وياكم بنات قصتنا الجديدة
للكاتبه سوزان المندلاوي .. ..
وردة .....
..جنت صغيرة ماعرف شكد عمري ...
جانت دنيا مطر ..والدربونه غركانه مي ..واني العب اروح ركض من باب المطبخ لباب الحوش..وامي بلمطبخ تسوي عشا ..والي اعرفه باباطلع بشغله جان يشتغل يسوي وايرات مال كهرباء ..
.اجه عمي سلمان يعيط وشايل نعوله ويضرب ع راسه. بيهن ..منذر ماات منذر ماات ..اني اباع بلوجهه . اليمي ..كلها طلعت برة..تركض ..ركضت وراهم ...منذر ماات ..وكعد بنص. ...الطينه الي بلباب ويلطم ..بيبي وامي ..ضلن يصرخن ...اني خفت ...رحت تكترت بصف
كن الدجاج ..وكمت ابجي ..منذر بابا ..شنو يعني مات ..جنت دائما اسمع بيبي تكول ..ع جدو ميت وبسما عايش..يعني بابا هسة بسما..يعني بابا مات ..زين اذا بسما ..ليش يعيطون ...
امد..راسي اشوف كلها ..تصرخ وتبجي ..ومنكعه هدومهم من المطر ..رديت رجعت راسي ..لان يخوفون بس يصرخون .. اني ..فوكايه ..سكيفه ..عازله عني المطر ..بس هدومي تنكعن من جوة...
طلعت ركضت من ورة البيت . حتى لا اشوفهم ..
وطبيت للبيت ...البيت فاارغ ..كلها بشارع ..
رحت وكفت باب المطبخ واباوع عليهم ..
الجيران التمت ..وعالم وزلم ماعرفهم...وعماتي وعمامي كلهم ..
هناك ..واشوف يجيبون واحد مدد وشايلي ...
ويركضون بي ...
طبو من يمي اني وخرت ختلت ورة الباب ..
هذا ابويه بس شبي ..راسه مدندل ..باوعت عليه ...
صحت بابا بابا ...
وطلعت ..اشوفهم خلو ..بلهول .والتمو عليه نامو ..ويعيطون ويضربون بروحم ..اريد افوت ماكدر ..كلها عليه ..نايمه ..
ضليت ..اطب..واتحشك بيناتهم وادفع ..وصلت يم راسه ...خليت ايدي عليه ..وبوسته ...
رفعت راسي الهم ..كتلهم هذا ابوية شبي ..ميحجي .مو وراح للسما ..شرجعه
عمي سلمان جرني وحضني ..بس ختنكت منه ومافهمت شي ..اكوله هوة مو بسما شجابة يمنا عمو..
ضليت من ايد لايد لحد ماطلعوني ....طلعوني برة ...
ولزمني نسوان عمي ...وبعد ماشفت ابوية اخر مرة اشوفها بي ...
ايام الفاتحه ...كلها دللتني ..وشبعوني جباسه .ونساتل .ودنانير..
جنت المهن واروح اضمهن. جوة راسي ..
واكول اشتري بيهن طيارة واروح لابوية ...
امي ...لبست اسود ..وضلت الفاتحه كلها تبجي هيه ..بيبي وعماتي وخلاتي ...
بس اني فرحانه بلفلوس ..والنمنمات ...ولعب..بلجادر ...الي ناصبي..اني وجهال عمامي وعماتي والجيران ...
خلصت الفاتحة ...
ورجع كلشي لمكانه ..
لحد جاب الي بعد جباسه ولا فلوس ...
وبدت بيبي ضوج امي ...
وتخليها يوميه تبجي ..
جنت اكعد يم بيبي تكولي..
وردة ..
ها بيبي ..
هاي امج فكر ..ماعرفت تخلف ولد لابوج ..المكرود ..
كرطت راسه ...
اني مافتهم ...
اكولها اي ..
واروح احجي لامي ..وامي تبجي ...
امي جانت شايله بيت جدي بصلوات كله ...
وداري بيبي ..حتى عمي اكله وشربة ع امي ..
لان مرتة وصخه ..واربعه وعشرين ساعه ..
تفرفر بسوك ..
