت لربيعه شويه قالت.. /زهرة.. هزت ربيعه راسها بصمت.. زكيه:خلاص خوديها يامجيده وخليها تبدا خدمه من توا مانبيكمش تحسسوني بغياب تعويضة.. مجيده:حاضر ياللا..شافت لزهرة وقالت..هي تعالي..ومشت والبنت لحقتها وعيون ربيعه معاهم لين طلعوا.. تنهدت زكيه وقالت.. /ياودي مافي حد يقدر ياخد مكان تعويضه مراة فالحة وعارفه شغلها كويس.. نبيهه قالت.. /صدقتي ان شاء الله تجيب ع خير وتشد صحتها وترجع لمكانها.. ابتسمت زكيه وقالت.. /ان شاء الله.. وترجع تخش عليهم مجيده وهي متوتره شافت لحسناء وقالت.. /اللا حسنا في هاتف جاك من الشركه ردي عليه.. كلهم وجهوا انظارهم لحسناء اللي ناضت ومشت للهاتف الموجود في الصالون .. نزيهه لاحظت توتر مجيده قالتلها.. /خيرك مجيده؟ مجيده بخوف:المراة اللي رديت عليها كانت تتكلم زي الخايفه.. كلهم خش في قلوبهم الخوف وحسناء طول رفعت السماعه وقالت.. /الو.. "ايوه استاذه حسناء صارت مصيبه يااستاذه" حسناء بخوف قالت.. /شن صار!؟ كل من الصالون سيطر عليهم الخوف واكثرهم ربيعه اللي حست بمغص في بطنها وحطت يدها عليها.. "البي تسعه تعرض لمحاولة قتل" حسناء بصرخه قالت.. /شن تقولي انتي!!؟.. "رموا ع سيارته وهي طالعه من الشركه" صرخت حسناء وهي تقول.. /تسعه! زكيه وهي ترجف قالت.. /حي عليا ولدي حي! نزيهه حطت يدها ع قلبها اللي قريب يطلع من مكانه.. اما فريحه جمدت في مكانها حتى عيونها معاش قدرت ترمشهم.. ناضت ربيعه وهي تقول بهلع.. /خيره تسعه ياحسنا تكلمي شن صارله! حسناء وهي تكلم في الموظفه قالت.. /شن صارله قولي!؟ "مانعرفش يااستاذه قالوا في المستشفى وخلاص" حسناء بعصبيه ودموعها ينزلوا.. /اما مستشفى!؟ كل من في الصالون لما سمعوا سؤال حسناء عيطوا ماعدا نبيهه اللي كانت خايفه هلبه وربيعه اللي من شدة الخوف حست بألم فضيع حطت ايديها الزوز ع بطنها وهي ساكته بعدين صرخت بصوت عالي من قوة الوجع... ♤امي كانت في الشهر السابع وقتها وبسبب الرعشه جتها حالة ولاده مبكرة وقعدت العيله في هداكا الموقف حايسين بينها وبين بوي اللي مازال ماعرفوش حقيقه وضعه لأنه تعرض للحادث في طرابلس وماجتهمش اي معلومه عنه الا بعد مامشي مرعي لطرابلس وفي المستشفى عرف وضعه واتصل بمرته بش يخبرها وهي بدورها خبرت العيله.. 🌿"قال انصاب برصاصه في ذراعه حولوها وتوا حاله باهي" زكيه وهي تبكي قالت.. /تقولي في الحق يابنتي!؟" فاطمه قالت.. /والله مازدت ولانقصت حرف.. بلقيس وهي تبكي.. /باهي الحراسه اللي معاه وين كانوا لما صار فيه هكي!؟.. فاطمه قالت.. /مرعي قال جمال هو اللي نقذه لما سمع صوت السيارة جايه بسرعه قال لتسعه ينزل راسه ولما نزل راسه جاته رصاصه في ذراعه بعدين جماعة الامن ضربوا ع السيارة هربت... خبطت زكيه بإيديها ع رجليها وهي تقول.. /مني دار فيه هكي مني!؟ نزيهه وهي تبكي قالت.. /تسعه ماعنداش عداوات عمره ماصارتله حاجة زي هادي.. فريحه قالت ببكاء .. /لا عنده عنده..هداكا الكلب كمال هو اني متأكده.. زكيه قالت.. /علاش!؟ شن اللي صار بيناتهم بش توصل للقتل!؟ فريحة وهي تبكي قالت.. /في جرة هداكا المصنع الأغبر.. 🌿🌿🌿 وفي هالاثناء.. كانوا مرعي وجمال مع تسعه في الحجرة متاعه كان كيف فايق من التخدير واول حاجه سأل عليها لما فاق عيلته.. 🌱مرعي:طمناهم عليك..تسعه قال بشي من التعب.. /مش قاعد هني الليله بنروح.. مرعي:بالله ياتسعه فكنا من العناد وتسكير في الراس في الصحة وضعك مايتحملش.. قال بإنزعاج.. /جتني في ذراعي مش فصدري يامرعي.. جمال قال.. /خلاص اقعد الليله هني وغدوة الصبح ان شاء الله نروحوا بيك.. مرعي:حتى هدا راي كويس.. شاف تسعه لجمال وقال.. /وصيتهم يأمنوا القصر كويس؟ هز جمال راسه بإيجاب.. مرعي وهو يوزع في نظره بيناتهم قال.. /عارفين من وراها؟ تسعه شافله وقال.. /ولد البندار مافيش غيره بعد ماقتل شعبان جي دوري اني.. بدت ع وجه مرعي ملامح الخوف مع القلق.. ويدق الباب.. تسعه شاف لجمال وجمال بعد ماشافله قال.. /تفضل.. انفتح الباب وخش كمال البندار وهو لابس بدله افرنجيه من غير ربطه عنق وحاط ع كتافه كشابيه.. سكر الباب وهو يقول بإبتسامه.. /لاباس لاباس..لاباس عليك ياالتسعه.. وقف قدام السرير وعيون تسعه عليه وهو يشوفله بإمتعاض.. مرعي قاله بغضب تهكما.. /جاي تم مابدوه كلابك؟ عقد حواجبه وقال بإبتسامه.. /نتم شني وكلاب مني!؟ مرعي قاله.. /اطلع من الجو اللي دير فيه هدا ولم بعضك وتسقد.. كمال ضحك وقال.. /قصدك تحسابني اني اللي درت في ولد عمك هكي!؟اشر بسبابته ع تسعه وهو يرفع وينزل فيها..رد نظره لتسعه وحط ايديه ورا ظهره وقال بإبتسامه مستفزة..لاياشيخ مرعي ولد عمك غالي عليا كان هو مات الحياه كلها ع بعضها معاش تسوى عندي شي... جمال كان يسمع فيه شن يقول وهو مركز عليه.. تسعه قال لكمال بعد صمت دام لدقايق.. /شن جاي تبي؟ قاله بنفس الابتسامه.. /جيت نطمن..ماتنساش حني ولاد مدينه وحده وبينا صلة قرابه.. غمض تسعه عيونه بنفاذ صبر.. ضحك كمال بعدين شاف لمرعي وقال.. /حاجه زي هادي مانديرهاش لسبب واحد بس..احتراما للمواثيق والعهود اللي دارها جدكم الخضر بينا في زمان الصلح والبنداريه لايخونوا ولايرجعوا في كلمه عطوها.. رد نظره لتسعه وقال.. /خليك ديما متفكر ان السية منك ديما نقابل فيها بالباهيه ياالتسعه..لاباس عليك مرة تانيه ياغالي..ابتسم ومرر نظره ع مرعي وجمال بعدين لف ومشي فتح الباب وطلع من الحجره وسكره وراه.. مرعي:ماصدقتش كلمه منه.. تسعه قعد ساكت وعيونه ع الباب بعدين غير نظره لجمال لما سمعه قال.. /صادق مش هو اللي وراها..اول شي هدا مش اسلوبه تاني شي عنده اعتبارات تانيه تمنعه يدير تصرف زي هدا.. مرعي:اعتبارات شني؟ جمال:اللي قال عليهم توا..كمال يحلم بسيادة الالف وخمسين وقاعد يسعالها هدا علاش قاعد يلمع في صورته طول الوقت،واي جريمه يرتكبها اما انه يحطها في ظهر غيره او يلقالها تصريفه بأي شكل بش مايخليش الناس يشوفوه ع انه مجرم سافك للدم يبي يقعد ديما راجل صالح في نظر العامة.. مرعي:تاريخ البنداريه معروف مايقدرش يمسحه مهما دار.. جمال:لايمسحه يابيي مرعي يمسحه الفلوس دير كل شي يابيي مرعي.. تسعه:كلام جمال مزبوط يامرعي.. مرعي بقلق.. /باهي كان مش هو اللي دار فيك هكي منو غيره؟ جمال:حنعرفه في القريب العاجل.. تسعه شافله بعدين قال.. /غدوة الصبح ضروري نروح.. جمال هز راسه بالموافقه صمتا... 🌿🌿🌿🌿 "توا اتصلت حسناء وقالت ربيعه جابت" زكيه:باهي شن حالها هي العيل؟ بلقيس وهي تلف في اطراف شاربتها حوالين رقبتها قالت.. /قالت البنيه حالها باهي لكن ربيعه تعبانه شويه..اني ماشيه توا امي خليك متين راقد في الدار.. زكيه:بري بنيتي بري وماتخمميش فيه.. لبست بلقيس شنطتها وقالت.. /بالسلامه..ومشت طلعت وهي تسمع في زكيه ترد عليها.. 🌿وصلت في باحة القصر وركبت سيارتها وبعد شغلتها طلعت بيها من القصر متوجهه للمشفى اللي فيها ربيعه.. ▪▪▪▪▪▪▪▪ "اني قاعده معاها!" حسناء:مانقدرش نروح قبل لنطمن عليها.. بلقيس:تو مش الدكتورة قالت حاطينها في العنايه كإجراء احترازي بس؟ معناها مافيش عليها خوف.. حسناء:لما تنوض وتتكلم نطمن عليها بس.. تنهدت بلقيس وهي تقول بإبتسامه.. /ع راحتك.. حسناء ابتسمت وقالت.. /انتي مفروض ماجيتيش.. بلقيس قالت بضحكه.. /علاش اللي داخل مش مرت خوي!؟ ضحكت حسناء وقالت.. /قصدي كان قعدتي مع ولدك خير اني قاعده معاها.. بلقيس:قبل كنت نبيك تروحي بش ناخد مكانك.. حسناء:خلاص نوضي روحي.. بلقيس قالت بضحكه.. /تي خيرك من بكري وانتي تلزي.! ضحكت حسناء ومعاش عرفت شن تقول.. ابتسمت بلقيس وقالت.. /خليني معاك نونسك.. شافتلها حسناء بإبتسامه وهزت راسها بإيجاب.. بلقيس:شفتي البنوته؟ حسناء:ايه بكري ريتها في الحضانه.. بلقيس قالت.. /خاطري نشوفها.. ناضت حسناء وقالت.. /تعالي معاي.. وتنوض معاها بلقيس ويمشوا مع بعض وهما يهدرزوا عن وضع تسعه.. 🌿وتسعه ماصدق طلع صبح تاني يوم،وقع ورقه يخلي فيها مسؤولية المستشفى من اي شي يصير فيه بعد مايطلع منها.. وع طول بعدين روح لطرابلس برفقة جمال ومرعي ومعاهم قوة تحمي فيهم.. وفي الطريق لما خشوا الالف وخمسين بلغه عن مرعي عن اللي صار لربيعه وهو اللي عصب هلبه لأنهم درقوا عليه خلا السواق يرفعهم للمسشفى طول.. 🌿"شن حالك توا؟" ربيعه بشي من التعب.. /الحمدلله.. كلمتواتسعه؟ زكيه قالت بإبتسامه.. /مروح اليوم ان شاء الله.. ابتسمت ابتسامه فرح خالطها التعب وهي تقول.. /بالحق!؟ زكيه بضحكه.. /حق بنتي حق.. دمعوا عيون ربيعه وهي مبتسمه وحسناء وبلقيس يشوفولها بإبتسامه.. زكيه وهي مبتسمه قالت.. /بنيتك ماشاء الله عليها جت زي العسل خطرت عليا بنتي هانيه لما جبتها.. بلقيس بضحكه.. /يافرحة هانيه لما تعرف.. ضحكت زكيه وحسناء قعدت مركزه ع ربيعه لما لاحظت انها حافظت ع ابتسامتها بالغصب.. وينفتح باب الدار ويخش تسعه.. بدت ع وجوههم ملامح المفاجأة وامه حطت يدها ع قلبها بفجعه وهي تشوف لذراعه وقالت.. /ولدي! قدملها وضمها بيد وحده بعدين كب ع راسها وقال.. /بسيطه يام بسيطه ماتخافيش.. نزل عيونه لربيعه لقاها تشوفله بألم ودموعها ينزلوا.. ابتسم بحنان وقال.. /حمد لله ع سلامتك ياالسرحانه.. قالت بنبرة باكيه.. /حمد لله ع سلامتك انت.. قاللها:ماتزيديش ترعشي روحك يامراة والله حالي باهي مافيا شي.. حسناء والدموع في عيونها قالت.. /وجهك شاحب تسعه كيف خلوك تطلع من المستشفى.. شافلها وقال.. /ياودي حاجه عاديه مافيا شي اهو تشوفوا فيا قدامكم واقف ع رجليا.. بلقيس بحزن قالت.. /ربي معاد يورينا فيك سو وخيي.. كلهم قالوا.. "آمين" وهو قال بإبتسامه.. /تسلمي ياجبنه.. 🌿وبعد مااطمن ع ربيعه مشي للحضانه بش يشوف بنته وامه رافقاته.. 🌱زكيه وهي مبتسمه قالت.. /زي هنو لما جبتها.. تسعه قال بإبتسامه.. /معناها بتطلع ليدي زيها.. ضحكت امه.. وهو قعد يتأمل في بنته بصمت.. تنهدت امه وشافتله بعدين قالت.. /مني دار فيك هكي!؟ شافلها وقال.. /تو نعرفهم ونعرف شغلي معاهم..انتي ريحي بالك يام اللي صار ان شاء الله مش حيتكرر.. شافت لذراعه بنظرات ألم وقالت.. /يارب.. ▪▪▪▪▪▪▪▪ "روحوا كلكم مانبي حد يقعد معاي" حسناء:كيف هكي!؟ ربيعه قالت.. /التمريض دايرين واجبهم والزايد.. بلقيس:مهما كان مفروض حد فينا يقعد معاك.. ربيعه:باهي بعدين اللي بيولي يولي المهم توا روحوا ارتاحوا.. ويخش تسعه مرة تانيه وهو يقول.. /السيارة لوطا تراجي فيكم امي سبقتكم.. ربيعه؛قصدك انت بتقعد؟ ابتسم وقال... /قلتلهم يوتولي سرير في قسم الجراحه صار ماصار يرفعوني غادي.. ربيعه:تسعه!. شاف لحسناء وبلقيس وهو يقول بإبتسامه.. /هيا اطلعوا امي ماتحبش تراجي.. ابتسموا وحسناء قالت.. /موليه العشيه.. ابتسمتلها ربيعه وبلقيس وزعت نظرها بين خوها وربيعه وهي تقول بإبتسامه.. /حمد لله ع سلامتكم.. الزوز ردوا عليها.. "الله يسلمك" وربيعه تابعت تقول.. /صحيتي.. بلقيس قالت.. /مش بجميلي حبيبتي..بالسلامه.. حسناء:بالسلامه توا.. ومشوا الزوز وهما يسمعوا في تسعه وربيعه يردوا عليهم.. بعد ماطلعوا وحسناء سكرت الباب قدم تسعه لكرسي قريب ع ربيعه وقعمز عليه وهو يقول.. /حالك باهي؟ قالتله:بشوفتك ولى باهي لكن قعدتك هني غلط.. رفع حاجبه اليسار وقال.. /ديما تلزي فيا..ركزي.. ضحكت بتعب وقالت.. /ياودي خايفه عليك..دمعوا عيونها وهي تقول..هادي تقول..رصاصه اللي صاباتك.. مد يده وشد يدها وهو يقول.. /مادارت شي صدقيني جرح عادي وخلاص.. قالتله:باهي كان ليا خاطر عندك برا اقعد في الحجرة اللي قلت عليها وجهك شاحب هلبه ياتسعه.. قاللها:وتقعدي بروحك؟ قالت:والله مابروحي الممرضات مش مغيبات جهد..شدت ع يده وقالت..ع خاطري كان اني نسوى عندك ريح قلبي بالله عليك.. تنهد بإبتسامه بعدين قال.. /امرك ياللا.. 🍀وفي نفس الوقت.. طلعوا حسناء وبلقيس من المستشفى.. حسناء توجهت للسيارة اللي فيها زكيه وبلقيس مشت بإتجاه سيارتها.. جمال اللي كان واقف مع السواق قرب السيارة لما شاف بلقيس وين متوجهه مشالها.. "ابله بلقيس" وقفت والتفتله هو طول غير عيونه عنها وقال.. /اركبي السيارة هديكا.. بلقيس قالت.. /بنروح في سيارتي.. قاللها:معليشي ضروري تروحي معانا.. قالتله:قصدك مرات يقتلوني حتى اني!؟ مرر نظره ع المكان وهو يقول.... /اجراءات احترازيه مش اكثر.. قالت:باهي وسيارتي.. شاف للسيارة وقال.. /تو نولي نروح بيها.. قالت بإبتسامه.. /لا كان انت بتروح بيها انت باهي..احميهالي زين ايوه.. هز راسه وقال.. /تفضلي ياابله.. مشت بلقيس وهي مبتسمه وهو مشي وراها وعيونه يدوروا في المكان لعند ماوصلوا في السيارة راجاها لين ركبت بعدين ركب وقبل ليتحركوا اشر لواحد من افراد قوة الحمايه جاه وقف عليه.. جمال:خلوا عيونكم مفتوحه وردوا بالكم.. قاله:حاضر ياافندي.. جمال قال للسواق.. /تحرك.. اول ماتحركت بيهم السيارة حسناء سألت جمال.. /ماعرفتوش من دار هكي؟ جمال وهو مركز في الطريق من القدام ومن الخلف عن طريق المرايه قال.. /للآن لا.. حسناء:يعني مش كمال البندار؟ جمال قال.. /لا.. سكتت حسناء وهي تفكر وزكيه وبلقيس حتى هما كانوا يفكروا بقلق.. بعد ماقطعوا مسافه مش طويله وصلوا لقصر ذهيبه.. نزلوا من السياره بلقيس وزكيه وطول مشوا بيخشوا اما حسناء قعدت بش تكلم جمال.. 🌱حسناء:في بالي ناس اكيد فكرتوا فيهم.. قاللها:ماخطرش في بالي غيرهم وننصحك يااللا الفترة هاديماتطلعيش من القصر.. حسناء بقلق.. /وتسعه اللي قاعد في المستشفى؟ قاللها:موليله مستحيل نخليه بروحه طمني بالك.. هزت راسها بعدين قالت.. /اي جديد تعرفه بلغني بيه.. قاللها:نبلغ البي وهو يبلغك كان يبي.. هزت راسها وهي في قمة القلق بعدين مشت بإتجاه الباب الرئيسي.. وجمال رجع ركب السياره بروحه من غير السواق وتحرك بيها برا القصر... ▪▪▪▪▪▪▪▪ "عمل انتقامي منك ومن اللا" تسعه بغضب.. /لو طلعوا هما حق معاش نخليهم يشوفوا ضي الشمس.. قاله جمال.. /واحد من الشباب حفظ رقم السيارة وهي اللي حتوصلنا للي داروا هكي ولما نوصلوا فيهم نديروا شغلنا معاهم.. تنهد تسعه بعصبيه وقعد ساكت.. 🌿🌿🌿🌿 "باهي وخيرنا حني ماخفناش عليه مانبوش نشوفوه ونطمنوا عليه!!؟" زكيه:هو قاعد ع خاطر حالته ماع خاطر حد تبي تشوفيه بريله وقت الزيارة.. سكتت فريحه وهي معصبه ودموعها ينزلوا ونزيهه تشوفلها.. زكيه:الصغار ماسمعوا بشي؟ نزيهه:لالتوا لا.. زكيه:كويس..ماشيه لجناحي.. ومشت فاتت من جنبهم،نزيهه راجتها لين تباعدت بعدين قالت.. /تو مش انتي كنتي تنصحي فيا نتمالك اعصابي ونفوت! فريحه بعصبيه.. /مش لهالدرجة يانزيهه مش لهالدرجه! اني حامل زيي زيها وحتى اني رعشت عليه اكثر منها مافكرش يتصل بيا حتى اتصال يطمن عليا وهي طول روحلها يجري وقعد حداها.. نزيهه:نقولوا ع خاطر ولادتها كانت صعبه.. فريحه بغيظ قالت.. /ياريتها ماناضت منها.. نزيهه في نفسها قالت.. "ياريت" تأففت فريحه وقالت بضيق.. /استغفر الله ياربي سامحني ياربي..