لو تعرفين وش يعني قهر الرجال ما أبتسم ثغرك لـغيري رجل

15

لو تعرفين وش يعني قهر الرجال ما أبتسم ثغرك لـغيري رجل /بقلمي؛كاملة - صفحة 5
جالسة في قصرها الفخم تحديدا في مجلسها حاطه رجل على رجل وسرحانه في الفراغ اللي قدامها ..تذكرت شكلها كيف كان ..شلون نحيفة ..شلون تناظر ..كأنها مهزوزه من داخلها ..او كأنها مسلوب حقها منها تنهدت ورفعت راسها وهي تشوف الخدامه تدف الكرسي المتحرك ل ابو وليد وقفت واتجهت للكرسي واخذته من يدين الخدامه و قربت الطاوله وجلست وهي تقول بلطف : شلونك اليوم
ابو وليد ابتسم : الحمدلله بخير
حنان وهي تبتسم : ان شاءلله حسيت بتحسن بعد جلسة العلاج الطبيعي
ابو ليد وهو يأشر على رجوله ويبتسم : زي ماتشوفين ..الحمدلله على كل حال
حنان تبتسم : الحمدلله
ابو وليد : متى بيوصل وليد
حنان وهي تناظر الساعه : عقب نص ساعه ان شاءلله
ابو وليد يتنهد : مقلقني هالولد يا حنان
حنان تناظر فيه : وليد ..وش مقلقك فيه يا سالم
ابو وليد : حاله مايل ..هو و ولده ..من عقب مرته وهو متردي .. و ولده من يد خدامه ليد وحده ثاني و بنفعال : حتى كلامه يا حنان ولهجته صارت مثلهم ..ماهوب عاجبني حاله ..يبغى له مره تداريه هو و ولده ..موب حاله ..هذي اللي هو فيها
حنان بلطف : قل لا اله الا الله ..بتنحل ان شاءلله
ابو وليد بقلق : صعب وليد يا حنان وانتي ادرى
حنان : ب احاول اقنعه ..لا تخاف
ابو وليد : ليته يسمع كلامك بس
حنان بهدوء :اصمل انت تزوجه ..وانا عندي له بنت تناسبه
ابو وليد وهو عاقد حواجبه : من بنته
حنان : هذي يا طويل العمر العايلة اعرفها من قديم وهالبنت يتيمه ..ابوها ميت من عمر وعايشه عند عمها و مرته ظالمتها ..و ماكله حقها
ابو وليد : وامها ..
حنان ب ارتباك : ا..امها ميته من زمان
ابو ليد : و كيفها و كيف اخلاقها
حنان بصدق : البنت محترمه ..وخلوقه ..و كل من عرفها مدح فيها ..قد خطبها محمد ال... بس مرت عمها رفضت ..
ابو ليد ب استغراب : ليه ..محمد ال.. ماينرد
حنان بقهر : نجاسه فيها ماتبيها تاخذ واحد اعلى من بناتها
ابو وليد ب استغراب : شلون تزوجينها وليد اجل
حنان : هذي محلوله ..بس خل وليد يوافق
ابو وليد وكأن الفكرة اعجبته وقال ب اصرار : ان شاءلله انه بيوافق لف راسه وهو يشوف سالم ولد وليد يدخل عليه وهو يركض ب اتجاهه ويصارخ بفرح : باااااباااااا
لمه ابو وليد وهو يضحك : هلا هلا بالذييب وش فيك تصارخ
وليد وفي فمه حلاوه : بابا ..انا في روح سيارة
لف على حنان وهو يناظرها : شفتي ..لهجته ماهيب لهجتنا لهجة خدم
ابو وليد : اول شي قل انا بروح بالسيارة
سالم : انا في روح سيارة
ابو وليد :لا يا بابا قل انا بروح بالسيارة
سالم بضجر : انا بروح بالسيارة
ابو وليد : الله يهديك ..طيب وين بتروح
سالم : انا بروح بقاله
ابو ليد وهو يضحك : ابشر من عيوني ..بس ليشب تروح
سالم بتفكير طفولي : ب اشتري ماما
حنان وهي تناظر ابو وليد بعدين تناظر سالم : بتشتري وش
سالم : بشتري ماما زي حمودي عنده ماما
ابو وليد يهز راسه ويناظر حنان : شفتي ..انا قايل من اول الولد يبغى له ام
رفع راسه وهو ينادي : لطفية ...لطفيه
دخلت لطفية : آمر حضرتك
ابو وليد : وش صاير اليوم في مدرسة سالم
لطفية ب استغراب : ماصرش حاقه
ابو وليد وهو يحتظن سالم : الا صاير شي ..وش فيه سالم يتكلم عن الام
لطيفة : اه ..اليوم في المدرسة بدا اسبوع الام الزائرة ..و صاحبوه حمودي كان دوره ..وقاي ومعاه مامته .. يبدو انه اتدايئ شويه
ابو وليد وهو يأشر لها تروح ويلف على حنان : الولد ذا لازم له ام
حنان تهز راسها : ان شاءلله ان ربي بيكتب له الخير ..اهدا
هز راسه وهو يفكر في حفيده اللي قدامه ومستقبل ولده

