هل إنتهيت منى!!؟

(٧)

ليلى فى حالة انهيار تام والدموع مغرقه عنيها واحمد اخدها وراحو المستشفى لابوها واول ما وصلوا عند نجوى ولما شافت ليلى قالت بلوم.. ليه كدا يا احمد انا مش قلت لك متقلقهاش

احمد.. والله يا ماما انا كل اللى قلته انه تعبان شويه ولقيتها فتحت هو بابا عامل ايه

نجوى .. هو فى العنايه والزياره ممنوعه

ليلى بإنهيار.. فى العنايه ليه هو بابا عنده ايه

احمد .. إهدى شويه خلينا نفهم ..هومين الدكتور المسؤل عن حالته

نجوى .. دكتور عماد هو لسه خارج من عنده من شويه

احمد.. طيب انا هاروح اطمن وأفهم منه ايه الموضوع

نجوى.. اه يابنى افهم محدش راضى يفهمنى إيه بيحصل

احمد.. حاضر يا ماما اهدى انتى بس وخدى بالك من ليلى وانا راجع حالا

سابهم احمد وراح يدور على الدكتور ولما شافه.. سلام عليكم  انا احمد ابن اخو الاستاذ كمال

د.عماد.. اهلا بحضرتك كويس انك جيت انا كنت عاوزك

احمد.. انشاء الله يكون خير

د.عماد.. اتفضل معايا على مكتبى نتكلم براحتنا
#فى مكتب الدكتور
د.عماد.. بصراحه الوضع ميطمنش نهائى عمك قلبه تعبان جدا هو عارف من فتره وعارف انه معرض للوضع ده فى اى وقت انا اقترحت عليه من فتره يعمل عمليه لكن هو دايما كان بياجل بحجة انه خايف المدام تعرف او ليلى وحد فيهم ينهار كان بيقول انهم مش هايستحملو الصدمه
احمد.. طيب والحل المفروض نعمل ايه

د.عماد.. احنا هانصبر لما يخرج من العنايه وبعدين نحدد وضعه وكمان لازم موافقته للعمليه

احمد.. طيب هو هايخرج من العنايه امتى

د.عماد.. والله على حسب استجابته هو والحمد لله هو بيستجيب كويس للعلاج يعنى ممكن بكره الصبح

احمد.. انا متشكر اوى يا دكتور وياريت تتابع معايا اول باول

دعماد.. استاذ احمد ياريت المدام والانسه ليلى ميعرفوش الكلام ده الا لما نتكلم مع عمك دى كانت رغبته

احمد.. حاضر عن اذنك

نزل احمد راح جاب اكل وطلع لنجوى وليلى وقعد جنبهم .. كلى لقمه ياليلى  وانتى كمان يا ماما عشان خاطرى انتو ماكلتوش حاجه من الصبح

نجوى .. ومين له نفس يابنى كل انت واختك

احمد.. كلى انتى ياليلى عشان خاطرى
ليلى بصت لاحمد بغيظ وهى بتبكى ..ماهو لو كان ابوك ما كنتش فاكرت فى الاكل والشرب هو ده كل اللى هامك
احمد اتصدم من كلامها بصلها وهو بيحاول يمنع الدموع تنزل من عينه من جواه نار هى ازاى تتكلم كده وهى عارفه قد ايه هو بيحبه .
ليلى ندمت من جواها على كلامها زعلت من نفسها او
ومش عارفه ترجع فى كلمتها كل اللى عملته انها فضلت تبكى وهى مش عارفه السبب
احمد قام من مكانه رمى الاكل فى الزباله وقعد جنب نجوى تانى
نجوى ..متزعلش منها ياحبيبى هى زعلانه بس عشان بابها

احمد ..لا ولا حاجه يا مرات عمى عادى هى مغلطتش

نجوى بصت بضيق ومردتش لان ده مش وقت لوم ولا عتاب
ساعات الليل عدت وكانها سنين والصبح كان كمال اتنقل من العنايه لاوضه عاديه اتجمعو حواليه كلهم والدكتور عماد كان معاهم 

احمد.. حمدالله على سلامتك ياعمى

كمال.. الله يسلمك يابنى
ليلي قاعده جنب كمال وراميه نفسها فى حضنه .. ياحبيبى يا بابا لو كان جرالك حاجه كنت هاروح فيها 

كمال ..بعد الشر عنك ياحبيبة بابا  .
قعدو معاه شويه لغاية الدكتور ما قال ليهم كفايه كده سيبوه يرتاح شويه  خرجو كلهم وقبل الباب ما يتقفل كمال نادى احمد.. احمد استنى انت يابنى كنت عاوزك شويه
خرجو كلهم ما عدا احمد استنى مع عمه ولا اتقفل باب الاوضه.
كمال .. قرب هنا يابنى
احمد.. فيه ايه بس يابابا مش ترتاح وبعدين نتكلم
كمال .. لا يابنى الموضوع ده ميتاجلش اكتر من كده

احمد ..خير يابابا لو على العمليه متشيلش هم حضرتك عارف ان ميراث المرحومه ماما زى ما هو

كمال.. فلوس ايه يابنى اللى بتتكلم فيه الموضوع مالوش علاقه بكدا خالص الموضوع بخصوص ليلى

احمد.. ليلى مالها يا بابا ليلى فى عنيا  متقلقش عليها قوم لنا انت بالسلامه بس ومتشغلش بالك بأى شئ

كمال.. انا عارف انك اكتر واحد هاتحافظ عليها عشان كدا انا عاوزك تتجوزها

احمد.. ااااااااااااااااااااااااا