أمير :"فيصل ممكن شاي أني بغرفتي
فيصل :"صار دقائق. .
فيصل :"ملك ممكن تصعدين الشاي الأستاذ أمير اني مشغول بالغدة
ملك:"أي اكيد ،،،
أمير ..كان كاعد على الكرسي ويتصفح. ..
ملك:"تفضل أستاذ هذا الشاي
أمير :"شكراً ملك خلي هنا
ملك..كنت اباوع على اللابتوب وأمير فاتح فيس ومطلع صورة ،،،
أمير :"تحبين الفيس ؟
ملك:"بصراحة ما اعرفلة
أمير :"معقولة؟ يعني ما عندج حساب؟
ملك:"لا اصلا ما اعرف للفيس
أمير :"سهل جداً جيبي ذاك الكرسي وتعالي يمي راح اعلمج شلون تستخدمي
ملك:"لا أستاذ شكراً ما أريد اعطلك
أمير :"لا ابدا ما عندي شغل حالياً تعالي اكعدي، ،،،
ملك..بدأ أمير يعلمني تقريبا ساعة ماحسيت بالوقت ،،،
ملك:"شنو هاي أكثر من 3000 لايك على صورتك الشخصية
أمير :"أي ههههه عندي هواية أصدقاء هاي عود قبل أيام غيرتها حلوة؟
ملك:"كولش حلوة وين ماخذها؟
أمير :"بتركيا
ملك :"المكان رائع
أمير :"أي أحب البحر والخضار اعشقهم
ملك:"مثلي بس عمري ماشفت بحر
أمير :"من نصيف ناخذكم ويانة انتي وزينب
ملك:"صدوك تحجي؟
أمير :"أي وعد،،،،تحبين اسويلج حساب فيس؟
ملك:"ياريت بس خاف اتعبك؟
أمير :"لا ميطول أقل الربع ساعة
ملك:"وين تسوي بهذا اللابتوب؟
أمير :"لا بموبايلك
ملك:"ماعندي موبايل
أمير :"هاي شنو وين عايشة انتي بسيطة الموبايل علية العصر اروح اجيبة
ملك:"لا أستاذ هواية علية
أمير :"ليش هواية عود احسبة الج بالاقصاد هههه تدرين احنة عدنة أكبر شركة أجهزة بالعراق
ملك:"الله هواية أحب الأجهزة الحديثة
أمير :"تحبين أجيب لابتوب ؟
ملك:"ما اعرف منو احسن؟
أمير :"الموبايل أفضل لأن راح يكون بجيبج وين مترحين واخليلج بي سيم كارت
ملك:"شكراً أستاذ
أمير :"من يصير بيدج اشكريني ههه
هسه المهم راح اسويلج حساب بلابتوبي ومن أجيب موبايل تفتحين صفحتج
ملك:"اوك.
أمير :"شتحبين أسميها؟
ملك:"أمم ملك وزينب
أمير :"هههههه زينب شدخلها هذا حساب شخصي
ملك:"مو هية وياية بكولشي
أمير :"لا غير اسم
ملك:"انت اختار
أمير :"شنو اسمي شنو اسمي برائة ملكة شنو رأيك ؟
ملك:"الله يجنن
أمير :"ههه اوك خلصنا من الأسم عندج صورة حلوة؟
ملك:"لا لا ما أريد اخلي صورتي
أمير :"اوك راح اخلي صورة على ذوقي وبعدين انتي غيري
ملك:"هاي شنو كملت؟
أمير :"أي كملت بس لازم اتضيفين أصدقاء على الأقل خمسة حالياً
ملك:"بس اني ماعندي أصدقاء
أمير :"أولا راح ابعث صداقة الأمير العراقي
ملك:"منو هذا؟
أمير :"ههه اني هذا اسمي بالفيس
وادز السمير وبعدين انتي الي يعجبج ضيفي
ملك:"اوك شكراً الك
أمير :"هاي شنو جايني طلب صداقة
ملك:"منو هاي ؟
أمير :"هاي انتي نسيتي اسمك برائة ملكة احفضي
ملك:"اها ههه شوية شوية اتعلم
أمير :"امممم أوافق عليج لو لا ؟
ملك:"براحتك
أمير :"اكيد أوافق
أمير :"شوفي سمير بسرعة وافق ودز مسج ههههه
ملك :"عرفني؟
أمير :" لا طبعاً بس سمير بس كون بنية شنو رأيك ننصب علي ههه
ملك:"هههه لا خطية
أمير :"شوفي لأنه صادقتي سمير وأمير طلعوا أصدقائهم بأصدقاء قد تعرفهم لتدزين لأي واحد اوك؟
ملك:"اوك ،،،
أم سلمان :"ملك انتي هنا وندور عليج
ملك:"آسفة جبت الشاي الأستاذ أمير
أمير :" هههه برد الشاي وما شربتة
أم سلمان :"عوف الشاي أنزل اتغدة
