رواية سنين الحرمان

الحلقه الثانيه عشر

كمل  محمد لإجراءات وجو اهل مها ومها استقبلتهم والضحكه منوره وجها اتحاول اتكابر وماتبينش لي حد اللي في قلبها وهيا طالعه مش منتبه على اللي قاعد يشوف فيها  وقريب يأكلها بعيونه كان يلقى يأخذها ويهرب بيها مكان بعيد ركبت مها السياره وشافت لقت د.محمد ايشوف فيها ابتسملها وهيا ابتسمتلها
وعدو لي حوشهم
وصلت الحوش ومها كانت متشوقه اتشوف حوشهم امرايفه عليه بكل معنى الكلمه نزلت من السياره وقفت قدام الحوش وقعدت تشوف فيه وتذكر  في كل ذكرياته من هيا وصغيره  ودمعه في عينها لما ذكرت عمر وخشت قعدت تبرم  في الحوش وأخيرا خشت دارها  وكيف ماخلتها لقتها قربت من السرير لقت  مذكراتها امتاع الطب قعدت تبكي هيا كان مازال 3 سنين واتخرج بكت  على سنين اللي حرمت منها القرايا وعمر
مها : ليش انا موجوده في الحياه ليش ياريتني انموت وونتريح  ليش نضت  من الغيبوبه شن بندير في حياه توا اصلا شن عندي
ونزلت عند هلها وتغذو وهذرزت معهم وركبت لي دارها قعدت تنظف  فيها وخذت دبشها وغسلته كله
ونضمت مذكراتها اذن العشاء نزلت عاونت اختها  ووجدان على العشاء ومعهم بيسان  واريج  وجو  ايهبل وتهذريز  وضحك العب
إم مها في الصاله اتهذرز

حنان: بكرا نبي اندير عشاء كبير  لي مها
ناصر: اكيدا  ان شاء الله بكرا نجيب اللي تبوه في الصبح
حنان: خلاص ان شاء الله
وتعشو وغسلو  الماعين  وركبت  مها لي  دارها ادوشت ولبست توته  شرت لي ركبه  اسود فيه خطين وردي وكت وردي  وطلعت لابتوب  وخذت مذكراتها كسدت  عليهن عشان تراجعن لان هيا توا عندها هدف واحد بس اللي هوا القرايا
اول مافتحت لقت  صورة عمر خليفيه الشاشه امتاع لاب  خنقتها العبره ودموع قعدن ينزلن هيا من الصبح اتحاول ماتضعغش لكن غصبن عن إرادتها مازالت مش متخيله ان عمر لي غيرها قعمزت على السرير ومسحت  دموعها
مها: خلاص مها خليك قويه لازم ماتضعفيش انتي قويه تو انطلعك ياعمر  من قلبي وعقلي خلاص اللي بينا انتهى خلاص ومسكت راسها بيديها خلاص  اطلع من راسي مجرد منتخيل  انك راقد مع غير انموت في الف موته ياريتك اتحس بس لاسف انت قاعد مع حبيبة قلبك  كيف قدرت تنسني كيف بس وقعدت تبكي وقعدت لعند الفجر صلت ورقدت