رن جوال ابو وليد رد وهو يقول : السلام عليكم
وليد : وعليكم السلام ..حي الله الوالد
ابو وليد : الله يحيك ..شلونك
وليد : بخير الحمدلله ..شلونك انت طمنني عنك
ابو وليد : بخير الحمدلله .. كم باقي لك وتوصل البيت ابيك في موضوع مهم
وليد : عساه خير يا ابوي
ابو وليد : خير ان شاءلله
وليد : يالله كلها نص ساعه وانا عندك
سكر من ولده وفي باله قرار لازم يتنفذ لو مهما كلفة الامر

ــــــــــــــــــــــــــــــــــــــــــــــــــ ــــــــ
في بيت نور كانت جالسة في الصاله تقلب في جوالها دخلت عليهها الخدامة وهي تقول : مدام في برا بابا ابو صالح مع هو رجال يبغى يشوف بابا ناصر و ماما
نور وقفت بخوف : عمي ابو صالح
الخدامه : ايوه ماما
نور بقلق : روحي نادي ماما بسرعه
نزلت امها وهي تقول : وش فيكم
نور وهي خايف : ما ادري تقول عمي ابو صالح معه رجال برا يبغونك
ام محمد و كأنها فهمت السالفه : اجلسي هنا ..لا اشوفك طالعه ..و ارقي قومي نادي ناصر اخوك
نزل ناصر وهو يقول : وش فيكم
ام محمد : عمك ابو صالح هنا ..يبغاني انا وياك
ناصر ب استغراب : وش يبي تعالي خلينا نطله له
نور : امانه علموني وش يصير
طلعت امها و وقفت عند الدريشة تناظر ..كان عمها صالح وعياله و ذياب و عبدالله و هو واقف بينهم سيف
فهمت الموضوع وجلست ب يأس وهي تناظرهم يدخلون المجلسس

