هل إنتهيت منى!!؟

(٢٦)

فى الوقت دا نجوى كانت سابتهم ودخلت ليلى تطمن عليها لما وصلت للاوضه بتفتح الباب لقيت ليلى وهى بتغير هدومها ومتلخبطه

نجوى.. ايه ياليلى انت لسه مغيرتيش دا جوزاك واقف بره مكسوف من نفسه يالا بسرعه عشان عماتك واعمامك كلهم زمانهم على وصول

ليلى .. انا خلاص جهزت اهوه يا ماما ثوانى بس انتى عرفتى منين انهم جايين

نجوى ..سمر لسه مكلامانى فضلت تتصل بيكى وانتى تليفونك مقفول

ليلى.. لا انا مش التليفون مش مقفول انا غيرت الرقم امبارح وانا رايحه الكوافير عشان فيه نمرة غريبه كانت بتضايقنى هاتى موبيلك لما اسجلك النمره الجديده

نجوى .. المهم عملتو ايه

ليلى .. عملنا ايه فى ايه بالضبط عشان انا مش فاهمه

نجوى .. بت انتى هتستعبطى ما تنطقى

ليلى .. متقلقيش يا ماما كل حاجه تمام

نجوى ..طيب يابنتى ربنا يهدى سرك

ليلى .. يالا بينا زمان بابا مستنى يشوفنى وعشان الجماعه اللى جايين خلينا نقعد بره نقابلهم احسن

ليلى خرجت هى ونجوى ليلى كان جواها صراع مش عارفه تتصرف مع احمد قدامهم ازاى لو هو مش موجود هى ممكن تمثل لكن بوجوده الوضع بيختلف

كمال.. اهى عروستنا وصلت وحشتينى اوى يا ليلى تعالى فى حضنى

ليلى.. وحشتك دا لسه سايباك بقالى كام ساعه

قالت وجرى رمت نفسها فى حضنه وكمال اخدها فى حضنه وهو بيبكى .. دا انتى كل اللى طلعت بيه من الدنيا ياقلب بابا مش عاوزه توحشينى كمان

ليلى .. وهو انا بعدت عنك ما انا جنبك ياحبيبى وعمرى ما هابعد عنك ابدا

بعدت عنه وهى بتمسح دموعها وشويه والجرس رن ليلى راحت فتحت عشان نتقابل سيل من البشر قرايبها ومعارفهم وصحاب احمد اللى وصلو بعد شويه وبعدين بشويه صاحبات ليلى الكل كان سعيد عشانهم والحل كان بيبارك ليهم ليلى اخدت لصاحباتها وراحت اوضتها كانت مخنوقه وعاوزه اى حد تفضفض معاه

آروى .. انتى مجنونه ازاى تعملى كدا

ليلى .. اللى حصل مقدرتش تمسك نفسى اكتر من كدا

ساره .. يعنى احتواتى اللى فات دا كله مكنتيش عارفه تصبرى المره دى كمان وتفوتى

ليلى .. اللى حصل بقى انا اللى مضايقنى اوى انه اخد موضوع طلب الطلاق دا عادى كدا ومحاولش حتى يرجعنى عن قرارى

آروى .. المهم دلوقتى تعرف الزفت دا بعتله قاله ايه تانى عشان يقلب كدا فى ثوانى انا هاتجنن المخلوق دا ايه شيطان ودينى ياليلى لأجيبلك حقك منه