ميلادي ومماتي

4

#ميلادي_ومماتي4
Shahd Alsalman
ليلة عرسنا جنت تعبانة توتر وتعب وقلق ولمدة اسبوع منايمة زين تحضيرات وحنة وعرس حتى مينقص شي زفونا انجمعنا وحدنا بغرفتنا

ما اكدر اوصف الخوف والرعب العشتة فعلا جنت مرعوبة تقرب مني حتى يبوسني لان كال متكدرين تعترضين وهاي انجمعنا هسة حضني احس دم ما بقى بية باسني لاول مرة محسيت الا غبت عن وعيي وهو ديصحي بية من صحيت كتلة ما اكدر تعبانة عفية
هو افتهم وطلع جكارتة وراح برة اني نمت ببدلتي محسيت على شي الا لثاني يوم الصبح اهلنا والصباحية والكيمر يعني التقاليد المعروفة ...

بهاليوم هو اتقرب مني وصرت مرتة استغربت عاملني بحنية ومخلاني اضوج او اتاذى بالعكس كلت خل تكون هاي بدايتي وياه وانطي فرصة الة ولنفسي وفعلا شهرين واحنا عايشسن حياة حلوة ويعني اكدر اكول اتأقلمت ع الوضع بس اكو شي غريب بي احسة يضغط على نفسة بس ما افهم ليش يمكن حتى ما اكون متضايقة
واليمكن الثانية بعدين عرفتها ..

كعدنا وحدنا بالبيت بس امة دائما يمنا مرة جبيرة واني وحدي هو طول الوكت برة ومن قبل الزواج كتلة ماكو داعي نعيش وحدنا كال لا احسن وما قبل انه نعيش ويا امة
برغم كلش حبابة وتخاف الله وتحبني مثل بنتها هواية جان يتعارك وياها ومجنت اقبل واخلي يصالحها مرات يضوج مني مرات لا يسمع مني
خالة جانت عدها اخت مريضة بالسرطان فتزورها ومرات تبات يمها واني اروح وياها اتطمن عليها اشوف شمحتاجة مرات انظفلها لان هي عدها ولدين واحد مستشهد والثاني ضابط اسمة هيثم الكل تحلف بي على رجولتة

ومرات تجي مرت خالهم اللي زوجها ينتمي لجماعات مسلحة مو رسمية بس حماية ومياذون الناس شبه منتسبين لوزارة الداخلية عدهم 3 بنات رانيا ورسل و رشا وحدة احلى من اللوخ بس شوية خفيفات و امهات لسان اني مجنت ارتاح لوجودهم وبالاخص رسل ورانيا بس شعلية بيهم امهم وابوهم خوش ناس واني لخاطر خالة احبهم مرات يباتون يمنا

مرات احنا نلتم يم بيت خالة ام احمد ونبات وفد يوم عزمتنا جان رمضان توة مبلش كالت تفطرون وتباتون 3 ايام ثاري كل سنة هيج تسوي على روح ابو احمد وتوزع اكل للفقراء ..
تسحرنا ونمنا بس حسيت بعطش كمت باوعت احمد مو يمي كلت يجوز بالحمام نزلت على كيفي خاف احد يكعد بالغرف الجوة
وصلت للمطبخ جان الباب موارب يعني اشوف شوي منة دا افوت وسمعت صوت احمد ويمة احد والمطبخ ظلمة بس ضوة الطرمة الخفيف عاكس شوية
- حبيبي يلة والله مشتاقلج حسي بية
- ليش لازم متنطيك اللي تريدة هالباردة
- اني اصلا ما اتقربلها مو احنا هيج متفقين وبعدين محد يريحني غيرج
- لا انت كذاب احنا اتفقنا تزوجها حتى ما تزعل امك هي مدري ليش تكرهني وتدري انت تحبني
- معليج منها اخذج اخذج
- ليش انت مماخذني ههههههه
- لك اروح فدوة للضحكة مشتاق تعذبيني

هذي رانيا واحمد ما اعرف شصار بية ريتني ميتة ولا سامعة ولا شايفة هي تتمنع عنة وتتدلع وهو يتوسل تواسيل وجوة رجليها مثل العبد ويكول عني ممتقرب مني يا الله خليني اكعد اذا هذا حلم ساعدني يا رب
جسمي يرجف وبعد ما بية اوكف اشوفة يبوسها بلهفة وهي هم كانو هم المتزوجين مو اني و هو متحملت اكثر صعدت للغرفة مكدرت احجي شي
رحت للفراش مصدومة وممستوعبة الصار
ورة ساعة هيج هو اجة سويت نفسي نايمة دايرة ظهري الة حضني من ورة ويشم بية كشت نفسي كلش وتمنيت اكوم اموتة واخلص علي بس سكتت ونمت ..