في المجلس
ام محمد وناصر : السلام عليكم
الكل : وعليكم السلام
ابو صالح بصوت عالي : شلونك يا ام محمد عساك بخير
ام محمد : يارب لك الحمد في افضل حال الحمدلله
سيف بصوته العالي : شلونك يا عمتي عساك بخير
ام محمد بهدوء : بخير الحمدلله ..شلونك انت ..
سيف : بخير والحمدلله
جلست ام محمد والمجلس مشحون ..النظرات بين ناصر و سيف مليانه شرار
ابو صالح : يا ام محمد و ياناصر ..حنا اليوم جاين نتمم اللي ما تتمم من قبل اربع سنين جاين نلم الشمل ..و نرجع نور ل سيف
ناصر ناظر في سيف وهو يقول : توه يذكر ان له مره عندنا
سيف بهدوء : ما نسيت عشان اذكر
ام محمد بهدوء : انا وانت خابرني يا ابو صالح مانيب قاطعه رزق البنت ..بس البنت بنتي و انا لي حق اعرف وش غيبه طول هالسنين ..وش صار ..يوم انه تركها ..
سيف بهدوء قاتل : انا غلطت واعترف ..لكني في ذاك الوقت كنت مجبور وانا مانيب مكذب ولا لي في هالعلوم ..العلم اكيد ..اني كنت مجبور يا عمه ..لك الحق انك تعرفين وكل الحق ..بس للاسف مانيب قادر اقول لك الا شي واحد ..الايام بتين لكم كل شي
ام محمد :.............
ابو صالح : اسمعي يا ام محمد واسمع يا ناصر البنت بنتي و الولد ولدي كلهم من قلبي ..وكلهم عيال اخواني ..لو في سيف شي وشفته بعيوني ماهوب زين لا والله ما ياخذ الجوهره نور ..لكن الحق ينقال يا ام سيف ..سيف مرته نور على سنة الله و رسوله ..والكل عارف انه متزوجين ..الا ان العرس ماتم ... حنا مانبي زيادة فضايح ..الولد موب راكبه شي عيبه يشيله بس البنيه ..من يشيل عيبها عنها
ام محمد : بنتي مافيها عيب ..بنتي بنت متربيه تفهم بالاصول
ابو صالح : بنتك من عرقنا مننا وفينا ..وعشان كذا يا ام محمد جاين حنا نلم الشمل من اول وجديد ..وكل شي تبينه نور بيتم
سكتت ام محمد لثواني وهي تقول : العلم طلع من يديني العلم في يد نور
ابتسم وهو عارف جوابها ومتطم من هالناحية قال : دام العلم معها ناديها نسمع رايها وانا الحين ان ارفضتني ..والله ماتشوفني ..وان وافقت لها كل علم طيب
ام محمد سكتت تفكر لثواني وقالت : بناديها ..بس عندي شرط
ابو صالح : سمي
ام محمد : تدخل بنتي و تتوسط المجلس و تقول رايها ب اعلى صوتها .. و ان رفضت ولا وافقت ماحد يفتح فمه بكلمه
ابو صالح وهو يناظر عياله وعبدالله انهم يطلعون وقفوا وقبل بطلعون
قالت ام محمد : اجلسوا اجسلوا ..خلهم شهود يا ابو صالح ..
ابو صالح يهز راسه
بينما سيف موب عاجبه اللي يصير رفع حاجبه وهو يقول شلون بتدخلها والعيال موجودين
ام محمد ب امر : قم ناد اختك
وقف ناصر و طلع ينادي نور

ناصر وهو يتوجهه لها : نور ..تعالي امي تبيك برا قدامهم
وقفت بخوف : ليه ..ليه وش صاير
ناصر : تعالي بس ..ألبسي عباتك وتعالي احتريك عند الباب
مسكت يد ناصر وهي تقول : وش فيه ..وش يقول
ناصر فك يدها : كل شي بتعرفيه ..تعالي انتي بس
نور بخوف: طيب بجيب عباتي انتظر
رقت فوق وقفت قدام المراية وهي تحاكي نفسها : خلك قوية ..خلك قوية ..أنتي قوية ..لا تخلينه يغلبك ..خلك قوية يا نور انتي ..قوية ..ٌوية
اخذت نفس و لبست عبايتها و لفت طرحتها و جت بتاخذ نقابها بس طرت في بالها فكره فكت طرحتها ولفتها من جديد و حطت طرفها على خشمها وشفايفها نزلت وهي تنادي ناصر : يالله انا جاهزه
ناصر : مشينا
في المجلس كان السكوت سيد الموقف
دخلت من الباب وهي تحاول تقوي نفسها ..و تهديها
نور بصوت شبه عالي : السلام عليكم
رفع عينه وهو يناظرها : وعليكم السلام
الكل : وعليكم السلام
قربت من عمها وباست راسه وسلمت عليه
جلست وهي تسمع صوت صالح : شلونك يا نور ..عساك بخير
نور ترد عليه : بخير الحمدلله شلونك انت ان شاءلله انك بخير
صالح : الحمدلله ماعلي الا العافيه
ابتسمت : جعلها دايمه
كان يراقب الموقف بهدوء مايبين على وجهه أي انفعال الا انه في داخله نار شابه ..مايدري من وش ..هل هو غيره ..او لانها تجاهلت وجوده بالمره ..ولا قهر من صالح ..المهم ان في قلبة نار غير طبيعيه وهو يناظرها كيف جالسة و يدها ماسكه طرف الطرحة و مزينه بمناكير حمراء صارخه و متجاهله وجوده تماما
ابو صالح : نور يا بنتي .
نور : سم يا عم
ابو صالح : انا اليوم جاي .. وبخطبك خطبه جديده من اول و جديد ..جاي يا بنتي وانا ما ابيك تردينني ..و انسي كل اللي فات ..وتذكري اننا عيال اليوم ..هذا سيف جاي و هذا انا جاي وعيالي جايني و اخوه جاي ..نخطبك من جد وجديد ل سيف ..
نور :..............................
سيف بصوت عالي وواثق : انا جاي اليوم ..ارجع اخطبك من اول وجديد .. كانك وافقتي الحمدلله ولاني ذاكر العكس لانه ان شاءلله موب صاير ..وش رايك .. ناظر فيها وهو رافع حاجبه وحاط رجل على رجل
نور تسلل الخوف لقلبها من صوته ..ماتدري ليه خافت من صوته ..حسته ..غير عن صوت سيف الاول ..حست فيه شي من الكرهه ..او الحقد قالت
قالت بصوت عادي جداً : ..موافقه ..

