تم قبول معزه في كليه الطب وفرحت ٱمنيه جدا بعد قربت تنسي طعم الفرح اما معزه فكانت طايره من الفرح خلاص دخلت الكليه البتحلم بيها وكمان جامعه حكوميه يعني الرسوم معقوله والفرحه الكبيره انها حتتخلص من السجن الحابسنها فيهو ٱمنيه وخالتو سهام ودي بقت قاعده معاهم طول الاسبوع الا الجمعه والسبت بتمشي لي زوجها ونهايه اليوم بتجي تبيت معاهم والكلام دا مضايق معزه جدا ودا واضح في تذمرها الدايم لكن ٱمنيه وسهام الاتنين عاملين م ملاحظين حاجه ...
منزل مصطفي🏠
ٱسيل حامل والدلع ذاد والطلبات كترت وكل يوم عايزه هديه وآخر حاجه وصلت ليها قالت عايزه عربيه كريز لي ناس امها يعني يشغلو فيها سواق والعايد ليهم وطبعا مصطفي وافق بعد شاف البيبي في الموجات ولد وبقت الفرحه م سايعاهو وقال لي ٱسيل : انت ام ولدي المنتظرو لي عشرين سنه اطلبي اي حاجه لو عايزه النجوم بجيبها ليك... ٱسيل في دلع : والله يعني لو طلبت اي حاجه اي حاجه... مصطفي في فرح : كدي جربي ..ٱسيل : البيت الفيهو بناتك عاجبني شديد موقعو حلو ونفسي يكون من نصيبي ..مصطفي اتغيرت ملامح وشو لما سمع الكلام دا وقال ليها :بصراحه البنات ديل انا حاسي اني ظلمتهم عشان كدا قبل فتره كتبت ليهم البيت القاعدين فيهو دا بيع وشراء وتاني الباقي كلو حقك انتي وحماده ولدي ..ٱسيل في غضب😡 بيت يسوي ملايين تكتبو ليهم طيب وانا كتبت لي شنو ؟ مصطفي : البيت دا وكل م املك واشتريت لي اهلك العربيه ...ٱسيل وعيونها مليانه دموع : خلاص توقف منهم مصروف الشهر ولدي دا ذنبو شنو وحيلقي شنو وهو لسه م شاف الدنيا وقدامو المستقبل لكن ديل كبرن الكبيره خلصت امتحانات نهايه السنه وفضل ليها سنه رابعه بس والتانيه دخلت كليه الطب ورسومها بسيطه جدا يتصرفو يمشو حالهم واذا جبت سيره المرتب الشهري دا تاني والله امشي بيت ابوي وتاني لا تشوفني لا تشوف ولدك. 😡😡😡😡😡😡😡😡😡😡
مصطفي في خوف : خلاص خلاص الزعل م كويس عشانك انتي والولد العايزاهو كلو بعملو ليك..انا ماشي اشوف احمد دا قالو عيان من امس م بتأخر ٱسيل في خلعه : عيان مالو تاني ؟ مصطفي : انتي عارفه هو عندو القلب والسكري الاتنين مع بعض ..ٱسيل في حزن : الله يشفيه ..مشي مصطفي بيت اخوه ولقي احمد راقد ولما شاف عمو قام عشان يسلم عليهو لكن مصطفي قال ليهو خليك مرتاح انا م ضيف يا ولدي ...احمد في اعياء اخبار البنات شنو ..خالتهم قاعده معاهم صاح ؟ مصطفي :صاح وانا شويه بعد سجلت ليهم الشقه القاعدين فيها ارتحت من عذاب الضمير لكن ٱمنيه قلبها لسه م صفي من ناحيتي بقرا في عيونها دايما كره وحقد رغم انها بتحاول تتعامل معاي عادي ...احمد في ندم : لا يا عمي ٱمنيه دي قلبها زي الحليب م بتعرف تحقد علي زول خاصه ابوها لكن انت عارف كيف كانت متعلقه بي امها .
مصطفي : ان شاء الله ياولدي اها انت عملت شنو في موضوعك معاها ؟ احمد : هي مصممه علي الطلاق وانا الدكتور قال حالتي م بتسمح اني ابذل اي مجهود يعني بالواضح كدا م مفروض اتزوج اصلا وانا راضي بي قدري وعلي فكره يا عمي بتك ٱمنيه دي اشرف من الدهب وانا ظلمتها كتير وعايز اديها حريتها عشان تعيش حياتها مع واحد نضيف زيها يقدر يسعدها ويوفر الحياة الهي بتستحقها ..
معزه بقت تجهز لبس جديد للجامعه وكل المعدات البتحتاج ليها طالبه الطب من ميزان ضغط وغيرو وكل يوم في السوق تشتري احذيه وفساتين وطرح وبناطلين وكمان اشترت اكسسوارات وكمان كم لاب كوت واي حاجه وخلصت كل القروش حقت ابوها ومشت لي ٱمنيه وطلبت منها ذيادة وٱمنيه كورت فيها : كل القروش حقت بابا خلصتيها 😳😳😳 بالغتي عديل لازم تعرفي انو نحن وضعنا م زي زمان يعني م عندنا مصدر دخل صاح البيت حقنا لكن مصاريف الاكل والشراب والكهربا ومصاريفنا نحن الشخصيه براها م ساهله لازم تمسكي يدك حبه كدا...معزه بقت تبكي : يعني انا م زي البنات من حقي البس واتشيك ...ٱمنيه قربت منها وحضنتها : حبيبتي انتي ست البنات لكن انا عايزه مصلحتك حبيبه نحن لازم نتكاتف عشان م عندنا غير بعض
وكمان نقتصد وانا حاليا بفتش في شغل المساء عشان م اخليك تحتاجي اي زول...
فيصل من الاجازه واخبارو مقطوعه وتلفونو مغلق وٱمنيه م عارفه تصل ليهو كيف وهي طول الوقت مشغوله بتفتش في شغل ومتذكرة منذر صلاح الشاب الكان راكب جنبها لما كانو جايين من كسلا لكن م قدرت تتصل بيهو واجلت الموضوع لحدي ما امورها توضح ومضت فتره طويله وهي م خلت محل م فتشت فيهو شغل الشركات عايزين الشهاده وفي اشغال م بتناسبها ولازم تشتغل قبل م الجامعه تفتح لانو بعد تفتح بكون الصباح محاضرات والمسا معظم المحلات م بتكون شغاله ...وصلت ٱمنيه البيت من التعب م قادرة تشوف قدامها ولقت سهام قاعده بتبكي ومتمحنه ومدت ليها ..
يتبع.....