ومشت وخلت نزيهه تبع فيها بنظرها وهي مبتسمه ابتسامه جانبيه.. 🌾🌾🌾🌾🌾🌾 في ساحة كبيره في منطقة البنداريه يملكها كمال البندار.. كان مأجرها لوزارة الرياضه بش دير فيها سباق خيل..سباق قفز حواجز.. سلطان كان مقعمز مع صديقه المقرب في مقاعد المتفرجين يتابع في تدريبات الفرسان اللي كانوا من جيله.. كان مركز ع اشكالهم وملابسهم وطريقه ركوبهم للخيل وحتى مسكهم للزمام.. وهو عاقد حواجبه ومضيق عيونه قال.. /مانشوفش في خيالة.. محرز قال بضحكه.. /مالا شن تشوف؟ عكرش وجهه وهو يحرك في راسه يمين ويسار بعدين قال.. /شي.. محرز قاله.. /اللي يدربوا فيهم اجانب من بريطانيا وكندا وهلبه بلدان اجنبيه.. قاله سلطان.. /وشن يفهمهم هادم في الفروسيه واصولها؟ العرب هما اللي يفهموا في الخيل،وفي الفروسيه مايفوتهم حد..حاجه هكي في الجينات ياصاحبي في الجينات الفارس العربي فارس حر والخيل تحب الفارس الحر.. محرز قال بضحكه.. /تعرف نحب نسمع بوك لما يدوي كلامه ديما يعجب فيا لكن كلامك انت مازال خير من كلامه.. ضحك سلطان ورجع يتفرج بصمت.. ع جية واحد من الفرسان وقف عليهم وقال.. /من فيكم سلطان البندار؟ سلطان قاله.. /اهوا.. ابتسم وقاله.. /حكولي عليك هلبه قالوا مايفوتك حد في البنداريه.. سلطان قاله.. /في شني؟ قاله:ركوب الخيل.. سلطان غير نظره عنه من غير مايتكلم ومحرز يشوفله.. الولد وهو مبتسم بغرور وتحدي.. /تخش معاي تحدي؟ شافله سلطان بصمت ومحرز يراجي في رد سلطان وهو متوتر.. غير سلطان نظره عن الولد وناض بعدين قاله.. /نخش ليش لا؟ محرز:سلطان! شافله سلطان وهو مبتسم بثقه بعدين قال.. /تفرج واستنى.. رد نظره للولد وقال.. /هيا.. مشي قدامه والولد لحقه وخلوا محرز يقول لنفسه بقلق.. /تي غير شن تفهم في فروسية قفز الحواجز بس!؟ سكت وقعد يراقب فيهم كيف وقفوا عن الراجل المسؤول عن التنظيم تكلموا معاه لدقايق بعدين مشي معاهم بإتجاه المكان اللي فيه الخيول.. 🌾سلطان:انت الاول.. الولد قال بإبتسامه غرور.. /تبي تشوف وتفهم ولا..عادي تو نساعدك.. ومشي الولد بحصانه وسلطان يتبع فيه بنظره.. وركب الفارس ع حصانه وبدي السباق وكل من كان موجود في المكان يتابع فيه.. تخطى كل الحواجز من غير مايطيح واحد فيهم وخلا الموجودين يصفقوله بإعجاب وتشجيع.. محرز:غير شن درت في روحك ياصاحبي بس! ويشوف سلطان مقدم بالحصان لعند ماوقف في مكان محدد ركب عليه..مسح بإيديه ع رقبته وظهره وعيونه يشوفوا القدام ولما عطاه الراجل اشارة البدء شد الزمام وانطلق بالحصان وهو يقول.. "ياالله" ويوصل في اول حاجز ويتخطاه في اقل من 50ثانيه والحكم يراقب ويحسب.. ويستمر سلطان في تخطي الحواجز في فترة زمنيه قصيره لعند ماتخطاهم كلهم .. الحاضرين كانوا يصفقوا بذهول منهم الولد اللي تحداه اما محرز كان يتفرج بصدمه.. رفع سلطان يده وهو يحيي في الناس اللي تصفقله بعدين نزل من الحصان.. جاه الولد مد يده وقال بإبتسامه.. /انت مايفوتك حد في البلاد كلها.. ضحك وصافحه بعدين قال.. /حتى انت فارس.. ▪▪▪▪▪▪▪▪ "لاتوا تفهمني كيف درتها هادي!؟" سلطان:شن تحسابني جاهل مانعرفش شن هي فروسية قفز الحواجز وقوانينها؟ ديما نتبع فيها في التلفزيون ولما مشيت مع بوي لطرابلس كنت نمشي لنادي فروسيه غادي وتعلمت منهم.. محرز:لا عليك حق..عليك حق وحرجت منك من امتى دس عليا في اسرار!!؟ سلطان بضحكه.. /اسرار شني ياقفل.. محرز بنرفزة قال.. /معاش نبي لسانك يخاطب لساني خلاص.. ومشيفاته.. سلطان بضحكه.. /تي تعالى هني ياقفل..