ميلادي ومماتي

13

#ميلادي_ومماتي13
Shahd Alsalman
اتصلت على اهلها حتى افهم شبيها لان هي جانت تحجي وياية متقطع ومو مفهوم
بعد ما حجيت ويا اهلها وفهموني الصاير للصبح ما نمت تمنيت اني اكون مكانها لان استاهل كلة بسببي وصوجي
ثاني يوم الصبح رحتلهم خلوني افوتلها شفتها نايمة واثار الضرب بوجهها وايديها اثر الشد والربط يا ريتني ميت ولا شفتها هيج لزمت ايدها وبجيت حيل حست علية وكعدت
- كريم
- ندى حبيبتي
- شبيك
- شدتحسين شنو يوجعج
- ما احس بشي
- شون متحسين حركي ايديج
- متتحرك
حاولت اكرص بيها بس متحس بشي
حركت رجليها وماكو اي رد فعل
- كريم اريد انام
- نامي ارتاحي
اختنكت بالبجي واعرف الصار بيها شلل من حالة نفسية مؤقت يعني
طلعت لاهلها وقررت احجيلهم كل شي اتخبلو وامها بقت تبجي وتلطم لان محد حاس على شي كل هالفترة
ابوها من العصبية يريد يخلص على احمد
كتلهم الحل الوحيد تتطلك

كم يوم ورفعنا قضية طلاك على احمد وجان رافض وطبعا فترة طولت شهور وهي تعافت بقيت وياها برغم كل محاولات احمد القاضي حكملها بالطلاك وانتهى زواجهم

هسة صار دور انه تتعالج نفسيا اقترحت على اهلها نسافر بس طبعا ما اكدر اكون وياها لان اني غريب عنها فاتفقت ويا اهلها نعقد ونسافر  بس فترة العلاج واني جانت امنيتي يقبلون والحمدلله بعد الاقناع والمحاولة قبلت ندى وحلفتلها مراح يصير شي بس علمود العلاج والسفر مو اكثر من هيج ..

سافرنا تركيا وصديقي هناك اجرلنا شقة كم شهر ورتبت كل شي
ندى جانت كل الوكت تسرح وصافنة ومو وياية اصلا بس شوية شوية وويا الجو والطبيعة كامت تتغير صحيح مرات تنهار بس تدريجيا ترتاح
جنت بالمطبخ دا اسويلها عصير

سمعت صوتها تبجي وتصرخ عفت كل شي وركضتلها مفتهمت شبيها حضنتها لاول مرة سكتت وهدت ونامت شلتها للفراش
شفت تلفونها بالكاع من شلتة اجتي رسالة
" ندى لو رحتي لابعد مكان بالكون راح الكاج ما اعوفج "
وقبلها رسايل
" جاوبيني عبالج بسكوتج راح تخلصين مني "
" انت تزوجتي صحيح ؟ "
" كل لحظة افكر بيج مشتاقلج بس رحتي خنتيني واتطلكتي مني علمودة مراح اخليج تتهنين "
" انت مالتي والي وبس محد يملكج غيري "
" مشتاق انام وياج تتذكرين شكد جنت اتونس على صوتج وصياحج "

اتصلت بي
- الوو واخيرا شلتي
- لك يا ناقص يا عديم الشرف شلون تتحرش بزوجتي
- هههعهههههه يا زوجتك هي كلها الي وحدي
- انجب والله اذا اشتكي عليك احبسك كل عمرك تخيس بالسجن واذا اندكيت بيها محد دافنك غيري
- راح ارجعها الي هي تحبني الي وبس يجوز انت غصبتها على شي
- انت تعرف شسويت بيها والله اذا دكيت او دزيت شي الها حظك اطيحة يا ناقص الشرف

هي شغلة من اثنين لو شارب و يحجي وياية لو هو مريض عقلي شون جانت متحملتة ندى مدا افتهم

ثاني يوم كعدت وجنت نايم بالكاع حسيت شي يمي يختل بحضني حضنتني وهي تبجي بدون صوت خليتها على راحتها تفرغ كل شي وما نطقت ولا تحركت مثلت النوم لحد محسيتها غفت شلتها ورجعتها لفراشها حتى من تكعد لا تحس باحراج او شي
بس الصراحة تمنيتها تبقى بين ايدية شكد حسيت براحة وحنية والاحلى انه هي دتلجأ لحضني من تحس بخوف
رحت سويت ريوك ورتبت سفرة حلوة وجبت ورد يفتح نفسيتها اعرفها تحب الورد وكعدتها
- ندوشة
ننو كسولة
يلة كومي مجعتي
- خليني انام
- لج كافي نوم
دب مال نوم يلة كومي ورانة طلعة
- ما اريد اطلع
- يلللة
- لا لا كريم اغااار ههههههه كافي ههههههه
- يلة لعد كومي متت جوع
 
