خانة الذكريات

اللقاء الجميل

#خانة_الذكريات
الفصل الثالث
#قصص_اسراءالجميلي

دخلنه ابوهم للصالة ..
اجتي الام سلمت علينه ..
و اني متلهف كلش لشوفت قمر..
دخلت بنت ما شاء الله لا قوة الا بالله شايله بيدها صينية عصير ..

السلام عليكم ..
امي : هلا ببنيتنه ..
بصوت ناصي ردت ..
اهلاً بيج خالة ..
اني و ابوية : و عليكم السلام و الرحمة ..
امدنكه راسها و تمشي ترفع راسها كل شوية حتى ما توكع ..
خطوات موزونه ..
امه : تعاي ماما كعدي اهنا ..
اثاث صالتهم ديوان و الزاوية مالته متروسة زرع ..
امي و ابوية كاعدين بجهه و امها و ابوها و اخوها امجد بجهة اللخ ..
اني كاعد على القنفة ام نفرين الاضافية ..
كعدت صارت كبالي و كام اخوها جر كرسي من ميز الطعام و كعد عليه ..

لابسة تنورة عريضة ماروني و قميص ابيض بيه ورد ناعم ماروني متباعد ..
و ربطة قطن ماروني ..
دققت بيها حسب مقدرتي لان استحيت من اهلها و اهلي ..
و الابنية عرض العالم لازم اخاف عليها ..

ابوية : يابه احنه جايين نريد نخطب بتنه قمر الابنه سرمد ..
ابوها : اهلا و سهلا بيكم مكضية شغلتكم بعون الله ..
امي : اخويه و خيتي ..
احنه جينه مثل ما ردتو ..
يتشاوفون و اذا صار نصيب يتم الموضوع ..
امها : اي خيتي صح كلامج ..
ابوية : بعد اذنك ابو امجد يكعدون على ميز الطعام يمنه ..
حتى يحجون سوة ..

ابوها : اي خوية ابو سرمد خلي يتفضلون ..
كمت كعدت على الميز ظهري للحايط وجهي عليهم اجتي كعدت براس الميز صاروا همه بيمنتنه ..
شلونج قمر اخبارج ؟
جاوبتني بصوت بالگوة سمعته ..

اهلا بيك انت شلونك ؟
الحمدلله ..
تدرين اني اول مره اصير بهيج موقف ..
ههه و اني همين و الله ..
بقلبي كلت فدوة الهالضحكة الحلوة ..
اذا عندج اي سؤال تريدين تساليني بيه تفضلي ؟

........................... ..............................

( طبعاً ما اوصفلكم شنو شكله و رجولته و اتزانه .. اول مشفته تمنيته يكون نصيبي ..
شخصية و شكل و كلشي ما شاء الله ..
جان لابس جينز نيلي و تشيرت حجري مقلم بالطول ماروني و نيلي و ابيض ..
حذاءه سبور جفت كلشي شفت بيه ..
كلما ارفع عيني انتبه على شغلة ..
ساعة لونها فضي ..
يعني دخل بنص قلبي بدون استئذان ..

طول ما احنه كاعدين سوة و نسولف سوالف عامة ..
ادعي بقلبي ..
يا رب اعجبه مثل ما عجبني )

............................................

سالتني كومة اسئلة كلها عامة ..
الا سؤال واحد ..
سرمد انت حاب قبل ؟
لو جنت بس علاقات مثل شباب هالوكت ؟
ههههه خوش سؤال وجيه ..
خجلت من گتلها هيچ ..

لا قمر اني لا حاب و لا عدي علاقات ..
ملكيت ابد الابنية الي ممكن انطيها روحي و عمري ..

و بنفس الوكت ما عدي وكت للعلاقات اعتبرها كلام فارغ و مضيعة للوقت ..

.....................................

( يابه شكد كبر بنظري ..
ربي اهدي و خلي يقبلني )

.....................................