ضلت بيبي وي امي ...هيج ..كبرت وامي يمي ...معافتني ابد ....وجنت يوميه اشوفها الفلوس واكولها ماصرفهن ..لحد منروح لابويه ..تحضني وتبجي وتدعي ع روحها بلموت ...ماعرف شجاوبها ..بس اضل اشم بيها وابوس ....
وسجلوني مدرسة ..وشترولي صدرية زركه ..وبيها ابيض ووشرايط حمر براسي ..وجنطه ...اني كيفت وفرحت ..عبالك عيد ..
جنت يوميه ...البسهم ...وارجع اصفطهن ..
انتظر شوكت اروح للمدرسة...
صارت المدرسة ..و امي ودتني ..
امي جانت حلوة ..وعيونها وساع كحيله ...
لبست عباتها وودتني ...
للصف وراحت ..
بس راحت كمت ابجي خفت ..لاتروح ومترجع مثل ابوية ..وبقيت ابجي..لحد ماطلعونه ...
شكد رادت وحاولت وياي المعلمه اني ابجي...
اول ماطلعونه وشفت امي ..ركضت حضنتها وكتلها عبالي رحتي للسما...
وتضل تبوس بيه وتقنعني ...ماكو شي لا تخافين ..
جنت يوميه ابجي ماريد اروح ..بس امي توديني وجيبني ...
واشوفه تمر بدرب مو درب المدرسه ..ابعد ..
ويوكف بركنها رجال ..ماعرفه يضل من نفوت يباوع ع امي ...يوميه ...ويحاجيها ..لو ياشر الها ..وتكوله من ارجع
جنت اضوج ..منه ..
وتكولي مو تكولين نفوت منا ترة ياخذوج مني ...وبعد مشوفيني..
اني اهز براسي ماحجي ....
........... ........
ضلت بيبي تاذي امي ..
ومرت عمي سلمان هم ..
يحجون عليها ...ويسبوها ...
حتى الي كامو ميحبوني مثل الاول ..
ومرت عمي ..سميرة ..متخليني لا العب وولا اروح يم جهالها ..تصيحلي بت البومه ...
لو وجهه الغراب ..
جانت كلما ..تندار اتفل عليها واغمها ..
لان تحجي ع امي ...
امي جانت فقيرة وحنينه كلش ..
جانت يوميه ...تسبحني وسويلي ضفاير ..وتنطيني فلوس واروح اشتري بيهن ..
واسمعها تدعي ..
ربي علي بخت وردة لا مثلي بختي ...
امي اهلها مو بغداد محافظات ..
محد رادها ...منهم بقت يم بيبي
وحجي بيبي ..
الي اني جنت انقهر منه ..
تكوم وتكعد تكلها ..غراب ..بومه ..طيرتي راس الرجال ..
وامي بس تبجي ..متحجي شي ..
احنه جنه..بلبيت اني وامي وبيبي وعمي سلمان ومرته وجهاله 3 ...عمامي وعماتي كلهم مزوجين وطالعين ..عنه..
مشت السنين وصرت بلرابع ..
وعرفت ابويه ميرجع ولا اكدر اسافر اله ..
وعرفت امي ماعدها احد تروحله ومجبورة تبقى هنا..علمودي
لحد ما فديوم ...
امي اجاها ..رجال من المنطقه يريد يخطبها..
عمي سلمان كال لبيبي ..واني جنت كاعدة يمهم ..
وامي تركب بلمطبخ ..
هنا بيبي ..حركت الدنيا بفشار وغلط ع امي ...
وسب بيها فضحتينه ...شنكول مرت منذر ..
تريد تزوج ..الله لا ينطيج ويوفقج ..عساج متي ولا ابني المات ..وعمي سلمان هم نهد بامي ..
اول مرة اشوف امي تحجي عليهم ...
وتغلط وتفشر ...
كام عمي سلمان ضربها..
اني جلبت برجله وعضيتها ...
لحد ماجرني من كصيبتي ..
وخرت سنوني ...
امي ركضت اخذتني ..وطبت للغرفه ...
لمت غراضنه بقجه وطلعت ...
بس شافوها..طلعت..من الغرفه جروني منها ..
ودفع دفع ..طلعو امي من البيت ..بشارع
وضلت امي تبجي واني ابجي واصرخ يمه يمه..
وللحكاية بقية
