سمية وحجة السيدة جو ب بنهم وسكرم وعمودم ....نصة نهار الشمس حارة وصلو ب امجاد دخلو
سلمو علي شريفة وقعدو يتونسو نرمين سامعاهم اتثاغلت وقالت بيس عليها ام 7 ارواح اليوم والتاني تجي ناطة ولا العجب امها البشوفا بقول بتشحد في الشوارع ديل نسب ديل اخييي الله يمرقنا منهم ...
احسن انوم لي نوم ينفعني
اما حجة شريفة تشيل وتنادي علي نرمين وهي عاملة نايمة وبتحلم(شكيتك لي الله يانرمين )
سمية قالت ليهم انا ح اعمل ليكم قهوة ...ح اقلي البن واجي
حجة شريفة عندها ودعات خاتاهن في صرة مابتطلعم الا بالمزاج وعلي حس القهوة جابت الودع وهي وحجة السيدة يقصن ويرصن
المرة العيانة ماتت
ودي طلقوها ودي عرست الطويلة المربوعه
نرمين سمعت سيرة الطلاق فرحت فرح طوالي جات اذيك ياخالتو السيدة كيفك معليش كنت نايمة
كدي ي امي ختي لي ودا بياضي مرقت 50 ج
امها رمت الودع قالت ليها المرة دي اطلقت والحمد عندك ضحكت لضرسها الاخير وقالت دا المفروض يحصل من الاول اي الطلقوها دي عرفناها لكن الراجل عرس ولا لسه وفكتا ضحكة
سمية سامعاها قالت احسن استغفر بس وبقت شغالة وتستغفر قلت البن ودقتو وهي لسه قلبها مقبوض وبتفكر في ناصر وبتدعي انه يرجع سالم
حجة السيدة مفتحة وفهمت قصد نرمين قالت لكن الطلقوها دي بعيالا الشر برة وبعيد هديلا تومات الودع حلفن
ضحكت وعاينت ليها وقالت في نفسها ههههه لو قصدك محمد ي مرة ياخرفانه هو بموت في التراب البمشي عليه مالي شينة زي بتك ولاسودة ولا خلاقة ......
لولوت خشما
*امها تاني رمت وقالت البعيد عرس عرس
نرمين:احيي برد لي قلبي
جابت سمية القهوة وسلمت علي نرمين ...مدت ليها اطراف اصابعا بس ..سمية اول ماشربت القهوة بطنها قلبت جرت استفرغت وبقت ماسكة بطنا وبتتلوي
*حجة شريفة وحجة سمية اتخلعو سمية انتي كويسه شالوها طلعوها غرفتا عملو ليها عصير اتصلو علي دكتورة بعرفوها قريبة منهم قالت انها في البيت جاتم طوالي
*حجة السيدة بقت تقرا ليها في راسا ومرة تمسك بطن سمية وتقول ربي مسها الضر وانت ارحم الراحمين
نرمين سالت امها :المستهبلة دي مالا😒😏
حجة شريفة:المرض مافيه استهبال ي بتي واظن لي دا مرض عافية
نرمين:سجمي😱 كيف يعني عايزة تقولي سمية حامل
حجة شريفة:اظن لي حامل لانها استفرغت ربنا يتمم ليها علي خير وبقت تبكي وتقول ح اشوف جناك ياناصر
