ميلادي ومماتي

15

#ميلادي_ومماتي15
Shahd Alsalman
بعد اخر مشكلة بيناتنا وانتحارها وللمرة الثانية فقدت ابني وبسببي متحملت ابقى يمها ولا اطلكها
روحي بيها و الادمان اثر علية هواية انصابيت بحالة نفسية وعندي مشكلة من الصغر كل شي احسة ملكي حتى الاشخاص
رحت عنها وسافرت وتركت كل شي ووكلت ناس يشتغلون عني واللي اكدر اديرة مناك اكملة

طول السنة الغبتها كل يوم اراسلها وكل يوم اسال امي عنها و امي تحجي علية واني مو ناقصني فتركت كمت ما اتصل بامي

متكعد هواية ع الانترنت ومن تفتح تشوف رسالتي تسدة ومتجاوبني بس كلت اتحمل كل يوم جنت اعذبها خليني اعيش ولو سنة بالاذية مقابل 3 سنوات من زواجنا جانت تعيشهم هي باذية

عرفت بيها اشتغلت وسالت عن الشركة التشتغل بيها سمعتها زينة واعرفها ودزيت توصية للمدير لان جنا نتعامل وياهم قبل وهو مرفض ورحب وكتلة اريدك تساعدها ما تخليها كل يوم تداوم وحطها بقسم دوامة قليل وبنفس الوقت راتبها زين

ولو جنت رافض تشتغل بس اريدها تلتهي اعرف بيها تحب الشغل وهمين قللت دوامها فمرتاح لان اغار عليها وما احب احد يشوفها مرات جنا نروح لبيت خالتي وهيثم يشاقيها او يكعدون يحجون اطك غيرة واتخبل وحتى من اهلها اغار عليها

خابرتني امي بيوم من الايام تسب بية وتلعن وتدعي علية ومدا افتهم شنو اللي صاير سكتتها

- اهدي يمة شكو شصاير ؟؟؟
- وك هو شنو المصاير اخذتها وردة مفتحة شكول لاهلها الله لا ينطيك خليتني بوجه الكباحة
- شبيها ندى احجي لا تخبليني !!!
- لك الساقطة مالتك جايبة عصابة ومعتدين عليها كتل وضرب والله اعلم ما اغتصبوها
- يمة شدتحجين انت حلمانة ؟؟
- شحلمانة بين الموت و الحياة هي وبالمستشفى وانت خاتل برة مثل الجبان لا ليش مثل هو انت جبان
- يمة ندى بيها شي احجي ؟؟؟
- محد يعرف توة هيثم خابرني وجابني يمها وهاي اهلها هنا والله مفتشلة منهم سودت وجهي الله يسود وجهك
- شجاب رانيا عليها وشون فاتو العصابة
- اني ادري بعد ساقطة ما ينعتب عليها حتى انت مثلها يا خسارة الربى بيك ادعي الله تكوم سالمة منها لان اذا صارلها شي ليوم الدين اغضب عليك
- الله ياخذني وين انتو بيا مستشفى
- والله فلا اكلك خليك محترك بنارك
- الوو الووو يمة دقيقة

خلتني اشب وانطفي ومتت خوف وبجي اريد بس اوصل لاحد وما اتصلت على اهلها
بعدين حصلت هيثم وحجالي كل شي وكالي ممغتصبيها متلاحكلها وكالي رانيا معترفة وهسة بالسجن والبقية متصاوبين
وسالتة على وضع ندى كال ما اعرف مجرحة ومضروبة هواية من وصلت يمها اغمى عليها هي مقبلت اكلك اصلا

