هل إنتهيت منى!!؟

(١٠)

احمد نزل يجيب الاكل وهو بيقول لنفسه ..اللى يشوفك امبارح وانتى عامله فيها العسكرى الاخضر وضحك فى سره وهو ماشى .
اخخد الاكل وليلى وطلع على المستشفى وهناك اول ما وصلو سكت كمال ونجوى لدرجة ان ليلى حست ان فيه حاجه غريبه بتحصل

ليلى.. فيه ايه اول ماشوفتونا سكتو ليه نخرج

كمال.. لا ياحبيبة بابا تخرجى ليه بس كنت باخد رأى ماما فى حاجه كده ولا ايه يا ام ليلى

نجوى.. انا ام احمد يا حبيبى مش ام ليلى وانت هتنادينى بالصغيره وانا عندى البكرى

احمد وهو بيحضنها ويبتسم ..ربنا يخليكى يا نوجا وانا ليا غيرك فى العيله دى

ليلى.. يعنى كده ياست ماما ماشى انا بقى هاكل لوحدى ومش هسيب ليكى اكل من اللى جبناه

احمد.. ولا يهمك انا هسيب ليكى من الاكل بتاعى .وطلع لسانه لليلى

ليلى بغيظ..ماشى بس خليكو فاكرين

احمد ونجوى ضحكو فى وقت واحد بعد ما خلصو اكل

كمال .. ماتروح يا أحمد تجيب لينا حاجه نشربها

احمد.. حاضر ياعمى بس انا هاجيبلك ينسون عشان الدكتور موصينى القهوه لأ

كمال.. ماشى بس متجبش قهوه لاى حد منكم راعى مشاعرى

احمد.. من عنيا وانتى ياليلى اجيبلك ايه

ليلى .. لا انا هاجى معاك اختار

احمد .. انتى داخله على طمع

قاطعهم كمال.. لا خليكى ياليلى عاوزك فى كلمتين كده وغمز لاحمد

احمد فهم عمه عاوز ليلى فى ايه خرج من سكات قلبه بيدق بقوة مش عارف ايه اللى هايحصل فكر يقف يسمع وبعدين لقى واحده من بتوع النضافه

أحمد.. لو سمحتى ممكن اطلب من طلب

الست.. اتفضل يا بيه اأمر

احمد .. ممكن تجيبلى شوية حاجات من الكافتريا

الست.. طبعا انت بس قولى عاوز ايه

احمد.. هاتى واحد ينسون واتنين شاى وواحد فيروز اناناس وهاتى شيكولاته كادبرى وخلى الباقى عشانك

الست.. ربنا يخليك يا بيه وينولك اللى فى بالك

احمد في سره يسمع منك ربنا وقرب من بابا الاوضه ومش سمع كويس الصوت كان واطى لغاية ما سمع ليلى وهى بتقول ..انا مش موافقه انا لسه صغيره ومبفكرش فى الجواز دلوقتى ومتحولوش تغصبونى على حاجه  لانى هارفض فاهمين هارفض

احمد. بعد ما سمع الكلمه دى اتصدم وحس انه بينهار قرب على اول كرسى وقعد يبكى  ومستناش يسمع باقى الكلام 

#فى الاوضه بعد خروج احمد

كمال بهدؤ.. قربى ياليلى
قربت ليلى وقعدت جنبه على السرير..

كمال.. انتى كبرتى يا حبيبتى وبقيتى عروسه

ليلى بهزار.. ايه جايلى عريس

كمال وعلى وشه جديه..ايوا يابنتى جايلك عريس وعريس كويس اوى ميترفضش مافيهوش غلطه

ليلى بصت له بصدمه وجواها نار ومش قادره تستوعب اللى بيحصل واحمد وحبها ليه وازاى هى سمحت لنفسها تتعلق بيه كده وبصوت مخنوق ردت..بابا هو احمد عرف الموضوع ده

كمال بباتسامه مرسوه وملامح مرتاحه ..طبعا هو اول  واحد عرف قبل حتى ما اكلم امك فى الموضوع ده

ليلى وهى بتبكى .. وهو رايه ايه

كمال.. فرحان والدنيا مش سيعاه من الفرح

ليلى بعصبيه وهى منهاره من البكاء..انا مش موافقه انا لسه صغيره ومبفكرش فى الجواز دلوقتى ومتحولوش تغصبونى على حاجه  لانى هارفض فاهمين هارفض

نجوى .. استهدى بالله يابنتى ليه بس رافضه دا احمد ابن حلال واحنا اللى ربناه على ايدينا هتلاقى احسن منه فين هو فيه حد هايصونك زيه والله فكرى ومحدش هايغصبك على حاجه صلي استخاره بس

ليلى مصدومه ومش فاهمه حاجه .. انتى بتقولى ايه واحمد ماله ومال اللى بنتكلم فيه

كمال..ما هو احمد العريس ولا انتى شايفه شوفه تانيه

ليلى وهى بتمسح دموعها.. انت بتتكلم بجد يا بابا احمد... احمد بتاعنا دا هو العريس

كمال بابتسامه خبيثه.. ايوا هو العريس ها لسه رافضه ولا غيرتى رأيك

ليلى بكسوف ووشها فى الأرض.. اللى تشوفه يا بابا  انا مكسرش ليك ولا لماما كلمه

نجوى بتريقه ..شوفى البت قفلت حنفية عنيها وعملت ازاى
ليلى ووشها احمر من العيط والخجل ..الله بقى يا ماما والله لا اسيبك واخرج اقعد بره

ليلى بتفتح الباب لقيت احمد فى وشها ومعاه صنيه عليها الطلبات بص ليها بغيظ واتجاهلها وهى وطت وشها فى الارض من الكسوف وخرجت
احمد فى نفسه مش عاوزه تبصيلى وكمان معيطه هى وصلت الدرجه دى قعد يفكر فى نفسه هو عمل ايه فى ليلى يخليها ترفضه وتكرهه اوى كده قطع السرحان اللى كان فيه صوت كمال وهو بيقوله ..احمد احمد

احمد.. ههااه نعم ياعمى

كمال.. ايه رحت فين

احمد.. معلش ياعمى سرحت شويه

كمال .. على العموم يابنى انا هاريحك من السرحان ليلى موافقه اول ما اخرج هانعمل خطوبه وكتب كتاب والجواز بعد الإمتحانات عشان مذاكرة ليلى

احمد بصدمه.. اللى تشوفه يا عمى

احمد قعد يفكر فى عمه اللى جاله قلب يغصب على بنته الوحيده انها تتجوز غصب عنها واحد مش بتحبه وفى ليلى اللى رافضاه من غير اسباب وفى نجوى اكيد الست قلبها بيوجعها على حال بنتها بس هما كلهم ميقدروش يرفضو طلب كمال لانهم خايفين على صحته فكلهم سلمو بالامر الواقع