هل إنتهيت منى!!؟

(27)

مصطفى.. انت حر بس نصيحه لوجه الله متنفعكش مش دى انت ما اخدش بالك فى الرحله هى عملت ايه

معاذ .. لا مأخدتش بالى وقبل ما تقول مش عاوز اعرف انتى فاكرنى احمد كلمه تجبنى وكلمه تودينى انت عارف كويس انا لو معجب بيها هاعرف اخليها تتغير ازاى

مصطفى.. والله انت حر انا نصحتك وعملت اللى عليا

#عند احمد وليلى

بعد ما الناس كلها مشيت ليلى دخلت اوضتها وقفلت الباب احمد قاعد بره مش عارف يتصرف ازاى خبط عليها

احمد.. ليلى انا جعان جدا ممكن بعد اذنك تجهزيلى اكل ....

سكتت شويه وبعدين سمع صوتها .. دقيقه واحد استنى بره وانا هاجهزلك

احمد.. متشكر اوى انا عارف انى غلطان وانتى معاكى حق لو عاملتينى وحش بس لو حطيتى نفسك مكانى اكيد هاتعذورينى

خرجت ليلى وراحت المطبخ من غير ما ترد عليه احمد وراها وبيكمل كلامه

احمد.. اعذرينى ياليلى حبى ليكى وغيرتى عمونى خلونى مش شايف حاجه غير افكار شيطان

ليلى .. مالوش لازمه الكلام دا دلوقتى

احمد.. ليلى انتى مش بس مراتى انتى بنت عمى واختى وكل حاجه ليا فى الدنيا زمان لما اعمامى وخالى قعدو مع بعض وكل واحد منهم هرب من مسئوليتى ابوكى هو كمان كان زيهم كان متجوز جديد ومش عاوز مسؤليه بس نجوى كانت بنت حلال ومعجبهاش الوضع اصرت انى هاعيش معاها وخيرت عمى كمال ايامها بين انى اعيش معاهم وهى تربينى او تسيبه وترجع بيت اهلها انا كنت صغير صحيح لكن كنت واعى وفاهم كل حاجه

ليلى والدموع فى عنيها .. خلاص يا احمد الكلام مالوش لازمه

احمد ..سيبينى اكمل الاول ....بعدها انا عشت معاهم فى الاول عمى كمال كان بيعاملنى عادى صحيح عمره مااساء ليا بس ما كنش حنين لغاية ما فى يوم عرف ان مامتك حامل كانت حامل فى توأم وهى فى الشهر الخامس اكتشفت ان عندها ورم فى الرحم الدكتور رفض الاجهاض لانه الاجهاض فى الوقت دا خطر عليها وبعد كدا ولدتك وتوأمك كان ولد مات بعد ما بدقايق انا كان عندى ست سنين فيه حاجات فاكره من ذاكرتى بس فيه حاجات خالى كان بيحفظهالى كبرت وانا باحفظها زى ان عمى مش بيحبنى وانه ربانى بس عشان طمعان فى ورثى من امى لغاية ما بقى عندى ١٦سنه كنتى انتى لسه بنت صغيره بدأت افهم كل حاجه بتجرى حوليا فهمت ان عمى بيحبنى ومتعلق بيا لانه معندوش ولاد ومستحيل ربنا يكرمه بيهم لان مامتك شايله الرحم بعد ولادتك مش لانه طمعان فيا زى ما خالى كان بيقول عرفت انى ابنه الوحيد وسنده من الدنيا لدرجة انى مكنش عندى الجرأه انى افاتحه فى موضوع جوازنا رغم انى مستحيل اتقبل فكرة انك تكونى لحد غيرى يوم ما قلى انك وافقتى كنت زعلان من اوى لانه غصبك انا بحبك صحيح بس مش بالغصب