الحب الخجول

الجزء 01

الرواية دي انا كتبتها بدري.. في شكل قصة قصيرة.. لكن انا يتخيلي .. بتحمل معاني سامية شديد جدا .. عشان كدا المفروض تحظى باعتبار ومتعة اكتر شوية .. فعدت صياغتها لما فيها من الفوائد

والعلم ..

مدرسة ثانوية.. بتاعة بنات متواضعة جدا ..وجميلة .. مع انو المدرسة مبانيها بسيطة.. لكن مهتمين بيها جدا .. وضاربينها جير وبوماستك لبني كلها .. وبره وفوقها لافتة كبيرة .. مدرسة الجراجير الثانوية بنات .. والبوابة كبيرة ..من تلاتة ضلفات بتدخل قندران ..

خلي عربية صغيرة .لمن يجو الموجهين بالعربيات الحكومية بدخلو جوة .. بي عرباتهم ..طوالي ..

والمدرسة فيها شكل حديقتين كدا بتاعة نجيلة مسورات بي طوب مغزغز في الارض .. سيافي .. وبيناتهن ممشى ..

المباني بتاعة المدرسة في شكل صف واحد ..فصول اولى و تانية من الناحية الشرقية.. بتجي بعديهم المكاتب.. مكتبين بينهم برنده ..مكتب الاساتذة شرقي.. ومكتب المدير غربي ..والمدير معاهو الوكيل في مكتبو .. وبعداك فصل تالتة في الناحية الغربية اخر شي .

وبوابة المدرسة فاتحة غرب ..

هناك في الناحية الجنوبية في ميز . وبوفي فيهو سندوتسات وشاي وكدا .. وجنبو طوالي المزيرة .. والحمامات بتاعة الطلبة في الركن الجنوبي الغربي .. وحمامات الاساتذة في الركن الشمال الشرقي ..

دي تقريبا الخرطة التقريبة للمدرسة ..

مدرسة عجيبة ورهيبة ..وفيها روح وهدوء غريب ..حتى الجوطة المعتادة ..البشتكو منها جيران المدارس مافيها .. وده كلو بي سبب المدير استاذ فارس .. الاستاذ فارس اصغر الاساتذة ما اكتر من 33 سنة . لكنو هو المدير ..الوكيل اقرب ليهو في العمر اسمو عبد الرحمن .. وهو صديقو المقرب ..وشغال معاهو في نفس المكتب ..

استاذ فارس خبير في الرياضيات .. عشان كدا كتير براجع لناس تالتة الرياضيات وزول تحفة ..

اصلا ما بميل للجلد .. لكن عندو كلام لاذع.. احسن منه يجلد البت خمسين صوط ..

وزول مهذب شديد .. ودايما مبتسم.. ووجيه وجاهة مكسر البنات لاحدهن ..ولبيس نضيف نضافة لدرجة .. ولازم المدرسة المدرسة دي ..يوميا تكون بتلمع ..من النضافة ..والا المدير بكون متوتر ..

المدير فارس محبوب حب شديد من الطلبة والاساتذة .. وفي استاذتين .. الاتنين متنافسات عليهو.. مع انهن مامناسبات ليهو في العمر ..واحدة عانس والتانية مطلقة .. بس هو مافاهم اي حاجة .. وبنات تالتة ديل ..اسكت ساي .. عاشقتنو عشق عديل .. جت عليهن .الواحدة فيهن تتمنى تدخل مكتب المدير .. عشان تشوفو ..

وقت يجي داخل من برة ..ماشي على مكتبو ..كلهن يمدن روسيهن بالشبابيك يقعدن يعاينن ليهو ..

هو زول بالمناسبة مكمل.. الكمال لله ..بس عندو عيب واحد ماقدر يتخلص منه بنعرفو لي قدام ..

