طردو امي ..
ومرت عمي ..جرتني وحبستني بلغرفه ..
ضليت اصرخ وابجي
لحد فتح الي باب ..ولا احد رجع الي امي ...
يوم ورة يوم امي ماكو
يومية ابجي ..لحد مانام ..
مكانها فارغ ومو دافي ...
وريحتها الي اغفه عليها ماكو ..
ولا خدها الي ابوسه موجود ..
ولا اسمع ..تغنيلي ...وردة ..بعد كلبي وردة بعد بيتي ..وردة روحي ..كل الناس عدها ..شوك ..بس اني عندي ..ورد
صوتها كام يروح عني ...
بقيت 10 ايام ..
لا اقبل اكل ولا اشرب ..
لحد ماوكعت وودوني للمستشفى ...
ماعرف شسوالي ..بس كلهم حاله نفسية ...
بيبي جانت تكرهه امي ماعرف ليش ..
حاولت ويايه ..علمود الاكل ..ومقبلت اروح مدرسة ..
وهم ماقبلت ......جبرتني ارجع
رجعت للمدرسة ...كمت اروح وحدي واجي ووحدي ...
الدرب مر...وخطوته ..تخنك ..فاارغ رغم ما الناس تروش بي...كلما امر بدرب الي جانت تفوتني بي ..اني .اوصل يم الركن واوكف اكول هسة تجي ...
بس لا جتي ولا مرت علية ...
مر اسبوع ..وفديوم بلحلة ..المدرسة
طلعت ..واشوف امي ..ركضت عليها وضليت ابوس واشم بيها ..كتلها لا تعوفيني يايمه ...
واشوف ذاك الرجال الي جان يوكف بلكرن واكف الها من بعيد ...
شبكتني وبوستني ...
شونج وردة ...
ضليت مجلبه بعبايته ..وابجي ..
كالت يمه وردة ..
اني ازوجت ..وماكدر ارجع لبيت بيبي ..
كتلها اخذيني ...دارت وجهها ع الرجال
كالت موهسة ..بس استقر ..
اشرت كالت هذاك رجلي ..
خليت راسي بحضنها ..وغطيت وجهي ماريد اشوف احد بس امي
يمه لا تعوفيني ..لاتعوفيني ابد ...
كالت يوميه اجيج وخلت بيدي فلوس ..
وبوستني وراحت ...
وكالت لا تكولين لبيبي اجي ولا لاي احد ترة ماكدر اشوفج بعد ....
هزيت براسي ..لا ماكول
شفتها عبرت ..وراحت وي الرجال ..
وراحت
الدرب كله ابجي ..
لحد ماوصلت البيت ..
طبيت ..ذبيت هدومي ..
ورحت يم بيبي كتلها اريد امي ...
هنوب كامت تحجي علية ...
وسب بامي ...
وع حسها طلعت مرت عمي ...
وكفت بصفي ..وكرصتني حيل من زندي ..
واني اكمز واتلوة من الالم ...وكالت
هاي مثل امها تريد تموتج شون ماموتت الرجال ..امها ..
ضليت ساكته وبس دموعي تجري ...
كمت انتظر يوميه اروح للمدرسه
حتى اشوف امي
ومن اكو عطلة ..
اضوج بس اكضي وكتي ..يم كن الدجاج ...والعب وياهن ..
ماعاد احد يهتم بيه لا بشعري ولا لبسي ولا اكلي..
بس بيبي ..وكوة تمشي ...وداري بيه ..
صح تحبني ..وتنطيني فلوس ..بس اني اريد امي ...
كرهت الكل بس مجبورة ابقى ..وانتظر امي تاخذني ..
يوميه امي تجي ..اشوفها ..وماشبع منها ..كامت تشترلي الي قراصات..ونساتل ومرة جابت لعابة الي ..شعرها برتقالي ..وعيونها زرك ..ولابسه فستان ..ازرك تخبل ...
ومن رجعت كتلهم المعلمه انطتها الي لان شاطرة ..