صباحا
فتحت عيوني  قعدت انشوف في السقف نضت قعمزت انشوف في داري  خطرت عليا حاجه كيف نسيتها مش عارف خشيت  دوشت ولبست توته ولفيت شعري وفتحت الباب دار ومجرد مافتحت دار تفوح عليا ريحة البخور بصراحه لين نفسيه تريح  نزلت لوطه لقيت ماما وخواتي واريج اللي تنظف  واللي تلمع  واللي تغلف 
مها نشوف  فيهم وانا مستغربه  والفرحه في وجهم  وحتى انا فرحانه زيهم : صباح الخير 😘
كلهم  يشوفو في عيونها اللي منتفخات واللي واضح انه كانت تبكي طول الليل  بس ماحابوش ايبينو لها: صباح النور وصبت ماما  حبت عليا وخواتي اضبطني وجتني اريج قرصتني من شدوقي
اريج : امرايفه عليك ياميمي
مها انكلم  فيها بنص عين : وانا امرايفه  عليك ومتشوقه نعرف كيف خذيتي خويا 😉
اريج قعدت تضحك: قصدك كيف هوا خذاني
مها : المهم كيف وصلتو لي بعضكم 😍
اريج : قصه طويله تو انهدرزو في الليل 😛
ام حنان جابت  الفطور لي مها : تعالي بنيتي تعالي كولي وانتي رايحه بتموتي
مها قعمزت  بحذاها : قصدك هذا كله نبي ناكله  واجد ياماما  وبدت تأكل
حنان: مازال والله توا نحشيك حشي وسلم بنيتي بيش تبرمي على روحك الليوم امدايرين عشاء كلهم جايين
مها قلبي قعد ينبض بسرعه : مافيش داعي العشاء خلاص تمام انا كويسه
حنان : لالا ضروري منه على سلامتك ياحبيبه وقعدت تبضبط في مها
مها حبت  راس  امها  :  خلاص اللي يريحك وصبت  انعاونكم في الحاجه
حنان: لالا عدي  انتي وتي روحك خالتك مسقده في طريق هيا وبناتها قريب توصل ونحن خلاص كل شي تقريبا كلمنا
مها بتعدي بعدين وذكرت  اللي كانت نازله على عشانه وقفت وتشوف امها
مها: ماما وين تليفوني 😕
حنان : والله ياماما دارك  ماحد خشلها وين ماحطيتيه تلقيه
مها: بس ياماما هوا كان عندي قبل ماندير الحادث قصدي لقيتوه ولا راح
حنان : مش عارف تو  تسال  عليه باتك بعد ايجي
مها: اوكي تمام وقعدت تشوف في اريج وتشير على وجها  وشيرت لي خواتها على يديها وكرعيها وقعد ت تتبسم وادير  في حركات ايضحكن وهنا  فهمنها
اريج ميته من الضحك: خلاص تمام اركبي تو انجيك
ركبت مها هيا واريج
اريج قعمزت على السرير ومها قعمزت مقابلتها وبدت اريج بسلك في وجه مها  يعني (فتله )ولقطت حواجبها وغسلت  وجها ودارت سنفره لي وجها
مها: اريج هيا احكيلي كيف خذاك امجد
اريج  : القصه بدت من يوم الحادث لما كنت انجي انشوف فيك
مها : امممم كملي
اريج: انتي عارفه انا معجبه بي خوكي  بس ماكنش امبينه كنت كل يوم انجي عشان انشوفك وبصراحه ديما ايلقي فيا امجد وحسيته تعبان ومرهق ومتبهدل من كثر الخوف عليك تقريبا بعد6 شهور من الحادث انتي كنتي اتعالجي برا كنت انتواصل مع وجدان عشان انطمن عليك  في يوم كلمت وجدان بعد ساعه رن عليا رقم غريب مارديتش  رن 3 مرات بعدين دز مسج  وقالي انا خو مها امجد
قلبي قعد ينبض بسرعه وانا انشوف  في رقمه ايرن على شاشة تليفوني في لأول ترددت بس بعدين رديت

مها: اها وشن قالك

اريج: رديت عليه ( تذكر في المحادته)
امجد: السلام عليكم
اريج لسانها اكلو القط:....
امجد:  الوووو اريج معاي ولا انا غالط في الرقم
اريج  درت روحي عاديه : وعليكم السلام عفوا من معاي
امجد :انا امجد خو مها
اريج : مها بخير صح طمني 😢
امجد: وسعي بالك  عليش تبكي  مها  بخير  ماتخافيش
اريج علامة استفهام فوق  راسها: باهي عليش متصل😯
امجد:  مش عارف  ليش متصل  بس االي نعرفه انا تعبان محتاج لي حد يحس بتعبي  محتاج لي حد نحكيله وايكون معايا انا تعبان ياريج ومافيش حد غيرك يقدر ينسيني التعب  مها حالته خطيره وانا خايف عليها
اريج قعدت نسمع فيه وقلبي يدق بسرعه مش متخيله انا  امجد يكون حزين هكي على اخته  ارتبكت ماعرفتش  شن نقول بصراحه
امجد:  اريج انا نبيك تكوني حلالي😳
اريج  من صدمه سكرت  عليه
مها: ههههههههه واوا خطير خويا 😂😂
اريج : خلاص بعدين قعدت انشوف فيه  كل يوم في جامعه  وبعدين كل مره ايكلمني وكثرت مواضيعنا وجا خطبني رسمي وكملت سنتين وبعدين طلع الفرح وآخر سنه كملتها عنده يعني تخرجت عند خوك
مها دمعه في عينها: كان خاطرني نحضركم يلا مافيش نصيب
اريج حتى هيا دمعت :خلاص حبيبتي ان شاءالله تو تحضري جيبتي
مها: باهي تشتغلني
اريج: فترة 6شهور بعدين وقفت
مها : ليش وقفتي 😕
اريج : اصلا كنت حامل ومن كثر شغل طيحت وبعدين  حملت مره اخرى اللي في بطني 6 شهور اطريت نوقف لين نجيب بعدين انرد انكمل شغلي
مها: اها 😔
خشت بيسان وجدان ومعهن الحلوى (جسم ) ويشيرلها بمعني وتي روحك تو انوروك
مها فنصت عيونها 👀
ولبست شرت قصير وكت  وبدن فيها حلوى جسمها  كلها ومها تعيط بهدلنها
خشت مها ادوشت وطلعت تسمع في هرجه لوطه لبست توته وجففت شعرها ونزلت لوطه لقت خالتهاوبناتها  سلمت وركبن هيا والبنات  وقعدن ايهذرزن بعدين  اذن العصر  نزلن  ايعاونن فيهن  في العشاء  ونظمن كل حاجه قعدت ابتسام توتي في مها وقت مغرب دنيا ملتمه وعدن البنات ايوتن في روحهن
وابتسام كملت مها

عند أهل عمر
ام عمر :عمر انا كملت بيتشلنا ومرتك تمشي
عمر : باهي شن صار في موضوعي

يتبع:............😉😉