كان دكتور فيصل ومشي حبه كدا ووقف في حته مضلمه وبعد 10 دقايق كدا جات ٱسيل تاني تتسحب وركبت العربيه ومشي فيصل علي طول وٱمنيه قالت لي سواق امجاد يتابع العربيه بس بدون م يحس وفعلا مشي وراه لحدي وصلو بيت كدا في الاطراف ونزلو وٱمنيه نزلت وراهم بعد دخلو وقفلو الباب وحاولت تعاين بي فتحه الباب ولقت فيصل ماسك ٱسيل من خصرها وببوس فيها وبسرعه جرت امجاد وبقت تبكي وقالت لي السواق يمشي وصلت البيت وطوالي معزه سألتها : طبعا لقيتيهم في وضع م تمام صاح؟ يعني في علاقه بينهم ! زوجه بابا اتوقعي منها اي حاجه ..انا م سألتك في العربيه عشان السواق لكن الشمار حارقني ..وشوفي كمان فيصل اتاريهو م ساهل بركه الشفتي بي نفسك !! ٱمنيه ذادت في البكي وقالت : انا اتصرف كيف ؟ سترتها في موضوع احمد عشانو وهو مريض طول الوقت لكن م بسترها تاني برضو دا شرف بابا حرام تخلي سيرتو علي اي لسان وكمان تدخل الحرام علي بيتو ...معزه : ايوه طوالي كلمي بابا بي اي حاجه وانا شاهده ..الله كان نجيب بتاع امجاد يشهد معانا... ٱمنيه : لا م عايزين فضايح اكتر من كدا... المزعلني دكتور فيصل كنت فاكره انو محترم لكن خساره والف خساره..معزه : مشكلتك م فاهمه الناس دي بقت كيف ..يعني انتي تتوقعي اي حاجه من اي زول ..ٱمنيه سكتت مسافه وقالت : معزه ..في واحده بتضرب لي قالت انتي عندك علاقه مع زوجها ..معزه في لهجه عاديه وبدون اي توتر : دي وحده مجنونه وماعندها ثقه لا في نفسها لا في زوجها ..ٱمنيه في حيره : يعني بتعرفيها ؟ معزه : جيران ناس صحبتي شيماء واطمني بوقفها في حدها .
ٱمنيه : اسمعي م عايزه مشاكل انا.. انتي اصلا اللماك في زوجها شنو ؟..معزه : بشرح لي شمو ايام الامتحانات وانا بقعد معاهم وشال رقمي من شمو.. م عارفه قاليها شنو وخلاها تديهو ليهو نسيت م سألت شمو والله.. ومن ديك بقي يضرب لي ويراسلني في الواتس وانا م شغاله بيهو ..المهم المتخلفه دي يظهر انها لقت رقمي عندو وبقت ترسل لي رسايل لكن بحسمها ..وكمان وصلتك انتي 😡 ٱمنيه :ارجوك ي معزه انا خلاص حاسه بي نفسي م قادره اتحمل حاجه ..معزه : تمام م تشيلي هم انا بحل الموضوع بدون مشاكل ..ٱمنيه فضلت سهرانه لحدي وش الصباح وكالعاده صلت الفجر وحاولت تنوم م جاها نوم ودخلت الفيس حبه وبعدها طوالي لبست عشان تمشي بيت ابوها وقبل م تطلع ضرب ليها منذر تلفون... ي ناس م بتفقدونا يعني لو غبنا ؟ ٱمنيه : آسفه والله لكن انشغلت شديد وحكت ليهو عن عقد ٱلاء وبارك ليها وقال ليها عقبالك ..واصر انها تقابلو اول وبعدين تمشي ناس ابوها وهو طبعا فاكر زياره عاديه ..المهم بعد إلحاح وافقت يجي يسوقها وفي لمح البصر جا ومشو مطعم راقي وفطرو وبعدين قال ليها : يعني م عايزه تحكي لي مالك ؟ ٱمنيه : م عايزه ازحمك بي حاجاتي... منذر : كدا غلط ..اي حاجه حقتك بتهمني ولو تفصيلة صغيره ..ٱمنيه : ان شاء الله يجي يوم واحكي ليك ..انا امشي عشان القي بابا قاعد ..منذر : اضربي تلفون بس ..ٱمنيه : معليش عايزه اعمل ليهو مفآجأة ..منذر : خلاص اوصلك قريب البيت ..