ومشاله يجري.. سمع محرز صوت الجري متاعه طلع يجري حتى هو ودهش سلطان على ماوصل فيه وشده ولف ذراعه ع رقبته وطاح فيه ضرب ع سبيل المزاح ومحرز يتلقى وهو يضحك.. 🌿وفي منطقة التسعاويه.. تحديدا مدرسة "نور المعارف"للتعليم الاساسي اللي كانت مختلطه.. في احد فصول الصف الثامن اللي كانوا يقروا فيه كريم وسلامه.. كان استاذ الفيزياء كيف خاش حيوه طلابه وهو رد التحيه بعدين قال.. /الاسبوع الجاي بيبدوا الاختبارات استعدوا.. سلامه وهو مبتسم بثقه.. /ديما مستعدين.. الاستاذ وهو يفتح في الكتاب قال بإبتسامه.. /الكلام مش عليكم انت والدحيح اللي جنبك.. ضحك كريم.. فجأه دق باب الفصل.. شافله الاستاذ وقال.. /تفضل.. انفتح الباب وخشت نائبه المدير ومعاها طالبه كانت في غايه الجمال.. لاكانت خايفه ولامتوتره..واقفه بثبات وراسها مرفوع وع وجهها ابتسامه ثقه خفيفه.. النائبه قالت.. /سامحنا استاذ بناخد من وقتك شويه..شافت للطلبه وقالت..هادي زميلتكم الجديده عزة الشيباني..خشي قعمزي ياعزة.. عزة مشت قعمزت في مقعد فاضي والعيون عليها.. النائبه قالت.. /مشكور جدا استاذ.. قال:العفو.. مشت النائبه طلعت وسكرت الباب والاستاذ شاف لعزة وقال.. /من اي مدرسه جيتي ياعزه.. قالت:من مدرسه منارة العلم .. قاللها:في طرابلس المدرسه هادي من احسن المدارس غادي.. قالت:احسن المدارس في المنطقه الغربيه كلها واني حولت منها ع خاطر شغل بابا ولى هني.. هز الاستاذ راسه وقال.. /مرحبتين بيك في الألف والخمسين وفي مدرسه نور المعارف.. قالت بإبتسامه.. /شكرا استاذ.. الاستاذ مرر نظره ع الطلبه وقال.. /هيا ساد ماضاع من الوقت ركزوا معاي.. عزة طلعت كتاب الفيزياء وهي تتصفح فيه مررت نظرها ع الفصل جو عيونها في عيون بنيه ابتسمتلها واشرتلها بيدها هي ردتلها الابتسامه... وبعدين يبدا الاستاذ الشرح والكل منتبه معاه.. عزة وهي مركزه مع الشرح لاحظت ان اكثر من يشارك مع الاستاذ،سلامه اي سؤال يسأله الاستاذ يجاوبه سلامه بسرعه.. وحتى طلعه يحل مسأله حلها وهو يشرح فيها شرح ممتاز وين جي خاش قعدت تشوفله وهو كما معروف عنه مايشوف لحد كان نفسه.. ▪▪▪▪▪▪▪ "اني وداد نقرا في المدرسه هادي من اول ابتدائي" عزة بإبتسامه.. /معناها تعرفي اللي فيها كلهم.. ضحكت وقالت.. /لامش هكي.. عزة قالت بضحكه.. /نبصر عليك..باهي قوليلي تعرفي من اشطر حد في المدرسه؟ وداد:هادي اكيده نعرفها..اشطر واحد وديما الاول سلامة.. عزة شافت لسلامه اللي كان شاد شيشة عصير البستان يتكلم وهو يحرك فيها ومرة مرة يضحكوا هو كريم ومعاهم زملائهم.. وداد قالت:هدا ولد اغنى راجل في الالف وخمسين تسعه بيت المال.. عزة:مرة سمعت بابا يحكي عليه لماما.. وداد قالت:حتى هداكا اللي جنبه اللي حط سلامه مرفقه ع كتفه من عيلة بيت المال ولد عم سلامه وحتى هو شاطر وديما يجيب في التاني..سلامه الاول وهو التاني ديما.. ابتسمت عزة بثقه وقالت.. /وبعد ماجيت اني نولي اني الاولى وهدا سلامه التاني وهداكا الثالت..شن اسمه حقه؟ وداد قالت بضحكه.. /كريم..شكلك دحيحه حتى انتي.. قالت بثقه:اني كنت ديما الاولى ع المنطقه اللي كنت ساكنه فيها.. وداد بإبتسامه حماس.. /الله كان تجيبي انتي الاولى وتخلينا نغلبوا الولاد.. ضحكت عزه بعدين قالت.. /انتي مشاركه في النادي اللي هني؟ قالت:شور..وانتي شاركتي؟ عزة قالت بضحكه.. /شورين.. ضحكت وداد بعدين قالت.. /حتى سلامه وكريم فيه..سلامه فالح في كرة التنس والسله وكريم في السله بس تشوفي فيهم كيف طوال.. عزة قالت.. /واني مايغلبني حد في التنس..شافت لسلامه وقالت..تو نغلبه حتى في هادي.. ضحكت وداد.. ♧سلامه وعزه..قصه حب مش عارفه كيف نوصفها اللي نقدر نقوله عنها انها قصة معقده هلبه..