هل إنتهيت منى!!؟

(١٣)

عدى اليوم وليلى خلصت المدرسه وروحت لقيت احمد لسه موصلش داخلت عشان تغير هدومها لبست فستان كحلى غامق له حزم روز عريض وطلعت طرحه روز وشنطه وجزمه لون الحزام والطرحه وبدأت تلبس خلصت وقعدت جنب مامتها وبابها قدام التلفزيون تستنى احمد لغاية ما رجع بص عليها وحب يغيظها

احمد.. ايه دا انتى ما صدقتى ولا ايه

ليلى خدودها كانت هاتنفجر من الخجل ردت بتردد.. اقوم اغير وناجلها انهاردا

احمد.. لا نأجل ثوانى اغير هدومى واجيلك

نجوى.. مش هاتكلو لقمه

احمد.. لا اكل ايه احنا هانتغدى انهاردا بره ولا ايه يا ليلى

ليلى بابتسامه رقيقه.. اللى تشوفه

دخل احمد غير وخرج اخد ليلى ومشى طول الطريق بيحاول يفتح اى موضوع معاها ومش عارف لان ليلى من الخجل بترد على قد الكلام وبتحاول مترغيش كتير ودا طبعا اللى احمد فضل يفسر فيه انها مغصوبه ومش موافقه ومش سعيده وصلو محل الدهب

احمد.. عاوزين احسن تشكيلة دبل عندك وعاوزين شبكه للعروسه

الصايغ.. تحت امرك دى دبل بتيجى طقم واحده دهب والتانيه فضه هما نفس الشكل بس بيتغير رسمة الاسم اللى بتختاروه

احمد .. حلوين دول طيب لو طلبناهم يجهزو امتى

الصايغ.. على ما تختارو الشبكه نكون حفرنا الاسامى

احمد.. ايه رايك يا ليلى نخليه يعملهم ولا تحبى تشوفى حاجه تانيه

ليلى .. لا دول حلوين اوى وفكرتهم جديده ومش منتشره

احمد .. على بركة الله اعمل اتنين واحده باسم ليلى والتانيه باسم احمد. ممكن نشوف اطقم كامله بس عاوزين اشيك حاجه لاحلى عروسه

الصايغ .. اتفضل يا فندم دى اشيك واحدث تشكيله مبيلبسش الحاجات دى غير المشاهير ايه رايكم فى دول الفنانه اليسا كانت لابسهم فى الاعلان

احمد.. هى مين اليسا دى
ليلى خبطته فى ايده .. متفضحناش مش عارف اليسا  اعمل نفسك تعرفها ....قالت له بهمس

احمد وهو بيهمس لها .. بس انا فعلا معرفهاش

ليلى .. لما نخرج هاعرفهالك اسكت بقى عشان الراجل بيبص علينا

احمد وهو بيعدل نبرة صوته .. طيب ايه اكتر واحد عجبك

ليلى.. الحاجات دى غاليه اوى

احمد.. مفيش حاجه تغلى عليكى

ليلى .. مش قصدى انا قصدى انت معاك فلوس

احمد.. انتى هابله انتى ناسيه انى الحمد لله وارث الجنينه بتاعة امى وخالى وابوكى بيحطو الايراد بتاعها كل سنه فى البنك دا غير القرشين اللى ابويا الله يرحمه سايبهم داغير مرتبى بقالى اربع سنين هو انا بصرف منه ايه يعنى

ليلى.. خلاص انا بس بسال انا هاختار الفراشه دا شكله رقيق كدا وبسيط ولا انت ايه رايك

احمد.. اولا هو مش ارق منك ثانيا اللى يعجبك لان دا انتى اللى هاتلبسيه انا لو عليا عاوز اجيب المحل كله

ليلى.. وهى مكسوفه من كلامه..لا محل كله ايه احنا هاناخد دا وبس شكله حلو

احمد.. اللى يعجبك خلاص احنا هناخد دا والدبل

الصايغ.. مش هاتاخد محبس

احمد .. لا ازاى نقى يا ليلى المحبس اللى يعجبك

ليلى.. لا كفايه كدا

احمد.. نقى المحبس اللى يعجبك ولا انتى عاوزه نجوى تقول انى ضحكت عليكى

نقت ليلى محبس رقيق واحمد دفع الحساب واخدو الشبكه والدبل ومشيو

احمد.. احنا هنتغدى الاول اصل واقع من الجوع وبعدين نشوف فستانك

داخلو مطعم على النيل وقعدو طلب احمد الاكل وقعدو يستنو الأكل احمد من بعيد لمح لمار قاعده لوحدها استاذن ليلى وراح لها

احمد.. معلش يا ليلى فى حد كدا اعرفه هاسلم عليه واجى

ليلى .. اتفضل انا هاستناك بس ماتتاخرش الاكل زمانه جاى

احمد .. ماشى

احمد .. لمار ازيك بتعملى ايه هنا

لمار ..ازيك انت عامل ايه ولا حاجه مستنيه عمار

احمد .. هو عمار هنا فى القاهره

لمار.. ايوا واخيرا رضى عليا وقرر يقابلنى نتكلم بالعقل .وانت بقى بتعمل ايه هنا

احمد .. ولا حاجه اصل خطوبتى بعد بكره وكنت واخد العروسها اشتريلها الشبكه وشوية حاجات كده

لمار.. مبروك يا احمد ومين سعيدة الحظ حد نعرفه

احمد.. ليلى بنت عمى مش انتى قابلتيها واحنا فى الرحله

لمار بصدمه .. هى ليلى مش اختك

احمد .. لا انتى فاهمه غلط ليلى بنت عمى ولانى اتربيت فى بيت عمى ف الكل فاكر اننا اخوات

لمار .. اهه على العموم الف مبروك متنساش الشهر الجاى المناقشه بتاعتى متنساش لازم تحضر

احمد.. حاضر يا دكتوره مقداما ومتنسيش تجيبى عمار وتيجى الخميس هو عارف البيت صحيح هو عمره ما زارنى هناك بس هو عارف العنوان

لمار .. ما شى يا احمد مبروك مره تانيه

احمد .. ما تيجى تقعدى معانا على ما يجى حتى تتعرفى بليلى اكتر هاتحبيها

لمار .. اوك يالا بينا

احمد اخد لمار وراح عند ليلى اللى اول ما شافتهم جايين وبيضحكو الغيره بدات تاكل قلبها

احمد .. ايه يا قمر اتاخرت عليكى

ليلى.. اوى اوى الكل هايبرد

احمد .. لا يبرد ايه انا واقع اه صحيح معرفتكيش لمار زميلتى فى الجامعه بس هى اكبر بسنتين ودى بقى ليلى بنت عمى وخطيبتى

ليلى بصت ناحية لمار بانتصار ايوا ليلى متعرفش هى مين لكن لان لمار جميله ومتحرره شويه فى لبسها ليلى بدأت تعاملها على انها غريمه ليها