❤ايرين❤

الجزء السادس عشر

انا ماقاسيه بس دموعي رافضه تنزل من جواي منكسره مهزومه يادوب حسيت بي اني يتيمه.. وانا بودع ماما وتيتا حسيت بي وجع كان نفسي اصرخ بس ماقدرت حسدت ننو وهي بتبكي على الاقل قدرت تعبر بس انا بعاين ليهم بس ماما بتبكي تبوس ننو وتوصيها وتيتا بتهدي ماما التفت حواليني عيني وقعت في عين جاسم كان بيتأمل فيني : انتي كويسه
رفعت اكتافي بمعنى ماعارفه رجعت عاينت لي ماما لقيتها جايه علي ضمتني عليها وانا واقفه زي الصنم ماقدرت اتحرك بعدت مني وهي زعلانه مفتكره اني غضبانه من قرارها بس انا موووووجوعه ياعالم
تيتا جات وحضنتني بكت وباستني وصتني وصايا كتيره ..ومشو على البوابه
كان نفسي اقول لي ماما اقيفي بس ماقدرت لا رجلي ولا لساني طاوعوني ننو مسكتني وبتبكي ....
جاسم : ريري ..
قبلت عليهو ..قال لي : يلا نمشي
هزيت راسي ومشينا على العربيه وركبنا طول الطريق وننو بتتونس معاهو وانا خاته راسي علي الشباك وساكته
- ريري ... وصلنا ماحتنزلي
دي ننو بتهزني من كتفي نزلت ودخلت البيت لقيت في الصاله عمو محمد وعمتو مها
محمد : البيت يادوب حينور
مها عوجت خشمها : اي صاح
سلمت عليهم وقعدت بعيد جو جاسم وننو وقعدو يتونسو معاهم
ريري : عمو عن اذنك حطلع ارتاح شويه ؟
محمد : طيب يابتي ...جاسم وديها جناحهم
قام طلع وانا لحقتو فتح باب الجناح ووقف : ايرين
رفعت راسي : نعم
جاسم : انتي كويسه
غصبت روحي على الضحك : اي عادي
جاسم : ماتضحكي وانتي موجوعه
طوالي ابتسامتي راحت ودموعي نزلت قعدت في الارض : يادوب بقيت يتيمه
جاسم قعد جنبي : ابكي وطلعي الجواكي ماتكتمي
بقيت ابكي واشهق بعد زمن هديت بس بشهق كل شويه مسحت دموعي وعاينت ليهو لقيتو متكي على الحيطه وسرحان : اول مره ابكي قدام زول غير بابا حتى ماما مابتشوف دموعي
جاسم : احم يعني انا شفت دموعك المبجله
ريري ☺: بطل مسخره بس شكرآ ارتحت شويه
جاسم : العفو تعالي في اي وقت
ريري : حاضر يامناديل فاين
جاسم : 😃 يلا امشي ارتاحي
الليله تمينا اسبوع من جينا بيت عمو ...عمتو مها متزوجه وبي بيتها بس من جينا بقت كل يوم تجي وكل ماتلقى فرصه ترمي كلام زي السم وتمشي.
مرة ساقوني سمر وندي نتفرج على السطوح وهي جات بي ورانا انا كنت بتأمل ف الالعاب جات وقالت لي : اقفلي خشمك ماتتخلعي لينا
ريري : نعم
مها : الماشاف البحر بتخلعو الترعه 😕
سمر : عمتو رأيك شنو تسبحي معانا
مها : شايفاني جنيت
سمر : عشان خاطري ياعمتو
مها وهي ماشه على الباب : لا مابسبح مع الشفع
سمر وندى بعد عمتهم طلعت : 😂😂
ريري : في شنو ؟
سمر : عمتو مابتعرف تسبح ومابتحب تبين انها مابتعرف حاجه ...بعيد عنك خبيره في كل شي 😂
ندى : فكه منها... سمورة نسيبتك نجاااااضه
سمر : توووفي .... بري جنيت ولا جنيت
ريري : نسيبتك ؟
ندى : اصلو خالد ولد عمتو بيحب الهانم
ريري : جد؟
سمر : قال حب قال 😕
ريري : ليه مالك ؟
سمر : شوفي هو شخصيآ كده مابيتبلع لي نهائي ..بقيف هنا ..اشرت على حلقها
ريري : ليه شخصيتو ولا اخلاقو ؟ فيها كلام ؟
ندي : لا والله راجل بجد واخلاق ووسيم ومهذب
سمر : عرسيهو انتي.... اوووووه نسيت انك مخطوبه😉
ريري : دقيقه...دقيقه... مين مخطوبه ؟
سمر : ندى طبعآ
ريري : ومين صاحب النصيب ؟
ندي بي خجل : عمر
ريري : اها ...سكتت وسرحت
ندى : ريري انتي زعلتي ؟
ريري : لا والله مازعلت عادي ...ربنا يتمم ليكم على خير... وانتي ياسمر ماتكوني مخطوبه لي اخوي التاني ؟
سمر : يع ...يع .... عمار الدون جوان ..جنيت ...ده مجكس كل بنات الخرطوم انا بقى ماعندي صحبات بي سببو..حتى صحباتي ماسلمو منو😔
ريري :😂😂😂 ...وطيب في لسه جاسم
سمر : لا والله ده لو قال سمر بس انا بجيني ارتجاج دماغي لما يعصب مابشوف قدامو ... الوحيد الجنتل مان بجد هو عمر وده حجزتو الحيزبونه دي ..وضربت ندى
ندى : اااي يدك تقيله
سمر : ياااااااي من متين الدلع عشان جبنا سيره سي سيد ..اتلهي بس
ندى : اووف منك
ريري : خلاص خلاص
سمر : ريري اخبار الشغل شنو ؟
ريري : انتي من زمنو خليتو من يوم جيت هنا
ندى : ليه بس ؟
ريري : مابحب شغل المكاتب واشتغلت عشان سبب وحاليآ مامحتاجه ارجع وكلمت جاسم وزمانو جاب سكرتيره جديده
القعده عند عمو كانت حلوه بالاخص مع ندى وسمر وننو مبسوطه مع سحر والتؤام ... ماما وتيتا كل يوم بيتصلو بينا مبسوطين في الصعيد خصوصآ تيتا لانها رجعت بلدا .....
في يوم ننو جاتني تبكي في الغرفه : ريري اهييئيييئ
ريري : مالك ياننو ؟
ننو : عمتو ضربتني عشان كسرت كبايه ...شوفي وشي
بجد  علامة اصابع كانت على خد ننو : تعالي معاي
نزلنا لقينا عمتو قاعده تتونس وتضحك : انتي كيف تمدي يدك على اختي
مها : بضربها عشان تتربي
ريري : مربيه غصبآ عنك ..وحاليآ الغلط العملتو شنو عشان تضربيها ؟
مها :قلة ادبها علي
ريري رفعت اصبعها ف وش مها : شوفي هنا اختي خط احمر اياكي تقربي منها ماعليك بي تربيتها ربي اولادك بس
مها عوجت خشمها : يعني امك ********* بناتها غير قلة الادب حيعرفو شنو؟

❤لا تلهيكم عن الصلاة❤