ميلادي ومماتي

9

#ميلادي_ومماتي9
Shahd Alsalman
احب الطلعات والونسة واعشق الفلوس لان بلاها ما يمشي اي شي واصلا محد يحقق رغبات الانسان الا الفلوس
اهتم بجمالي ولبسي وكلش احب اكون مميزة
احمد جان من النوع الاحبة حلو و صاحب املاك وفلوس وعقارات يعني طاك كلش و محبس بيدي استغليتة لان اعرف يحبني ويحب شكلي وجسمي

عرفتة على جماعات هواية هو سادي ويحب العنف ولعبت على هالاساس راد يتزوجني بس اني ما اريد اتزوج لان هو عنيف ولان اريد ابقى هيج عندي هواية علاقات ومستفادة من الكل واذا تزوجتة معناها اخسر كل شي وبعدين امة تخنكني واني اضوج ابقى على شخص واحد هيج عايشة حرة

وخاف اتزوج ومنتوالم نوب اخسر جماعتي اظطريت واني اعرف امة متحبني احركة على امة واكلة امك سبتني لان عرفتها موافقة علية بعدين اتفقت ويا احمد نحرك كلبها باللي تريد تزوجها الة

احمد مثل خروف بالنسبة الي واني ما احب زوجي يكون هيج لان اني اسيطر ع الكل اريد احد هو يسيطر علية بس طبعا عندة فلوس سالفة الحب مو واردة عندي ابد واعتبرة غباء ..

من تزوج احمد وشفت ندى الكل يحبها ويحترمها بقيت اغار منها وعلاقتي باحمد ما انكطعت ابد كمت اجرجر احمد واني بنص بيتهم واخلي يتقربلي ولان متاكدة هي حاسة بشي بيوم عفتلها القراصة بالغرفة ويم فراشهم حتى تتاكد من احساسهة انه احمد ديخونها اللي خبلني اكثر هي مسوت شي وتصرفت بهدوء وبعقلها و بقت وياه ولا كأنو اكو شي لهذا اني اتزوجت
كلت مراح احصل منة اكثر وهالشخص الجايني غني هواية ويعيشني برفاهية اكثر من احمد ..
اتزوجت واتطلكت بسبب فقر زوجي لان فلس وخسر فلوس بشغلة واني ميوالمني هيج برغم ذل نفسة وتوسل بية بس مقبلت وتطلكت ..

عرفت بأحمد متعالج من الادمان وهيج حيصعب علية اكثر بس ماكو شي صعب اللي اريدة يصير وخلص وطبعا اني انتصر بجمالي ارجعة وبلساني ودموعي اجيبة مرة ثانية وهو راكع

حاول هواية يتملص مني ويبينلي هو مرتاح ويا ندى بس اني مو كدرت ورجعتة وانطيتة من الحبوب مرة لوخ ورجعتلة الادمان وكمت اسحب منة فلوس هواية بس صرت حامل ما ادري منة او من غيرة المهم عندي هسة شون اخلي يتزوجني كام ميقبل ع الزواج وبسبب ندى يكلي ما اريد اخسرها وفضلها علية وكالي نزلي الطفل

بعد فترة كمت احرمة مني ومن الحبة حتى يسوي الاريدة بدة يفقد عقلة بس يقاوم كوة
رحت للبيت جانت طالعة وانتظرتها ع الباب جانت كلش فرحانة من شافتني ضاجت

- هلو ندى
- هلو
- شبيج شو ضايجة
- لا بالعكس شلونج
- الحمدلله صارلي هواية انتظرج
- خير شصاير
- حنحجي ع الباب
- لا العفو تفضلي اعذريني هلا بيج
- شتحبين تشربين
- ولا شي بس مي
- صار ثواني واجيج
- شتعبتي نفسج مجاية لا اكل ولا اشرب
- خير رانيا قلقتيني
- ندى ساعديني محد يحلها غيرج
- رانيا شبيج تبجين شصاير اهدي هاج اشربي مي
- ندى اني حامل
- شنووووو
- حامل وما اعرف شسوي ميقبل يتزوجني
- رانيا انت شدتحجين
- ندى لا تسوين هيج بية هو كالي انت مقابلة الله يخليج استري علية والله اهلي يذبحوني
- وج هو منو ؟؟؟
- ندى يعني احمد مو كالج اتزوجها بس انت مقبلتي اعتبريني اختج هو غدرني وغصبني وصرت حامل
- رانيا انت جذابة
- ندى ابوس ايدج اهلي يذبحوني ولو بس شهرين واتطلك منة ميخالف قابلة الله يخليج
- كومي اطلعي برة بسرعة
- ندى حرام عليج
- برررررة

طلعت واني اضحك على منظرها اول مرة اشوفها مو هادية هيج بس بعيني احمد محد غيرها يقنعك بزواجك مني لازم احصل منك شي ..
طبعا احمد ميدري بكل اللي صار واكيد هي مراح تكلة اعرفها لندى اهم شي كرامتها وهسة انجرحت ومراح تحجي اكيد

مرات انقهر عليها لان هي طيبة وبنت اوادم ومرات احسدها لان هي اخذت احمد والمشكلة احمد مو ثابت اليشوف ضخامتة ولسانة يكول هو وبس لكن الواقع هو طفل وكلش ينجر ورة رغباتة وعواطفة ..