حب معقد غريب..قصتهم كلها ع بعضها ماريتش قصه تشبهها لكن برغم تعقيدها حلوة هلبه الحق... 🌿🌿🌿🌿🌿 الساعه الرابعه عصرا.. في مستشفى"ابن البيطار".. تحديدا في الحجرة اللي قاعد فيها تسعه.. 🌱"ياروحي ياريته اني ولاانت ياريته فيا اني" تسعه قال بضيق.. /اعوذ بالله..شن الدوة اللي تقولي فيها هادي يافريحه! فريحه وهي تبكي.. /مش متحمله نشوفك هكي.. بألم شافت لذراعه وقالت..ياعمري.. توجع فيك هلبه؟ ابتسم بحب وقال.. /مش هلبه حاجه عاديه حاجه عاديه.. نزيهه اللي كانت واقفه مقابلاته قالت.. /ربي معاد يورينا فيك سو.. قاللها بإبتسامه.. /ولايوريني فيكم السو يالشيهانه..وزع نظره بيناتهم وقال..معاش نبي وحده منكم تطلع من القصر الفترة هادي.. نزيهه:لهالدرجه الوضع خطير؟ قاللها:احتياط احتياط يانزيهه.. فريحه قالت بضيق.. /هداكا وراها ولا؟ تسعه حرك راسه بالنفي.. فريحه شافت لنزيهه بخوف وبنفس الخوف سألت نزيهه.. /مالا منو؟ تسعه قال.. /مش شوركم يانزيهه المواضيع هادي.. قالتله بضيق.. /باهي والصغار نقعمزوهم حتى هما؟ قاللها:لا خلوهم يمشوا للمدرسه الحراسه تقعد وراهم لكن من المدرسه للقصر ومن القصر للمدرسه.. نزيهه قالت.. /حاضر.. هو تنهد وقال..توا تطلعوا من عندي وتمشوا تشوفوا ربيعه بعدين تروحوا طول.. فريحه غمضت عيونها بنفاد صبر.. اما نزيهه ابتسمت غصبا وقالت.. /حاضر.. 🍃وطلعوا من عنده لحجرة ربيعه وهما يجروا في رجليهم جر لما خشوا عليها لقوا عندها عصمت وصاحبتها نوال.. يدوب سلموا وتحمدولها ع السلامه وطلعوا طول.. ربيعه تجاهلت لأنها تعودت لكن عصمت كانت مضايقه وقلقه في نفس الوقت.. 🌿🌿🌿🌿 "هنو ماما شن حالك حبيبتي" "حمد لله ماما حالي مافيش احلى منه انتي شن حالك وحال الباقي" زكيه وهي تمسح في دموعها قالت.. /الحمد لله ياماما كلنا بخير..مرت خوك جابت بنيه سبحان الله تقول جايبتيها انتي ناسخاتك نسخ.. "باهي الحمد لله طلعتلنا حني" ضحكت امها وقالت.. /تحشمي.. "هدا الحق..المهم كان طلعت تشبهني مفروض اني نسميها ولاسموها هما؟" زكيه:لالتوا لا.. "خلاص اني بنسميها طبعا كان رضت البرنسيسه امها" زكيه قالت.. /ترضى غصب عنها انتي عمتها ومن حقك تسميها.. "سلمها مامتي العسل..اسمعي ماما قولي لخوي يسميها فداء نحبه هلبه الاسم هدا وقولي الاسم منك انتي باهي؟" زكيه:لاعادي نقوله عمتها خاطرها تسميها مايقول شي.. "تو نشوفوا".. 🌿وماكذبتش خبر زكيه تاني يوم الصبح كانت عند ربيعه بعد سلمت عليها قعمزت حداها وقالت.. /مشيت شفتها قبل لنجيك الحمد لله حالها باهي الدكتورة قالت مافيش عليها خطر.. ربيعه وهي مبتسمه قالت.. /ايه قالتلي..الحمد لله قدر ولطف.. ابتسمت زكيه وقالت.. الحمد لله..عقدت حواجبها بعدين قالت..ماقلتوش شن بتسموها؟ ربيعه قالت بإبتسامه.. /في بالي اكثر من اسم قلت نقول لتسعه عليهم وهو يختار معاي.. زكيه قالت.. /امس كلمتني هنو وخبرتها فرحت هلبه وقالت ياماما خاطري نسميها لكن مرات امها ماترضاش قلتلها لوى ماترضى انتي عمتها وليك حق تسميها حتى انتي.. حافظت ربيعه ع ابتسامتها بالغصب بعدين قالت.. /شن خاطرها تسميها؟ زكيه قالت.. /اسم قنين هلبه..فداء.. ربيعه وهي مبتسمه قالت.. /حلو..خلاص ناخدوا بخاطر عمتها ونسموها فداء.. هزت زكيه راسها وهي مبتسمه بعدين قالت.. /يسلم خاطرك بنتي يسلم خاطرك.. ♤ويطلعوا بوي وامي من المستشفى بعد مايولي حالهم باهي وتقعد اختي فداء في الحضانه شهر كامل.. فهالشهر وصل بوي للناس اللي حاولوا يقتلوه طلعوا جماعه مأجرهم واحد من ولاد نور الدين الزواري راجل خالتي حسنا الأول.. 