ملك:"رايحة أساعد زينب ،،،،
زينب :"وين جنتي خلصنا وصبينة؟
ملك:"أمير سوالي صفحة على الفيس
زينب :"كذذذب
ملك:"والله وكال راح يجيب موبايل
زينب:"هلة عيني وأني الفقيرة الي الله ههه
ملك:"انتي عندج موبايل، ،،،
أمير :"شلونك عمو
أبو علاء:"أهلا أهلا بأستاذ أمير
أمير :"ليش منايم لحد الآن؟
أبو علاء :"انتظرتك حتى اقفل الباب
أمير :"اوك تصبح على خير، ،،،،
********
ملك:"زينب يمكن اجة أمير
زينب :"أي وشنو ؟
ملك:"لا هيج اكول
زينب:'اني نعست تصبحي على خير
ملك:"لج الباب اندك
زينب:"منو يدك باب الغرفة بهيج وقت؟
ملك:"منو
أمير :"اني أمير شنو نايمين؟
ملك..فتحت الباب شوية لأنه كانت لابسة ملابس النوم ،،،
ملك:"خير أستاذ أمير ؟
أمير :"تعالي جبتلج فون
ملك:"دقيقة أستاذ بس اغير ملابسي
أمير :"اوك منتظرج بالمطبخ راح اشرب قهوة ،،،،
*****
زينب:"اممممم بركاتك ياشيخة ملك
ملك:"ولي عابتلك هههه ،،،،
ملك:"مساء الخير
أمير :"مساء النور تفضلي هذا الفون وبي سيم كارت وفايبر والفيس
ملك:"شكراً أستاذ تعبتك
أمير :"تستاهلين شوفي بس تدخلين على الفيس تلكين حسابك ماخرجت منة وجايتك طلبات صداقة
ملك:"اوك راح أضيف بس بنات
أمير :"على راحتك
ملك:"تصبح على خير
أمير :"وين سويت قهوة مال نفرين ههه
ملك:"انت سويت أستاذ ؟
أمير :"رجاءاً بلا أستاذ اضوج منها أمير وبس
ملك:"تعودت اكول أستاذ
أمير :"كولي أمير كوليها
ملك:"لا أستاذ أمير ما اكدر
أمير :"هم كالت أستاذ كولي أمير واتساهل وياج بأقصاد الفون هههههههه
ملك:"ههههه شكراً أمير
أمير :"الله شوفي شلون سهلة
ملك:"أي أستاذ بس
أمير :"رجعت الأستاذ
ملك:"يووو قصدي أمير
أمير :"اول مرة أحس اسمي حلو بلة عيديها أمير الله أمير
ملك:"ههههه شنو اني هيج صوتي ناعم ؟
أمير :"اصلا مثل النغمة امييير عيديها بداعتي
ملك:"تصبح على خير أمير
أمير :"وأنتي بخير عيون أمير ،،،
أمير ...ليش ارتاح من احجي وي ملك ليش تختلف على كل البنات الي عرفتهم اكو شي غريب بهاي المخلوقة بس ما اعرفة شنو !،،،
******
ملك :"لج زينب كومي كومي
زينب:"شكو شبيج فززتيني ؟
ملك:"اضربيني
زينب :" اضربج؟
ملك:"أي ولج ضربيني كرصيني
زينب:"انتي ملك لو غيرج؟
ملك:"لا مو ملك اني انسانة ثانية اليوم انولدت
زينب:"لا لا اكيد تخبلتي وشنو هذا الفون؟
ملك:"من أمير هذا الفون من أمير
زينب:"أمير بدون أستاذ ولا شي؟
ملك:"هوة يكول هيج أحلى
زينب:"تعالي سولفي شصار وشحجيتو ؟
ملك:"ما ادري شصار ولا أتذكر شحجينة
زينب:"هل مرة صدك راح اضربج لج روحي شوفي وجهج بالمرايا صايرة حمرة وعيونج تلمع شنو شكو؟
ملك:"لحظة هسه اسولفلج كولشي، ،،
*******
زينب:"كومي ملك الساعة بثمانية ونص
ملك:"عوفيني نايمة
زينب:"لج كومي كعدو من وراج البارحه بقينا لتلاثة كاعدين
ملك:"انزلي اجي وراج ،،،
ملك..طلعت من غرفتي امشي صادفني أمير طالع من الحمام كان لابس بدي أسود وبجامة أزرق ويفرك بشعرة بالخاولي ومن شافني رايحة للحمام وبيدي ملابسي وبدون حجاب نزل الخاولي شوية شوية وعينة علية ،،
أمير :"صباح الخير
ملك:"صصصصباح النور وغطيت شعري بالخاولي
أمير :"هههه يلة براحتك ،،،
ملك..صح كلما اشوف أمير أنيق ومرتب بس بكوشتة بعد أحلى ههههه، ،،،،،،
يتبع