فارس ده كان خاطب بت خالتو.. اسمها منال ..ناس الحلة مسمنها (منال شطه) . .. ومنال باعتو قبل سنيتن ..بي سبب واحد مغترب .. وكان دخل في حالة نفسية ..لكن هسي اتجاوز الامتحان ده .. لي قدام هو حيكي قصته معاها ..

اها كان في الايام دي يادوب مضى شهر لبداية السنة ..

حصلت قصة ..بنات تالتة طبعا في مرحلة مراهقة.. ومحتاجات لي معاملة خاصة ..

ونستهن كلها في المدرسة ..استاذ فارس استاذ فارس .. ونسبة لانو زول دغري ..ومهذب ..مافي واحدة قادرة تتكلم معاهو كلمتين ورا بعض .

اها يوم من الايام ..في بنات صحبات كدا بتونسن.. واحدة اسمها أريج . . بت حلوة .. ماشاء الله . زي الوردة المتفتحة . وعليها جنس عيون ترمي في الشوك . وبت مسلطة وبتاعة كوارث .اها اريج قالت لصاحباتها ..والله انا الليلة كان اشاغل استاذ فارس في الفصل .. واشوف ردة فعلو ان شاء الله يطردني ..

لازم اجازف احتمال يقع في الحبكانة .. البنات قالن ليها انتي كذابة..

مابتقدري ..بتتفاصحي معانا هنا ساي.. لكن مابتسوي الحبة ..

قالت ليهن كويس بتشوفن .. انا اصلي قنعانة قنعانة ..وهو انا عارفاهو مستبد ومتكبر احتمال يطردني 90 % ..

وطبعا الليلة بالذات.. استاذ فارس عندو حصة رياضيات معاهن .. والبنات متوترات ..وخايفات من البت تقوم تعمل العملة .. هو دخل الفصل ماشايل كتاب ولا اي شي .. اصلا بجي يدرس من راسو.. زول مبالغة في الرياضيات .. معلم معلم ..

وبدأ في الحصه اول حاجة سلم عليهن..

ووصاهن قاليهن انتن طبعا" املي الوحيد.. في نجاح المدرسة وفشلها .. والحمد لله انا مبسوط منكم ..ومن ادبكم واجتهادكم .. طبعا انتو السنة دي احسن من بنات السنة الفاتت ..عشان كدا انا مبسوط ونفسياتي مرتفعة ومتفائل ..

طبعا قال ليهن كلام .. كل البنات القبيل كانن مع اريج .. اتمنن انو اريج تغير رايها من قرارها .. عشان ماتخيب ظن الاستاذ الطيب ده في بنات الفصل ..

لكن طبعا" سبق السيف العزل ..والبت المتهورة اتكحلت ومسحت شفايفها .. بي مرطب .. وبقت تتململ .. والاستاذ الجميل بدأ يشرح بكل ذكاء ولباقة .. والبنات ديل بس عيونن مسمرات فيهو .. وفاتحات خشومن زي الهبل ..واظنهن مافاهمات حاجة للرياضيات .. لكن سبحان الله حصتو دي اكتر حصة بفهمنها وبصمتن فيها ..

اها اريج زي.. بس منتظرة فرصة انو يواجها بي عيونو القاتلة عشان تنفذ قرارها . في المجازفة الناوية عليها ..

اول ما قبل عليها ابتسمت .. وهو شاف ابتسامتها . لكن عمل فيها ماشايف حاجة وما ملاحظ ..

وبقى تاني مابقبل عليها .. هي قاعدة في صف المقاعد التاني وهي نمرة اتنين من الشباك .. على يدو اليمين ..

والسبورة عبارة عن اسمنتي.. مضروب بالبوهية السوداء.. في الحائط الغربي.

المهم بدون فارس مايشعر وفي اثناء اندماجه في شرح الدرس ..قبل على جيهة اريح ..قامت البت (جبكت) غمزت ليهو عينها الشمال.

الاستاذ ده .اتخلع زي الفي زول محطو صوط ..والطبشيرة وقعت من يدو ..

يتبع....