نزلت ٱمنيه قريب من البيت ومشت وضربت الجرس مسااافه وبعدها جات ٱسيل واضح انها كانت نايمه ..ٱمنيه السلام عليكم... ٱسيل : ي فتاح ي عليم.. خير في شنو ؟ .. ٱمنيه دخلت وٱسيل لسه واقفه علي الباب ووقفت مسافه بعداك قفلت الباب شديد وجات قعدت جنبها : م تقولي لي عاوزين قروش ..البنك خلاص بح ..يعني مافي قروش... ٱمنيه متجاهله كلامها : بابا وين امشي صحي بابا من النوم عايزاه ضروري ..ٱسيل : اعرف اول عايزه شنو منو ؟ ٱمنيه : الموضوع بيني وبين بابا ...وقامت علي غرفه ابوها ولقتو نايم وجات راجعه ..: بابا عمرو م نام لي الوقت دا هو عيان ولا حاجه ...ٱسيل : العهد حق ابوك زمان دا تنسيهو في فرق بين عيشه ابوك مع امك وعيشتو معاي ..ٱمنيه في غضب : انصحك م تجيبي سيره ماما الشريفه علي لسانك ..وتاني دخلت الغرفة وبقت تصحي في ابوها : بابا انت كويس ؟ بابا ..ٱمنيه جات طالعه تاني : والله بابا دا م طبيعي انتي عملتي ليهو شنو ؟ ٱسيل : امرك غريب انتي عايزه شنو منو ؟
ٱمنيه : ياهانم نسيتي انو بابا ولا شنو !!!! وطلعت ٱمنيه وقالت تمشي تشوف احمد وتجي راجعه تاني لي ابوها وفعلا مشت وسلمت علي عمها ودخلت لي احمد في غرفتو ولقت حالتو صعبه وماقدرت تتحمل بكت وطلعت طوالي ورجعت بيت ابوها ولقت ٱسيل بتتكلم في التلفون واول م شافت امنيه تاني صرخت في وشها اطلعي من بيتي اذا عايزه ابوك خلي يجيك في شقتكم يلا لما اشوفك بحس بالضيق وانا حامل ..ٱمنيه : حامل ياتري ابو الولد منو احمد ولا دكتور فيصل ؟ ٱسيل اتهيجت وبقت تصرخ وتكورك وتقطع في شعرها يظهر انها اعراض الادمان وبي صوتها صحي مصطفي وجا هايج : في شنو ؟ عملتي ليها شنو ؟ لييي م عايزين تخلو مرتي في حالها ..اختك بتخت ليها حبوب مخدره في القهوه مشينا الدكتور وطلب مننا نحلل باقي فنجان القهوه وطلع فيها حبوب مخده وهي عشان خاطري م قدمت في معزه شكوي. وحاليا بنعالج فيها انتي عايزه شنو منها.. حرام عليكم... ٱمنيه : بابا كنت عايزه اقول ليك ٱسيل بتخونك مع
قاطعها في غضب : اولا م تقولي بابا دي علي لسانك لانك لو كنتي بتي صحي كان احترمتي ٱسيل عشاني حتي لو غلطت فيك ..الشي العايزو منك انتي واختك خلوني في حالي.. انا زماان اتبريت منكم وتاني بكررها اذا مت لا انتي ولا اختك م تجو تعزو فيني... ٱمنيه بقت م شايفه قدامها من البكي والزعل وبي خطي متخاذله طلعت بره البيت وقعدت في الارض لانها م قدرت تمشي وطلعت التلفون وداست رقم منذر وكان آخر رقم وطلبت منو يجي ويسوقها من هنا وبي سرعه البرق منذر جا وركبت في العربيه وقالت ليهو طلعني من الحته دي سريع حاسه اني م قادره اتنفس... منذر في خوف : سلامتك ..حصل شنو ؟ ٱمنيه : ارجوك ي منذر م قادره احكي حاجه 😭😭😭😭😭😭😭😭😭😭
منذر : تمام تمام بس م تضايقي نفسك تحبي اوديك وين ؟ ٱمنيه : الشغل ..وديني الشغل.. منذر : وانتي في الحاله دي ؟ حاضر .ٱمنيه طول الطريق تمسح في دموعها ومنذر ساكت لحدي م وصلو المطعم ونزلت ٱمنيه ودخلت المطعم وسلمت علي يس وعايزه تمشي طلب منها تقعد وبدون اي مقدمات قال ليها : اسامه قال عايزك ! ٱمنيه في حيره : عايزني كيف يعني م فهمت ؟ يس : عايزك تقضي معاه كم يوم في شقتو وبدفع ليك الانتي عايزاه 🙊🙊
يتبع...