امي متقبل تحجي وياية واهلها ما اتصلو بية صار تواصلي بس ويا هيثم
- شلونك هيثم
- هلا احمد انت شلونك
- بالي يم ندى
- ندى زينة لا يظل بالك يمها اهلها وخالةتروح وتشوفها
- وانت
- مريت كم مرة بس عندي شغل فاخابر عليهم
- يعني هسة هي زينة
- بصراحة ما اعرف شكلك هسة هي عدها كدمات واثار ضرب كلش قوية وعلى اثرها انشلت بس شلل نفسي مؤقت حسب مكال دكتورها
- شلل ! زين منو دكتورها
- دكتور شاب هيج اسمة كريم بس هو شاطر كلش وان شاء الله يكدر يعالجها كل التحتاجة راحة وهدوء
- زين ورانيا
- ثبتت عليها التهمة وبالميت حتاكللها 10 سنوات لان مو بس اعتداء على ندى هواية عدها قضايا من اعترفو عليها طلعت مهربة ومدمنة مخدرات
- ها يعني ديعترفون واحد ع اللاخ
- اي وكم يوم ونلزم كل اللي يهربون ويتعاطون
- اي خير ان شاء الله
- احمد
-نعم
- انت تتعاطى
- شنووو لا يمعود شون اتعاطى
- احمد كول الصدك حتى اكدر اساعدك
- باوع هيثم هسة مو وكت هالحجي واني ما عندي شي ترة بس اريد تدير بالك على ندى
- ليش ما انت تجي وتدير بالك عليها شعندك برة متكلي
- عندي شغل وما اكدر اجي يلة من رخصتك سلملنا

خوفني هيثم من كال ع التعاطي وادري بي ذكي ويلكفها وهو ضابط كفوء كلش والطير ما يفوت من يمة الا ويعرف بي منين جاي ووين رايح خفت ارجع وانلزم بس اذا اعترفو علية وهاي رانيا حقيرة وتسويها شون ساعتها لا اكدر ارجع ولا اروح ولا اجي

بعد مدة قصيرة

- الوو ها يمة شلونج
- اسود لوني بلون الصخام الصخمتة
- شكو يمة
- ندى رفعت عليك قضية طلاك او مو ندى لا بالاحرى اهلها
- يعني شنو طلاك
- يعني دفرت نعمتك بيدك والبنية متريدك بعد والجماعة خايفين على بنتهم من عدنا حتى كمت استحي اروحلهم
- يجوز جابريها ندى متعوفني
- ليش متعوفك شمسويلها حابها صاينها مداريها خايف الله بيها شمسويلها انت
- يمة الله يخليج بطلي عتب وملامة والله البية مكفيني
- ما بيك شي اناني وميهمك احد
- يوم شنو الحل ما اكدر بلياها اني شون اطلك
- والله يا يمة حتطلك وغصب عليك لان كل شي ضدك ولا شي لصالحك
- روحي واقنعيها تغير رأيها مدتقبل تجاوبني هي
- شروح البنية بيا حال تعالج بروحها المسكينة لا ايد ولا رجل طلكها وخليها ترتاح حرام عليك
- لاااا ما اطلك متروح مني
- مو صاير سبع وتعلي صوتك بالتلفون تعال وواجه وحل امورك

راحت امي بس اني جبان ومو رجال مثل مجانت تكول ندى عني وجنت اضربها لان تكول هيج واتوحش عليها

فعلا صار الجنت اخاف منة واتطلكنا بعد كل الادلة واخذنا فترة طويلة

كالي هيثم كامت تمشي على رجلها وتقريبا اختفى الشلل و سافرت وتزوجت الدكتور علمود يكون وياها بفترة العلاج وميكدرون بدون عقد لازم يكون اكو صلة بينهم سالتة وين كالي بتركيا

كدرت اوصللها ودائما تغير حساباتها بسببي وارقامها بس اكدر احصلها وطبعا هي متجاوبني بس مرة جاوبني هذا كريم ويهدد ومبين من كلامة هو يحبها ويحجي بخوف عليها ومو هامة شي غيرها
كمت انام واحلم بكوابيس واشوفهم متزوجين او مرتاحين اني اريدها واحبها وهي ملكي والي بس
هذا كل اللي مسيطر علية وعلى نفسيتي

تعبت بدونها هملت نفسي وشغلي صرت مثل المخبل حتى العالم تخاف من شكلي بس ما كدرت لليوم اوصل لعنوانها

اجاني العنوان على شكل مسج من ناس اني منطيهم فلوس حتى يجيبوه حجزت لتركيا و راقبتهم ل 3 ايام شفتة طالع وهي تودعة صايرة حلوة بس مبينة تعبانة و مع هذا عيونها تلمع وفرحانة احس ابتسامتها غير

طول وما اجة وقررت ادخل عليها للبيت من تظلم الدنيا حتة محد يشوفني وهمين هي ما تكشفني تنكرت بزي عامل نظافة ولثمت وجهي وحجيت تركي وياها من ورة الباب لان سالت منو وباوعت من العين السحرية و دخلت بعد ما فتحت الباب ...