خانة الذكريات

املاك

#خانة_الذكريات
الفصل الثالث عشر
#قصص_اسراءالجميلي

و محل ذهب بعمارة الرواد على الشارع العام حتى من تروحله ..
قريب عليك متحتاج سيارة و متتاخر عليه ..
و بيت ٢٠٠م بالمنصور دبل فاليوم وره الرواد ..
انتِ صدك تحجين ؟
لارا : شوف الاوراق الي يمك و تعرف ..
و اكيد حبيبي احجي صح .. كُلي و ما املك الك ..
تستاهل كل خير انت ..
تحجي و بعدها لازمه ايدي اليسار و تحرك بابهامه عليه و تسوق مسيطرة ..
ودتني الفندق بابل دا نتريك ..
صاحت البوي ..
لارا : وين مدير صالة الاعراس ؟
البوي : هسة اصيح الج ست ..
صاح اجه سلم عليه بالايد كالعادة ..
و كعد ويانه طلبنه الريوك ..
لارا : هاا استاذ بعده الحجز مو ؟
المدير : اي بس تكملين بقيت الفلوس لتأكيد الحجز ..
فتحت جنطته طلعت دولار ابو ١٠٠ ما اعرف شكد انطته ..
اخذهم حسبهم و راح ..
هاي شنو يا حجز ؟
مال عرسنه .. مو زواجنه يوم الخميس انت قررت ؟
هااا اي صحيح ..
لارا : فانت اول مكتلي اني اجيت حجزت ..
هاااا بالخير عليج ..
لارا : جه جه جه ..
و تحرك باصبعه السبابة بيده اليمين ..
لارا : بالخير علينه سوة ..
ابتسمت ..
اي اي اكيد علينه سوة ..
تريكنه و طلعنه رحنه البيتهم ..
يخبوول .. شكد ما اوصلفكم مينوصف ..
بيت يمكن الف متر بالنص البناء و داير مدايرة حديقة بالاحلام ماكو ..
بجهة اليمين نافورة وسطية ام الالوان ..
بجهة اليسار مرجوحة مغلفه و طقم كعدة مال حديقة جوزي خرافي ..
دخلنه ليجوة بيت بالاحلام و فتحتنه الباب الخادمة ..
الثريات نازلة من الطابق الثاني للاول ..
الاثاث كله ارابيسك الخشب المصري الاصلي ..
يلمع لمع البيت ..
التحف مشايف منها حتى بارقى محلات الكرادة و المنصور و العرصات ..
تلكاني عمي واصلين قبلي ..
عمي : شلونك سرمد .. الف مبروك ابني اخيراً عرفت تختار ..
طالع على عمك ذكي و تفتهم مو تضيع عمرك كله مثل ابوك و تالي بيت بالسيدية هههههههه ..
طبعاً اني اسمع صوته بيه صدى و بعيد كالعادة ..
اني بس ابتسمت : الله يبارك بيك عمو ..
و ابوهه كلشي ميحجي .. طابك على صفحة ..
كل الحجي ال امهه و اخته الجبيرة ..
و هيه كاعدة بصفي ..
قرينه الفاتحة ..
اني بديت بيه وصلت لحد الآية ( اهدنا الصراطّ المستقيم )
و بنجرة مكدرت اكمل اباوع عليهم و اسمعهم يحجون اصواتهم بعيدة كملوها كلهم و مسحوا وجوهم و اني اعيد و اصقل و ما اكدر اكمله و ايأست و استحيت منهم و حتى ممسحت وجهي لان مكملتهه اني ..
اتفقنه على العقد بالمحكمة باجر ..
بعدها رحنه نتغده بغرفة الطعام الي بيه بس بوفية ناصية ..
خالين بيه مواعين و ادوات الاكل مال الخطار
ميز طعام امبين توصاه .. بيه ٣٠ كرسي ..
اتغدينه يمهم ما لذ و طاب من الاكل ..
اكلت قليل ..
لارا : شبيك حبيبي اكل ؟
ما بيه بس من يوم تمرضت نفسي تلعب من الاكل ..
لارا : اي حبيبي حقك .. مرضتك قوية جانت ..
الحمدلله على سلامتك و رجعتك اليه ..
ابتسمت و سكتت ..
اكلنه و صار موعد رجعتي من المعمل اترخصت منهم و طلعت ..
دا اطلع اجتي ويايه للباب ..
مديت ايدي اليسار افتح الباب البره ..
لزمتهه الايدي اوكف حبيبي غير اودعك ..
مديتله ايدي اسلم عليه ..
جان تحضني راساً ..
لارا : احبك موت ..
تحتاجين شئ علمود الحنه و الزواج ..
مديت ايدي بجيبي دا اريد اطلعله فلوس ..
جان تضحك ضحكة العاهرات الي بالتلفون و سمعته ضحكة شريفه ..
لارا : حبيبي ميحتاج بعد عندي فلوس كومة ..
مو عبالك خلصتهم عليك ..
هههه اي صح نسيت ..
و طلعت .. رجعت للبيت ..
دخلت المطبخ اظلم عرفت امي ماكوو ..
ارتاحيت صعدت فوك راساً لكيت قرد و عبودي بحضنه على القنفه ..
رحت ركض اخذته منه .. هاي شدا تسويله تخبلتي ؟
هاي شبيك سرمد ؟ انت الي تخبلت ..
لج احترمي نفسج .. ادبسزز ..
فتحت عينهه عليه ..
شنو شكلت ؟ تغلط عليه ؟
اغلط و انعل سلفه سلفاج اذا قللتي من احترامي ..
و انداريت هيه صافن عليه بعد ما عدها كلام ..
حجت جملة وحدة ..
لحد هذا اليوم صداها بأذني ..
( سرمد الي يبتعد عن ربه كلشي بحياته يتعبهه )
يعني شنو قصدج ؟
قصدي من تمرضت لسه ممصلي انت ..
فلازم تتعصب و اتاذي نفسك و تاذيني ..
اشتغل عمرو خالد براسي ..
دولي بابا ولي ..
خليني انخمد و اخلص منج ..
بقلبي حجيت : هذا شبيه الرجال احسه مكلوب على الابطانة .. كلمة لج جان يكوله بالشقة ..
غلط طول السنة و العشرة اشهر مال زواجنه مغلطان عليه و لا مقلل من قيمتي ..
آآآآآه ربي كفينه شر المغطايات ..
الم قلبي احسه حيوكف و الله ..
قررت باجر احجي الخالتي على تغيره بلكي تلكالي حل ..
ثاني يوم كعد كالعادة يلبس و يمشط و كلشي على كيف ..
اني مصدومة من تصرفاته ..
الهالدرجة كارهني ..
بقيت ابجي و بس انتظرة يطلع لان اختنكت بدموعي و سكوتي ..
نزلت جوة بالسته و ربع ..
شايل حذائي بيدي اتسحب حتى محد يحس بيه ..
دخلت للمطبخ جان اتلكه امي و ابوية ..
بالاحرى الحيوانات رحت على الثلاجة بس انهزم من نظري الهم ..
صباح الخير ماما و بابا شلونكم ؟

فالقصة بصيص امل ..