ميلادي ومماتي

3

#ميلادي_ومماتي3
Shahd Alsalman
بعدني ارتاح من يحجي وياية هالاحساس ميروح مني برغم انجرحت كلش منة ولو الحجاه مجان بي اي قصد اساءة او جرح بالعكس جان عاقل مثل كل مرة بس العقل يقتل كل شعور وكل حب ممكن ينولد بين اثنين ..

المشكلة لحد اليوم مناسيتة مرت سنين ومكدرت ابطل افكر بي جنت اتمناه اعترفتلة بس لانه واثقة هو حيفهم هالمشاعر ويحس بيها وبية مردت اخسرة ولا احط بكلبي شي وبعدين اندم بس ندمت لان كتلة ..

لحد هاللحظة اتذكر اليوم الكتلة بي اجوني ناس
جان يحجي وياية ببرود ولا كأنو معترفة الة بحبي
بكل بساطة تخلى عني وكالي اذا زين واهلج سالو عنة اقبلي بي انت تستاهلين كل خير تمنيت بيومها يكلي لا تقبلين او ما اكدر تروحين لغيري برودة ذبحني وجرحني وقبلت جنت ادري راح اتعذب بس رضيت حتى اعاقب نفسي لان حجيت بمشاعري وهمين ما اكدر اغصبة انه يحبني ..

الله كريم كلمن ياخذ نصيبة بهاي الدنيا والحمدلله على كل حال المهم هو سعيد ومرتاح وهذا الشي جد يريحني

احمد غريب عني امة شافتني بفاتحة جوارينا هي تكون اقاربهم و بعد فترة اجتي جوارينا وهي وياها جانت زيارة تعارف حجتلنا عن ابو احمد استشهد هو جان عسكري وعدها منة احمد و سالي
احمد مواليد 86 مخلص هندسة اتصالات ولازم مقاولات ويا عمامة وجان يشتغل ويدرس وحالتة المادية فوك الممتازة مناقصة شي بس بنت الحلال حسب كلام امة

اما سالي مواليد 88 كملت ادارة اعمال وتزوجت ابن خالتها وسافرو كندا وعدها ولد

خالة اقصد ام احمد مرة جبيرة وعلى نياتها طيبة كلش اهم شي عدها سعادة اولادها ربت الولدين وحدها وهي صغيرة ومتزوجت بعد ابو احمد

صار قبول مبدئي واجة احمد شفتة وشافني وقبلت بسبب كريم ردت انساه وردت اوجعة برغم عقلي يكلي غلط الدتسوي بس كملت بهذا الطريق ..

بهاي الفترة انخطبنا ولبسنا حلقات مرات انسى احمد او انسى وجودة ممتعودة علي وهمين اخجل منة الرجال الوحيد العرفتة بحياتي جان كريم ما جنت اتقبل احد ولا اعرف شون ممكن اشوف حياتي ويا غيرة دائما احس نفسي تايهة ماكو شي بيناتنا مشترك مجرد زواج عادي ردت انسحب وما اكمل وافسخ خطبة لان ما احس بشي تجاهة بس كلت اذا سويت هيج عبالة اني ميتة علي هو مو يريد افكر بعقلي وهاي اني حكمل واثبتلة اكدر بلياه هيج جنت اعتقد ...

جانت اول طلعة النا كال راح امرلج نطلع نفتر ونتعشى برة كلت لاهلي وكالو براحتكم بس لا تتاخرين ؛ ع الساعة 5 اجة علية بسيارتة

- هلو شلونك
- هلو الحمدلله وانت
- الحمدلله
- اليوم راح نروح للزوراء نفتر شوية ونتمشى ونطلع لمطعم كلش راقي
- تمام
- حلوة سيارتي ؟
- اي ما شاء الله
- اشتريتها جديدة اني متولع بالسيارات وكل فترة اغير موديل ودا افكر اسوي معرض سيارات يعني نوع من انواع التجارة و ....