زين و انتِ ؟؟؟
اني مثلك طول عمري ملتهييه بالدراسة ..
بالكلية تقدمولي كومة بس ما ارتاحيت لاحد بيهم ..
هاااا الحمدلله ربي يقدم الخير ..

طبعاً همه يسولفون و يحجون كدامنه و عيونهم مفارگتنه كل شوية واحد بيهم يباوع ..
صاح والدي يلا سرمد دفضها عاد ..
ضحكت و كمت من يمها ..
شاورت والدي ..
ابوية : يابه بتنه قمر نالت الرضى من سرمد ..
قمر شنو رئيج بابا ؟

.........................................

( اني صرت بنص هدومي ..
كل العيون صارت عليه منتظرين اجابتي ..
اني مدنكة احس نفسي صار صعب ..
گامت نار تطلع من خدودي ..
راساً طلعت بره ..
و جان اسمع ام سرمد تهلهل ..
الهلوله الي خلت دگات قلبي تقره الف بالدقيقة )

...........................................

تم الموضوع و كمنه نتخابر اني و قمر هواية ..
حسيت الله انطاني و ما قصر وياية ..
بعثلي نجمه بالسما ..
و خلاها يمي ..
و هيه الابنية مقدرتني و صاينتني ..
ربي ما يكذبني من تم الموضوع لحد يوم الحنه ..
ما اتزاعلنه غير مرتين بس و راساً نتصالح ..
اجه يوم الحنه ..
و اجونه كرايبنه كلهم لان بيتنه جبير و الوضع ابـ بغداد مو مال قاعات ..
اني ملتهي وي الولد بالحديقة عرسنه صار بتاريخ ٢٠/١٠/٢٠٠٤ يوم الجمعة ..
يعني اليوم خميس ..
النسوان جانوا بالهول و الصالة ..

المهم جانوا الولد ياكلون و اعتازو مي رحت اجيبلهم دخلت للمطبخ ..
دا ادور مي بالمجمدة ..
جان اشوف بنية عازلة نفسها ما انتبهت على شكلها الصدك ..
الابنية : مبروك سرمد ..
الولد الصالح ..
انداريت شايفها بس مدا اذكرها ..
الله يبارك بيج خيتي ..
اجتي مرت عمي ام احمد للمطبخ دتاخذ خواشيك للنسوان ..
عمة فدوة كولي ال امي استعجلوا حتى انروح انحني قمر ..
الابنية : جان المفروض تجون تحنوني الي !!!

اني راساً انداريت عليها و ظليت بس اباوع ..
ليش خيتي اني واعدج بشئ و خلفته ؟
بعصبية حجيتها ..
و صوتي شوية عله ..

مرة عمي : هههه على كيفك هاي شبيك معرفتها ..
اكيد دا تشاقه وياك لارا ..
باوعت عليها شفتها تضحك ..
وي نفسي كلت شلون شقه سخيف شكد وكحة هاي الابنية ..
ابتسمت بالكوة :: تدرين شككتيني بروحي !!!
لارا : اتشاقه وياك مثل مكالت خالتي ..

و رحنه و حنينة عروستي ..
سبحان الله الصورها بكلشي حلوة ..
اول مكعدت يمها اباوع ..
ياااااابه شكد داعيتلي فاطمة ..
ضحكت هيه ..
عيب هيج تكول على خالتي ..
بعدين ولدنه يصيحولي باسمي ..
فدوة اروح الادبج و اخلاقج و تفكيرج البعيد ..

شوصفلكم عيونها كبار سودة شعره طويل خشم قصير حلك صغيرون شفايف متروسة
جمال ملائكة ..
لابسة ثوب ذهبي كيمونه و من كدام الفتحة مثلثة ..
و مخصر ليجوة ..
جسمها ممتلئ و طويله ..
رافعة شعرها و منزلة خصل منه ..

في القصة فرحة حلوة اتمناه لكل ولد و بنت يحبون بعض فالله