ناظر فيها وحط عينه في عليها وهو يبتسم ويناظر فيها بقوة
لفت ام محمد لبنتها بصدمه وهي تعيد السوال : انتي موافقه
هزت راسها بكل بطء كانت تفكر لو كانت خرساء ..او لو كانت مشلوله ..ماتقدر تحرك راسها .. ناظرت فيها حطت عينها في حينة حست برجفة ماتدري ليش عيونه غريبة ..موب سيف ماهي نظرت سيف ..طال النظر بيني وبينه غيرت اتجاه عيوني وانا اسمع عمي يتفق مع امي ..ماادري وش تقول ..اعيش تحت حالة ضغط غير طبيعي ..موقفي الآن ...ضعفي الآن ..وين راحت قوتي ..و عزمي ..وين كل هذا .. كل هذا راح بسبب صوته و نظرته ..وقفت وانا ماني قادرة اتحمل الموقف وعيوني تايهه ما ادري وين اركزها : انا بطلع
طلعت من المجلس وعيوني وراها ..حسيت بالخوف في عيونها ..حسيت انها كارهتني ...حسيت ب احساس غير ..نور تغيرت ..انا غيرتها للاسوء ..اخذ نفس وهو يلف على عمه ويقول : بعد اذنك يا عمي بكلم ام محمد
ابو صالح يهز براسة :..
سيف : اسمعي يا عمتي ..جيتي هذي اعتبريها خطبة من جد وجديد .. وان كان لك شروط انتي ونور ..انا حاظر ..و شروطك كلها مجابه ..وشروط نور بعد
ام محمد بطول تفكير : شرطي واحد
سيف ناظر فيها :
ام محمد : احترمها ..ولا تكسرها من جد وجديد
استغرب شرط ام محمد ..ام محمد من نوعها ماتقول مثل هالكلام ..اكيد انها حاسه في بنتها ..والاكيد اني صدق عذبت بنتها
سيف : ب اذن الله احسن معاملتها
وقفت ام محمد وهي تقول : الله يكتب اللي فيه الخير لك ولها .. محمد اخوها جاي بعد اسبوع ولازم يصير عنده علم بهالموضوع
هز راسه ابو صالح وهو يقول : انا بتصل عليه ..خلي موضوعه عندي
طلعت من المجلس تاركه خلفها الرجال يتفاهمون على امور العرس
ــــــــــــــــــــــــــــــــــــــــــــــــــ ـــــــــــــــــــــ

جالس على طاولة الطعام وباله مشغول سمع ابوه وهو يكلم امه وخواته
ابو فارس : ترى خطبت لفارس
لفت عليه ام فارس ب انفعال : كيف تخطب له ولا تقول لي يا رجال ..تراه ولدي نفس ماهو ولدك
ابو فارس يبتسم : الوضع جا سرعه بسرعه
ام فارس : حتى ولو يا ابو فارس ..كان مفروض يصير لي علم بهالموضوع