سرحت وهو ديحجي مسالني عن المكان الاريدة او عاجبني اروحلة حددلي مطعم بكيفة مقرر كل الطلعة بدون ميسالني عن شي كاعد ويحجي بموضوع ممكن يحجي بي ويا صديقة

اتذكرت كريم جان حتى العصير يسالني نوعة شيعجبني مشتاقتلة هواية هسة هو شديسوي بس اني هسة لازم انسى ميصير اني ارتبطت بأنسان لازم اصونة حرام علية انتبهت ديصيح اسمي كطع سرحاني

- نعم
- هاي وين صافنة صار ساعة احجي
- لا وياك بس تذكرت شغلة
- ها خوش ؛ شنو رأيج بية ؟
- من يا ناحية ؟
- كل شي شكلي مثلا
- ما اعرفك بعدني حتى انطي رأيي بيك مو منطقي انه اكلك شي هسة اما بالنسبة لشكلك يعني محبوب نكدر نكول
- بس ترة اني حلو هههههه
- هههههه الله يحفظك
- ويسلمج
- اسمعي هاي الاغنية احبها

اذا ناوي تروح ابي افهم
وين اروح تخليني اعيش
بعدك بألم وجروح
واذا عني مشيت
واذا غيري لكيت
منو غيرك انا بلكى
يا روح الروح ....

جان يدنن بالاغنية واني بعالم ثاني دمعت عيني اتمنيت ابجي ويسمعها كريم ويحس بية
عبالك احمد يعرف جرحي وحطها مثل الملح علي
كل الاغنية سرحانة بكلماتها ومدمعة لنص الاغنية متحملت

- احمد سدة ولو زحمة
- ليش معجبتج
- حلوة بس عبالي اسالك كم سؤال
- تمام اسالي اي شي يخطر ببالج

كمت اسالة عن حياتة دراستة اريد التهي وهو يحجيلي لحد ما وصلنا نزلنا لحدايق الزوراء
مدلي ايدة ولزم ايدي ودنمشي شكد تمنيت اسحب ايدي منة بس ما اريد اضوجة واني هم لازم اتعود

- ايدج ناعمة وباردة
- دائما تبرد
- هسة ادفيها
شالها وصلها يم كلبة سحبتها متحملت من الخجل واتضايقت كلش
- ليش ضجتي ؟
- احمد ما احب هيج خلينا نتعرف اكثر على بعض وبعدين
- اسف مثل متريدين

كملنا طلعتنا وهو كل الطريق يحجي ويسولف واني اسمع وبس ما احجي شي
عدت الايام على طلعة وعزايم وطبعا جو مقيد كلش
جان يريد نتزوج بسرعة اني بعدني دا اتعود علي بس كلت هاهية شكد ما اطول مراح اعرفة

اللي جان يضايقني بي انه يحجي بليلة الدخلة كل همة هذا الموضوع واني اخجل كلش ومرة كالي اني احب تصيرين جريئة و قوية همين اعرف هواية معلومات عن هالمواضيع بس التطبيق يختلف واحسها صعبة

كلش اتوتر من يلزم ايدي او يحاول يبوسني ولا مرة كدر يبوسني كل مرة افلت منة
قررنا موعد عرسنا كلها فرحانة اهلي اهلة هو حتى صديقاتي بس اني ما اعرف اذا جنت فرحانة او خايفة او كريم بعدة ماثر بية او اساسا ممتقبلة احمد ما اعرف هواية مشاعر
تزوجنا وجان عرسنا ملوكي مثل ميكولون وكل شي راقي والكل مدح بي
جنت ادور كل شي بسيط ونازك هو لا عكسي كل شي فخم ومتكلف يختارة

بدلة العرس جانت ذوقة هي حلوة بس اني بسيطة وما احب المبالغة
حاولت بهاي الفترة اراسل كريم بس مردت انزل نفسي اكثر جنت اشتاق بس مراسلني بعد ولا اتصل باهلي مجرد باركلهم وبعد خلص اختفى وانكسر كل شي حلو بداخلي ...