صرخت ٱسيل : صفصف حبيبي وحضنتو وهو كمان سلم عليها في حرارة لكن واضح عليه الحزن والغضب في آن واحد ووقف عاين لي حنان وبناتها ودخل الغرفه بدون م يسلم عليهم وطلب من ٱسيل تحكي اي شي بالتفصيل الممل وطبعا ٱسيل م قصرت الفي والمافي قالتو ليهو وآخر شي رمت ليها دميعات كدا وقالت في دلع : إتخيل يا صفصف إتهمتني في شرفي وقالت عندي علاقه مع احمد عشان سمعت صوتو بنادي وهو تعبان كان في الدكتور وحالتو صعبه مشيت اديتو حبوب إسبرين وطلعت طوالي لقيت ٱمنيه قدامي وقالت لي انتي كنتي معاه وضربتني ...مصطفي بقي يغلي من الغضب وقال : بناتي خلاص فشلو واحده زوجها لقي م عندها شرف وعايز يطلقها والتانيه متزوجه عرفي وبتستعمل مخدرات ولسه م كملت ال16 سنه ..طلع التلفون وضرب لي اخوه ابو احمد واجتمعو كلهم في الهول وقبل م يبدا مصطفي كلامو دخل حجره حنان وفتش الدولاب حقها وجاب الدهب حقها كلو وجا قعد وهو غضبان : اسمعو انا حنان دي كنت عايش معاها عشان البنات ديل فيها عيوب كتيره من زمان لما امي وابوي عايشين كانت بتكرهم وبتضايق جدا لما يجوني في البيت وحاجات كتيره مافي داعي لي ذكرها واجبها م قايمه بيهو كامل تجاه بناتها الدليل البنات خلاص مستقبلهم ضاع ومره زي دي م بتنفع معاي يعني الليله دا آخر يوم بيني وبينها وم عايز اشوف وشها في البيت لا هي ولا البنات انا متبري منهم تمشي تعيش في بيتي في ( ) هي والبنات وكل آخر شهر برسل ليهم مرتب يعيشو منو والموضوع التاني الدهب... وفتح العلبه وطلع كل المجوهرات الفيهو لكن ٱسيل صرخت : الاساور حقتي تذكر ي مصطفي جبتهم لي هديه لما جيت تخطبني وعاينت لي حنان حرام عليكم انا عملت ليكم شنو عشان تسرقو دهبي وين الباقي وديتهو وين ؟ مصطفي : معليش ي روحي ...وعاين لي اخوه وواصل شايف براك ي اخوي ..المهم انا بشيل كل دهب حنان واديهو لي المسكينه دي عوض ليها وجزاء لي حنان علي عملتها ..ٱمنيه وقفت وقالت : دهب امي اكتر من حق ٱسيل بي كتير و
قاطعها مصطفي في غضب : م عايز اسمع صوتك اخرسي خالص 😡😡😡😡😡😡😡😡😡😡
حنان : اسكتي ي بتي اسكتي ويلا نلم حاجاتنا وحسبي الله ونعم الوكيل... مصطفي واصل كلامو : انا ببدا حياتي مع المره الشريفة دي وربنا يديني منها اولاد ويطلعو ذريه صالحه.. وانتو اذا سمعت حاجه كعبه عنكم المره دي بطردكم الشارع 🙊🙊🙊🙊🙊🙊🙊🙊🙊🙊
ابو احمد م عجبو الكلام : ي مصطفي الناس ديل غلطو صاح لكن انت م تعالج الغلط بالغلط حنان م عايز تعيش معاها حقك لكن البنات ديل شرفك وعرضك خلي حنان في البيت تربي بناتها ويكونو تحت عينك لكن كونك تبعدهم عنك دا اكبر غلط ...ٱسيل وقفت وقالت ي صفصف اذا قعدو في البيت انا بمشي بيت بابا ...ابو احمد 😳😳😳 صفصف يابتي اسمو مصطفي !!!! ٱمنيه : خير ي بابا نحن حنمشي وربنا يوفقك وكمان بنكافح ونعيش من عرق جبينا ووفر البيت وحتي الراتب الشهري ربنا كريم ومابنسي عبادو وكتر خيرك 😭😭😭