جانت شجيب امي
اني اضمه...بلدولاب مال امي ...حتى لحد يشوفها ..وياخذها مني ...
خلصت السنه ..ومرت العطله ..واني اموت بس اريد اشوفها ...بس تعلمت صح يوميه ابجي . بس احضن العابة واكول..باجر تجي تاخذني ...
يوميه انتظر باجر ...
مرت عمي كامت تشغلني بلبيت علمتني اجلف المواعين واشطف الحوش ...
ذبت شغل علية ...
صعدت للخامس ..اول يوم مدرسة واني عندي عيد راح اشوف امي ..
خلص اليوم وطلعت وضليت واكفه واعاين ع الناس..راح جايه بس ماجتي امي ..
معقولة نست دوام ..
كلت باجر تجي ..
وضليت انتظر ..
وماكو ...
لحد مايوم الصبح بروحتي جتي ..
وجانت بطنها عاليه ..
حضنتها وبوستها
كتلها ليش تاخرتي يايمه ..يوميه اتانيج ..
ماعوفج اجي وياج مشتاقه الج ..
يمه حتى نوم ماكدر انام ..
ومرت عمي ..تاذيني ..
ومد يحبني هناك ..اخذيني..
امي بس تبجي كالت ..
وردة اني رايحه للكوت
وماكدر يوميه اجيج ..
اخذيني للكوت ..
ماكدر حبيبه ..
انتي كبرتي ..وردة ..وضلي يم بيت بيبي ..لحد ماني اكدر اخذج ..
ضلت تبجي وتبوس بيه ..
وفتحت جزدنها ..
عرفت راح تنطي فلوس وتروح ..
جلبت بعبايتها ..لا تعوفيني يمه ..
ابوس رجلج ..لاتعوفيتي ..
ضليت ابجي بشارع والعالم تباوع ..
اجه رجال جرني عنها ..ولزمني ..
وخلت بجنطتي فلوس ..
وكالت وردة سامحيني ..
وراحت هيه وهذا الرجال الي لزمني صعدت سيارة ..
ضليت اركض وراها لحد ماتعبت ووكعت بلكاع ...
راحت امي وبعدها ماشفتها ...وعرفت راحت بعد ...
كمت ..مادرس وارسب بلمدرسة ..
سنه .ورة سنة .رسبت ..
فديوم
وعمي راح لبيبي كلها ...
خوما نبقيها وهيه ترسب انبطلها احسن ..
وتساعد سميرة بلبيت بيبي مقبلت ..
كالت لا اكو احد يدرسها ..ولا احد مهتم بيها طبعا ترسب ..
ضاج عمي من كلام بيبي ..
كلها ماتشمريها ع امها ...
زوجت وراحت للكوت دزيها ..
بيبي مارضت ..
وكالت دام نفس بيه بت منذر ماتطلع من البيت ..
بيبي ..جانت متخلي احد يضوجني ..وياذيني ..بس ...
ماتعرف الي يصير بلبيت ..جنت اشكي الها ..تتعارك وي مرت عمي ...
بهلسنه ..كعدوني ..بلبيت ..وذبت عليه مرت عمي كل الشغل ...
فوك راسي..
بيبي تعبت ..ومثل الاول بحيلها ..ومتكدر لسميرة ...
كامت تسكت .....
اني عرفت ..هذا بيتي ..وماعندي احد بس بيبي...
وعمي ياخذة صبح ويجيبه لليل يادوب ياكل لكمه وينام ..
بيبي تعبت وتمرضت ..
اني كبرت صار عمري 12 ...
سنه كمت اداريها ..
كامت تحن لامي ..ومداراتها الها ..وتعض اصبع الندم طردتها .....وبهذلتني ..
وتكول امج عشكت وفضحتنه بلمنطقه ..
لوما هيج ..جان بقينها...يمنه ...
بس كمت ماسكت ...الهم ....
صح ..اشتغل ..بلبيت ..وادراري بيبي ..
بس الي يجيب طاري امي ماسكتلة...
بس بقيت انتظرها تجيني ..بيوم وتاخذني ...
وللحكايه بقيه ...
