Enduring a Thousand Tribulations [Shui Long Yin] MM Translation

9.2

အတွဲ (၁) - မြေခွေးမိစ္ဆာသခင်လေး

9 - အပြာရောင် ရေခဲခေါင်းတလား [Part 2]

နောက်တစ်နေ့တွင် ထန်လိစစ် သည် ကျိုဖုန်းမြို့ရှိ နို့ထိန်းတစ်ဦးကို ငှါးရမ်း၍ သူမထံ ဖုန့်ဖုန့်ကို ယာယီအပ်နှံထားခဲ့သည်။ သူတို့ ၄ ယောက်မှာ ဝူယီတောတောင်ဆီ ဆက်လက်ထွက်ခွါလာခဲ့သည်။

•••••••••••

ဝူယီတောင်။

အဆုံးမဲ့ ကျယ်ပြန့်သောတောင်များမှာ မမြင့်မားလှသော်လည်း သိပ်သည်းထူထပ်နေသော သစ်ပင်ပန်းမန်များမှာ အင်းဆက်များ၊ မြွေများ၊ ခြင်များ၊ စပျစ်နွယ်ပင်များနှင့် အဆိပ်ရှိသော ပေါင်းပင်များနှင့် ပြည့်နှက်နေသည့်အတွက် နှင်းဖုံးနေသော မော်ယာတောင်ထိပ်နှင့် နှိုင်းယှဉ်ပါက ခရီးလမ်း ပို၍ကြမ်းတမ်းခက်ခဲနေစေသည်။ တစ်ခါတစ်ရံ ချီယွင်က သူ၏ဓားနှင့် ခုတ်ဖြတ် လမ်းရှင်းရသည်။ သို့သော် တောထူထပ်လှသဖြင့် နေ့တစ်ဝက်အချိန်မျှ ကုန်သွားသော်လည်း ခရီးက သိပ်မတွင်။

တောထူထပ်လှသော တောထဲတွင် ရက်အတော်ကြာ လမ်းလျှောက်ပြီးနောက် သစ်ပင်တစ်ပင်ပေါ်မှ တစ်ပင်ပေါ် ခုန်ပျံသွားလာကြဖို့ကလွဲ၍ ရွေးချယ်စရာမရှိတော့။ သို့သော် ထိုသို့ခုန်ပျံသွားလာနေခြင်းက အားအင်များစွာ သုံးစွဲနေရ၍ မောပန်းလွယ်လာပြီး မျက်စိတစ်ဆုံး မြင်နေရသည့် သစ်ပင်များကြားတွင် ဝူယီတောင်က မည်သည့်နေရာတွင် ရှိမှန်း သူတို့မသိချေ။

"ချီဟွင်တောင်ရဲ့နောက်ကွယ်မှာ ထူးဆန်းတဲ့အဖြူရောင်မြေလွှာတွေရှိတယ်၊ ပြီးတော့ အုတ်ဂူလုပ်ပြီးရင် လုံးဝဖျက်လို့မရတော့ဘူးဆိုတော့ မယုံနိုင်လောက်အောင် ကျစ်လျစ်သိပ်သည်းတဲ့မြေသားပဲ ဖြစ်ရမယ်။" ထန်လိစစ်က သစ်ပင်တစ်ပင်၏ ထိပ်ဖျားကနေ နောက်တစ်ပင်၏ ထိပ်ဖျားဆီ ခုန်ပျံလိုက်ရင်း မှတ်ချက်ပေးလိုက်လေသည်။ "ပြီးတော့ ရွှယ်ရှန်းဇိက ဒီလိုနေရာမျိုးကို ရွေးပြီး သူ့ဇနီးကို မြုပ်နှံထားခဲ့တာကို ထည့်စဉ်းစားရရင် ဒီနေရာမှာ ထူးခြားရှားပါးတဲ့ ပန်းပင်တွေ အများကြီး ရှိနေရမယ်။ ကျောက်တုံးလို မာကျောပြီး ထိုးဖောက်ဖို့ခက်တဲ့ မြေသားမှာ ရှင်သန်နိုင်တဲ့ ပန်းပင်မျိုး ရှိလား?"