😭😭😭😭😭
ودخلت الغرفه ولمت حاجاتها كلها وكمان حنان ومعزه.. وابو احمد مشي البيت ولقي ولدو نايم : صحي من النوم يخسي عليك وعلي ادبك اذا لقيت في بت عمك عيب تسترها ولا تفضحها ياخ انت م عندك اخوات ذنب البت دي عليك وانا والله واثق فيها لو معزه معليش لكن ٱمنيه دهب مجمر وضامنها زي بتي وطول عمرها محترمه وخلوقة ومجتهده في دراستها يلا امشي حصلم وشوف ماشين وين ..واذا عرفت انك عندك علاقه بالحصل لي مره عمك وبناتا بنفيك واتبري منك لاني شايف سرك مع البقولو ليها ٱسيل دي من زمن كانت صحبه اختك ..احمد حس بالذنب وخت يدينو في راسو 🙇🙇🙇🙇🙇
وطلع لقي امجاد واقفه جنب الباب وحنان وٱمنيه راكبين ومنتظرين معزه لسه م جات واقفه مع ابوها جوه وودعتو وطلعت بعد اداها مبلغ كبير وقال ليها اذا احتاجو اي شي تتصل بيهو ...ركبت في العربيه وٱمنيه كوركت فيها شلتي القروش ي رخيسه بعد طلق امك وطردنا باع عشره السنين بي عشره شهور وياريت لو لي واحده بتستاهل 😬😬😬 معزه في غضب عايزانا نخلي ليها الجمل بما حمل والله م اخليها تتمتع بي قروش بابا ببقي ليها كابوس حتي في الاحلام تلقاني وانتو بس خليكم بعيد وانا بتصرف 😡😡
احمد وقف جنب ٱمنيه وحاول يتكلم معاها لكن م ادتو اي فرصه وطلبت منو ورقه الطلاق وقالت لي سواق امجاد يتحرك وفي الطريق بفكرو يمشو وين معزه قالت ليهم يمشو شقه ابوها لحدي م يلقو حل ويدبرو حالهم وفعلا وصلو الشقه وكانت حلوه من ثلاث غرف وهول كبير وحمام داخلي وخارجي ومطبخ ومفروشه كان ساكنه فيها واحده من زوجات مصطفي ولما تم الطلاق طبعا رحلت منها ومن الوكت داك هي مقفوله ..ختو الشنط وطوالي بدو نضافه ..
منزل مصطفي🏠
مصطفي دخل طوالي الغرفه وكان تعبان نام طوالي وٱسيل بعد نام مشت الهول ودخلت باقي الغرف وهي طايره من الفرحه وتغني وترقص 💃💃💃💃💃💃💃💃💃💃
👏🏻👏🏻👏🏻👏🏻👏🏻👏🏻👏🏻👏🏻👏🏻👏🏻
منزل حنان
نضفو البيت ورتبو اي شي وختو الملابس كل ذول في دولابو وغرفتو الخاصه وحسو بي راحة نفسيه ال حنان كانت حاسه بالظلم والقهر والدموع ماليه خدودها وماصدقت تمشي الغرفه وتغفلها عليها عشان تبقي هي والاحزان والدموع ...
الكل تعبان ومرهق اليوم كان صعب جدا وحزين ونامو حتي بدون م يفكر زول في عشا. . وٱمنيه صحت مخلوعه وعاينت للساعه ولقت 8 جات وعندها جامعه واستغربت كيف امها تخليها نايمه لي الزمن دا وهي عندها محاضرات بدري وبسرعه شالت عبايه وجري علي الحمام لكن قبل م تدخل لقت غرفه امها مقفوله مشت عليها ودقت الباب ماما ماما صحي النوم ولما م ردت فتحت الباب براحه وصرخت ....
يتبع....