🌿جمال سلمهم للشرطه وغادي اعترفوا بكل شي وبعد التحقيقات مع ولاد نور الدين طلعوا متفاهمين مع واحد في الحبس هو اللي نفد خطتهم عن طريق جماعه يعرفهم برا وبعد اعترافهم قررت السلطات الأمنيه نقل كل واحد فيهم لسجن مختلف برا طرابلس في مدن مختلفه وكذلك اعادة محاكمتهم بش يخضعوا لعقوبه اشد... 🍃وعاد لما عرفوا العيله السبب ورا محاولة قتل تسعه من ورا الكواليس انحط اللوم ع حسناء.. 🌱"اعوذ بالله من نهار خشوا للعيله وحني من مصيبه لمصيبه.." قالت هالكلام فريحه لنزيهه اللي ردت عليها تقول.. /يستر الله من اخرتها وخلاص..اني كان نقولك البلي الجديد اللي سمعته عن هادي ربيعه شن يصير فيك.. فريحه قالت بخوف.. /شن وراها تاني هالبلوة.. نزيهه:تتفكري المراة اللي قالوا صاحبة امها..هادي اللي قالت عليها عصمت افترت عليهم؟ فريحه:ايه خيرها!؟ نزيهه؛تتفكري ولدها اللي قالوا قتلوه جماعة المخدرات؟ هداكا كان صاحب ربيعه.. حطت فريحه يدها ع فمها بصدمه.. نزيهه؛جاياتك بالطامه حق..في اليوم اللي مات فيه ربيعه كانت راكبه معاه السياره ورافعها لحوشه فريحه بصدمه شديده.. /شن تقولي يانزيهه!؟ الدوة هادي كبيره هلبه لو يسمع بيها تسعه يقلب الدنيا.. نزيهه:واني ليا وقت سامعه وداسه عارفاته مش حيصدق فيها..لكن في نفس الوقت خايفه ع سمعتنا وسمعه بناتنا في جرتها.. فريحه وهي مصدومه قالت.. /بنتك متعلقه بيها هلبه.. نزيهه قالت بإستياء.. /هدا الهم..اسمعي اني وانتي مانقدروا نديروا شي اللي يقدر يتصرف في حاجه زي هادي عمتي بس.. فريحه:قصدك نحكولها؟ نزيهه:ايه لكن مش توا خل يعدي اسبوع بنت هديكا قبل.. مسحت فريحه بإيديها ع وجهها وقالت.. /غبارة وخلاص غباره.. ..وحديثهم هدا اللي كان يدور بينهم في الحديقه الخلفيه للقصر كان مسموع لأحدهم... 🌿🌿🌿 ويجي اللي تطلع فيه فداء من المستشفى.. ولأن وضعها حساس خلوها في جناح امها ماخش حد شافها غير هانيه اللي كانت هادي اول زيارة ليها لعيلتها بعد ماروحت من شهر العسل.. 🌱"عسل ياناس عسل..قصدك اني كنت حلوة هكي ماما" زكيه قالت وهي مبتسمه.. /ومازال حلوة وكل ماتكبري تحلي.. ضحكت هانيه بعدين قالت.. /نقيمها عادي؟ زكيه:قيميها قيمي عادي عادي.. سمت هانيه بالله ورفعتها في حضنها بعدين قالت.. /ياروحي..فدو..فدفد حبيبة عميمه شبيهة عميمه وباهي اللي جيتي تشبهي عميمه بش ماتقعديش في رقبة بوك.. فنصت زكيه في بنتها وهي تضحك وهانيه متجاهله.. اساسا ماعبرتش ربيعه نهائي وزكيه كذلك مااهتمتش لوجود ربيعه وكأن فداء مش بنتها.. ربيعه اللي كانت مضايقه هلبه من هالوضع انجبرت تساير تبي تقعد كاسبه عزوزتها لأنها تعرف عواقبخسارتها كويس.. حطت هانيه البنت في سريرها بحذر بعدين حطت هديتها جنبها وقالت.. /تتربى في عز وخيي وعزنا..هيا ماما خل نطلعوا معبيه هدرزة راهو .. ومشت بتطلع وامها وراها تسأل.. /لامتى قاعده؟ هانيه قالت.. /لبعد آذان العشاء.. وطلعوا الزوز من الحجرة وخلوا ربيعه حاسه بشعور بشع للغايه ردت نظرها لبنتها وهي تشوفلها بخوف ودموعها ينزلوا بعدين قالت.. /يارب.. 🌿🌿🌿🌿🌿 الساعه الثانيه بعد منتصف الليل... واهل القصر كلهم راقدين.. كان في من فايق وموجود في ركن من اركان القصر يدير في مكالمه هاتفيه.. =هي والعيله كلها مش الابيض الوحيدات الباهيات معاها ضرتها الزواريه وحماتها بنت الانجليزيه.. "مني اكثر حد معاديها في العيله" =ضرتها الكبيره بنت الزايدي وحماتها بنت زكيه.. "باهي باهي..المهم انتي ديري اللي قتلك عليه وردي بالك تغلطي ردي بالك.." =حاضر حاضر بنسكر توا قبل ليفيق بيا حد بالسلامه.. "بالسلامه".. وسكرت السماعه بهدوء وحذر وهربت تجري...
....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
