ميلادي ومماتي

2

#ميلادي_ومماتي2
Shahd Alsalman

تعرفت على ندى بالجامعة جنا مرحلة ثالثة اني طب وهي علوم بايو تعرفت بيها اكثر وباهلها ناس طيبين وبحكم اني من صلاح الدين امها جانت دائما تدزلي اكلة بيدها او مرات ابوها يدز علية نسولف نلعب طاولي يعني مأمنين بية كلش وهمين يدرون بينا ما عدنا شي وواثقين من ندى..

دائما جنت احجي على ندى لان متهتم بأكلها قليل ومرات تنسى تاكل تكلي شبعانة ومرات اضحك عليها اكللها علمود لا يطلع الكرش مو وهي تضوج واحبها من تضوج حتى اراضيها ...

ترضى بسرعة ذكية حنونة توزن الامور بعقلها كل شي بيها يعجبني بنية واثقة من نفسها وبالاضافة لكل هذا شايلة وجه مثل ميسموه بيبي فيس كلش ملامحها مريحة مرات جنت اتذكر والدي واختنك او اشتاق لاهلي او اكون متضايق من شغلات اكللها ما اريد شي منج بس خليني اباوع لوجهج وفعلا ارتاح
يمكن هو ماكو هيج شي بس هذا الجنت احسة وياها ..

صار عندي ظروف عائلية واظطريت اسافر برة اكمل دراستي بهذا اليوم برغم كل اذيتي لان حعوف كل شي هنا وحتى ندى هي جانت تكلي بالعكس هالشي زين و تشجعني وترفع معنوياتي برغم ادري بيها منهارة بداخلها بكلشي جنا سوة ما فد يوم واحد ترك الثاني توجهت للطيارة ودعتها وودعت اهلها ومشفتها بجت او لا مو من عادتها تبجي كدام احد لو مهما كان قريب منها دمعتها عزيزة ..

اليوم مرت 4 سنوات على فراكنا الحقيقي اذا رجعت بالاحداث لكم سنة ليورة حكون حقير كلش بنظر اي شخص بس الواقع انه اني مفكرت بأنانية وفكرت بمصلحة ندى قبل كل شي وحتى دفنت كل احساس وشعور علمود ما اخليها تضيع عمرها بالانتظار ..

جنا نتواصل ع الفيس هواية وكل يوم تقريبا احنا سوة تحجيلي كل شي عنها واحجيلها كل شي يصير وياية مرات نتخابر مرات فيديو كول على حسب بس اني دراستي صعبة هنا بديت اخفف وياها مجبر لان ما اكدر ارسب بمادة وهمين هي متفهمة الوضع فما تضغط علية عبرنا هالمرحلة ونجحت وهي همين سهرنا سوة للصبح نسولف ونعوض كل ذيج الايام
احسها اختي وصديقتي ومرتي وامي شكو مسمى ممكن تتسمى بي المرية هي ينطبق عليها
ما ردت اكبر شعور الحب بداخلي بس هو مو بيدنا ابد ما نكدر نتحكم بي ولا نكدر نلزم احساسنا صعب
لكن ما اكدر اعترف بشي الها لان وضعي صعب بين دراستي وظروفي العائلية وهمين خفت اكللها وتزعل مني

- كريم
- نعم عيني
- ممكن اكول شي
- كل شي ممكن الج كولي
- عادي اذا بنية كالت لواحد انه هي معجبة بي او تحبة او تحس تجاهة شي ؟
- هو واقع الحال لا مو عادي لان متعرفين المقابل شنو ممكن يفكر يجوز ياخذها بنظرة الجريئة او يستغلها وينصب عليها وتالي يتركها ويجوز العكس يحبها ويتشجع لما هي تحجي
- اممم صحيح
- ليش هالسؤال !
- لأن بصراحة
- اي !!
- كريم اني احبك
- ....
- اسفة انسى رايحة انام
- لا مسكتت بس اعرف بحبج الي
- شون تعرف ؟
- غيرتج علية الضامتها كوة راحتج وياية السؤال اللي متملين منة من سنتين خما مضايقك شي
اهتمامج كل شي بيج يكول احبك
- منتبه على كل هذا !
- واكثر بس يا ندو ما اكدر اكون الج اكثر من صديق
- ليش ؟
- اني احب بنية جوارينا بصلاح الدين من 6 سنوات ولو انقطعنا صار فترة سنة ونص بس يعني ما اكدر احب غيرها
- ليش مكتلي عنها ؟؟
- مصارت مناسبة وخلص كل شي انتهى بيناتنا بس اني ما اكدر احب بعدين لو فرضنا اكدر مفكرتي شكد حتبقين بالانتظار وضعي صعب وبعدني ادرس
- يعني هو الحب مو صبر وانتظار بعدين اني محد يفهمني مثلك وتعرف بية ما اكدر اوثق بأحد بسهولة
- ندى الانتظار شي والحب شي ما اكدر اعلقج بية واني ما اعرف شنو مصيري
- يعني انت متحبني ؟
- احبج بس ما اكدر اكمل كحبيب
نكدر نكمل كأصدقاء انت احسن شي صارلي وهمين وجودج بحياتي هو اليقويني ما اريدج تزعلين مني اريدج تفكرين بعقلج اكثر من مشاعرج
- ماشي اني اعتذر منك انسى الكلتة واعتبر ما حجيت شي
- مراح انساه و لاتزعلين الحياة كدامج وفرصج اكثر وبعدين كتلج مريت بتجربة وما اكدر
- عادي ماكو مشكلة .. مع السلامة
- مع السلامة
" مجان عندي حب ولا بنية احبها بصلاح الدين "