اكلنا وهي صافنة وتاكل على كيفها
- ندى بشنو تفكرين
- كريم ما ادري حلمانة او صدك
- شنو شفتي
- احمد راسلني حسيت شي يخنكني
- هذا صدك
- يعني محلمانة
- لا وحجيت وياه وهددتة وميتعرضلج بعد لا تخافين اني يمج
- وشي ثاني
- شنو
- جنت بحضنك
- لا مصار هذا حلم ههههه
- بس متاكدة شم ايديا بيهم عطرك
- لانو هسة كعدتج وانت وخرتني من دغدغتج
- اممم اوكي
- اليوم حنطلع طلعة غير شكل
- مالي واهس
- هههههه هذا حجي من تطلعين وتشوفين المكان حتغيرين رأيج
- امممم
- بلا امممم يلة كومي بدلي
- خلي الم السفرة
- اني المها انت اليوم ملكة متسوين شي
- هههههه اوكي

بدلت وطلعت من الغرفة يعني اكدر اكول حورية مهزومة من الجنة نازكة وكل شي بيها حلو لابسة بنطرون وبوت عالي لحد الركبة فلات وبلوزة مخصرة على جسمها وشايلة القمصلة وشعرها رافعتة

- شبيك صافن
- ها لا ما بية بس هيج اتذكرت شغلة
- زين شوكت تبدل
- قابل اني مثلكم عشر ساعات يالا ابدل دقايق واطلع
- هههههه دنشوف
بدلت مثل الوانها اللابستها هي وطلعت
- ها شو انت الصافنة هسة
- هههههههه لا بس ليش لابس نفس الواني
- باعي ندو اليوم مختلف اريد نعيش شي سوة
- شتقصد يعني
- يعني خل نتخيل اليوم احنا كبل عشاق وطالعين ننسى كل شي ومنفكر الا باللحظة النعيشها
- بس
- بدون بس اعتبري هالشي طلب مني متسوي ؟
- ماشي
- لحظة

رحت جبت وردة وحيطتها على اذنها بشعرها وطلعنا
طول الطريق صرعتني وين رايحين وين موديني واني اداهرها
وصلنا لمنطقة كلها ثلج جانت قبل تتمنى شغلتين
البحر والثلج بما انه الجو بارد مو مال بحر فشفت انه نروح ثلج ونلعب وناكل برة يعني نكضي يوم مثل ما هي تحب وترتاح

مصدكت عيونها وكامت تكمز مثل الجهال ظلينا نلعب ونسوي كرات ثلج وواحد يشمر ع الثاني شمرت عليها وحدة ووكعت بعد مكامت
ركضتلها واصحي بيها خفت لا اذيتها خليت اذني على صدرها حتى اسمع نبضاتها حسيت بهزة
باوعتلها خربانة ضحك

- ولج ليش هيج كلبي راد يوكف من الخوف
- هيج تخاف علية
- اذا صارلج شي وين اروح اني

حسيت اريد اتقرب عليها وهي تباوع بعيني بستها وهي مغمضة مشفتها خايفة او متضايقة بالعكس جانت تبادلني هالشعور وتبوسني

وخرت اجر نفس اثنينا انكطعت انفاسنا
- ندى
- هممم
- اني احبج ومن زمان كلش
- اني احبك اكثر
- وعد علية ما اخليج بيوم و لا اضايقج واحميج لاخر نفس بية
- مراح تتركني مثل قبل
- ابد هاي غلطة وما تتكرر عشت بلياج بجحيم وكل يوم يمر احس ما بي معنى بدونج
- مراح تندم حبيت وحدة مثلي
- ليش شنو انت بيج جنتي تعبانة نفسيا وهسة طبتي وانتهى كل شي
ماكو احد يكدر يمسج واني موجود بس ساعدي نفسج حتى تطيبين اكثر
- اذا تظل وياية راح اكون بخير دائما
- اصير ظلج اذا هالشي يخليج بخير

رجعت بستها اكثر واكثر وهي هم مرتاحة وحاضنتني بعدين كالت غمض عيونك من غمضتها حطت كرة ثلج بوجهي وانهزمت وكامت وهي تضحك وظلينا واحد يلحك الثاني
تغدينا ورجعنا للبيت حتى نام صارت دنيا ليل متنا تعب بس تونسنا حيل وكلبي ارتاح لان هي هيج ولان كتلها كل مشاعري

وبرغم هالشي ما ضغطت عليها وبقيت نايم بالكاع وهي ع الفراش ما تقربت منها اريد هي من ذاتها توثق باحساسها وباللي تريدة وتجي وتطلب وترجع مثل اول واحسن