ميلادي ومماتي

6

#ميلادي_ومماتي6
Shahd Alsalman
كل الفترة اللي جنا نحجي بيها ونتراسل مجابت سيرة احمد ولا كأنو موجود ولا حتى تكول هو يمي من شفتها طابت خابرتها

- هلو ندوشة
- هلو كريم شونك
- اني زين انت شون صرتي
- هههههه ترة قبل شوية سالتني
الحمدلله كلش زينة صرت
- الحمدلله
- ندى ممكن اسال سؤال
- كل شي الك ممكن
- ههههه بعدج تتذكرين هالجملة فدوة لكلبج
وين احمد ؟
- مو موجود
- يعني وين ؟
- مسافر
- وين ؟
- اوروبا
- يعني وين بيا بلد ؟
- ما اعرف  كافي تسال عنة مسافر وخلص
- شون متعرفين عنة شي فهميني مو زوجج هو
- زوجي او مو زوجي ما الك علاقة انت لا تتدخل بحياتي
- خلص اهدي مو قصدي اضوجج والله
- اسفة مو قصدي اصيح مع السلامة
- لحظة الوو الوو

عزمتها بعد كم يوم على نفس الحديقة لازم اعرف شبيها بعد ما شلعت كلبي وافقت والحمدلله
تلاكينا هناك وهي جانت ضايجة وطبعا هو هذا المود الرسمي صاير الها مو مثل قبل ولا هي ندى الاعرفها
بس اعرف من تكون متضايقة او مهمومة ما تحجي وان حجت مختصر مفيد وخلص كتلها بس اجيبلج شعر بنات واجي اكعدي ع المصطبة

بينما رحت ورجعت لكيتها صافنة على رجال ومرتة وابنهم بالعربانة وتباوعلهم بكسرة خاطر مثل اللي تمناه وما حصلة كعدت يمها محست بوجودي ومحبيت اكطع صفنتها
- جان لازم يكون بكدة
- تقصدين الجاهل
- بس راح يمكن هو الارتاح
- انت تحبين الجهال اعرف بيج
- كل شي احبة يروح مني
- وين راح ابنج
- مات
- شلون مات
- مقبل يجي هو واخو يريدون هم يعاقبوني ﻹن احبهم

ولاول مرة من اول معرفت ندى اشوف بجيها ودمعها وشهكتها تشك الكلب نصين العالم يباوعون علينا لان علا صوتها بالبجي
واعرف بيها متحب احد يشوفها تبجي ومدام بجت يعني وصلت مرحلة من الكبت والتعب وباعتباري طبيب فأعرف هي عدها كأبة مفرطة و مرت بصدمات واثر جرحها هو اثر محاولة انتحار وكرجال اكدر افهم انه هو ماذيها
غطيتها وخفيت وجهها بقت تبجي لحد منامت شلتها والناس عبالهم بيها شي كتلهم حامل وتعبت وديتها للسيارة بالطريق صحت

- هاي شنو نمت اني
- اي من دنرجع غفيتي
- محسيت بس خوش غفوة صار شكد نايمة
- مصار دقايق
- ها تمام ؛ حلوة جانت الطلعة مو
- كلش حيل تونست وانت ؟
- ايي واني هم

ندى من اول سؤال الها عرفت بيها تعاني من مرض الوهم المؤقت واللي تعيش بي الشخصية الدافنتها او الكبت اللي ما تكدر تفضحة وبعد ما تصحى او تخلص النوبة تنسى كل شي وترجع لواقعها

اذيتها اني السبب دمرتها وانطيتها لشخص ما يستاهلها والله تمنيت انزل لايدها وابجي واتوسلها تسامحني بس هسة فات الاوان ولازم افكر شون اطلعها من هالحالة يا رب العون منك ..

كمت استغل الليل حتى اخليها تطلع كل شي بداخلها لان الليل يهيج المشاعر وهي جانت تداوم بشركة ونظام شركتهم 3 دوام و3 عطلة فبالايام اللي اعرف دوامها اتعبها واسهرها حتى تنهار من قلة النوم وتحجيلي كل شي مرات صوت ومرات كتابة على حسب اليريحها هي ما ضغطت عليها بشي كل اليهمني ترجع مثل قبل ..

- نداوي ليش راح ؟
- منوة
- احمد
- احسن الي والة
- شنو السبب
- هو اللي راح جبان
- يعني مهزوم من شي
- مهزوم من جرايمة
- هو قاتل احد
- اي اني اولهم
- اذاج
- حيل كريم حيل اذاني
بجت وخليتها ترتاح وكملت وياها
- شجان يسوي وياج
- كل شي محلو سواه
- زين ابنج وينة ليش مات
- هو كتلة دمرني
- تكدرين تحجيلي الج واهس
- كريم اريدة يموت
- يستاهل بس كليلي شون
- القصة طويلة واني تعبانة
- شتحسين
- اريد انام هواية
- نامي وباجر نكمل
- تصبح على خير
- وانت بالف خير

فات كم يوم على اخر حجاية منها لحد هسة ما افتهمت شنو اللي مرت بي والواضح انه ما مبلغة احد بي حتى اهلها
مثل اللي يريد ينتقم من نفسة ولو ادري كبريائها ما يسمحلها تحجي عن هيج امور حتى تبقى بنظر الكل قوية ومتتقبل تسمع من احد كلمة خطية